by Midhun HP News | Sep 10, 2026 | Latest News, ജില്ലാ വാർത്ത
കര്‍ഷക കോൺഗ്രസ്സ് ആറ്റിങ്ങല്‍ നിയോജകമണ്ഡലം പ്രവര്‍ത്തക സമ്മേളനവും പുനസംഘടിപ്പിക്കലും നടന്നു. ആറ്റിങ്ങല്‍ ഭജനമഠം ഹാളില്‍ കര്‍ഷക കോൺഗ്രസ്സ് നിയോജക മണ്ഡലം പ്രസിഡന്റ് ആറ്റിങ്ങല്‍ മനോജിന്റെ ആദ്യക്ഷതയിൽ നടന്ന ചടങ്ങ് കര്‍ഷക കോൺഗ്രസ്സ് സംസ്ഥാന വൈസ് പ്രസിഡന്റ് അടയമൺ മുരളീധരന്‍ ഉദ്ഘാടനം ചെയ്തു.
നിയോജക മണ്ഡലത്തിലെ മുഴുവന്‍ മണ്ഡലം കമ്മിറ്റികളും പുന:സംഘടിപ്പിച്ചു. പുതുതായി നിയമിതരായ മണ്ഡലം പ്രസിഡന്റുമാരെ പ്രഖ്യാപിച്ചു കൊണ്ട്‌ ജില്ലാ പ്രസിഡന്റ് കള്ളിക്കാട് രാജേന്ദ്രന്‍ മുഖ്യ പ്രഭാഷണം നടത്തി.
പുതുതായി തെരഞ്ഞെടുക്കപ്പെട്ട ജനപ്രതിനിധികൾക്ക് സ്വീകരണം നല്‍കി. സംസ്ഥന ജനറൽ സെക്രട്ടറി രാജ് മോഹൻ, മണ്ഡലം കോൺഗ്രസ്സ് പ്രസിഡന്റുമാരായ പ്രശാന്ത്, രഘുറാം കൗൺസിലർമാരായ കെ സതി, സതീഷ് കുമാര്‍, മല്ലിക, ബ്ലോക്ക് കോൺഗ്രസ്സ് ഭാരവാഹികളായ ഗോപി വലിയകുന്ന്, ഷാജി, കര്‍ഷക കോൺഗ്രസ്സ് ജില്ലാ ഭാരവാഹികളും മണ്ഡലം പ്രസിഡന്റുമാരും ബ്ലോക്ക് ഭാരവാഹികളും പങ്കെടുത്തു.
by Midhun HP News | Sep 10, 2026 | Latest News, ജില്ലാ വാർത്ത
തിരുവനന്തപുരം പ്രേംനസീർ സുഹൃത് സമിതി ഏർപ്പെടുത്തിയ പ്രേംനസീർ
ബഹുമുഖ ചലച്ചിത്ര പ്രതിഭാ പുരസ്കാരം ഗാനരചയിതാവും തിരക്കഥാകൃത്തും ചലച്ചിത്ര നിർമ്മാതാവുമായ ടൈറ്റസ് ആറ്റിങ്ങൽ, ഗായകൻ വേണുഗോപാലിൽ നിന്നും ഏറ്റുവാങ്ങി.
സത്കർമ്മങ്ങളുടെയും ചലച്ചിത്രമേഖലയിലെയും പ്രവർത്തനങ്ങൾ കണക്കിലെടുത്താണ് ടൈറ്റസ് ആറ്റിങ്ങലിന് പ്രേംനസീർ സുഹൃത് സമിതിയുടെ ‘എന്റെ നിറവോണം 2026’ൽ വച്ച് പുരസ്കാരം സമർപ്പിച്ചത്.
by Midhun HP News | Sep 10, 2026 | Latest News, ദേശീയ വാർത്ത
ദുബൈ: ദുബൈ ഡ്യൂട്ടി ഫ്രീ മില്ലേനിയം മില്യനയര്‍ നറുക്കെടുപ്പില്‍ മലയാളിക്ക് ഭാഗ്യം. അജ്മാനില്‍ ഫോട്ടോഗ്രാഫറായി ജോലി ചെയ്യുന്ന മലയാളി ജിജോ പുളിക്കത്തൊടി (41)ക്കാണ് 10 ലക്ഷം ഡോളര്‍ (ഏകദേശം 9 കോടിയിലേറെ രൂപ) സമ്മാനം അടിച്ചത്.
