by Midhun HP News | Oct 30, 2026 | Latest News, കേരളം
കൊച്ചി: സംസ്ഥാനത്ത് വീണ്ടും വൈദ്യുതി ലോഡ് ഷെഡ്ഡിംഗിന് കളമൊരുങ്ങുന്നു. യുഡിഎഫ് സര്‍ക്കാര്‍ അധികാരത്തില്‍ വന്നതിനു ശേഷമുള്ള മൂന്നാമത്തെ വൈദ്യുതി നിയന്ത്രണത്തിനാണ് കേരളം സാക്ഷ്യം വഹിക്കാന്‍ പോകുന്നത്. ഹിമാചല്‍ പ്രദേശില്‍ നിന്നും ഹ്രസ്വകാലാടിസ്ഥാനത്തില്‍ വൈദ്യുതി വാങ്ങുന്നതിനുള്ള കരാര്‍ അംഗീകരിക്കുന്നതില്‍ സര്‍ക്കാര്‍ തലത്തിലുണ്ടായ കാലതാമസമാണ് പുതിയ പ്രതിസന്ധിക്ക് കാരണം.
കേരളപ്പിറവി ദിനമായ നവംബര്‍ 1 മുതല്‍ സംസ്ഥാനത്ത് വൈദ്യുതി ഉപയോഗം ഏറ്റവും കൂടുതലുള്ള സമയത്ത് (പീക്ക് അവറുകളില്‍) 900 മെഗാവാട്ട് വരെ കുറവ് നേരിടാന്‍ സാധ്യതയുണ്ടെന്ന് കെഎസ്ഇബി ഉന്നത ഉദ്യോഗസ്ഥര്‍ അറിയിച്ചു. ആവശ്യകതയും ലഭ്യതയും തമ്മിലുള്ള അന്തരം നികത്തുന്നതിനായി വൈകീട്ട് 6 മണിക്കും അര്‍ധരാത്രിക്കും ഇടയില്‍ നിയന്ത്രണങ്ങള്‍ ഏര്‍പ്പെടുത്താന്‍ കെഎസ്ഇബി നിര്‍ബന്ധിതരായേക്കും. ജൂലൈയിലും സെപ്റ്റംബറിലും പവര്‍ കട്ടുകള്‍ ഉണ്ടായതിന് പിന്നാലെയാണ് പുതിയ പ്രതിസന്ധി.
ഇടവിട്ട് മഴ പെയ്യുന്നുണ്ടെങ്കിലും കഴിഞ്ഞ രണ്ട് ആഴ്ചകളായി പീക്ക് ഹവര്‍ വൈദ്യുതി ഉപഭോഗം 4,900 മെഗാവാട്ടിന് അടുത്താണ് തുടരുന്നത്. സംസ്ഥാനത്ത് വരള്‍ച്ചാ സാഹചര്യം ഉണ്ടായാല്‍ ഇത് 5,500 മെഗാവാട്ട് കടക്കാന്‍ സാധ്യതയുണ്ട്. എന്നാല്‍, നവംബര്‍ 1 മുതല്‍ സംസ്ഥാനത്തിന് ലഭ്യമാകുന്ന പരമാവധി ശേഷി 4,200 മെഗാവാട്ട് ആയിരിക്കും. 2,225 മെഗാവാട്ട് വൈദ്യുതി വാങ്ങുന്നതിനായി കെഎസ്ഇബി സമര്‍പ്പിച്ച പ്രൊപ്പോസലില്‍ ഇലക്ട്രിസിറ്റി റെഗുലേറ്ററി കമ്മീഷന്‍ അനുമതി നല്‍കിയത് 1,000 മെഗാവാട്ടിന് മാത്രമാണ്. അതും യൂണിറ്റിന് 6.90 മുതല്‍ 10 രൂപ വരെ ഉയര്‍ന്ന നിരക്കില്‍.
