by Midhun HP News | Oct 3, 2026 | Latest News, കേരളം
നഗോയ: ഏഷ്യന്‍ ഗെയിംസ് അമ്പെയ്ത്തില്‍ പുതിയ ചരിത്രമെഴുതി ഇന്ത്യയുടെ കൗമാര വിസ്മയം കുംകും മൊഹോദ്. വനിതകളുടെ റിക്കര്‍വ് വിഭാഗം വ്യക്തിഗത പോരാട്ടത്തില്‍ ചരിത്രത്തിലാദ്യമായി ഇന്ത്യക്ക് മെഡല്‍. അതും സുവര്‍ണ നേട്ടം! 14ാം ദിനത്തില്‍ ഇന്ത്യന്‍ കുതിപ്പിന് സ്വര്‍ണ നേട്ടത്തടെ തുടക്കമിടാന്‍ 17കാരിക്ക് സാധിച്ചു. താരത്തിന്റെ ഗെയിംസിലെ രണ്ടാം സ്വർണ നേട്ടം കൂടിയാണിത്. നേരത്തെ ഇതേ ഇനത്തിൽ ടീം വിഭാഗത്തിലും കുംകും സ്വർണം നേടിയിരുന്നു.
ഈയിനത്തിന്റെ വ്യക്തിഗത പോരില്‍ ആദ്യമായി ഫൈനലിലെത്തുന്ന ഇന്ത്യന്‍ വനിതാ അമ്പെയ്ത്ത് താരമെന്ന നേട്ടവുമായാണ് കുംകും കലാശപ്പോരിന് ഇറങ്ങിയത്. ഫൈനലില്‍ ദക്ഷിണ കൊറിയന്‍ താരം ഒഹ് യെജിന്റെ കടുത്ത വെല്ലുവിളി കുംകും കൂളായി തന്നെ നേരിട്ടു. ത്രില്ലര്‍ പോരില്‍ 10-8 എന്ന സ്‌കോറിനാണ് താരം സ്വര്‍ണം എയ്തു വീഴ്ത്തിയത്.
ഒരു ഘട്ടത്തില്‍ 5-5 എന്ന നിലയില്‍ ഇരു താരങ്ങളും തുല്യ നിലയില്‍ മുന്നേറിയിരുന്നു. ഒടുവില്‍ പെര്‍ഫെക്ട് 10 അടിച്ചാണ് കുംകും ഇന്ത്യയുടെ സുവര്‍ണ രാജകുമാരിയായത്. സുവര്‍ണ നേട്ടത്തിനൊപ്പം താരം ലൊസാഞ്ചലസ് ഒളിംപിക്‌സിനു യോഗ്യതയും സ്വന്തമാക്കി.
ഗെയിംസില്‍ ഇന്ത്യയുടെ 17ാം സ്വര്‍ണമാണിത്. 17 സ്വര്‍ണം, 25 വെള്ളി, 35 വെങ്കലം മെഡലുകളുമായി ഇന്ത്യയുടെ മൊത്തം നേട്ടം 77ല്‍ എത്തി.
by Midhun HP News | Oct 3, 2026 | Latest News, കേരളം
തിരുവനന്തപുരം: പൊലീസുകാര്‍ക്കെതിരെ വധഭീഷണി മുഴക്കിയ സംഭവത്തില്‍ സിപിഎം നേതാക്കള്‍ക്കെതിരെ പൊലീസ് കേസെടുത്തു. സിപിഎം തിരുവനന്തപുരം ജില്ലാ സെക്രട്ടറി വി ജോയി എംഎല്‍എ, മുന്‍മന്ത്രി കടകംപള്ളി സുരേന്ദ്രന്‍ എന്നിവര്‍ക്കെതിരെയാണ് ജാമ്യമില്ലാ വകുപ്പ് പ്രകാരം കേസെടുത്തത്. ഉദ്യോഗസ്ഥര്‍ക്കെതിരെ നേതാക്കള്‍ കൊലവിളി നടത്തിയെന്ന് എഫ്‌ഐആറില്‍ പറയുന്നു.