ദുബൈ രാജ്യാന്തര വിമാനത്താവളത്തിലെ കോണ്‍കോഴ്‌സ് ബിയില്‍ ബുധനാഴ്ച നടന്ന നറുക്കെടുപ്പിലാണ് ജിജോയെ ഭാഗ്യം തേടിയെത്തിയത്. ഓഗസ്റ്റ് 22-ന് ഓണ്‍ലൈന്‍ വഴി എടുത്ത 4891 എന്ന ടിക്കറ്റിനാണ് സമ്മാനം അടിച്ചത്.
കഴിഞ്ഞ നാല് വര്‍ഷമായി അജ്മാനില്‍ താമസിക്കുന്ന ജിജോ തന്റെ 17 സുഹൃത്തുക്കള്‍ക്കൊപ്പം ചേര്‍ന്നാണ് ടിക്കറ്റ് എടുത്തത്. ഈ തുക തങ്ങള്‍ക്കെല്ലാവര്‍ക്കും വലിയ സഹായമാകുമെന്ന് ജിജോ പറഞ്ഞു. 1999-ല്‍ മില്ലേനിയം മില്യനയര്‍ ആരംഭിച്ചതിന് ശേഷം ഈ സമ്മാനം നേടുന്ന 283-ാമത്തെ ഇന്ത്യക്കാരനാണ് കേരളത്തില്‍ നിന്നുള്ള ജിജോ. മില്ലേനിയം മില്യനയര്‍ പരമ്പര 554-ന്റെ ഭാഗമായി നടന്ന മറ്റൊരു നറുക്കെടുപ്പില്‍ ദുബൈയിലെ ഇന്ത്യന്‍ പ്രവാസി രോഹന്‍ പ്രകാശ് ഫെര്‍ണാണ്ടസും 10 ലക്ഷം ഡോളര്‍ വിജയിച്ചു. 1710 എന്ന ടിക്കറ്റ് നമ്പറാണ് അദ്ദേഹത്തിന് ഭാഗ്യം നല്‍കിയത്.
ഡ്യൂട്ടി ഫ്രീയുടെ ഫൈനസ്റ്റ് സര്‍പ്രൈസ് നറുക്കെടുപ്പില്‍ ഷാര്‍ജയില്‍ താമസിക്കുന്ന ഇന്ത്യന്‍ സ്വദേശിയായ യോഗേഷ് ധനക് (53) റേഞ്ച് റോവര്‍ കാര്‍ സമ്മാനമായി നേടി. 1243 എന്ന ടിക്കറ്റ് നമ്പറിലൂടെയാണ് നേട്ടം. കഴിഞ്ഞ 15 വര്‍ഷമായി യാത്രകളിലെല്ലാം ടിക്കറ്റെടുക്കുന്ന ഇദ്ദേഹത്തിന് ഇതാദ്യമായാണ് സമ്മാനം ലഭിക്കുന്നത്. ദുബൈയില്‍ താമസിക്കുന്ന തുര്‍ക്കി പൗരന്‍ എസെര്‍ എറോള്‍ ബിഎംഡബ്ല്യു ബൈക്കും ദുബായിലെ ഇന്ത്യക്കാരനായ മെല്‍വിന്‍ പോണ്ടസ് അപ്രീലിയ ബൈക്കും സമ്മാനമായി നേടി. ഇദ്ദേഹത്തിന് ഇത് രണ്ടാം തവണയാണ് ഡ്യൂട്ടി ഫ്രീ നറുക്കെടുപ്പില്‍ ബൈക്ക് സമ്മാനമായി ലഭിക്കുന്നത്.
