by Midhun HP News | Oct 28, 2026 | Latest News, ജില്ലാ വാർത്ത
തിരുവനന്തപുരം: ലോട്ടറിയുടെ മറവില്‍ സോഷ്യല്‍ മീഡിയ, ആര്‍ട്ടിഫിഷ്യല്‍ ഇന്റലിജന്‍സ് സാങ്കേതികവിദ്യകള്‍ ഉപയോഗിച്ച് വ്യാജലോട്ടറി വില്‍പന നടത്തുന്നവര്‍ക്കെതിരെ കര്‍ശന നടപടി സ്വീകരിക്കുമെന്ന് മുഖ്യമന്ത്രി വിഡി സതീശന്‍. ഇത്തരം തട്ടിപ്പുകള്‍ മുലം ഖജനാവിന് വലിയ സാമ്പത്തിക നഷ്ടമാണ് ഉണ്ടാകുന്നതെന്നും മുഖ്യമന്ത്രി പറഞ്ഞു.
കൂടാതെ ലോട്ടറി തൊഴിലാളികള്‍ക്കും പൊതുജനങ്ങള്‍ക്കും ഉണ്ടാകുന്ന കഷ്ട നഷ്ടങ്ങളും തുടങ്ങി ലോട്ടറി മേഖലയിലുമായി ബന്ധപ്പെട്ട് നിരവധി പ്രശ്‌നങ്ങള്‍ ഇതുണ്ടാക്കുന്നുണ്ട്. വലിയ ഒരു ലോബിയായിട്ട്, വലിയ ഒരു ക്രൈമായിട്ട് ഇത് മാറുകയാണ്. പ്രത്യേകിച്ച് പാലക്കാട് പോലെയുള്ള ജില്ലകളിലാണ് ഇത് ഏറ്റവും കൂടുതലായി കാണുന്നതെന്നും മുഖ്യമന്ത്രി പറഞ്ഞു.
ഇതിനെതിരെ ലോട്ടറി വകുപ്പ് കര്‍ശന നടപടിയാണ് എടുക്കുന്നതെന്നും മുഖ്യമന്ത്രി സഭയില്‍ പറഞ്ഞു. ലോട്ടറി റഗുലേഷന്‍ ആക്ട് അനുസരിച്ച് ഇങ്ങനെ ചെയ്തു കഴിഞ്ഞാല്‍ രണ്ട് വര്‍ഷം വരെ തടവ് ശിക്ഷ കിട്ടാവുന്ന ക്രിമിനല്‍ കുറ്റമാണ്. വലിയ ഒഫന്‍സ് ആണ് ഇവര്‍ ചെയ്യുന്നത്. വ്യാപകമായി വ്യാജ ലോട്ടറി അടിച്ച് വില്‍ക്കുകയും ആര്‍ട്ടിഫിഷ്യല്‍ ഇന്റലിജന്‍സ് ഉപയോഗിച്ച് യാഥാര്‍ത്ഥ്യമാണെന്ന രീതിയില്‍ ആളുകളെ കബളിപ്പിക്കുകയും ചെറിയ സമ്മാനം നല്‍കിയും വലിയ സമ്മാനം ലഭിച്ചാല്‍ ഫോണ്‍ ഓഫ് ചെയ്തു പോകുകയും ചെയ്യുന്ന വലിയ തട്ടിപ്പാണ് നടക്കുന്നത്. ഈ തട്ടിപ്പുകാരെ മുഴുവന്‍ നിയമത്തിന്റെ മുന്നില്‍ കൊണ്ടുവരാനുള്ള കര്‍ശനമായ നടപടികള്‍ സര്‍ക്കാര്‍ സ്വീകരിക്കുമെന്നും മുഖ്യമന്ത്രി പറഞ്ഞു.
