വടക്കാഞ്ചേരി അപകടം; മരിച്ചവരില്‍ ദേശീയ ബാസ്‌കറ്റ് ബോള്‍ താരവും

by Midhun HP News | Oct 6, 2022 | Latest News, കേരളം, ജില്ലാ വാർത്ത

പാലക്കാട്: വടക്കാഞ്ചേരി അപകടത്തില്‍ മരിച്ചവരില്‍ ദേശീയ ബാസ്‌കറ്റ് ബോള്‍ താരവും ഉള്‍പ്പെടുന്നു. തൃശൂര്‍ നടത്തറ മൈനര്‍ റോഡ് സ്വദേശി രോഹിത് രാജ് (24) ആണ് മരിച്ചത്. കെഎസ്ആര്‍ടിസി ബസിലെ യാത്രക്കാരനായിരുന്നു രോഹിത്. രോഹിത് കോയമ്പത്തൂരിലേക്ക് പോകുകയായിരുന്നുവെന്നാണ് വിവരം.

രോഹിതിന്റെ മൃതദേഹം ആലത്തൂര്‍ ആശുപത്രിയിലാണ്. ആശുപത്രിയിലെത്തിയ ബന്ധുക്കളാണ് രോഹിതിന്റെ മൃതദേഹം തിരിച്ചറിഞ്ഞത്. വടക്കാഞ്ചേരിയില്‍ ടൂറിസ്റ്റ് ബസും കെഎസ്ആര്‍ടിസിയും കൂട്ടിയിടിച്ചുണ്ടായ അപകടത്തില്‍ അഞ്ചു വിദ്യാര്‍ത്ഥികളും ഒരു അധ്യാപകനും മൂന്ന് കെഎസ്ആര്‍ടിസി യാത്രക്കാരുമാണ് മരിച്ചത്. മുളന്തുരുത്തി ബസേലിയസ് വിദ്യാനികേതന്‍ സ്‌കൂളില്‍ നിന്ന് വിനോദയാത്രയ്ക്ക് പോയ വാഹനമാണ് അപകടത്തില്‍പ്പെട്ടത്.

ഇന്നു മുതല്‍ ഒരു വാഹനത്തിലും ഫ്ലാഷ് ലൈറ്റും നിരോധിത ഹോണും പാടില്ല; അങ്ങനെയുള്ള വാഹനങ്ങള്‍ പിടിച്ചെടുക്കുമെന്ന് ഹൈക്കോടതി നിർദ്ദേശം

by Midhun HP News | Oct 6, 2022 | Latest News, കേരളം, ജില്ലാ വാർത്ത

കൊച്ചി: വടക്കഞ്ചേരി ബസ് അപകടത്തില്‍ ഹൈക്കോടതി സ്വമേധയാ കേസെടുത്തു. അപകടത്തെക്കുറിച്ച് പൊലീസും മോട്ടോര്‍ വാഹന വകുപ്പും വിശദീകരണം നല്‍കണമെന്ന് ജസ്റ്റിസ് ദേവന്‍ രാമചന്ദ്രന്‍ നിര്‍ദേശിച്ചു. കേസ് വീണ്ടും ഉച്ചയ്ക്ക് 1.45ന് പരിഗണിക്കും.
വടക്കഞ്ചേരിയില്‍ അപകടമുണ്ടാക്കിയ ബസ്സിന് ഫിറ്റ്‌നസ് സര്‍ട്ടിഫിക്കറ്റ് നല്‍കിയത് ആരാണെന്ന് കോടതി ചോദിച്ചു. ടൂറിസ്റ്റ് ബസുകളിലെ ഫ്ലാഷ് ലൈറ്റുകളും ഹോണുകളും ശബ്ദസംവിധാനവും സംബന്ധിച്ച് നേരത്തെ നിര്‍ദേശം നല്‍കിയിട്ടുള്ളതാണ്. ഇതു ലംഘിച്ചെന്ന് വ്യക്തമാണെന്ന് കോടതി പറഞ്ഞു. ഇന്നു മുതല്‍ ഒരു വാഹനത്തിലും ഫ്ലാഷ് ലൈറ്റുകളും നിരോധിത ഹോണുകളും പാടില്ല. അങ്ങനെയുള്ള വാഹനങ്ങള്‍ പിടിച്ചെടുക്കണമെന്നും ഹൈക്കോടതി നിര്‍ദേശിച്ചു.

