വർക്കല ബീച്ചിൽ കുളിക്കാൻ ഇറങ്ങിയ 9 അംഗസംഘത്തിലെ ഒരാൾ തിരയിൽപ്പെട്ട് മരണപ്പെട്ടു

by Midhun HP News | Feb 26, 2023 | Latest News, കേരളം, ജില്ലാ വാർത്ത

വർക്കല ബീച്ചിൽ കുളിക്കാൻ ഇറങ്ങിയ 9 അംഗസംഘത്തിലെ ഒരാൾ തിരയിൽപ്പെട്ട് മരണപ്പെട്ടു. തമിഴ്നാട് ട്രിച്ചി സ്വദേശി സെന്തിൽ കുമാർ (47) ആണ് മരിച്ചത്. ഇന്ന് രാവിലെ 6.30 ഓടെയാണ് കടലിൽ കുളിക്കാൻ ഇറങ്ങിയത്. കുളിക്കുന്നതിനിടയിൽ ഒരാളെ തിരയിൽപ്പെട്ടു കാണാതാവുകയായിരുന്നു. ലൈഫ് ഗാർഡുകൾ സ്ഥലത്തു തെരച്ചിൽ നടത്തിയെങ്കിലും കണ്ടെത്താൻ കഴിഞ്ഞിരുന്നില്ല.

ഏകദേശം 9 മണിയോടെ ഇയാളുടെ മൃതദേഹം നോർത്ത് ക്ലിഫിൽ കരയ്ക്ക് അടിയുകയായിരുന്നു. വർക്കല ഫയർ ഫോഴ്സ് സ്ഥലത്തെത്തി മൃതദേഹം മാറ്റുന്നതിനുള്ള നടപടികൾ പുരോഗമിക്കുകയാണ്. മലമുകളിൽ നിന്നും വടം ഉപയോഗിച്ച് ആണ് മൃതദേഹം മുകളിലേക്ക് എത്തിക്കുന്നത്. 50ൽ അധികം മീറ്റർ താഴ്ചയിൽ നിന്നാണ് മൃതദേഹം മുകളിലേക്ക് എത്തിക്കുന്നത്. കഴിഞ്ഞദിവസം ആണ് സുഹൃത്തുക്കളായ 9 അംഗസംഘം വർക്കല എത്തുന്നത്. ഓഡിറ്റർ ആയി ട്രിച്ചിയിലെ ഒരു സ്വകാര്യ കമ്പനിയിൽ ജോലി നോക്കുകയാണ്.

കടയ്ക്കാവൂർ ഉപതെരഞ്ഞെടുപ്പ്: സമ്പൂർണ്ണ മദ്യനിരോധനം ഏർപ്പെടുത്തി

by Midhun HP News | Feb 26, 2023 | Latest News, കേരളം, ജില്ലാ വാർത്ത

കടയ്ക്കാവൂർ പഞ്ചായത്തിലെ നിലയ്ക്കാമുക്ക് പന്ത്രണ്ടാം വാർഡിൽ 28 ന് ഉപതെരഞ്ഞെടുപ്പ് നടക്കുന്നതിനാൽ വാർഡ് 12ലും പോളിങ് സ്റ്റേഷൻ പ്രവർത്തിക്കുന്ന 11-ാം വാർഡിലും മദ്യനിരോധനം ഏർപ്പെടുത്തി. വോട്ടെടുപ്പ് അവസാനിക്കുന്നതിന് മുമ്പുള്ള 48 മണിക്കൂറും വോട്ടെണ്ണൽ ദിനമായ മാർച്ച് ഒന്നിനുമാണ് സമ്പൂർണ മദ്യ നിരോധനം.