by Midhun HP News | Oct 28, 2026 | Latest News, കായികം, ജില്ലാ വാർത്ത
ഡല്‍ഹി: ന്യൂസിലന്‍ഡിനെതിരായ മൂന്നാം ടി20 അന്താരാഷ്ട്ര മത്സരത്തില്‍ കൗമാരതാരം വൈഭവ് സൂര്യവംശിക്ക് വേണ്ടി ഓപ്പണിങ് സ്ഥാനം വിക്കറ്റ് കീപ്പര്‍ ബാറ്റര്‍ സഞ്ജു സാംസണ്‍ വിട്ടുകൊടുക്കുകയായിരുന്നുവെന്ന് അഭിഭേഷ് ശർമ. ഇത് അദ്ദേഹത്തിന്റെ വ്യക്തിത്വത്തെയാണ് കാണിക്കുന്നത് എന്ന് പറഞ്ഞ് സഞ്ജുവിനെ അഭിഷേക് ശർമ പ്രശംസിച്ചു.
മത്സരത്തില്‍ ഇന്ത്യ ആറു വിക്കറ്റിന്റെ വിജയമാണ് നേടിയത്. 38 പന്തില്‍ 113 റണ്‍സെടുത്ത അഭിഷേക് ശർമയുടെ തകര്‍പ്പന്‍ ബാറ്റിങ്ങ് ആണ് അനായാസ വിജയം നേടി കൊടുത്തത്. മുന്‍ മത്സരത്തില്‍ മൂന്നാമനായി ഇറങ്ങിയ വൈഭവ് സൂര്യവംശി ഇത്തവണ ഓപ്പണര്‍ ആയി ഇറങ്ങി അഭിഷേക് ശർമയ്ക്ക് മികച്ച പിന്തുണയാണ് നല്‍കിയത്. 19 പന്തില്‍ 45 റണ്‍സ് ആയിരുന്നു വൈഭവിന്റെ സംഭാവന. ഇതിന് മുന്‍പുള്ള മത്സരങ്ങളില്‍ അഭിഷേക് ശര്‍മ്മയ്‌ക്കൊപ്പം സഞ്ജു സാംസണ്‍ ആണ് ഓപ്പണര്‍ ആയി ഇറങ്ങിയത്. ഇത്തവണ വൈഭവ് സൂര്യവംശിക്ക് വേണ്ടി ഓപ്പണിങ് സ്ഥാനം വേണ്ടെന്ന് വച്ച സഞ്ജു സാംസണ്‍ വണ്‍ഡൗണ്‍ ആയാണ് ഇറങ്ങിയത്. ഇഷാന്‍ കിഷന്‍ പരിക്കേറ്റതിനെ തുടര്‍ന്നാണ് വൈഭവ് സൂര്യവംശിക്ക് ടൂര്‍ണമെന്റില്‍ അവസരം ലഭിച്ചത്. രണ്ടാം മത്സരത്തില്‍ 61 റണ്‍സ് നേടി പ്ലെയര്‍ ഓഫ് ദി മാച്ച് പുരസ്‌കാരം നേടി മികച്ച ഫോമില്‍ നില്‍ക്കുമ്പോഴാണ് ഓപ്പണിങ് സ്ഥാനം സഞ്ജു ത്യജിച്ചത്. ടീമംഗങ്ങള്‍ ഒന്നടങ്കം സഞ്ജുവിന്റെ വ്യക്തിത്വത്തെ പുകഴ്ത്തുകയാണ്.
കഴിഞ്ഞ മത്സരത്തില്‍ സഞ്ജു ഭായി ബാറ്റ് ചെയ്ത രീതി നോക്കുമ്പോള്‍, തനിക്ക് പരിചിതമായ ബാറ്റിങ് സ്ഥാനം വിട്ടുകൊടുക്കുക എന്നത് എളുപ്പമുള്ള കാര്യമല്ല. അത് അദ്ദേഹത്തിന്റെ വ്യക്തിത്വത്തെയാണ് കാണിക്കുന്നത്. ടീമിലെ എല്ലാവരും നിസ്വാര്‍ഥരാണ് എന്നാണ് ഇത് കാണിക്കുന്നത്. മറ്റുള്ളവരുടെ നേട്ടങ്ങളില്‍ സന്തോഷിക്കുന്നവരാണ് ടീമംഗങ്ങള്‍. ഒരു മികച്ച ടീമിന്റെ അടയാളം ഇതാണ്’- ബിസിസിഐ ടിവിയോട് അഭിഷേക് ശർമ പറഞ്ഞു.