വധിക്കുമെന്നും കലാപമുണ്ടാക്കാനും ഉതകും വിധം വി ജോയി പ്രസംഗിച്ചുവെന്ന് എഫ്‌ഐആറില്‍ സൂചിപ്പിക്കുന്നു. കൊലപാതകം നടത്തുമെന്ന് ഉദ്യോഗസ്ഥരെ ഭീഷണിപ്പെടുത്തി. കുഞ്ഞുങ്ങളെ താലോലിക്കാന്‍ കഴിയാതെ ഇല്ലാതാക്കുമെന്ന് കടകംപള്ളി സുരേന്ദ്രന്‍ പറഞ്ഞു. രാത്രി ആക്രമിക്കുമെന്നും കടകംപള്ളി ഭീഷണി മുഴക്കിയതായും എഫ്‌ഐആറില്‍ പറയുന്നു. സിഐ സതീഷ്, എസ്‌ഐ ഗോകുല്‍ എന്നിവരുടെ പരാതിയിലാണ് കേസെടുത്തത്.
യൂണിവേഴ്‌സിറ്റി കോളജ് ഹോസ്റ്റലില്‍ വിദ്യാര്‍ഥികള്‍ക്ക് നേരെ നടന്ന ലാത്തിച്ചാര്‍ജ്ജില്‍ പ്രതിഷേധിച്ച് സിപിഎം സംഘടിപ്പിച്ച സെക്രട്ടേറിയറ്റ് മാര്‍ച്ചിനിടെയാണ് പൊലീസ് ഉദ്യോഗസ്ഥനെതിരെ സിപിഎം തിരുവനന്തപുരം ജില്ലാ സെക്രട്ടറി വി ജോയി പരസ്യ വധഭീഷണി മുഴക്കിയത്. കന്റോണ്‍മെന്റ് പൊലീസ് സ്റ്റേഷനിലെ സബ് ഇന്‍സ്‌പെക്ടര്‍ ഗോകുലിനെതിരെയാണ് വി. ജോയി പരസ്യമായി കൊലവിളി നടത്തിയത്.
ഡ്യൂട്ടിയിലുണ്ടായിരുന്ന കന്റോണ്‍മെന്റ് അസിസ്റ്റന്റ് കമ്മീഷണര്‍ വി. ജയചന്ദ്രന്റെ മുഖത്തുനോക്കിയാണ് എംഎല്‍എയായ വി ജോയി ഭീഷണി മുഴക്കിയത്. ‘അയാളെക്കൊണ്ട് പൊറുതിമുട്ടുകയാണെങ്കില്‍ ഞാന്‍ പറയുകയാണ്, ഒരു കൊലപാതകം നടക്കും, നിങ്ങള്‍ നോക്കിക്കോ’ എന്നായിരുന്നു വി. ജോയിയുടെ വാക്കുകള്‍. മുന്‍ മന്ത്രിയും എംഎല്‍എയുമായ കടകംപള്ളി സുരേന്ദ്രന്‍, സിപിഎം നേതാവ് ആനാവൂര്‍ നാഗപ്പന്‍ തുടങ്ങിയ മുതിര്‍ന്ന നേതാക്കളുടെ സാന്നിധ്യത്തിലായിരുന്നു ജോയിയുടെ ഭീഷണി. സംഭവത്തിന്റെ വീഡിയോ ദൃശ്യങ്ങള്‍ പുറത്തുവന്നിരുന്നു.
by Midhun HP News | Oct 2, 2026 | Latest News, കേരളം
ആറ്റിങ്ങൽ: അവനവഞ്ചേരി ടോൾമുക്ക് വിളയിൽ വീട്ടിൽ റെജി പ്രകാശ് (42) സെപ്റ്റംബർ 16-ന് ലണ്ടനിലെ ഈസ്റ്റ്ഹാമിൽ അന്തരിച്ചു. പരേതനായ പ്രകാശന്റെയും ബീനയുടെയും മകനാണ്. ഭാരതി എയർടെൽ, ജെ.എസ്.എം ഹോസ്പിറ്റൽ, സ്റ്റാർ ഹെൽത്ത് ഇൻഷുറൻസ് തുടങ്ങിയ സ്ഥാപനങ്ങളിലെ മുൻ ജീവനക്കാരനായിരുന്ന അദ്ദേഹം ‘അറ്റ് വൺസ്’, ‘മായാപുരി’, ‘1000 – ഒരു നോട്ട് പറഞ്ഞ കഥ’ എന്നീ സിനിമകളിലും ശ്രദ്ധേയമായ നിരവധി ടെലിവിഷൻ പരമ്പരകളിലും വേഷമിട്ടിട്ടുണ്ട്.
