പാലക്കാട്: പ്ലസ് വണ്‍ വിദ്യാര്‍ഥി കളിക്കളത്തില്‍ കുഴഞ്ഞു വീണ് മരിച്ചു. ചെര്‍പ്ലശ്ശേരി തോട്ടര കോട്ടയില്‍ രാജന്‍- ദീപ ദമ്പതികളുടെ മകന്‍ ദില്‍രാജ് എന്ന അപ്പു ആണ് മരിച്ചത്.
കെ എച്ച് എസ് തോട്ടരയില്‍ പ്ലസ് വണ്‍ വിദ്യാര്‍ഥിയാണ്. കരിമ്പുഴ ടര്‍ഫില്‍ കളിക്കുമ്പോള്‍ കുഴഞ്ഞ് വീഴുകയായിരുന്നു. ഉടന്‍ മാങ്ങോട് മെഡിക്കല്‍ കോളജില്‍ എത്തിച്ചുവെങ്കിലും ജീവന്‍ രക്ഷിക്കാനായില്ല.
ന്യൂഡല്‍ഹി: ലഹരി ഉപയോഗ രംഗങ്ങളില്‍ മുന്നറിയിപ്പ് നിര്‍ബന്ധിതമാക്കിയതടക്കം സിനിമ സെന്‍സര്‍ മാനദണ്ഡങ്ങള്‍ പുതുക്കി കേന്ദ്ര സര്‍ക്കാര്‍. സ്ത്രീകളെ അവഹേളിക്കുന്ന രംഗങ്ങള്‍ പാടില്ല, അക്രമങ്ങളെ ന്യായികരിക്കരുത്, കോടതികളുടെ അന്തസ് ഇടിക്കുന്ന രംഗങ്ങള്‍ പാടില്ലെന്നും നിര്‍ദേശത്തില്‍ പറയുന്നു. സെന്‍സര്‍ ബോര്‍ഡ് പുനഃസംഘടിപ്പിച്ചതിന് പിന്നാലെയാണ് പുതിയ മാര്‍ഗനിര്‍ദേശങ്ങള്‍.
ആവിഷ്‌കാര സ്വാതന്ത്ര്യത്തെ അനാവശ്യമായി നിയന്ത്രിക്കാതെ തന്നെ, സിനിമകള്‍ സാമൂഹിക മൂല്യങ്ങളോട് ഉത്തരവാദിത്തമുള്ളതും സംവേദനക്ഷമവുമാണെന്ന് സെന്‍സര്‍ ബോര്‍ഡ് ഉറപ്പാക്കണമെന്നും നിര്‍ദേശത്തില്‍ പറയുന്നു. മദ്യപാനം, ലഹരി ഉപയോഗം, പുകവലി എന്നിവ സിനിമകള്‍ മഹത്വവല്‍ക്കരിക്കരുത്. ലഹരിവസ്തുക്കള്‍ ഉപയോഗിക്കുന്ന രംഗങ്ങളില്‍ നിര്‍ദ്ദിഷ്ട മുന്നറിയിപ്പുകള്‍ നല്‍കേണ്ടതാണ്. സ്ത്രീകളെ അവഹേളിക്കുന്ന തരത്തിലുള്ള ഉള്ളടക്കങ്ങള്‍ പാടില്ല. ലൈംഗികാക്രമണങ്ങള്‍ പരമാവധി ഒഴിവാക്കണം; പ്രമേയത്തിന് അത്യാവശ്യമാണെങ്കില്‍ അത്തരം രംഗങ്ങളുടെ ദൈര്‍ഘ്യം കുറയ്ക്കണമെന്നും നിര്‍ദേശത്തില്‍ ഉണ്ട്
അക്രമസംഭവങ്ങള്‍ പ്രോത്സാഹിപ്പിക്കുകയോ, മഹത്വവത്കരിക്കുകയോ ചെയ്യരുത്.കുട്ടികളെ അക്രമങ്ങളുടെ ഇരകളായോ കുറ്റവാളികളായോ നിര്‍ബന്ധിത സാക്ഷികളായോ കാണിക്കുന്നതോ, ബാലപീഡനത്തിന് ഇരയാക്കുന്നതോ ആയ ഉള്ളടക്കങ്ങള്‍ പാടില്ല. മൃഗങ്ങളോടുള്ള ക്രൂരത, ശാരീരികമോ മാനസികമോ ആയ വെല്ലുവിളികള്‍ നേരിടുന്ന വ്യക്തികളെ പരിഹസിക്കുകയോ ഉപദ്രവിക്കുകയോ ചെയ്യരുതെന്നും നിര്‍ദേശത്തില്‍ ഉണ്ട്