by Midhun HP News | Sep 10, 2026 | Latest News, ജില്ലാ വാർത്ത
തിരുവനന്തപുരം: പിഎസ്‌സി മൂല്യനിർണയ ക്രമക്കേടിൽ ഉദ്യോഗസ്ഥർക്ക് സംഭവിച്ചത് ഗുരുതര വീഴ്ചയെന്ന് എസ്ഐടി. മൂല്യനിർണയ ചുമതലയുണ്ടായിരുന്ന രണ്ട് ഉദ്യോഗസ്ഥരുടെ ഭാഗത്ത് വീഴ്ചയെന്ന് കണ്ടെത്തൽ. മുൻ ഡെപ്യൂട്ടി സെക്രട്ടറി, അഡീഷണൽ സെക്രട്ടറി എന്നിവർക്കെതിരെ നടപടി ആവശ്യമെന്ന് ക്രൈംബ്രാഞ്ച്. ക്രിമിനൽ ഗൂഢാലോചനയുണ്ടോയെന്നതിൽ അന്വേഷണം തുടരുന്നു. വീഴ്ച അറിഞ്ഞിട്ടും പിഎസ്‌സി നടപടിയെടുത്തില്ല. ഉദ്യോഗസ്ഥർക്കെതിരെ വകുപ്പ് തല നടപടി ക്രൈംബ്രാഞ്ച് ആവശ്യപ്പെട്ടു. ഡിജിപി വഴി സർക്കാരിന് കത്ത് നൽകി. സർക്കാർ പിഎസ്‌സിക്ക് കത്ത് കൈമാറും.
പരീക്ഷയിൽ 9 ചോദ്യങ്ങളുടെ മൂല്യനിർണയം നടത്താതെ പോയത് ഉദ്യോഗസ്ഥരുടെ വീഴ്ച്ചയെന്ന് ക്രൈംബ്രാഞ്ച് പറയുന്നു. മൂല്യനിർണയം നടത്തിയത് ഈ രണ്ട് ഉദ്യോഗസ്ഥരാണ്. സാങ്കേതിക പിഴവെന്നാണ് ഉദ്യോഗസ്ഥരുടെ വിശദീകരണം. പിഎസ്‌സി പരീക്ഷ അട്ടിമറിയിൽ നടന്നത് വൻ ആസൂത്രിത ഗൂഡാലോചനയെന്ന് എസ്.ഐ.ടി സ്ഥിരീകരിക്കുന്നു. ആസൂത്രണ ബോർഡ് ചീഫ് പരീക്ഷയിൽ സിപിഐഎം അനുകൂലിയെ ഒന്നാം റാങ്കിൽ എത്തിച്ചതിന് പിന്നിലാണ് വൻ ഗൂഢാലോചന നടന്നത്.
ഒന്നാം റാങ്ക് നേടിയ സിപിഐഎം അനുകൂലിയായ ഉദ്യോഗാർത്ഥി എഴുതാതിരുന്ന 54 മാർക്കിന്റെ ചോദ്യങ്ങളാണ് മൂല്യനിർണയം നടത്താതെ ഒഴിവാക്കിയത്. ഇത്രയും ചോദ്യങ്ങൾ മൂല്യനിർണയം നടത്താതെ ഒഴിവാക്കിയതോടെ ഈ ഉദ്യോഗാർത്ഥിയെക്കാൾ ഉയർന്ന റാങ്കിലെത്തേണ്ടിയിരുന്ന ഒട്ടേറെ പേരുടെ അമ്പതോളം മാർക്ക് നഷ്ടമായി. ഇതോടെയാണ് രണ്ടാം റാങ്കുകാരനെക്കാൾ യഥാർത്ഥത്തിൽ 53 മാർക്ക് കുറവുള്ള ഇടത് അനുകൂലി ഒരു മാർക്കിൻ്റെ വ്യത്യാസത്തിൽ ഒന്നാം റാങ്കിൽ എത്തിയത്.