എസ്.എസ്.എം സ്കൂളിലെ മുൻ അധ്യാപിക അനുവിദ്യയാണ് ഭാര്യ.
മക്കൾ: കാർത്തിക് ആർ. എ, റിതു ആർ. എ.
സംസ്കാരം: (04/10/2026 ഞായർ) രാവിലെ 8 മണിക്ക് ടോൾമുക്കിലെ വസതിയിൽ നടക്കും.
by Midhun HP News | Oct 2, 2026 | Latest News, കേരളം
കൊച്ചി: 49-ാമത് കേരള ഫിലിം ക്രിട്ടിക്സ് അവാർഡ് ദാനച്ചടങ്ങ് ഒക്ടോബർ 2ന് കൊച്ചി IMA ഹാളിൽ നടക്കും. വൈകിട്ട് 6.30ന് ആരംഭിക്കുന്ന ചടങ്ങ് കേരള സാംസ്കാരിക-ടൂറിസം വകുപ്പ് മന്ത്രി പി.സി. വിഷ്ണുനാഥ്, മലയാളത്തിന്റെ പ്രിയതാരം, പത്മ പുരസ്കാര ജേതാവായ മമ്മൂട്ടി, ജല വിഭവ വകുപ്പ് മന്ത്രി അഡ്വ. മോൻസ് ജോസഫ് ഉൾപ്പടെയുള്ള കലാ, സാംസ്കാരിക, സാമൂഹിക, രാഷ്ട്രീയ രംഗങ്ങളിലെ പ്രമുഖർ ചേർന്ന് ഉദ്ഘാടനം ചെയ്യും.
കേരള ഫിലിം ക്രിട്ടിക്സ് അസോസിയേഷനും പ്രമുഖ ബ്രാൻഡിംഗ് സ്ഥാപനമായ Biscon Marketing Solutions Pvt. Ltd.-ഉം സംയുക്തമായി സംഘടിപ്പിക്കുന്ന പുരസ്കാര നിശയിൽ മോഹൻലാലിനെ മികച്ച നടനായും കല്യാണി പ്രിയദർശൻ, അനശ്വര രാജൻ എന്നിവരെ മികച്ച നടിമാരായും പ്രിയദർശൻ, എം ജി ശ്രീകുമാർ എന്നിവർ ഉൾപ്പെടെ വിവിധ വിഭാഗങ്ങളിലായി സിനിമാരംഗത്ത് മികവ് തെളിയിച്ച 70 ഓളം പ്രതിഭകളെ ചടങ്ങിൽ ആദരിക്കും.
മലയാള സിനിമയുടെ കലാപരമായ മികവിനെയും മികച്ച സംഭാവനകളെയും ആദരിക്കുന്ന കേരള ഫിലിം ക്രിട്ടിക്സ് അവാർഡിന് അഞ്ച് പതിറ്റാണ്ടിനോട് അടുക്കുന്ന പാരമ്പര്യവും വിശ്വാസ്യതയുമുണ്ട്. വിവിധ പുരസ്കാര വിഭാഗങ്ങളിലേക്കായി ലഭിച്ച സിനിമകളിൽ നിന്ന് വിദഗ്ഗ ജൂറിയുടെ വിശദമായ വിലയിരുത്തലിന്റെ അടിസ്ഥാനത്തിലാണ് പുരസ്കാര ജേതാക്കളെ തിരഞ്ഞെടുക്കുന്നത്. ഈ വർഷം 70 സിനിമകളാണ് വിവിധ വിഭാഗങ്ങളിലായി പരിഗണിച്ചത്.
