by Midhun HP News | Nov 2, 2026 | Latest News, കേരളം
ഗുരുവായൂര്‍: ഗുരുവായൂര്‍ ദേവസ്വത്തിന്റെ മേല്‍പ്പത്തൂര്‍ ഓഡിറ്റോറിയത്തിനും ഗുരുവായൂര്‍ ഓഡിറ്റോറിയത്തിനും വാടക ഇരട്ടിയാക്കി. ഒരുമണിക്കൂറിന് 11,800 രൂപയാണ് പുതിയ വാടകനിരക്ക്. കഴിഞ്ഞ ദിവസത്തെ ദേവസ്വം ഭരണസമിതിയാണ് തീരുമാനമെടുത്തത്.
ജിഎസ്ടി ഉള്‍പ്പടെ 5900 രൂപയായിരുന്നു ഇതുവരെ. ജനുവരി ഒന്നിന് പുതിയ നിരക്ക് പ്രാബല്യത്തില്‍ വരും. ഒരുമണിക്കൂര്‍ ഒരുസ്ലോട്ടായി കണക്കാക്കിയാണ് ഇവിടെ വാടക നിശ്ചയിക്കുന്നത്. പുതിയ നിരക്കനുസരിച്ച് ഒരു ദിവസം മുഴുവനായുള്ള സ്ലോട്ടിന് 1.60 ലക്ഷം രൂപയാകും. ഓഡിറ്റോറിയങ്ങള്‍ 60 ദിവസം മുന്‍പ് ബുക്ക് ചെയ്യണമെന്നുള്ളതിനാല്‍ ജനുവരിയിലേത് ഇപ്പോഴെ ചെയ്യണം. ഒരു സ്ലോട്ട് ലഭിക്കാന്‍ നേരിട്ട് എത്തി അപേക്ഷ നല്‍കണം. ഒരുസ്ലോട്ടിന് ഒന്നിലധികം പേര് ഉണ്ടെങ്കില്‍ നറുക്കെടുപ്പിലൂടെയാണ് സ്ലോട്ട് അനുവദിക്കുക.
നിരക്ക് കൂട്ടിയത് സാധാരണ കലാകാരന്‍മാര്‍ക്ക് തിരച്ചടിയാണെങ്കിലും ബുക്കിങിന്റെ മറവില്‍ ചിലര്‍ പണമുണ്ടാക്കുന്നതായി ദേവസ്വത്തിന് പരാതി കിട്ടിയിട്ടുണ്ട്. 5900 രൂപയടച്ചുള്ള ഒരു സ്ലോട്ടില്‍ എത്രപേര്‍ക്ക് വേണമെങ്കിലും നൃത്തം അവതരിപ്പിക്കാം. ചിലര്‍ നേരത്തെ സ്ലോട്ട് ബുക്ക് ചെയ്തിട്ട് വന്‍ തുകയ്ക്ക് മറിച്ചുകൊടുക്കുന്നതായും പരാതിയുണ്ട്.
ഇന്ത്യയുടെ വിവിധ ഭാഗങ്ങളില്‍ നിന്നും വിദേശത്തുനിന്നും ഒട്ടേറെ പേരാണ് ഗുരുവായൂരില്‍ കലാപരിപാടികള്‍ അവതരിപ്പിക്കാന്‍ എത്തുന്നത്. ഇതിലേറെയും നൃത്തസംഘങ്ങളാണ്. ഏകാദശി വിളക്ക് നടത്തുന്ന ഒട്ടുമിക്ക വ്യക്തികളും സംഘടനകളും ഒരുമുഴുവന്‍ ദിവസത്തെ കലാപരിപാടികള്‍ നടത്തുക പതിവാണ്. ഇവരെയെല്ലാം നിരക്കുവര്‍ധന ബാധിക്കും. 3450 രൂപയായുന്നു നേരത്തെ ഒന്നരമണിക്കുറിനുള്ള നിരക്ക്. ഒരുവര്‍ഷം മുന്‍പാണ് 5900 രൂപയായി വര്‍ധിപ്പിച്ചത്.