ഹിമാചല്‍ പ്രദേശില്‍ നിന്ന് വൈദ്യുതി വാങ്ങുന്ന കാര്യത്തില്‍ തീരുമാനമെടുക്കാന്‍ സര്‍ക്കാരിന് സാധിക്കാത്തതാണ് ഏറ്റവും വലിയ തിരിച്ചടിയായത്. പീക്ക് അവറുകളില്‍ യൂണിറ്റിന് 14.50 രൂപ നിരക്കില്‍ 900 മുതല്‍ 1,200 മെഗാവാട്ട് വരെ വൈദ്യുതി നല്‍കാന്‍ ഹിമാചല്‍ പ്രദേശ് സ്റ്റേറ്റ് ഇലക്ട്രിസിറ്റി ബോര്‍ഡ് തയ്യാറായിരുന്നു. ഒക്ടോബര്‍ 1 മുതല്‍ സംസ്ഥാനത്തിന് ഈ വൈദ്യുതി ലഭിച്ചുതുടങ്ങിയിരുന്നു. ഇത് മുന്‍പ് ഏര്‍പ്പെടുത്തിയിരുന്ന പവര്‍ കട്ട് അവസാനിപ്പിക്കാന്‍ കെഎസ്ഇബിയെ സഹായിക്കുകയും ചെയ്തു. എന്നാല്‍ നവംബര്‍ 1 മുതല്‍ അടുത്ത വര്‍ഷം മെയ് 15 വരെയുള്ള കാലയളവിലേക്ക് ഹിമാചലില്‍ നിന്ന് വൈദ്യുതി വാങ്ങുന്നത് തുടരുന്നതിനുള്ള അനുമതി തേടിയുള്ള ഫയല്‍ കഴിഞ്ഞ 22 ദിവസമായി കെട്ടിക്കിടക്കുകയാണ്.
by Midhun HP News | Oct 30, 2026 | Latest News, കേരളം
ഡല്‍ഹി: എല്ലാ മാസങ്ങളിലേതുപോലെ നവംബറിലും സാമ്പത്തിക രംഗത്ത് നിരവധി മാറ്റങ്ങളാണ് വരാന്‍ പോകുന്നത്. ഉപഭോക്താക്കള്‍ക്കും പെന്‍ഷന്‍കാര്‍ക്കും നവംബര്‍ മാസം നിര്‍ണായകമാണ്.
ചരക്കുസേവന നികുതി
നവംബര്‍ ഒന്നുമുതല്‍ വില്‍പ്പനാനന്തര കിഴിവുകള്‍ക്കുള്ള ചരക്കുസേവന നികുതിയുമായി ബന്ധപ്പെട്ട ചട്ടങ്ങള്‍ ലഘൂകരിക്കാനും ഇന്‍വേര്‍ട്ടഡ് ഡ്യൂട്ടി ഘടന നേരിടുന്ന ബിസിനസുകള്‍ക്കുള്ള താല്‍ക്കാലിക റീഫണ്ടുകള്‍ വേഗത്തിലാക്കാനും കേന്ദ്രസര്‍ക്കാര്‍ പദ്ധതിയിടുന്നുണ്ട്. കഴിഞ്ഞ ബജറ്റിലാണ് ഈ നടപടികള്‍ കേന്ദ്രസര്‍ക്കാര്‍ പ്രഖ്യാപിച്ചത്.
പെന്‍ഷന്‍കാര്‍ക്ക് ലൈഫ് സര്‍ട്ടിഫിക്കറ്റുകള്‍
യാതൊരുവിധ തടസ്സവുമില്ലാതെ പെന്‍ഷന്‍ ലഭിക്കുന്നതിന് സര്‍ക്കാര്‍ പെന്‍ഷന്‍കാര്‍ ഓരോ വര്‍ഷവും ലൈഫ് സര്‍ട്ടിഫിക്കറ്റ് സമര്‍പ്പിക്കേണ്ടതുണ്ട്. 80 വയസില്‍ താഴെയുള്ള പെന്‍ഷന്‍കാര്‍ക്ക് നവംബര്‍ ഒന്നുമുതല്‍ ലൈഫ് സര്‍ട്ടിഫിക്കറ്റ് സമര്‍പ്പിക്കാം. 80 വയസും അതില്‍ കൂടുതലുമുള്ളവര്‍ക്ക് ഒക്ടോബര്‍ ഒന്നുമുതല്‍ തന്നെ സമര്‍പ്പിക്കാന്‍ അനുവാദമുണ്ട്. സാധാരണയായി ഓരോ വര്‍ഷവും നവംബര്‍ 30 ആണ് സര്‍ട്ടിഫിക്കറ്റ് സമര്‍പ്പിക്കേണ്ട അവസാന തീയതി
റിട്ടേണ്‍ സമര്‍പ്പിക്കാനുള്ള സമയപരിധി നീട്ടി
അക്കൗണ്ടുകള്‍ ഓഡിറ്റിന് വിധേയമാക്കേണ്ട നികുതിദായകര്‍ക്ക് ആദായനികുതി റിട്ടേണ്‍ സമര്‍പ്പിക്കുന്നതിനുള്ള സമയപരിധി നീട്ടിയിട്ടുണ്ട്. 2026-27 അസസ്‌മെന്റ് വര്‍ഷത്തേയ്ക്കുള്ള ആദായനികുതി റിട്ടേണ്‍ സമര്‍പ്പിക്കുന്നതിനുള്ള സമയപരിധി ഒക്ടോബര്‍ 31ല്‍ നിന്ന് നവംബര്‍ 21 വരെയാണ് നീട്ടിയത്. ഈ ഇളവ് എല്ലാ വ്യക്തികള്‍ക്കും ബാധകമല്ല. നിശ്ചിത വിഭാഗത്തില്‍പ്പെട്ട നികുതിദായകര്‍ക്ക് മാത്രമാണ് ഇത് ബാധകമാകുക.
