കേരളത്തിന്റെ കലാരൂപങ്ങൾക്ക് ഇനി പുതുജീവൻ; വർക്കലയിൽ രംഗകലാകേന്ദ്രം സജ്ജമായി

by Midhun HP News | Jul 1, 2022 | Latest News, ജില്ലാ വാർത്ത

കേരളത്തിന്റെ കലാരൂപങ്ങൾ പുനരുജ്ജീവിപ്പിക്കാൻ കേരളത്തനിമയുടെ മാറ്റിൽ വർക്കലയിൽ രംഗകലാകേന്ദ്രം സജ്ജമായി. ലോക സാംസ്‌കാരികകേന്ദ്രമാക്കി വർക്കലയെ മാറ്റാൻ ഒരുക്കുന്ന സംസ്ഥാന സർക്കാർ സംരംഭമാണ് രംഗകലാകേന്ദ്രം. പ്രാചീനവും ആധുനികവുമായ സമൃദ്ധ സംസ്‌കൃതിയെപ്പറ്റി പഠനാന്വേഷകർക്ക് കളമൊരുക്കുന്നതുമാണ് ഈ കേന്ദ്രം.

നാടൻ കലകളുടേയും ആയോധനകലകളുടേയും സംസ്‌കാരവും പൈതൃകവും തനത് ടൂറിസവും ലോകമെമ്പാടും പ്രചരിപ്പിക്കുകയാണ് കലാകേന്ദ്രത്തിന്റെ ലക്ഷ്യം. കേരളത്തിൽ അന്യം നിന്നുപോകുന്ന പരമ്പരാഗത കലകളേയും ഗിരിവർഗ്ഗ കലാരൂപങ്ങളെയും സംരക്ഷിക്കുന്നതിനും ക്ലാസ്സിക്കൽ കലാരൂപങ്ങളെ പരിപോഷിപ്പിക്കുന്നതിനും ലക്ഷ്യമിടുന്ന കേന്ദ്രമാണ് വർക്കലയിൽ രൂപം കൊള്ളുന്നത്.

ടൂറിസം വകുപ്പിന്റെ കീഴിലുള്ള വർക്കലയിലെ സർക്കാർ ഗസ്റ്റ് ഹൗസ് പരിസരത്ത് മൂന്നേകാൽ ഏക്കർ സ്ഥലത്താണ് രംഗകലാ കേന്ദ്രം പണിക്കഴിപ്പിച്ചിരിക്കുന്നത്. 13,000 ചതുരശ്ര അടിയിലാണ് കേരളത്തനിമയിൽ രംഗകലാകേന്ദ്രം ഒരുക്കിയിരിക്കുന്നത്. കൂത്തമ്പലത്തിന്റെ മാതൃകയിലുള്ള അവതരണവേദി, കളരിത്തറ, 2000 ചതുരശ്രഅടി വിസ്തീർണ്ണമുള്ള ചുവർചിത്രം, കേരളത്തിന്റെ പരമ്പരാഗത ശൈലിയിലുള്ള ആനപ്പള്ള ചുറ്റുമതിൽ, താമരക്കുളം, ആംഫിതിയേറ്റർ, ആമ്പൽകുളം, കാവ്, പാരമ്പര്യ കലകളെക്കുറിച്ചുള്ള കലാപഠനകേന്ദ്രം എന്നിവ പൂർത്തിയായി. കൺവെൻഷൻ സെന്റർ, ഓഡിറ്റോറിയം, ആയുർവേദ ചികിത്സാകേന്ദ്രം, ഓർഗാനിക്ക് ഗാർഡൻ, ഫെസിലിറ്റേഷൻ സെന്റർ തുടങ്ങിയവ ഭാവിയിൽ നിർമ്മിക്കും. 15 കോടിയാണ് നിർമ്മാണ ചെലവ്.