അപകടക്കെണിയായ് ആറ്റിങ്ങൽ – മണനാക്ക് റോഡ്

by Midhun HP News | Feb 26, 2023 | Latest News, കേരളം, ജില്ലാ വാർത്ത

ആറ്റിങ്ങൽ – മണനാക്ക് റോഡ് വാഹന- കാൽനട യാത്രക്കാർക്ക് അപകട കെണിയായി മാറുന്നു. സ്കൂൾ വാഹനങ്ങളും ഇരുചക്ര വാഹനങ്ങളും സർക്കാർ – സ്വകാര്യ ബസ്സുകളും ഉൾപ്പെടെ കടയ്ക്കാവൂർ വർക്കല ഭാഗങ്ങളിൽ പോകുന്ന നിരവധി യാത്രക്കാർ ഏറെ ആശ്രയിക്കുന്ന പാതയാണിത്. ഏറെ നാളായി പൊട്ടി പൊളിഞ്ഞു കിടന്ന റോഡ് ജനങ്ങളുടെ നിരന്തരമായ പ്രതിഷേധങ്ങൾക്കൊടുവിൽ അടുത്തകാലത്താണ് കുഴികൾ അടച്ച് അറ്റപറ്റപ്പണികൾ ചെയ്തത്. പണി കഴിഞ്ഞ് അടുത്ത ദിവസം തന്നെ റോഡ് വീണ്ടും വെട്ടി പൊളിച്ച് അധികൃതർ ജനങ്ങളോട് കണക്കുതീർത്തു. വെട്ടിപ്പൊളിച്ച കുഴിയിൽ വാഹനങ്ങൾ വീണ് നിയന്ത്രണം തെറ്റി അപകടങ്ങൾ ഉണ്ടാകുന്നത് പതിവാവുകയാണ്. റോഡിലെ പ്രധാന അപകട മേഖലയായ കൊല്ലമ്പുഴ പാലം, എലാപ്പുറം ഭാഗത്തെ ഇറക്കവും, വളവും വരുന്ന ഭാഗങ്ങളിൽ നടപ്പാത ഇല്ലാത്തത് കാൽനട യാത്രക്കാർക്ക് ഏറെ ബുദ്ധിമുട്ടുകൾ സൃഷ്ടിക്കുന്നു.

നടപ്പാത ഇല്ലാത്തത് കൊണ്ട് പലപ്പോഴും യാത്രക്കാർ റോഡിൽ ഇറങ്ങി സഞ്ചരിക്കുന്നത് അപകടങ്ങൾക്ക് കാരണമാകുന്നു. കൊല്ലമ്പുഴ പാലത്തിന്റെ കൈവരിയുടെ ഉയരമില്ലായ്മ പാലത്തിലൂടെ സഞ്ചരിക്കുന്ന കാൽനട യാത്രക്കാർക്ക് വലിയ വാഹനങ്ങൾ വരുമ്പോൾ ഏറെ ഭീതി സൃഷ്ടിക്കുന്നു. റോഡിലെ സ്വകാര്യ ബസുകളുടെ അമിതവേഗത യാത്രക്കാരെ അപകടത്തിലാകുന്നുണ്ട്. വളവും തിരിവുമുള്ള റോഡിന്റെ ഇരുവശങ്ങളിലും പല ഭാഗത്തായി താഴ്ന്ന പ്രദേശങ്ങളാണുള്ളത്. അമിത വേഗതയിൽ വരുന്ന വാഹനങ്ങളിൽ നിന്ന് രക്ഷ നേടാനായി കാൽനടയാത്രക്കാരും ഇരുചക്രവാഹനക്കാരും ഒഴിഞ്ഞു മാറുമ്പോൾ പലപ്പോഴും റോഡിന് വശങ്ങളിലുള്ള താഴ്ന്ന പ്രദേശങ്ങളിൽ വീണ് അപകടങ്ങൾ സംഭവിക്കുന്നുണ്ട്.

