ആറ്റിങ്ങലിൽ ശക്തമായ മഴയിൽ കിണർ ഇടിഞ്ഞു താണു
ആറ്റിങ്ങൽ: കെ എസ് ആർ ടി സി ബസ്സ് സ്റ്റാൻഡിനു സമീപം അനിത ഭവനിൽ ധർമ്മപാലന്റെ കിണറാണ് കനത്ത മഴയെ തുടർന്ന് കിണർ ഇടിഞ്ഞു താഴ്ന്നത്.
കരമനയില് യുവാവിനെ കുത്തിക്കൊന്നു; പ്രതി ഒളിവില്
തിരുവനന്തപുരം: കരമനയില് യുവാവിനെ കുത്തിക്കൊന്നു. ഇടഗ്രാമം സ്വദേശി ഷിജോയാണ് കൊല്ലപ്പെട്ടത്. കുടുംബ വഴക്കിനെ തുടര്ന്നാണ് കൊലപാതകം എന്നാണ് പ്രാഥമിക വിവരം.ഞായറാഴ്ച രാത്രി പത്തോടെയാണ് കരമന ഇടഗ്രാമത്തിലെ ടാവുമുക്കില് കൊലപാതകം നടന്നത്. കഴുത്തിനോടു ചേര്ന്നാണ് കുത്തേറ്റിട്ടുള്ളത്. ഷിജോയുടെ ബന്ധുവാണ് പ്രതി എന്നാണ് വിവരം. പ്രതിക്കായി പൊലീസ് തിരച്ചില് ആരംഭിച്ചു.
പൊലീസ് ആശുപത്രിയിലേക്ക് കൊണ്ടുപോകുന്നതിനിടെ ശരീരത്തില് അധികം പരിക്കുകളൊന്നുമില്ലായിരുന്നു. അതിനാല് ഒറ്റ കുത്തിന് ഷിജോ കൊല്ലപ്പെട്ടു എന്നുള്ളതാണ് പൊലീസ് വ്യക്തമാക്കുന്നത്.
വൃത്തിയുള്ള ശുചിമുറി വിവരങ്ങൾ ‘ക്ലൂ’ നല്കും; ആപ്പുമായി ശുചിത്വ മിഷന്
തിരുവനന്തപുരം: യാത്രകള്ക്കിടയില് വൃത്തിയുള്ള ശുചിമുറി കണ്ടെത്താന് ആപ്പുമായി ശുചിത്വമിഷന്. തൊട്ടടുത്ത് വൃത്തിയുള്ള ഒരു ശുചിമുറി ക്ലൂ ആപ്പ് കാണിച്ചുതരും. സ്വകാര്യമേഖലയില് ഉള്പ്പെടെ നിലവില് പ്രവര്ത്തിച്ചുകൊണ്ടിരിക്കുന്ന ഹോട്ടലുകള്, റെസ്റ്ററന്റുകള് തുടങ്ങിയ സ്ഥാപനങ്ങളിലെ മികച്ച രീതിയില് പ്രവര്ത്തിക്കുന്ന ശുചിമുറികളെക്കൂടി ഉള്പ്പെടുത്തിയാണ് സംസ്ഥാന വ്യാപകമായി പദ്ധതി നടപ്പിലാക്കുന്നതെന്ന് മന്ത്രി എം ബി രാജേഷ് അറിയിച്ചു.
റിയല് ടൈം അപ്ഡേറ്റുകള്, മാപ്പില് ലഭ്യമാക്കുന്ന കൃത്യതയാര്ന്ന സ്ഥലവിവരങ്ങള്, ശുചിമുറികള് ലഭ്യമായ സ്ഥാപനങ്ങളുടെ പ്രവര്ത്തനസമയം എന്നിവയ്ക്കൊപ്പം ശുചിമുറിയുടെ റേറ്റിങും ആപ്പില് ഉപയോക്താക്കള്ക്ക് രേഖപ്പെടുത്താനുള്ള സംവിധാനം ഉണ്ടാകും. തദ്ദേശസ്വയംഭരണ വകുപ്പിന്റെ ‘മാലിന്യമുക്തം നവകേരളം’ പദ്ധതിയുടെ ഭാഗമായുള്ള ഈ പദ്ധതി, കേരള ഹോട്ടല് & റസ്റ്റോറന്റ് അസോസിയേഷനൊപ്പം ചേര്ന്ന് ശുചിത്വമിഷനാണ് ആവിഷ്കരിച്ചിരിക്കുന്നത്. ഇത്തരത്തില് പദ്ധതിയുടെ ഭാഗമാവുന്ന സ്വകാര്യസ്ഥാപനം നല്കുന്ന സേവനങ്ങള്, റെസ്റ്റോറന്റുകളിലെ സിഗ്നേച്ചര് ഡിഷ്, മറ്റ് ഭക്ഷണവിഭവങ്ങള്, സൗകര്യങ്ങള് എന്നിവയും ആപ്പില് നല്കും.