‘ആദ്യ പന്ത് നേരിട്ടപ്പോള്‍ തന്നെ വൈഭവ് തന്റെ ആക്രമണോത്സുകത പ്രകടിപ്പിച്ചു. നോണ്‍- സ്‌ട്രൈക്കര്‍ എന്‍ഡില്‍ നിന്ന് അത് കണ്ടപ്പോള്‍ എനിക്കും വലിയ ആവേശമായി. വൈഭവ് കളിച്ച രീതിക്ക് പ്രത്യേക അഭിനന്ദനം അര്‍ഹിക്കുന്നു’- വൈഭവ് സൂര്യവംശിയെ പുകഴ്ത്താനും അഭിഷേക് ശർമ മറന്നില്ല.
by Midhun HP News | Oct 28, 2026 | Latest News, കേരളം
ദേശീയപാതകളിലെ ടോൾ പ്ലാസകൾക്ക് സമീപം താമസിക്കുന്ന സ്വകാര്യ വാഹന ഉടമകൾക്ക് ആശ്വാസമായി കേന്ദ്ര സർക്കാരിന്റെ പുതിയ വാർഷിക ടോൾ പാസ് പദ്ധതി. ടോൾ പ്ലാസയുടെ സ്ഥാനം അനുസരിച്ച് 1,500 രൂപയും 3,000 രൂപയും നിരക്കിൽ പാസ് ലഭ്യമാക്കാനാണ് തീരുമാനം. ടോൾ പ്ലാസയുടെ 20 കിലോമീറ്റർ പരിധിക്കുള്ളിൽ താമസിക്കുന്ന അർഹരായവർക്കാണ് ഈ ആനുകൂല്യം ലഭിക്കുക. 2026 നവംബർ 1 മുതൽ പുതിയ സംവിധാനം പ്രാബല്യത്തിൽ വരും.
റോഡ് ഗതാഗത, ഹൈവേ മന്ത്രാലയം ഒക്ടോബർ 26-ന് പുറത്തിറക്കിയ വിജ്ഞാപനത്തിലാണ് പദ്ധതിയുടെ വിശദാംശങ്ങൾ വ്യക്തമാക്കിയത്. ടോൾ പ്ലാസകൾക്ക് സമീപം താമസിക്കുന്നവർക്ക് ടോൾ ചെലവിൽ ഇളവ് നൽകുകയും യാത്രാഭാരം കുറയ്ക്കുകയുമാണ് പദ്ധതിയുടെ ലക്ഷ്യം. കലണ്ടർകാണുക
നഗരത്തിന് അകത്തോ പുറത്തോ? നിരക്കിൽ വ്യത്യാസം
ടോൾ പ്ലാസ സ്ഥിതി ചെയ്യുന്ന പ്രദേശത്തിന്റെ അടിസ്ഥാനത്തിലാണ് വാർഷിക പാസ് നിരക്ക് നിശ്ചയിച്ചിരിക്കുന്നത്. മുനിസിപ്പൽ അല്ലെങ്കിൽ പ്രാദേശിക പട്ടണ പരിധിക്ക് പുറത്തുള്ള ടോൾ പ്ലാസകൾക്ക് സമീപം താമസിക്കുന്ന അർഹരായ സ്വകാര്യ വാഹന ഉടമകൾക്ക് 1,500 രൂപ നൽകി വാർഷിക പാസ് നേടാം. നഗരപരിധിക്കുള്ളിലുള്ള ടോൾ പ്ലാസകൾക്ക് സമീപം താമസിക്കുന്നവർക്ക് പാസ് നിരക്ക് 3,000 രൂപ ആയിരിക്കും.