by Midhun HP News | Nov 2, 2026 | Latest News, കേരളം
തിരുവനന്തപുരം: തിരുവനന്തപുരം വേറ്റിനാട് കുറ്റിയാണി റോഡില്‍ ഓട്ടോറിക്ഷ തോട്ടിലേക്ക് മറിഞ്ഞ് ഡ്രൈവറെ കാണാതായി. പന്തലക്കോട് സ്വദേശി വിദ്യാധരനെയാണ് ഒഴുക്കില്‍പെട്ട് കാണാതായത്. ഒപ്പമുണ്ടായിരുന്ന ഭാര്യ ലതയെ നാട്ടുകാര്‍ രക്ഷപ്പെടുത്തി.
ഞായറാഴ്ച വൈകുന്നേരം ആറുമണിയോടെയാണ് സംഭവം. ശക്തമായ മഴയെത്തുടര്‍ന്ന് റോഡില്‍ വലിയ രീതിയില്‍ വെള്ളക്കെട്ട് രൂപപ്പെടുകയും തോടും റോഡും തിരിച്ചറിയാന്‍ പറ്റാത്ത അവസ്ഥയിലാവുകയും ചെയ്തിരുന്നു. വിവാഹസത്കാരത്തില്‍ പങ്കെടുത്ത ശേഷം മടങ്ങുകയായിരുന്ന ഇവര്‍, റോഡിലെ വെള്ളക്കെട്ട് കണ്ട് ഓട്ടോ തിരിക്കാന്‍ ശ്രമിക്കുന്നതിനിടെ തോട്ടിലേക്ക് മറിയുകയായിരുന്നു.
അപകടം കണ്ട ഓടിയെത്തിയ നാട്ടുകാരാണ് ഉടന്‍ തന്നെ രക്ഷാപ്രവര്‍ത്തനം നടത്തിയത്. വിദ്യാധരനെ രക്ഷിക്കാന്‍ ശ്രമിച്ചെങ്കിലും കൈ വഴുതി വെള്ളത്തിലേക്ക് പോകുകയായിരുന്നു. വെഞ്ഞാറമൂട്, നെടുമങ്ങാട് എന്നിവിടങ്ങളില്‍ നിന്നുള്ള ഫയര്‍ഫോഴ്സ് യൂണിറ്റുകള്‍ സ്ഥലത്തെത്തി തിരച്ചില്‍ ഊര്‍ജ്ജിതമാക്കിയിട്ടുണ്ട്.
by Midhun HP News | Nov 2, 2026 | Latest News, കേരളം
തിരുവനന്തപുരം: സംസ്ഥാനത്ത് ബുധനാഴ്ച വരെ ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ്. ശക്തമായ മഴ കണക്കിലെടുത്ത് വിവിധ ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചു. ഇന്ന് ആറ് ജില്ലകളിലാണ് മഴ മുന്നറിയിപ്പ്. പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു.
ചൊവ്വാഴ്ച കോഴിക്കോട്, കണ്ണൂര്‍, വയനാട്, കാസര്‍കോട് ജില്ലകളിലും ബുധനാഴ്ച പത്തനംതിട്ട, ഇടുക്കി, മലപ്പുറം, കോഴിക്കോട് ജില്ലകളിലുമാണ് മഴ മുന്നറിയിപ്പ്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില്‍ 64.5 മില്ലിമീറ്റര്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അര്‍ത്ഥമാക്കുന്നത്.