സിനിമയുടെ വേദിയിൽ നിന്ന് സമൂഹത്തിനായി ഒരു സന്ദേശം സിനിമയെ ആദരിക്കുന്ന വേദി എന്നതിലുപരി, സമൂഹത്തിൽ പ്രാധാനമുള്ള വിഷയങ്ങളിൽ ജനകീയ ഇടപെടലുകൾക്ക് പിന്തുണ നൽകുന്ന വേദിയായി കേരള ഫിലിം ക്രിട്ടിക്സ് അവാർഡിനെ കൂടുതൽ വിപുലപ്പെടുത്തുകയാണ് ഈ വർഷം. യുവതലമുറയുടെ ജീവിതത്തെയും സ്വപ്നങ്ങളെയും കുടുംബങ്ങളെയും ഗുരുതരമായി ബാധിക്കുന്ന ലഹരി ഉപയോഗത്തിനെതിരായ കേരള സർക്കാരിന്റെ ‘ഓപ്പറേഷൻ തൂഫാൻ’ ഉൾപ്പെടെയുള്ള ലഹരിവിരുദ്ധ പ്രവർത്തനങ്ങൾക്ക് 49-ാമത് കേരള ഫിലിം ക്രിട്ടിക്സ് അവാർഡ് പിന്തുണ പ്രഖ്യാപിക്കുന്നു.
സിനിമയെ ആഘോഷിക്കുന്നതിനൊപ്പം, യുവതലമുറയുടെ സ്വപ്നങ്ങളും ഭാവിയും സംരക്ഷിക്കാനുള്ള സാമൂഹിക ഉത്തരവാദിത്തവും ഏറ്റെടുക്കുകയാണ് 49-ാമത് കേരള ഫിലിം ക്രിട്ടിക്സ് അവാർഡ്. ബന്ധപ്പെടേണ്ടവർ ഡോ. ജോർജ് ഓണക്കൂർ പ്രസിഡന്റ് & ജൂറി ചെയർമാൻ കേരള ഫിലിം ക്രിട്ടിക്സ് അസോസിയേഷൻ തേക്കിൻകാട് ജോസഫ് ജനറൽ സെക്രട്ടറി കേരള ഫിലിം ക്രിട്ടിക്സ് അസോസിയേഷൻ.
by Midhun HP News | Oct 2, 2026 | Latest News, കേരളം
വന്യജീവി വാരാഘോഷത്തിന്റെ ഭാഗമായി തിരുവനന്തപുരം മൃഗശാലയിലും അക്വേറിയത്തിലും വിദ്യാർഥികൾക്ക് സൗജന്യ പ്രവേശനം അനുവദിച്ചു. ഒക്ടോബർ 2 മുതൽ 8 വരെ സ്കൂൾ, കോളേജ് വിദ്യാർഥികൾക്കാണ് പ്രവേശനം സൗജന്യം. വന്യജീവികളെയും അവയുടെ സംരക്ഷണത്തെയും കുറിച്ച് വിദ്യാർഥികളിൽ അവബോധം വളർത്തുകയാണ് പദ്ധതിയുടെ ലക്ഷ്യം.
by Midhun HP News | Oct 2, 2026 | Latest News, കേരളം
ന്യൂഡല്‍ഹി: ദുബായില്‍ നിന്ന് ടെല്‍ അവീവിലേക്ക് പറന്ന ഫ്‌ളൈദുബായ് വിമാനത്തിനുള്ളില്‍ സഹപൈലറ്റിന്റെ ആക്രമണത്തിന് ഇരയായ ഇന്ത്യന്‍ പൈലറ്റ് ക്യാപ്റ്റന്‍ സ്മിത് മച്ചാറുമായി പ്രധാനമന്ത്രി നരേന്ദ്ര മോദി വിഡിയോ കോളിലൂടെ സംസാരിച്ചു. ക്യാപ്റ്റന്‍ സ്മിത്തിന്റെ സമചിത്തതയെയും സമയോചിതമായ ഇടപെടലിനെയും പ്രധാനമന്ത്രി പ്രശംസിച്ചു. രാജ്യം മുഴുവന്‍ അദ്ദേഹത്തിന് വേണ്ടി പ്രാര്‍ഥിക്കുകയായിരുന്നുവെന്ന് പ്രധാനമന്ത്രി പറഞ്ഞു.