വിദേശികൾക്കും സ്വദേശികൾക്കും കേരളത്തിന്റെ തനതായ കലകൾ ആസ്വദിക്കാനും പഠിക്കാനുമുള്ള സൗകര്യമുണ്ട്. പാരമ്പര്യ, ആധുനിക കലകളുടെ താരതമ്യപഠനത്തിനും അവസരമുണ്ട്. കേരളീയ വാസ്തുശൈലിയിലാണ് കെട്ടിടങ്ങൾ നിർമ്മിച്ചിട്ടുള്ളത്. അലങ്കാര തടിപ്പണികൾ, മ്യൂറൽ പെയ്ന്റിംഗ് എന്നിവയുമുണ്ട്. ഇന്ത്യയിലെ പ്രഥമ പൊതുമേഖലാ സംരംഭമായ ഈ കേന്ദ്രം ഭാവിയിൽ മറ്റു രാജ്യങ്ങളിലുള്ള സമാന സ്ഥാപനങ്ങളുമായി സഹകരിച്ച് പ്രവർത്തിക്കാനുള്ള പദ്ധതിയും ആവിഷ്‌ക്കരിച്ചുകൊണ്ടിരിക്കുകയാണ്. വർക്കലയിലെ കലാകേന്ദ്രത്തിന്റെ ആശയത്തെ ഇന്ത്യയിലെ വിവിധ യൂണിവേഴ്സിറ്റികളിലെ ഇരുന്നൂറോളം ആർക്കിടെക്റ്റ് വിദ്യാർത്ഥികൾ ഗവേഷണ വിഷയമാക്കിയിട്ടുണ്ട്. കൂടിയാട്ടത്തിന് പുറമേ, കേരളത്തിൽ നിന്നുള്ള കൂടുതൽ കലാരൂപങ്ങളെ യുനെസ്‌കോയുടെ ലോകപൈതൃക പട്ടികയിൽ ഉൾപ്പെടുത്തുന്നതിനുള്ള ശ്രമവും രംഗകലാകേന്ദ്രത്തിന്റെ നേതൃത്വത്തിൽ നടക്കുന്നുണ്ട്.

ആസൂത്രണ സാമ്പത്തികകാര്യ വകുപ്പിന്റെ കീഴിൽ വിഷൻ വർക്കല ഇൻഫ്രാസ്ട്രക്ചർ ഡവലെപ്മെന്റ് കോർപ്പറേഷൻ വഴി നടപ്പാക്കുന്ന പ്രധാനപ്പെട്ട പദ്ധതികളിൽ ഒന്നാണ് വർക്കലയിലെ രംഗകലാകേന്ദ്രം. ഹിന്ദുസ്ഥാൻ ഇൻഫ്രാസ്ട്രക്ചർ ലിമിറ്റഡിനാണ് നിർമ്മാണ ചുമതല. പ്രശസ്ത ആർക്കിടെക്റ്റ് ബി.സുധീറാണ് കലാകേന്ദ്രത്തിന്റെ രൂപരേഖ തയ്യാറാക്കിയത്. പ്രശസ്ത സംവിധായകൻ അടൂർ ഗോപാലകൃഷ്ണൻ ചെയർമാനായ ഏഴംഗ സമിതിക്കാണ് കലാകേന്ദ്രത്തിന്റെ നടത്തിപ്പ് ചുമതല. ബിശ്വനാഥ് സിൻഹ ഐ.എ.എസ്, സൂര്യ കൃഷ്ണമൂർത്തി, ബോസ് കൃഷ്ണമാചാരി, എ.മീര സാഹിബ്, കെ.എസ്.ശ്രീനിവാസ് ഐ.എ.എസ് എന്നിവർ ഡയറക്ടർ ബോർഡ് അംഗങ്ങളാണ്. വി.രാമചന്ദ്രൻ പോറ്റി എക്സിക്യൂട്ടീവ് ഡയറക്ടറായും ചുമതല വഹിക്കുന്നു.