എന്നാൽ ടോൾ പ്ലാസയിൽനിന്ന് 20 കിലോമീറ്റർ പരിധിക്കുള്ളിൽ താമസിക്കുന്നു എന്നതുകൊണ്ടുമാത്രം എല്ലാവർക്കും ആനുകൂല്യം ലഭിക്കില്ല. പദ്ധതിയിൽ നിർദേശിച്ചിട്ടുള്ള മറ്റ് നിബന്ധനകളും പാലിക്കണം
എല്ലാവർക്കും ലഭിക്കില്ല; നിബന്ധനകൾ അറിയണം
ക്ലോസ്ഡ് യൂസർ ഫീ കളക്ഷൻ സംവിധാനത്തിന് കീഴിൽ പ്രവർത്തിക്കുന്ന ദേശീയപാതകളിലും എക്‌സ്പ്രസ് വേകളിലും ഈ ആനുകൂല്യം ലഭ്യമാകില്ല. ടോൾ പ്ലാസയ്ക്ക് സമീപം സർവീസ് റോഡോ ബദൽ റോഡോ ലഭ്യമായ സ്ഥലങ്ങളിലും പദ്ധതിയുടെ ആനുകൂല്യം അനുവദിക്കില്ലെന്നാണ് വ്യവസ്ഥ.
വാണിജ്യേതര ആവശ്യങ്ങൾക്കായി രജിസ്റ്റർ ചെയ്ത സ്വകാര്യ വാഹനങ്ങൾക്കു മാത്രമാണ് പാസ് ലഭിക്കുക. കൂടാതെ, വാഹനത്തിൽ സാധുവായതും പ്രവർത്തനക്ഷമവുമായ ഫാസ്ടാഗ് ഉണ്ടായിരിക്കണം. അർഹത ഉറപ്പാക്കുന്നതിന് ഈ നിബന്ധനകൾ നിർണായകമാണ്.
രാജ്യത്തെ എല്ലാ ടോൾ പ്ലാസകളിലും ഉപയോഗിക്കാനാകുമോ?
ഇല്ല. പുതിയ വാർഷിക പാസ് രാജ്യത്തെ എല്ലാ ടോൾ പ്ലാസകളിലും ഉപയോഗിക്കാവുന്ന പൊതുപാസല്ല. ആനുകൂല്യം അനുവദിക്കുന്ന നിർദ്ദിഷ്ട ടോൾ പ്ലാസയുമായി ബന്ധപ്പെട്ടാണ് ഇത് ബാധകമാകുക. അതിനാൽ പാസ് എടുക്കുന്നതിന് മുമ്പ് സ്വന്തം താമസസ്ഥലവും ബന്ധപ്പെട്ട ടോൾ പ്ലാസയും പദ്ധതിയുടെ നിബന്ധനകൾക്ക് കീഴിൽ വരുന്നതാണോയെന്ന് പരിശോധിക്കണം.
നവംബർ 1 മുതൽ പദ്ധതി നടപ്പിലാകുന്നതോടെ ദേശീയപാതകളിലെ ടോൾ പ്ലാസകൾക്ക് സമീപം താമസിക്കുന്ന അർഹരായ സ്വകാര്യ വാഹന ഉടമകൾക്ക് വാർഷിക ചെലവ് കുറയ്ക്കാൻ അവസരം ലഭിക്കും. എന്നാൽ പാസ് ലഭിക്കാനുള്ള യോഗ്യതയും ബാധകമായ നിരക്കും ഉറപ്പാക്കിയശേഷം മാത്രമേ അപേക്ഷിക്കാവൂ.