മതവിഭാഗങ്ങളെയോ മറ്റ് സമൂഹങ്ങളെയോ അവഹേളിക്കുന്ന ദൃശ്യങ്ങളോ വാക്കുകളോ പാടില്ല. വര്‍ഗീയതയോ, രാജ്യവിരുദ്ധമായ ആശയങ്ങളോ പ്രചരിപ്പിക്കാന്‍ പാടില്ല. ഇന്ത്യയുടെ പരമാധികാരത്തെയും അഖണ്ഡതയെയും ചോദ്യം ചെയ്യുന്നതോ, രാജ്യസുരക്ഷയ്‌ക്കോ ക്രമസമാധാനത്തിനോ ഭീഷണിയാകുന്നതോ, വിദേശ രാജ്യങ്ങളുമായുള്ള സൗഹൃദബന്ധത്തെ ബാധിക്കുന്നതോ ആയ ഉള്ളടക്കങ്ങള്‍ക്ക് നിയന്ത്രണമുണ്ട്.
തിരുവനന്തപുരം: സംസ്ഥാനത്തെ റെയിൽവേ സ്റ്റേഷനുകളിലെ വാഹന പാർക്കിങ് സേവന മേഖലയിൽ 7.56 കോടി രൂപയുടെ നികുതി വെട്ടിപ്പ് കണ്ടെത്തി. സംസ്ഥാന ചരക്കു സേവന നികുതി വകുപ്പ് നടത്തിയ പരിശോധനയിലാണ് വെട്ടിപ്പ് കണ്ടെത്തിയത്. സെപ്റ്റംബർ 16ന് ഇന്റലിജൻസ് & എൻഫോഴ്സ്മെന്റ് വിഭാഗങ്ങൾ സംയുക്തമായാണ് പരിശോധനകൾ നടത്തിയത്.
റെയിൽവേ പരിസരങ്ങളിൽ പാർക്കിങ് സേവനം നൽകുന്ന 22 നികുതിദായകരുടെ പ്രധാന വ്യാപാരസ്ഥലങ്ങൾ, അധിക വ്യാപാരസ്ഥലങ്ങൾ, വസതികൾ എന്നിവയുൾപ്പെടെ 69 സ്ഥലങ്ങളിലായിരുന്നു പരിശോധന. പാർക്കിങ് സേവനങ്ങളിൽ നിന്നുള്ള യഥാർത്ഥ ടേൺ ഓവറിനേക്കാൾ ഗണ്യമായി കുറഞ്ഞ തുകയാണ് റിട്ടേണുകളിൽ കാണിച്ചിരുന്നതെന്ന് പരിശോധനയിൽ വ്യക്തമായി. കൂടാതെ, ഒന്നിലധികം ക്യു ആർ കോഡുകൾ ഉപയോഗിച്ചുള്ള പണമിടപാടുകളും ഇത്തരത്തിൽ കണ്ടെത്തിയിട്ടുണ്ട്.
42 കോടി രൂപയുടെ ടേൺഓവർ വെട്ടിപ്പും 7.56 കോടി രൂപയുടെ നികുതി വെട്ടിപ്പും നടന്നിട്ടുണ്ടെന്ന് അധികൃതർ വ്യക്തമാക്കി. 13 നികുതിദായകരുടെ വിവരങ്ങൾ സോഫ്റ്റ്‌വെയറുകളിൽ നിന്നും മറ്റുള്ളവരുടേത് രജിസ്റ്ററുകൾ, ബുക്കുകൾ, മൊബൈൽ ചാറ്റുകൾ എന്നിവയിൽ നിന്നും ശേഖരിച്ചിട്ടുണ്ട്. റെയിൽവേ സ്റ്റേഷനുകൾക്ക് പുറമെ കെ.എസ്.ആർ.ടി.സി, ആശുപത്രികൾ, മാളുകൾ, തിയേറ്ററുകൾ എന്നിവിടങ്ങളിലെ ആയിരത്തിലധികം വാഹന പാർക്കിംഗുകളുടെ വിവരങ്ങൾ സംസ്ഥാന ജി.എസ്.ടി ഇന്റലിജൻസ് വിഭാഗം ശേഖരിച്ചിട്ടുണ്ട്.