ഭിന്നശേഷിക്കാര്‍ക്കുള്ള പെന്‍ഷന്‍
ഭിന്നശേഷി പെന്‍ഷന്‍ ആനുകൂല്യങ്ങള്‍ വിപുലീകരിക്കുന്നതിനായി കേന്ദ്ര മന്ത്രിസഭ അടുത്തിടെ ചില മാറ്റങ്ങള്‍ക്ക് അംഗീകാരം നല്‍കിയിരുന്നു. ഇതില്‍ ഭിന്നശേഷിയുടെ കുറഞ്ഞ പരിധി 80 ശതമാനത്തില്‍ നിന്ന് 40 ശതമാനമായി കുറയ്ക്കുന്നതും അര്‍ഹതയ്ക്കായി നിശ്ചയിച്ചിരുന്ന കുറഞ്ഞ പ്രായപരിധി ഒഴിവാക്കുന്നതും ഉള്‍പ്പെടുന്നു. അംഗീകരിച്ച പരിഷ്‌കാര നടപടികള്‍ പ്രകാരം, 80 വയസില്‍ താഴെയുള്ള അര്‍ഹരായ ഗുണഭോക്താക്കള്‍ക്ക് പ്രതിമാസം 375 രൂപയും 80 വയസും അതിന് മുകളിലും പ്രായമുള്ളവര്‍ക്ക് പ്രതിമാസം 625 രൂപയും കേന്ദ്രസഹായമായി നല്‍കാന്‍ നിര്‍ദേശിക്കുന്നു. എന്നാല്‍ പുതുക്കിയ മാര്‍ഗനിര്‍ദേശം ഇതുവരെ പുറത്തിറങ്ങിയിട്ടില്ല. അതിനാല്‍ നവംബര്‍ ഒന്നുമുതല്‍ ഈ മാറ്റങ്ങള്‍ പ്രാബല്യത്തില്‍ വരുമെന്ന് പ്രതീക്ഷിക്കുന്നില്ല.
എല്‍പിജി സിലിണ്ടര്‍
പൊതുമേഖല എണ്ണ വിപണന കമ്പനികള്‍ ഓരോ മാസത്തിന്റെയും തുടക്കത്തില്‍ എല്‍പിജി സിലിണ്ടര്‍ വില അവലോകനം ചെയ്യാറുണ്ട്. വാണിജ്യ ആവശ്യങ്ങള്‍ക്കുള്ള എല്‍പിജി സിലിണ്ടര്‍ വിലയില്‍ മാറ്റം വന്നാല്‍, അത് റെസ്റ്റോറന്റുകള്‍, ഹോട്ടലുകള്‍ എന്നിവയെ ബാധിച്ചേക്കാം. എന്നാല്‍ ഇതുവരെ ഇതുസംബന്ധിച്ച് സൂചനകളൊന്നും നല്‍കിയിട്ടില്ല.
by Midhun HP News | Oct 30, 2026 | Latest News, കേരളം
പാലക്കാട്: കറുകപുത്തൂരിലെ പ്രവർത്തനരഹിതമായ ക്വാറിയിലെ ആഴമേറിയ വെള്ളക്കെട്ടിലേക്ക് ലോറി മറിഞ്ഞ് കാണാതായ ഡ്രൈവറുടെ മൃതദേഹം കണ്ടെത്തി. 24 മണിക്കൂർ നീണ്ട ഊർജ്ജിതമായ തിരച്ചിലിനൊടുവിൽ വെള്ളിയാഴ്ച രാവിലെയാണ് മൃതദേഹം കണ്ടെടുത്തത്. പാലക്കാട് തിരുമിറ്റക്കോട് ചഴിയാട്ടിരി സ്വദേശി സി. അബു താഹിർ (40) ആണ് മരിച്ചത്.