by Midhun HP News | Oct 28, 2026 | Latest News, കേരളം
ദീർഘകാലമായി ടാക്സ് അടക്കാതെ നികുതി കിടിശ്ശികയായികിടക്കുന്ന മോട്ടോർ വാഹനങ്ങൾക്കായി കേരള സർക്കാർ *ഒറ്റത്തവണ തീർപ്പാക്കൽ പദ്ധതി* (One Time Settlement Scheme) വീണ്ടും നടപ്പിലാക്കുന്നു. 2022 മാർച്ച് 31 ന് ശേഷം ടാക്സ് അടക്കാൻ കഴിയാത്തതും അതിന് മുൻപ് എത്ര കാലത്തേക്കും നികുതി കിടിശ്ശികയുള്ള വാഹന ഉടമകൾക്ക് ഈ സുവർണ്ണാവസരം പ്രയോജനപ്പെടുത്താം. നാല് വർഷത്തിൽ കൂടുതലായി എത്ര കാലത്തെ കുടിശ്ശികയുണ്ടെങ്കിലും 01.04.2022 മുതൽ 31.03.2026 വരെയുള്ള നികുതി കുടിശ്ശികയുടെ നിശ്ചിത ശതമാനം തുക മാത്രം താഴെ പറയുന്ന നിരക്കിൽ അടച്ച് തീർപ്പാക്കാൻ ഈ പദ്ധതി അവസരം നൽകുന്നു:
*നോൺ-ട്രാൻസ്പോർട്ട് (Private)* *വാഹനങ്ങൾ:* 2026 മാർച്ച് 31 വരെയുള്ള നാല് വർഷത്തെ നികുതി കുടിശ്ശികയുടെ 40 ശതമാനം മാത്രം.
*ട്രാൻസ്പോർട്ട് വാഹനങ്ങൾ:* 2026 മാർച്ച് 31 വരെയുള്ള നാല് വർഷത്തെ നികുതി കുടിശ്ശികയുടെ 30 ശതമാനം മാത്രം.
ഈ ഒറ്റത്തവണ നികുതി തീർപ്പാക്കൽ സൗകര്യം *2027 മാർച്ച് 31 വരെ* ലഭ്യമായിരിക്കും. പദ്ധതി പ്രയോജനപ്പെടുത്തുന്ന വാഹന ഉടമകളെ ഗ്രീൻ ടാക്സ് അടയ്ക്കുന്നതിൽ നിന്നും ക്ഷേമനിധി രസീത് ഹാജരാക്കുന്നതിൽ നിന്നും ഒഴിവാക്കിയിട്ടുണ്ട്. മോഷ്ടിക്കപ്പെട്ടതോ പൊളിച്ചുമാറ്റിയതോ ഉപയോഗശൂന്യമായതോ ആയ വാഹനങ്ങളുടെ ഉടമകൾക്ക് മതിയായ രേഖകൾ സമർപ്പിച്ചാൽ നികുതി ബാധ്യതയിൽ നിന്ന് ഇളവ് ലഭിക്കുന്നതാണ്. റവന്യൂ റിക്കവറി നടപടികൾ നേരിടുന്നവർക്കും നികുതിയോടൊപ്പം റവന്യു കളക്ഷൻ ചാർജ് അടച്ച് ഈ പദ്ധതിയുടെ പ്രയോജനം നേടാം.
വാഹനം നിലവിലില്ല എന്ന നിലയിൽ ഒറ്റത്തവണ തീർപ്പാക്കൽ പദ്ധതി പ്രകാരം ബാധ്യത അവസാനിപ്പിച്ച വാഹനം ഭാവിയിൽ റോഡിൽ ഉപയോഗിക്കുന്നതായി കണ്ടെത്തിയാൽ ഇളവില്ലാതെ യഥാർത്ഥ നികുതി പൂർണ്ണമായും ഒടുക്കേണ്ടിവരുന്നതാണ്.