പൊതുജനങ്ങൾക്ക് ഇത്തരത്തിലുള്ള നികുതി വെട്ടിപ്പുകളെക്കുറിച്ചുള്ള വിവരങ്ങൾ inform.sgst@kerala.gov.in എന്ന വിലാസത്തിൽ അറിയിക്കാവുന്നതാണെന്നും, നികുതി വെട്ടിപ്പ് നടത്തുന്നവർക്കെതിരെ അന്വേഷണവും നടപടികളും കർശനമായി തുടരുമെന്നും സംസ്ഥാന ചരക്ക് സേവന നികുതി കമ്മീഷണർ അറിയിച്ചു.
തിരുവനന്തപുരം: കേരള, കണ്ണൂര്‍ സര്‍വകലാശാലകളിലെ വിദ്യാര്‍ഥി യൂണിയന്‍ തെരഞ്ഞെടുപ്പില്‍ എസ്എഫ്‌ഐക്ക് വന്‍ വിജയം. ഇരു സര്‍വകലാശാലകളിലുമായി ഘടനാപരമായി തെരഞ്ഞെടുപ്പ് നടന്ന 148 കോളേജ് യൂണിയനുകളില്‍ 115ലും എസ്എഫ്‌ഐ വിജയിച്ചു.
കേരളയില്‍ 71ല്‍ 62 യൂണിയനുകളും കണ്ണൂരില്‍ 77ല്‍ 53 യൂണിയനുകളുമാണ് എസ്എഫ്‌ഐ നേടിയത്. ആലപ്പുഴ ജില്ലയിലെ എല്ലാ കോളജുകളും കൊല്ലത്ത് 18ല്‍ 12 കോളജുകളും തിരുവനന്തപുരത്ത് 29 ഇടത്തും എസ്എഫ്‌ഐ വിജയിച്ചു
പോളി ടെക്‌നിക് കോളജുകളിലെ യൂണിയന്‍ തിരഞ്ഞെടുപ്പില്‍ എസ്എഫ്‌ഐ വന്‍ വിജയം നേടി. തെരഞ്ഞെടുപ്പ് നടന്ന 55 പോളികളില്‍ 45 എസ്എഫ്‌ഐയുടെ യൂണിയനുകള്‍ വിജയിച്ചു. കാസര്‍കോട് ജില്ലയില്‍ മത്സരിച്ച 3 ല്‍ 3 പോളിടെക്‌നിക് കോളജുകളിലും എസ്എഫ്‌ഐ വിജയിച്ചു. കണ്ണൂര്‍ ജില്ലയില്‍ മത്സരിച്ച 5ല്‍ 5 കോളജുകളിലും കോഴിക്കോട് ജില്ലയില്‍ മത്സരിച്ച 2ല്‍ 2 കോളജുകളിലും വയനാട് ജില്ലയില്‍ മത്സരിച്ച 3ല്‍ 3 കോളജുകളിലും മലപ്പുറം ജില്ലയില്‍ മത്സരിച്ച 5ല്‍ 1 കോളജിലും പാലക്കാട് ജില്ലയില്‍ 3ല്‍ 3 കോളജുകളിലും തൃശ്ശൂര്‍ ജില്ലയില്‍ മത്സരിച്ച 7ല്‍ 5 കോളജുകളിലും എറണാകുളം ജില്ലയില്‍ മത്സരിച്ച 5ല്‍ 4കോളജുകളിലും ഇടുക്കി ജില്ലയില്‍ 4ല്‍ 4 കോളജുകളിലും കോട്ടയം ജില്ലയില്‍ 3ല്‍ 3 കോളജുകളിലും ആലപ്പുഴയില്‍ 2ല്‍ 2കോളജുകളിലും പത്തനംതിട്ടയില്‍ 5 ല്‍ 5 കോളജുകളിലും കൊല്ലം ജില്ലയില്‍ 3ല്‍ 2 കോളജുകളിലും തിരുവനന്തപുരം ജില്ലയില്‍ 5ല്‍ 3കോളജുകളിലും എസ്എഫ്‌ഐ വിജയിച്ചു.