by Midhun HP News | Sep 10, 2026 | Latest News, കേരളം
ഇരിട്ടി: ക്ലാസ് മുറിയിൽ അസുഖബാധിതയായി കുഴഞ്ഞുവീണ ആറാം ക്ലാസ് വിദ്യാർഥിനിയോട് മനുഷ്യത്വരഹിതമായി പെരുമാറുകയും അധിക്ഷേപിക്കുകയും ചെയ്തെന്ന പരാതിയിൽ അധ്യാപികയെ സ്കൂൾ മാനേജ്മെന്റ് താൽക്കാലികമായി ജോലിയിൽ നിന്ന് മാറ്റിനിർത്തി. ഇരിട്ടി കുന്നോത്ത് സെന്റ് ജോസഫ്സ് യുപി സ്കൂളിലെ അധ്യാപിക സിസ്റ്റർ ലിന്റോ ജോസിനെതിരെയാണ് മാനേജ്മെൻറ് അച്ചടക്ക നടപടി സ്വീകരിച്ചത്. സ്കൂളിന്റെ നിയന്ത്രണ ചുമതലയുള്ള തലശ്ശേരി അതിരൂപത കോർപ്പറേറ്റ് എജ്യുക്കേഷണൽ ഏജൻസിയാണ് അധ്യാപികയെ സർവീസിൽ നിന്ന് മാറ്റിനിർത്താൻ ഉത്തരവിട്ടത്. സംഭവത്തെക്കുറിച്ച് വിശദമായി പരിശോധിക്കാൻ പ്രത്യേക അന്വേഷണ സമിതിയെയും മാനേജ്മെന്റ് നിയോഗിച്ചിട്ടുണ്ട്.
രക്തത്തിലെ സോഡിയം അളവിലെ വ്യതിയാനം കാരണം സ്ഥിരമായി മരുന്ന് കഴിച്ചുവരുന്ന കുട്ടിയാണ് ബുധനാഴ്ച ഉച്ചയോടെ ക്ലാസ് മുറിയിൽ തലകറങ്ങി വീണത്. കുട്ടിയുടെ അസുഖവിവരം സ്കൂൾ അധികൃതർക്ക് നേരത്തെ തന്നെ അറിയാവുന്നതുമായിരുന്നു. കുട്ടി ക്ലാസിൽ കുഴഞ്ഞുവീണ വിവരം സഹപാഠികൾ പ്രധാനാധ്യാപകനെയും ക്ലാസ് ടീച്ചറെയും അറിയിക്കാൻ എത്തിയപ്പോൾ, ‘കുട്ടി എന്തുകൊണ്ട് നേരിട്ടെത്തി വിവരം പറഞ്ഞില്ല’ എന്ന മനുഷ്യത്വരഹിതമായ മറുപടിയാണ് ക്ലാസ് ടീച്ചർ നൽകിയതെന്ന് കുട്ടികൾ പറയുന്നു.
തുടർന്ന് ക്ലാസിലെത്തിയ സിസ്റ്റർ ലിന്റോ ജോസ്, നിലത്തു കിടക്കുകയായിരുന്ന കുട്ടിയോട് ‘നീയിതുവരെ ചത്തില്ലേ’ എന്ന് ചോദിച്ചതായും വീണുകിടന്ന കുട്ടിയെ ചവിട്ടിയതായും രക്ഷിതാക്കൾ മാനേജ്മെന്റിന് നൽകിയ പരാതിയിൽ വ്യക്തമാക്കുന്നു.
വിവരമറിഞ്ഞ് രക്ഷിതാക്കൾ സ്കൂളിലെത്തി ചോദ്യം ചെയ്തപ്പോൾ അധ്യാപിക ആരോപണങ്ങൾ പൂർണ്ണമായി നിഷേധിക്കുകയായിരുന്നു. ഇതോടെ രോഷാകുലരായ രക്ഷിതാക്കൾ സംഘടിച്ച് സ്കൂളിലെത്തി ഉപരോധവും പ്രതിഷേധവും സംഘടിപ്പിച്ചു. സിസ്റ്റർ ലിന്റോയെ സർവീസിൽ നിന്ന് പൂർണ്ണമായി പിരിച്ചുവിടണമെന്ന് ആവശ്യപ്പെട്ടായിരുന്നു പ്രതിഷേധം.
Recent Comments