മാസങ്ങൾക്ക് മുൻപ് നഗരൂർ സ്വദേശിയായ യുവാവ് എലാപ്പുറത്തെ വളവിൽ ഇരുചക്ര വാഹനത്തിൽ നിന്നും തെറിച്ച് വശത്തുള്ള കുഴിയിൽ വീണ് മരണപെട്ടിരുന്നു. റോഡിനോട് ചേർന്ന് ഏലാപുറത്ത് സ്ഥിതി ചെയ്യുന്ന സ്കൂൾ വിടുന്നതോടെ റോഡും പ്രദേശം കുട്ടികളെ കൊണ്ട് നിറയും. സ്കൂളിന് മുൻവശത്തെ റോഡിന് ഇരു ഭാഗവും കച്ചവടക്കാർ കൈയെറിയതോടെ ഇവിടെയും കാൽനട യാത്രക്കാർക്ക് ഏറെ ബുദ്ധിമുട്ടുകൾ സൃഷ്ടിക്കുന്നുണ്ട്. രാത്രികാലങ്ങളിൽ ഈ ഭാഗങ്ങളിൽ തെരുവ് വിലക്കുകളൊന്നും കത്താറില്ല. പ്രധാന ജംഗ്ഷനായ മണനാക്കിലെ ഉയരവിളക്ക് കത്തതായിട്ട് മാസങ്ങളായി. രാഷ്ട്രീയ പാർട്ടികൾ നിരവധി പ്രതിഷേധങ്ങൾ നടത്തുകയും, പരാതി നൽകുകയും ചെയ്തിട്ടും ജംഗ്ഷനിലെ ഉയരവിളക്ക് പ്രവർത്തന യോഗ്യമാക്കാൻ അധികാരികൾക്ക് ഇതുവരെ സാധിച്ചിട്ടില്ല.

രാത്രിയായാൽ പ്രദേശം കൂരിരുട്ടാണ്. പൊതുമരാമത്ത് വകുപ്പിന്റെ കീഴിലുള്ള ആറ്റിങ്ങൽ മണനാക്ക് റോഡിലെ അപകടമേഖലകൾ ഒഴിവാക്കി സുരക്ഷിതമായ യാത്ര ചെയ്യുവാനുള്ള സൗകര്യം ഒരുക്കണമെന്നാണ് ജനങ്ങളുടെ ആവശ്യം

വീടിനുമുകളിൽ ഉണങ്ങാനിട്ട തുണി എടുക്കാൻ പോയ പത്തു വയസുകാരൻ അയ കഴുത്തിൽ കുരുങ്ങി മരിച്ചു

by Midhun HP News | Feb 26, 2023 | Latest News, കേരളം, ജില്ലാ വാർത്ത

പാലക്കാട്: വീടിനുമുകളിൽ ഉണങ്ങാനിട്ട തുണി എടുക്കാൻ പോയ പത്തു വയസുകാരൻ അയ കഴുത്തിൽ കുരുങ്ങി മരിച്ചു. പാലക്കാട് തച്ചമ്പാറ കോലാനി വീട്ടിൽ ഷമീറിൻറെ മകൻ ആലിഫ് (10) ആണ് മരിച്ചത്. ശനിയാഴ്ച രാത്രി ഏഴ് മണിയ്ക്കാണ് സംഭവം.
വീടിനുമുകളിൽ ഉണക്കാനിട്ട തുണിയെടുക്കാനായി പോയതായിരുന്നു. ഏറെ സമയം കഴിഞ്ഞിട്ടും കാണാതായതോടെ അമ്മ അന്വേഷിച്ച് എത്തുകയായിരുന്നു. അപ്പോഴാണ് ആലിഫിനെ കഴുത്തിൽ കയറും തോർത്തുമുണ്ടും കുടുങ്ങി നിക്കുന്ന നിലയിൽ കാണ്ടത്. ഉടൻ അടുത്തുള്ളവരുടെ സഹായത്തോടെ തച്ചമ്പാറ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. തച്ചമ്പാറ സെൻറ് ഡൊമനിക് യു പി സ്കൂൾ മൂന്നാം ക്ലാസ് വിദ്യാർത്ഥിയാണ്.

തിരുവനന്തപുരത്ത് പ്രവാസിയെ കാമുകി തട്ടിക്കൊണ്ടുപോയി വൻ കവർച്ച; ആറ് പേര്‍ പിടിയില്‍