വ്യാഴാഴ്ച രാവിലെ എട്ടു മണിയോടെയാണ് കറുകപുത്തൂരിൽ അപകടം നടന്നത്. പ്രവർത്തനരഹിതമായ ക്വാറിയിലേക്ക് മണൽ ഇറക്കുന്നതിനായി എത്തിയതായിരുന്നു താഹിർ. മണൽ തട്ടാനായി ലോറി പുറകിലേക്ക് എടുക്കുന്നതിനിടെ നിയന്ത്രണം തെറ്റി ക്വാറിയിലെ ഖനനം മൂലം രൂപപ്പെട്ട 15 അടിയിലധികം ആഴമുള്ള വെള്ളക്കെട്ടിലേക്ക് വാഹനം പതിക്കുകയായിരുന്നു.
വിവരമറിഞ്ഞ് വ്യാഴാഴ്ച രാവിലെ 8.30-ഓടെ ഫയർഫോഴ്സും രക്ഷാപ്രവർത്തകരും സ്ഥലത്തെത്തി തെരച്ചിൽ ആരംഭിച്ചു. ഫയർഫോഴ്സിലെ സ്കൂബ ഡൈവർമാർ നടത്തിയ പരിശോധനയിൽ വ്യാഴാഴ്ച വൈകുന്നേരത്തോടെയാണ് വെള്ളത്തിനടിയിൽ മുങ്ങിപ്പോയ ലോറി കണ്ടെത്താനായത്. തുടർന്ന് അർദ്ധരാത്രിയോടെ വലിയ ക്രെയിൻ ഉപയോഗിച്ച് വാഹനം കരയ്ക്ക് കയറ്റിയെങ്കിലും ക്യാബിനുള്ളിൽ താഹിറിനെ കണ്ടെത്താൻ കഴിഞ്ഞിരുന്നില്ല.
തുടർന്ന് വെള്ളിയാഴ്ച പുലർച്ചെ സ്കൂബ സംഘം ജലാശയത്തിന്റെ മറ്റ് ഭാഗങ്ങളിൽ നടത്തിയ തിരച്ചിലിലാണ് രാവിലെ 7.30-ഓടെ താഹിറിന്റെ മൃതദേഹം കണ്ടെത്തിയത്. ഗൾഫിൽനിന്ന് മടങ്ങിയെത്തിയ ശേഷം ഉപജീവനത്തിനായി ലോറി ഡ്രൈവറായി ജോലി ചെയ്തുവരികയായിരുന്നു താഹിറെന്ന് പൊലീസ് പറഞ്ഞു. പോസ്റ്റ്‌മോർട്ടം നടപടികൾക്ക് ശേഷം മൃതദേഹം ബന്ധുക്കൾക്ക് വിട്ടുനൽകും. സംഭവത്തിൽ ചാലിശ്ശേരി പൊലീസ് കേസ് രജിസ്റ്റർ ചെയ്തു.
by Midhun HP News | Oct 30, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവില കുത്തനെ ഇടിഞ്ഞു. ഇന്ന് പവന് ഒറ്റയടിക്ക് 1240 രൂപയാണ് കുറഞ്ഞത്. 1,04,320 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 155 രൂപയാണ് കുറഞ്ഞത്. 13,040 രൂപയാണ് ഒരു ഗ്രാം സ്വര്‍ണത്തിന്റെ വില.