അധ്യാപനരംഗത്തെ അഞ്ചുതെങ്ങിന്റെ മുഖം ജെമ്മ ടീച്ചർക്ക് നാടിന്റെ യാത്രാമൊഴി

by Midhun HP News | Oct 6, 2022 | Latest News, കേരളം, ജില്ലാ വാർത്ത

അധ്യാപനരംഗത്തെ അഞ്ചുതെങ്ങിന്റെ മുഖം ജെമ്മ ടീച്ചർക്ക് (76) (ജെമ്മ ജാക്സൺ ) നാടിന്റെ യാത്രാമൊഴി. അഞ്ചുതെങ്ങിന്റെ സാമൂഹ്യ പുരോഗതിയ്ക്ക് വേണ്ടി ശക്തമായ ഇടപെടലുകളും നിലപാടുകളും സ്വീകരിച്ച മാതൃകാ വ്യക്തിത്വമാണ് വിടവാങ്ങിയത്.
1946 ജൂലായ് 28 ലേവി ക്രിസ്റ്റിയന്റെയും സ്റ്റെല്ല ക്രിസ്റ്റിയന്റെയും മൂന്നു മക്കളില്‍ രണ്ടാമത്തെ മകളായ് അഞ്ചുതെങ്ങ് മാമ്പള്ളിയില്‍ ജമ്മ ജാക്സന്റെ ജനം. അഞ്ചുതെങ്ങ് സേക്രട്ട് ഹാർട്ട് കോൺവെന്റ്, നെടുങ്ങണ്ട ശ്രീനാരായണവിലാസം ഹയർസെക്കണ്ടറി സ്കൂളുകളിൽ പ്രാഥമിക വിദ്യാഭ്യാസം പൂർത്തിയാക്കിയ ജമ്മാജാക്സൻ തുടർന്ന് കൊല്ലം ഫാത്തിമ കോളേജില്‍ നിന്നും കെമിസ്ട്രിയില്‍ ബിരുദവും,അഞ്ചുതെങ്ങ് നെടുങ്ങണ്ട ബിഎഡ് കോളേജിൽ നിന്ന് ബിഎഡും ജമ്മ ജാക്സൻ കരസ്ഥമാക്കി. തുടർന്ന് അഞ്ചുതെങ്ങ് സെന്റ്‌ ജോസഫ് ഹയർ സെക്കണ്ടറി സ്കൂളില്‍ അദ്ധ്യാപികയായി നിയമനം ലഭിച്ചു.

തുടർന്ന് അഞ്ചുതെങ്ങിന്റെ സാമൂഹ്യ പുരോഗതിയ്ക്കായ് ശക്തമായ നിലപാടുകളിലൂന്നിയ പ്രവർത്തനങ്ങൾ നടത്തി. 1987 ലെ സാക്ഷരതാ പ്രവർത്തനങ്ങൾക്ക് വേണ്ടിയും ജമ്മ ജാക്സൻ സമാന പ്രവർത്തനങ്ങളാണ് അഞ്ചുതെങ്ങ് ഗ്രാമ പഞ്ചായത്ത് തീരദേശ പ്രദേശങ്ങൾ ഉൾപ്പെടെ കേന്ദ്രീകരിച്ചു നടത്തിയിട്ടുള്ളത്. മുപ്പതിലേറെ വർഷത്തെ മാതൃകാപരമായ അധ്യാപന ജീവിതത്തിന് ഒടുവിൽ അതേ സ്കൂളില്‍ നിന്നുതന്നെ 2001 ല്‍ പ്രിൻസിപ്പൾ തസ്തികയിൽ ജമ്മ ജാക്സൻ വിരമിച്ചു.

ബന്ധുക്കളും അറിയപ്പെടുന്നവരുമടക്കം അഞ്ചുതെങ്ങിൽ നിന്ന് വീടും സ്ഥലവും വിറ്റ് മറ്റ് സ്ഥലങ്ങളില്‍ താമസം മാറിയപ്പോഴും അതിനായ് ബന്ധുക്കളും സുഹൃത്തുക്കളും ഉൾപ്പെടെയുള്ളവർ നിർബന്ധിച്ചപ്പോഴും മരിക്കുന്നതു വരെ ഞാന്‍ ഈ അഞ്ചുതെങ്ങിലെ മക്കളോടൊപ്പം ഉണ്ടാകും എന്നു പറഞ്ഞുകൊണ്ട് സന്തോഷത്തോടെ നിരസിച്ച തീരദേശത്തിന്റെ സ്വന്തം മകളാണ് നാടിനെ കണ്ണീരിലാഴ്ത്തി വിടവാങ്ങിയത്.