by Midhun HP News | Feb 26, 2023 | Latest News, കേരളം, ജില്ലാ വാർത്ത

തിരുവനന്തപുരം: തിരുവനന്തപുരം വിമാനത്താവളത്തിലെത്തിയ പ്രവാസി യുവാവിനെ കാമുകിയും സഹോദരനും ചേര്‍ന്ന് തട്ടിക്കൊണ്ടുപോയി കവര്‍ച്ച നടത്തി. തമിഴ്നാട് തക്കല സ്വദേശിയായ മുഹൈദിന്‍ അബ്ദുള്‍ ഖാദറാണ് കവര്‍ച്ചയ്ക്ക് ഇരയായത്. ചിറയന്‍കീഴിലെ റിസോട്ടില്‍ കെട്ടിയിട്ടശേഷം പണവും സ്വര്‍ണവും കവര്‍ന്നതായാണ് യുവാവിന്റെ പരാതി.
ഇക്കഴിഞ്ഞ 22-ന് മുഹൈദിനെ കാറിൽ തട്ടിക്കൊണ്ടുപോയി ചിറയിൻകീഴിലെ റിസോർട്ടിൽ രണ്ട് ദിവസം കെട്ടിയിട്ടു. മുഹൈദിന്റെ കാമുകി ഇൻഷയും സഹോദരൻ ഷഫീക്കും ചേർന്നായിരുന്നു കവർച്ച നടത്തിയത്. ദുബായിൽ വച്ച് മുഹൈദിനും ഇൻഷയുമായി അടുപ്പത്തിലായിരുന്നു. ബന്ധത്തിൽ നിന്നും പിൻമാറിയ മുഹൈദിനോട് ഇൻഷ ഒരു കോടി നൽകാൻ ആവശ്യപ്പെട്ടു.

എന്നാൽ ഈ പണം നൽകാത്തതിനെ തുടർന്നാണ് തട്ടിക്കൊണ്ടുപോയി 15 ലക്ഷത്തി 70,000 രൂപയും രണ്ട് ഫോണും സ്വർണവും തട്ടിയെടുത്തത്. ഒപ്പം മുദ്ര പത്രങ്ങളും ഒപ്പിട്ടു വാങ്ങിയതായി പരാതിയുണ്ട്. തുട‍ര്‍ന്ന് പ്രവാസിയെ സ്കൂട്ടറിൽ എയർപോർട്ടിന് മുന്നിൽ ഉപേക്ഷിച്ചു കടന്നുകളയുകയായിരുന്നു. ശംഖുമുഖം അസി. കമ്മീഷണറുടെ നേത്യത്വത്തിലായിരുന്നു അന്വേഷണം.

കാപ്പ കേസ് പ്രതിയെ നടുറോഡില്‍ കുത്തിക്കൊന്നു

by Midhun HP News | Feb 26, 2023 | Latest News, കേരളം, ജില്ലാ വാർത്ത

കൊല്ലം: ഇറച്ചിക്കട ലേലത്തെ ചൊല്ലിയുള്ള തര്‍ക്കത്തെ തുടര്‍ന്ന് കാപ്പ കേസ് പ്രതിയെ നടുറോഡില്‍ വെട്ടിക്കൊന്നു. കുന്നിക്കോട് സ്വദേശി റിയാസാണ് കൊല്ലപ്പെട്ടത്. പ്രതി ഷിഹാബ് പൊലീസില്‍ കീഴടങ്ങി. ഇന്നലെ രാത്രി പതിനൊന്ന് മണിയോടെയാണ് റിയാസിനെ ഷിഹാബ് കുത്തിയത്. ഇറച്ചിക്കടയെ ചൊല്ലി ഇരുവരും തമ്മില്‍ പല തവണ സംഘര്‍ഷത്തില്‍ ഏര്‍പ്പെട്ടിരുന്നതായി പൊലീസ് പറഞ്ഞു. ഇരുവരും തമ്മിലുണ്ടായ സംഘര്‍ഷമാണ് കൊലപാതകത്തിലേക്ക് നയിച്ചത്. ഇന്നലെ രാത്രി റിയാസ് വീട്ടിലേക്ക് നടന്നുപോകുന്നതിനിടെ ഷിഹാബ് ആക്രമിക്കുകയായിരുന്നു. കത്തിക്കുത്തില്‍ സാരമായി പരിക്കേറ്റ റിയാസിനെ പുനലൂര്‍ താലൂക്ക് ആശുപത്രിയിലെത്തിച്ചെങ്കിലും വിദഗ്ധ ചികിത്സയ്ക്കായി തിരുവനന്തപുരം മെഡിക്കല്‍ കോളജിലേക്ക് മാറ്റി. ഇന്ന് പുലര്‍ച്ചയോടെ റിയാസ് മരിച്ചു.