ആഗോള വിപണിയില്‍ എണ്ണവില കൂടുന്നതും അമേരിക്കയില്‍ പണപ്പെരുപ്പനിരക്ക് ഉയര്‍ന്നതോടെ വീണ്ടും പലിശനിരക്ക് ഉയര്‍ത്തുമെന്ന റിപ്പോര്‍ട്ടുകളുമാണ് സ്വര്‍ണവിലയെ സ്വാധീനിച്ചത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് 116 ഡോളറിന് മുകളിലാണ്. അമേരിക്കയില്‍ പണപ്പെരുപ്പം കഴിഞ്ഞമാസം 3.6 ശതമാനമായി ഉയര്‍ന്നിരിക്കുകയാണ്. പണപ്പെരുപ്പം രണ്ടു ശതമാനമായി നിയന്ത്രിക്കുകയാണ് യുഎസ് കേന്ദ്രബാങ്കായ ഫെഡറല്‍ റിസര്‍വിന്റെ ലക്ഷ്യം. ഈ ലക്ഷ്യം നേടാന്‍ ഫെഡറല്‍ റിസര്‍വ് അടിസ്ഥാന പലിശനിരക്ക് കൂട്ടാനുള്ള സാധ്യത 75 ശതമാനത്തിലധികമാണെന്ന് വിപണി വിദഗ്ധര്‍ പറയുന്നു. ഇതോടെ ഡോളറും ബോണ്ട് യീല്‍ഡും കരുത്താര്‍ജ്ജിക്കാനുള്ള സാധ്യതകള്‍ ഉണ്ട്. ഇതാണ് സ്വര്‍ണവില കുത്തനെ ഇടിയാന്‍ കാരണം.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Oct 30, 2026 | Latest News, കേരളം
തിരുവനന്തപുരം: സംസ്ഥാനത്തെ മന്ത്രിമാരുടെയും എംഎൽഎമാരുടെയും ശമ്പളവും അലവൻസുകളും വർധിപ്പിക്കുന്നതിനുള്ള ബില്ല് നിയമസഭ പാസ്സാക്കി. പുതുക്കിയ നിരക്കനുസരിച്ച് എംഎൽഎമാരുടെ പ്രതിമാസ വരുമാനം 70,000 രൂപയിൽ നിന്ന് 98,000 രൂപയായും മന്ത്രിമാരുടേത് ഒരു ലക്ഷത്തിൽ നിന്ന് 1,33,000 രൂപയായുമാണ് ഉയർന്നത്. ഭരണ-പ്രതിപക്ഷാംഗങ്ങൾ ഒറ്റക്കെട്ടായി ആവശ്യപ്പെട്ടതിനെ തുടർന്നാണ് നടപടി.
മുൻ എംഎൽഎമാരുടെ പെൻഷനും വർധിപ്പിച്ചിട്ടുണ്ട്. മിനിമം പെൻഷൻ 8,000 രൂപയിൽ നിന്ന് 10,000 രൂപയാക്കി. രണ്ടു വർഷം പൂർത്തിയാക്കിയവർക്ക് 10,000 രൂപയും മൂന്നു വർഷം പൂർത്തിയാക്കിയവർക്ക് 15,000 രൂപയും പ്രതിമാസ പെൻഷൻ ലഭിക്കും. കൂടാതെ, 70 വയസ്സ് തികയുമ്പോൾ 4,000 രൂപയും 80 വയസ്സ് തികയുമ്പോൾ 5,000 രൂപയും അധിക പെൻഷനായി നൽകും.
പ്രധാന വർധനവുകൾ
എംഎൽഎമാർ: മണ്ഡലം അലവൻസ് 35,000 രൂപയായും (പഴയത് 25,000) യാത്രാബത്ത 30,000 രൂപയായും (പഴയത് 20,000) ഉയർത്തി. ഇൻഫർമേഷൻ ബത്ത 8,000 രൂപയും മറ്റ് ചെലവുകൾക്ക് 13,000 രൂപയുമാക്കി. ദിനബത്ത സംസ്ഥാനത്തിനകത്ത് 1,500 രൂപയായും പുറത്ത് 1,800 രൂപയായും വർധിപ്പിച്ചു.
മന്ത്രിമാർ, പ്രതിപക്ഷ നേതാവ്, ചീഫ് വിപ്പ്: ആകെ ശമ്പളം 1,08,000 രൂപയിൽ നിന്ന് 1,22,000 രൂപയായി ഉയർന്നു. മണ്ഡലം ബത്ത 45,000 രൂപയായും കൺവേയൻസ് അലവൻസ് 25,000 രൂപയായും റോഡ് യാത്രാബത്ത കിലോമീറ്ററിന് 20 രൂപയായും പുതുക്കി.
2018-ലാണ് അലവൻസുകൾ അവസാനമായി പരിഷ്കരിച്ചത്. 2022-ൽ ശമ്പള പരിഷ്കരണ ശുപാർശ ലഭിച്ചിരുന്നെങ്കിലും സാമ്പത്തിക പ്രതിസന്ധി കാരണം നടപ്പിലാക്കുന്നത് മാറ്റിവെക്കുകയായിരുന്നു.
Recent Comments