ഫ്രഞ്ച് എഴുത്തുകാരി ആനി എര്‍ണുവിന് സാഹിത്യനൊബേല്‍

by Midhun HP News | Oct 6, 2022 | Latest News, കേരളം, ജില്ലാ വാർത്ത

സാഹിത്യത്തിനുള്ള ഈ വര്‍ഷത്തെ നൊബേല്‍ പുരസ്‌കാരം ഫ്രഞ്ച് എഴുത്തുകാരി ആനി എര്‍ണുവിന്. മനുഷ്യാവസ്ഥകളെ സൂക്ഷ്മമായും ധീരമായും ആവിഷ്‌കരിച്ചതിനാണ് ബഹുമതിയെന്ന് നൊബേല്‍ പുരസ്‌കാര സമിതി അറിയിച്ചു. ആത്മകഥാംശമുള്ള രചനകളിലൂടെയാണ്, ലോകസാഹിത്യത്തില്‍ ആനി എര്‍ണു ശ്രദ്ധേയയായത്. നോര്‍മന്‍ഡിക്കടുത്ത ഗ്രാമത്തില്‍ ജനിച്ച ആനി ആ ഗ്രാമീണ പശ്ചാത്തലമാണ് എഴുത്തില്‍ ഏറെയും കൊണ്ടുവന്നത്. വ്യക്തിഗത ഓര്‍മകളുടെ വേരുകള്‍ ചികയുന്നതില്‍ അവര്‍ പ്രകടിപ്പിച്ച സൂക്ഷ്മത ശ്രദ്ധേയമാണെന്ന് നൊബേല്‍ സമിതി പറഞ്ഞു. ക്ലീന്‍ഡ് ഔട്ട്, എ മാന്‍സ് പ്ലേസ്, എ വുമണ്‍സ് സ്റ്റോറി, ഷെയിം, ഹാപ്പനിങ്, പൊസഷന്‍, ദി ഇയേഴ്‌സ്, എ ഗേള്‍സ് സ്റ്റോറി തുടങ്ങിയവയാണ് ആനി എര്‍ണുവിന്റെ പ്രധാന കൃതികള്‍.

വടക്കാഞ്ചേരി വാഹനാപകടം; സ്പീഡ് ഗവർണർ വിച്ഛേദിച്ചിരുന്നെന്ന് സംശയം

by Midhun HP News | Oct 6, 2022 | Latest News, കേരളം, ജില്ലാ വാർത്ത

പാലക്കാട്: വടക്കാഞ്ചേരിയിൽ ഒൻപത് പേരുടെ മരണത്തിനിടയാക്കിയ വാഹനാപകടം ഉണ്ടാക്കിയ ടൂറിസ്റ്റ് ബസ് സ്പീഡ് ഗവർണർ വിച്ഛേദിച്ചിരുന്നെന്ന് സംശയം. കോൺട്രാക്ട് ക്യാരേജ് വാഹനങ്ങൾക്ക് പരാമാവധി 80 കിലോമീറ്ററാണ് വേഗപരിധി. എന്നാൽ അപകടത്തിൽ പെട്ട ടൂറിസ്റ്റ് ബസ് 97.7  കിലോമീറ്റർ വേഗത്തിലായിരുന്നു സഞ്ചരിച്ചത്. മോട്ടോർ വാഹന വകുപ്പിന്റെ വാഹൻ മിത്രയിലാണ് ഈ വേഗത രേഖപ്പെടുത്തിയത്. ഇതേ തുടർന്ന് ബസിലെ സ്പീഡ് ഗവർണർ ആർടിഒ പരിശോധിക്കും.

അതേസമയം അപകട കാരണമായ ടൂറിസ്റ്റ് ബസിന്റെ ഫിറ്റ്നസ് റദ്ദാക്കാൻ കോട്ടയം ആർടിഒ നടപടി തുടങ്ങി. ബസിന്റെ ആർസി ഉടമ അരുണിനെ ആർ ടി ഒ വിളിച്ചു വരുത്തും. അപകടമുണ്ടാക്കിയ ലുമിനസ് ബസിനെതിരെ മുൻപ് കേസെടുത്തിരുന്നതായി വ്യക്തമായി. രണ്ട് തവണ നിയമം ലംഘിച്ച് ബസിൽ ലൈറ്റുകൾ ഘടിപ്പിച്ചതിന് കേസെടുത്തു. എന്നാൽ വാഹന ഉടമകൾ പിഴ അടച്ചില്ല. തുടർന്ന് ബസിനെ കരിമ്പട്ടികയിൽ പെടുത്തി. എന്നാൽ ബസിന് മറ്റ് സാങ്കേതിക തകരാറുകൾ റിപ്പോർട്ട് ചെയ്തിട്ടില്ലെന്നും മോട്ടോർ വകുപ്പ് എൻഫോഴ്സ്മെൻറ് വിഭാഗം അറിയിച്ചു.

അപകടമുണ്ടാക്കിയ ബസ് ഓടിച്ചിരുന്ന ഡ്രൈവർ ജോജോ പത്രോസ് ചികിത്സ ഇകെ നായനാർ ആശുപത്രിയിലെത്തിയതായി തെളിഞ്ഞു. അപകടത്തിൽ പെട്ട ബസിലെ ഒരാൾ പുലർച്ചെ ചികിത്സ തേടിയിരുന്നുവെന്നും ജോജോ പത്രോസ് എന്നാണ് പേര് പറഞ്ഞതെന്നും ആശുപത്രി അധികൃതർ പറഞ്ഞു. ആദ്യം അദ്ധ്യാപകൻ എന്നാണ് പറഞ്ഞത്. എന്നാൽ രാവിലെ ആറു മണിയോടെ എറണാകുളത്തു നിന്ന് ബസിന്റെ ഉടമകൾ എത്തി ഇയാളെ കൂട്ടികൊണ്ട് പോവുകയായിരുന്നു.