ബംഗാള്‍ ഉള്‍ക്കടലില്‍ രൂപപ്പെട്ട ചുഴലിക്കാറ്റിന്റെ സ്വാധീനത്തിലാണ് സംസ്ഥാത്ത് ശ്ക്തമായ മഴയ്ക്ക് സാധ്യതയെന്ന മുന്നറിയിപ്പ്. തിങ്കളാഴ്ച അര്‍ധരാത്രി മുതല്‍ ചൊവ്വാഴ്ച പുലര്‍ച്ചെ നാലു മണി വരെയുള്ള സമയത്ത് തെക്കന്‍ ആന്ധ്രാപ്രദേശ് തീരത്ത് നെല്ലൂരിനും നരസാപുരത്തിനും ഇടയില്‍ ശക്തമായ ചുഴലിക്കാറ്റായി മാറി പരമാവധി മണിക്കൂറില്‍ 120 കിലോമീറ്റര്‍ വരെ വേഗത്തില്‍ കരയില്‍ പ്രവേശിക്കാന്‍ സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു. ചുഴലിക്കാറ്റ് നേരിട്ട് സ്വാധീനിക്കുന്നില്ലെങ്കിലും അടുത്ത 2-3 ദിവസം കേരളത്തില്‍ പലയിടങ്ങളിലായി ഇടിമിന്നലോട് കൂടിയ ശക്തമായ മഴയ്ക്ക് സാധ്യതയെന്നും കാലാവസ്ഥ വകുപ്പ് അറിയിച്ചു. വടക്കന്‍ ജില്ലകളിലാണ് കൂടുതല്‍ മഴയ്ക്ക് സാധ്യത നിലനില്‍ക്കുന്നത്.
by Midhun HP News | Nov 1, 2026 | Latest News, ജില്ലാ വാർത്ത
ആറ്റിങ്ങൽ: ആറ്റിങ്ങലിലെ പൊതുപ്രവർത്തകനും രാഷ്ട്രീയ നേതാവുമായിരുന്ന അഡ്വക്കേറ്റ് കെ രാജപ്പൻ നായരുടെ 33 ആം ചരമവാർഷികത്തോടനുബന്ധിച്ച് സുഹൃത്തുക്കളും സഹപ്രവർത്തകരും ചേർന്ന് അനുസ്മരണയോഗം സംഘടിപ്പിച്ചു. സി.പി.ഐ.എം ചിറയിൻകീഴ് താലൂക്ക് കമ്മിറ്റി അംഗം,കെ.എസ്.വൈ.എഫ് താലൂക്ക് കമ്മിറ്റി അംഗം എന്നീ നിലകളിൽ പ്രവർത്തിച്ചിട്ടുണ്ട്.
ആറ്റിങ്ങലിലെ രാഷ്ട്രീയ സാമൂഹിക സാംസ്കാരിക രംഗത്തെ നിറ സാന്നിധ്യമായിരുന്നു രാജപ്പൻ നായർ. ആറ്റിങ്ങൽ ഗവൺമെൻ്റ് കോളേജ് അനുവദിച്ച് കിട്ടുന്നതിന് വേണ്ടിയുള്ള പ്രക്ഷോഭങ്ങൾക്ക് നേതൃത്വം നൽകിയവരിൽ പ്രമുഖ നേതാവായിരുന്നു. ആറ്റിങ്ങൽ ടീച്ചേഴ്സ് സൊസൈറ്റി ഹാളിൽ നടന്ന യോഗത്തിൽ ആറ്റിങ്ങൽ ജി സുഗുണൻ അധ്യക്ഷത വഹിച്ചു. കെ ശ്രീവൽസൺ സ്വാഗതവും എസ് സതീഷ് കുമാർ നന്ദിയും പറഞ്ഞു.
സിപിഎം ഏരിയ സെക്രട്ടറി ആർ സുഭാഷ് ആമുഖ പ്രസംഗം നടത്തി. പി ജി മധു, അഡ്വക്കേറ്റ് എസ് ലെനിൻ, കിളിമാനൂർ നടരാജൻ, അഡ്വക്കേറ്റ് എൻ സായികുമാർ, ഒറ്റൂർ പ്രഭുല്ലചന്ദ്രൻ, കിളിമാനൂർ ഷാജഹാൻ, അഡ്വക്കേറ്റ് സി ജെ രാജേഷ് കുമാർ, ഡോക്ടർ സ്നേഹചന്ദ്രൻ, വഞ്ചിയൂർ ഉദയൻ, കെ ആർ ബാലചന്ദ്രൻ, അഡ്വക്കേറ്റ് മോഹനൻ നായർ എന്നിവർ സംസാരിച്ചു. ആർ രാജു, സി ദേവരാജൻ, ജയചന്ദ്രൻ നായർ, ജയകുമാർ, മേലാറ്റിങ്ങൽ അനിൽകുമാർ, ബി പ്രഭാകരൻ, സുരേഷ് കൊളച്ചയിൽ തുടങ്ങിയവരും പങ്കെടുത്തിരുന്നു.