by Midhun HP News | Oct 28, 2026 | Latest News, ദേശീയ വാർത്ത
ഷാര്‍ജ: കല്‍ബ ക്ലോക്ക് ടവറിന് സമീപം തിരക്ക് കുറയ്ക്കാന്‍ സ്ത്രീകള്‍ക്കായി പ്രത്യേക ടവര്‍ നിര്‍മിക്കുമെന്ന് ഷാര്‍ജ ഭരണാധികാരിയും സുപ്രീം കൗണ്‍സില്‍ അംഗവുമായ ഡോ. ഷെയ്ഖ് സുല്‍ത്താന്‍ ബിന്‍ മുഹമ്മദ് അല്‍ ഖാസിമി. കല്‍ബ യൂണിവേഴ്‌സിറ്റിക്ക് സമീപമാണ് പുതിയ പദ്ധതി യാഥാര്‍ഥ്യമാവുക. ഷാര്‍ജ റേഡിയോ ആന്‍ഡ് ടിവിയുടെ ‘അല്‍ ഖാത്ത് അല്‍ മുബാഷിര്‍’ (നേര്‍രേഖ) പരിപാടിയിലാണ് ഇക്കാര്യം അറിയിച്ചത്.
പുതിയ ടവറിനോട് ചേര്‍ന്ന് വിശാലമായ പാര്‍ക്കിങ് സൗകര്യങ്ങളുള്ള പൂന്തോട്ടവും വിവിധ വിനോദങ്ങള്‍ അടങ്ങിയ ഇന്‍ഡോര്‍ ഗെയിംസ് ഹാളും സജ്ജീകരിക്കുമെന്ന് ഷെയ്ഖ് സുല്‍ത്താന്‍ വ്യക്തമാക്കി. ഷാര്‍ജയിലുടനീളം സാമൂഹിക സേവന സാന്ത്വന കേന്ദ്രങ്ങള്‍ വ്യാപിപ്പിക്കുന്നതിന്റെ ഭാഗമായാണ് പുതിയ നടപടി.
ഖോര്‍ഫക്കാന്‍ റോഡില്‍ പുരുഷന്മാര്‍ക്കും സ്ത്രീകള്‍ക്കുമായി പ്രത്യേക സൗകര്യങ്ങളോടെയുള്ള സംയോജിത പരിചരണ നഗരത്തിനും ഷാര്‍ജ ഭരണാധികാരി അംഗീകാരം നല്‍കിയിട്ടുണ്ട്. പ്രായമായവര്‍ക്കായുള്ള 2 സംരക്ഷണ കേന്ദ്രങ്ങള്‍, 2 ഫിസിയോതെറപ്പി മന്ദിരങ്ങള്‍, ലഹരിവിമുക്തി നേടുന്നവര്‍ക്കുള്ള 2 പുനരധിവാസ കേന്ദ്രങ്ങള്‍, 2 ശിശു സംരക്ഷണ കേന്ദ്രങ്ങള്‍, വനിതാ സംരക്ഷണ കേന്ദ്രം, ഇവന്റ്‌സ് സ്‌ക്വയര്‍, സോഷ്യല്‍ സെന്റര്‍, പൂന്തോട്ടങ്ങള്‍, പള്ളി, 390 വാഹനങ്ങള്‍ക്കുള്ള പാര്‍ക്കിങ് സൗകര്യം എന്നിവ ഇതിലുണ്ടാകും.
കല്‍ബ ബീച്ചില്‍ 700 മീറ്റര്‍ ദൈര്‍ഘ്യമുള്ള തീരദേശ വികസന പദ്ധതി 2026 ഡിസംബറോടെ പൂര്‍ത്തിയായേക്കും. റസ്റ്ററന്റുകള്‍, കഫേകള്‍, കിയോസ്‌കുകള്‍, ഓട്ടത്തിനും സൈക്ലിങ്ങിനുമുള്ള പ്രത്യേക പാതകള്‍, ഫുട്‌ബോള്‍-വോളിബോള്‍ കോര്‍ട്ടുകള്‍, കുട്ടികളുടെ കളിസ്ഥലങ്ങള്‍ എന്നിവ പദ്ധതിയിലുണ്ട്.
Recent Comments