സോഷ്യലിസമാണ് ഭാവി, മതനിരപേക്ഷതയാണ് കരുത്ത് എന്ന മുദ്രാവാക്യം ഉയര്‍ത്തിയാണ് എസ്എഫ്‌ഐ ഈ തെരഞ്ഞെടുപ്പിനെ നേരിട്ടത്. സംഘപരിവാര്‍ ആശയങ്ങളോട് ഐക്യപ്പെടുന്ന രീതിയില്‍ സംസ്ഥാനഭരണം കയ്യാളുന്ന കോണ്‍ഗ്രസിന്റെ നെറികെട്ട വിദ്യാര്‍ത്ഥി വിരുദ്ധ നിലപാടുകള്‍ക്ക് എതിരെയുള്ള കേരളത്തിലെ പ്രബുദ്ധരായ വിദ്യാര്‍ത്ഥികള്‍ നല്‍കിയ തിരിച്ചടി കൂടിയാണ് ഈ തിരഞ്ഞെടുപ്പ് വിജയമെന്ന് എസ്എഫ്‌ഐ നേതാക്കള്‍ പറഞ്ഞു.
തിരുവനന്തപുരം: റോഡിലെ അശ്രദ്ധമായ ഡ്രൈവിങ്ങും മത്സരയോട്ടവും അവസാനിപ്പിക്കുന്നതിന്റെ ഭാഗമായി, ബസ് സര്‍വീസുകള്‍ക്കിടയില്‍ ജിപിഎസ് മുഖേന നിരീക്ഷിക്കപ്പെടുന്ന നിര്‍ബന്ധിത സമയ ഇടവേളകള്‍ നടപ്പാക്കാന്‍ സ്റ്റേറ്റ് ട്രാന്‍സ്‌പോര്‍ട്ട് അതോറിറ്റി തീരുമാനിച്ചു. നവംബര്‍ 1 മുതല്‍ പുതിയ സംവിധാനം നിലവില്‍ വരും.
പുതിയ സംവിധാനമനുസരിച്ച് ഒരേ റൂട്ടില്‍ സര്‍വീസ് നടത്തുന്ന കെഎസ്ആര്‍ടിസി, സ്വകാര്യ ബസുകള്‍ കര്‍ശനമായും കുറഞ്ഞ സമയ ഇടവേള പാലിക്കേണ്ടതുണ്ട്. നഗരപ്രദേശങ്ങളില്‍ 5 മിനിറ്റും ഗ്രാമീണ പാതകളില്‍ 10 മിനിറ്റും ആയിരിക്കും ചുരുങ്ങിയ ഇടവേള. ഇതുവഴി യാത്രക്കാരെ പിടിക്കുന്നതിനായുള്ള ബസുകളുടെ മത്സരയോട്ടവും അപകടകരമായ ഡ്രൈവിങ്ങും തടയാനാകുമെന്നാണ് പ്രതീക്ഷിക്കുന്നത്. ജിപിഎസ് സാങ്കേതികവിദ്യയുടെ സഹായത്തോടെ ആപ്പുകള്‍ വഴിയും മറ്റ് ഡിജിറ്റല്‍ പ്ലാറ്റ്ഫോമുകള്‍ വഴിയുമാണ് തത്സമയ ലൊക്കേഷനുകളും സമയക്രമവും നിരീക്ഷിക്കുന്നത്. നിലവില്‍ സംസ്ഥാനത്ത് ഏകദേശം 7,000 സ്വകാര്യ ബസുകളും 4,468 കെഎസ്ആര്‍ടിസി ബസുകളുമാണ് സര്‍വീസ് നടത്തുന്നത്.