by Midhun HP News | Nov 1, 2026 | Latest News, കേരളം
തിരുവനന്തപുരം:ഐക്യകേരളത്തിന് ഇന്ന് 70-ാം പിറന്നാൾ. 1956 നവംബർ ഒന്നിന് ഭാഷാടിസ്ഥാനത്തിൽ കേരളം രൂപീകൃതമായതിന്റെ ഓർമ്മ പുതുക്കി സംസ്ഥാനമൊട്ടാകെ കേരളപ്പിറവി ആഘോഷിക്കുന്നു. സംസ്ഥാനത്തിന്റെ പേര് ഔദ്യോഗികമായി കേരളം എന്നാക്കിയ ശേഷമുള്ള ആദ്യ കേരളപ്പിറവി ദിനമെന്ന പ്രത്യേകത ഇത്തവണയുണ്ട്.
തിരുവിതാംകൂർ, കൊച്ചി രാജ്യങ്ങളും മലബാർ പ്രദേശവും കാസർഗോഡും ചേർന്നാണ് ഇന്നത്തെ കേരളം രൂപം കൊണ്ടത്. നീണ്ട ഐക്യകേരള പ്രസ്ഥാനത്തിനൊടുവിൽ 1956 നവംബർ ഒന്നിന് കേരളം ഔദ്യോഗികമായി നിലവിൽ വന്നു. 1957 ൽ ഇ.എം.എസ് നമ്പൂതിരിപ്പാടിന്റെ നേതൃത്വത്തിൽ ആദ്യ മന്ത്രിസഭ അധികാരമേറ്റു.
സംസ്ഥാനത്തുടനീളം ഇന്ന് വിപുലമായ ആഘോഷ പരിപാടികളാണ് സംഘടിപ്പിച്ചിട്ടുള്ളത്. സർക്കാർ ഓഫീസുകൾക്കും വിദ്യാഭ്യാസ സ്ഥാപനങ്ങൾക്കും ഇന്ന് അവധിയാണ്. സ്കൂളുകളിൽ മലയാള ഭാഷാ പ്രതിജ്ഞയും സാംസ്കാരിക പരിപാടികളും കലാമത്സരങ്ങളും നടക്കും.
സാക്ഷരതയിലും ആരോഗ്യരംഗത്തും രാജ്യത്തിന് മാതൃകയായി വളർന്ന കേരളത്തിന്റെ യശസ്സ് ലോകമെമ്പാടുമുള്ള മലയാളികൾ ഇന്ന് അഭിമാനത്തോടെ ആഘോഷിക്കുന്നു.
തലസ്ഥാനത്ത് മാതൃഭാഷാ സ്നേഹവും ജനാധിപത്യ ഓർമ്മകളും സംഗമിക്കുന്ന വിപുലമായ പരിപാടികൾക്ക് തുടക്കമാകുന്നു. ഇതിന്റെ ഭാഗമായി രാവിലെ 10 മണിക്ക് നിയമസഭാ സമുച്ചയത്തിൽ വച്ച് സ്പീക്കർ തിരുവഞ്ചൂർ രാധാകൃഷ്ണൻ അധ്യക്ഷത വഹിക്കുന്ന ചടങ്ങിൽ മുൻ സ്പീക്കർമാർ, ഡെപ്യൂട്ടി സ്പീക്കർമാർ, മുൻ സെക്രട്ടറിമാർ, മുതിർന്ന മാധ്യമപ്രവർത്തകർ എന്നിവരെ ആദരിക്കുന്നതിനൊപ്പം, അന്താരാഷ്ട്ര കായിക മത്സരങ്ങളിൽ നേട്ടങ്ങൾ കൈവരിച്ച മുൻ നിയമസഭാംഗം എം.ജെ. ജേക്കബിനെയും വിശിഷ്ടമായി ആദരിക്കും.
Recent Comments