അക്രമത്തിനിരയായ ഭീതിജനകമായ നിമിഷങ്ങളില്‍ താന്‍ ഹനുമാന്‍ ചാലിസ ജപിക്കുകയായിരുന്നുവെന്ന് സ്മിത് മച്ചാര്‍ പ്രധാനമന്ത്രിയോട് പറഞ്ഞു. ‘ഞാന്‍ ആ സമയത്ത് എന്റെ ജീവനുവേണ്ടി പോരാടുകയായിരുന്നു. എനിക്ക് പരിക്കേറ്റിരുന്നു, എന്നാല്‍ ഏത് സാഹചര്യത്തിലും വിമാനത്തിലുണ്ടായിരുന്ന യാത്രക്കാരെ മരണത്തിന് വിട്ടുകൊടുക്കാന്‍ എനിക്ക് കഴിയില്ലായിരുന്നു. ധൈര്യം കാണിച്ചില്ലെങ്കില്‍ വിമാനത്തിലുള്ള 170 യാത്രക്കാരുടെ ജീവന്‍ നഷ്ടപ്പെടുമെന്ന യാഥാര്‍ഥ്യം ഞാന്‍ മനസ്സിലാക്കി. ആ പ്രതിസന്ധി ഘട്ടത്തില്‍ ഞാന്‍ ഹനുമാന്‍ ചാലിസ ചൊല്ലുകയായിരുന്നു. ഭഗവാന്‍ ഹനുമാനാണ് എനിക്ക് ധൈര്യം തന്നത്’ -സ്മിത് മച്ചാര്‍ പറഞ്ഞു.
പ്രധാനമന്ത്രിയുമായുള്ള സംഭാഷണത്തിനിടെ പലപലപ്പോഴും ക്യാപ്റ്റന്‍ സ്മിത് വികാരഭരിതനായി. വിമാനത്തില്‍ നടന്ന കാര്യങ്ങളും താന്‍ നേരിട്ട പ്രയാസങ്ങളും അദ്ദഹം വിശദീകരിച്ചു. ഇത് തനിക്ക് വളരെ പ്രത്യേകതയുള്ള നിമിഷമാണെന്നും പ്രധാനമന്ത്രി മോദിയാണ് തന്റെ ഏറ്റവും വലിയ മാതൃകാപുരുഷനെന്നും ക്യാപ്റ്റന്‍ കൂട്ടിച്ചേര്‍ത്തു. വിമാനത്തിന്റെ നിയന്ത്രണം ഏറ്റെടുത്ത് വന്‍ ദുരന്തം ഒഴിവാക്കിയ ക്യാപ്റ്റന്‍ സ്മിത് മച്ചാറിന്റെ ധീരതയെ ഇസ്രായേല്‍ പ്രധാനമന്ത്രിയും സ്ഥാനപതിയും പ്രശംസിച്ചിരുന്നു.
ബുധനാഴ്ച ദുബായില്‍ നിന്ന് ടെല്‍ അവീവിലേക്ക് FZ1073 വിമാനം പറത്തുന്നതിനിടെയാണ് മുംബൈ ഘാട്ട്‌കോപ്പര്‍ സ്വദേശിയായ സ്മിത് മച്ചാര്‍ ആക്രമിക്കപ്പെട്ടത്. സഹപൈലറ്റ് ആണ് സ്മിത്തിനെ ആക്രമിച്ചത്. 180 യാത്രക്കാരാണ് വിമാനത്തില്‍ ഉണ്ടായിരുന്നത്. പരിക്കേറ്റുവെങ്കിലും, അക്രമിയെ ചെറുത്ത സ്മിത് മച്ചാര്‍ വലിയ ദുരന്തത്തില്‍ നിന്നാണ് രക്ഷപ്പെടുത്തിയത്. നിലവില്‍ സൗദി അറേബ്യയില്‍ ചികിത്സയില്‍ കഴിയുന്ന മച്ചാറിന്റെ ആരോഗ്യനില തൃപ്തികരമാണെന്ന് അധികൃതര്‍ അറിയിച്ചു.
Recent Comments