കേന്ദ്രീകൃത ഡിജിറ്റല്‍ പ്ലാറ്റ്ഫോമിലേക്ക് ഉള്‍പ്പെടുത്തുന്നതിനായി സ്വകാര്യ ബസ് ഉടമകളില്‍ നിന്നും കെഎസ്ആര്‍ടിസിയില്‍ നിന്നും ട്രിപ്പ് ഷെഡ്യൂളുകള്‍ ശേഖരിക്കുന്ന പ്രവൃത്തികള്‍ റീജിയണല്‍ ട്രാന്‍സ്‌പോര്‍ട്ട് അതോറിറ്റികള്‍ ഇതിനകം ആരംഭിച്ചിട്ടുണ്ട്. നവംബര്‍ 1ന് പുതിയ സംവിധാനം ഉദ്ഘാടനം ചെയ്യുന്നതിന് മുന്നോടിയായി റൂട്ടുകളിലെ കൃത്യവും സുരക്ഷിതവുമായ സമയക്രമം തയ്യാറാക്കാന്‍ ഈ വിവരങ്ങള്‍ സോഫ്റ്റ്വെയറിലേക്ക് നല്‍കും.
കേരള ബസ്സ്, ബസ് ടൈം പോലുള്ള ഡിജിറ്റല്‍ പ്ലാറ്റ്ഫോമുകള്‍ യാത്രക്കാര്‍ക്ക് തത്സമയ വിവരങ്ങള്‍ നല്‍കും. മത്സരയോട്ടം മൂലമുണ്ടാകുന്ന അപകടങ്ങള്‍ പൂര്‍ണമായും ഒഴിവാക്കാന്‍ ഇതുവഴി സാധിക്കുമെന്നാണ് വിലയിരുത്തപ്പെടുന്നത്. സര്‍വീസുകള്‍ക്കിടയില്‍ കൃത്യമായ ഇടവേളകളും അനുയോജ്യമായ സമയക്രമവും ഉണ്ടായാല്‍ ബസുകള്‍ക്ക് സുഗമമായി സര്‍വീസ് നടത്താന്‍ കഴിയുമെന്ന് കേരള സ്റ്റേറ്റ് ബസ് ഓപ്പറേറ്റേഴ്‌സ് ഫെഡറേഷന്‍ ജനറല്‍ സെക്രട്ടറി ഹംസ എരിക്കുന്നന്‍ വ്യക്തമാക്കി.
റോഡ് അപകടങ്ങള്‍ കുറയ്ക്കുന്നതിനും ഇന്ധനക്ഷമത വര്‍ധിപ്പിക്കുന്നതിനും പുതിയ സംവിധാനം സഹായിക്കുമെന്നും അദ്ദേഹം കൂട്ടിച്ചേര്‍ത്തു. പുതിയ പെര്‍മിറ്റുകള്‍ നല്‍കുമ്പോള്‍ നിലവിലുള്ള ട്രിപ്പ് ഇടവേളകള്‍ പരിശോധിക്കാത്ത ആര്‍ടിഎയുടെ നയങ്ങള്‍ക്കെതിരെ ബസ് ഉടമകള്‍ നേരത്തെ തന്നെ ആശങ്ക പ്രകടിപ്പിച്ചിരുന്നു. റോഡ് സുരക്ഷയാണ് പ്രധാന ലക്ഷ്യമെന്നിരിക്കെ കെഎസ്ആര്‍ടിസി ബസുകളെയും ഈ നിയമത്തില്‍ നിന്ന് ഒഴിവാക്കില്ലെന്ന് അധികൃതര്‍ വ്യക്തമാക്കി. എന്നാല്‍ നഗരങ്ങളിലെ നിയമങ്ങള്‍ ഗ്രാമീണ മേഖലകളിലെ സര്‍വീസുകളെ പ്രതികൂലമായി ബാധിക്കുമെന്ന ആശങ്കയും സ്വകാര്യ ബസ് ഉടമകള്‍ പങ്കുവെച്ചിട്ടുണ്ട്.
Recent Comments