കേരള ലൂ (Kerala Loo) എന്നതിന്റെ ചുരുക്കെഴുത്തായാണ് ആപ്പിന് ക്ലൂ എന്ന പേര് നല്കിയിരിക്കുന്നത്. ഫ്രൂഗല് സൈന്റിഫിക് എന്ന സ്റ്റാര്ട്ടപ്പ് കമ്പനിയാണ് ആപ്പ് രൂപകല്പ്പന ചെയ്തിരിക്കുന്നത്. വൈകാതെ ആന്ഡ്രോയ്ഡ്, ഐഒഎസ് പ്ലാറ്റ്ഫോമുകളില് ആപ്പ് ലഭ്യമാവും. ആപ്പിലേക്ക് ഹോട്ടലുകള്, റെസ്റ്റോറന്റുകള്, ശുചിമുറികള് ലഭ്യമായ മറ്റു സ്ഥാപനങ്ങള് എന്നിവയുടെ രജിസ്ട്രേഷന് ഈ മാസം നാളെ മുതല് ആരംഭിക്കും. തദ്ദേശ സ്ഥാപനങ്ങളുടെ നേതൃത്വത്തിലുള്ള ടേക്ക് എ ബ്രേക്കും പൊതുശുചിമുറികളും യാത്രക്കാരുടെയുള്പ്പെടെ അവശ്യങ്ങള് നിറവേറ്റാന് പര്യാപ്തമല്ലാത്ത സാഹചര്യത്തിലാണ് പുതിയ സംരംഭം എന്നാണ് തദ്ദേശ വകുപ്പിന്റെ വിശദീകരണം.
ഒറ്റയടിക്ക് 840 രൂപ കുറഞ്ഞു; സ്വര്ണ വില 92,000ല് താഴെ
കൊച്ചി: സംസ്ഥാനത്ത് സ്വര്ണവിലയില് വീണ്ടും ഇടിവ്. കഴിഞ്ഞ ദിവസം ആയിരത്തോളം രൂപ വര്ധിച്ച സ്വര്ണവില ഇന്ന് അതേപോലെ തിരിച്ചിറങ്ങി.നിലവില് 92,000ല് താഴെയാണ് സ്വര്ണവില.
ഇന്ന് പവന് 840 രൂപയാണ് കുറഞ്ഞത്. 91,280 രൂപയാണ് ഒരു പവന് സ്വര്ണത്തിന്റെ വില. ഗ്രാമിന് 105 രൂപയാണ് കുറഞ്ഞത്. 11,410 രൂപയാണ് ഒരു ഗ്രാം സ്വര്ണത്തിന്റെ വില. ഒരിടവേളയ്ക്ക് ശേഷം ശനിയാഴ്ച പവന് ഒറ്റയടിക്ക് 920 രൂപയാണ് വര്ധിച്ചത്. ഈ മാസം സ്വര്ണവിലയില് ഏറ്റവും കുറവ് രേഖപ്പെടുത്തിയത് ഒക്ടോബര് മൂന്നിനായിരുന്നു. അന്ന് 86,560 രൂപയായിരുന്നു വില.
17ന് രേഖപ്പെടുത്തിയ 97,360 രൂപയാണ് സര്വകാല റെക്കോര്ഡ്. അമേരിക്കയില് സാമ്പത്തിക രംഗത്ത് നിലനില്ക്കുന്ന അനിശ്ചിതത്വം അടക്കമുള്ള വിഷയങ്ങളാണ് അന്താരാഷ്ട്ര വിപണിയില് സ്വര്ണവിലയെ സ്വാധീനിക്കുന്നത്. അന്താരാഷ്ട്ര വിപണിയില് സ്വര്ണവിലയില് ഉണ്ടാകുന്ന ചലനങ്ങള് ഇന്ത്യന് വിപണിയിലും പ്രതിഫലിക്കുന്നതാണ് വില വര്ധനയ്ക്ക് കാരണം.
കരൂര് ദുരന്തം: വിജയ് ഇന്ന് മരിച്ചവരുടെ കുടുംബത്തെ കാണും, കൂടിക്കാഴ്ച മഹാബലിപുരത്തെ റിസോര്ട്ടില്
ചെന്നൈ: തമിഴക വെട്രി കഴകം (ടിവികെ) കരൂരില് സംഘടിപ്പിച്ച റാലിക്കിടെ തിക്കിലും തിരക്കിലുംപെട്ട് മരിച്ച 41 പേരുടെ കുടുംബാംഗങ്ങളുമായി പാര്ട്ടി നേതാവും നടനുമായ വിജയ് നടത്തുന്ന കൂടിക്കാഴ്ച ഇന്ന്. മഹാബലിപുരത്തെ സ്വകാര്യ റിസോര്ട്ടിലാണ് കൂടിക്കാഴ്ച നിശ്ചയിച്ചിരുക്കുന്നത്. പരിപാടിയിലേക്ക് മാധ്യമങ്ങള്ക്ക് പ്രവേശനമില്ല.
വിപുലമായ സൗകര്യങ്ങലാണ് കൂടിക്കാഴ്ചയ്ക്ക് മുന്നോടിയായി റിസോര്ട്ടില് ഒരുക്കിയിരിക്കുന്നത്. ദുരന്തത്തില് മരിച്ചവരുടെ ബന്ധുക്കള്ക്കായി റിസോര്ട്ടിലെ 50 മുറികള് ബുക്ക്ചെയ്തിട്ടുണ്ട്. കൂടിക്കാഴ്ചയില് പങ്കെടുക്കുന്നവരെ വീടുകളില് നിന്ന് കാറുകളില് കരൂരിലെത്തിച്ച ശേഷം എട്ട് ബസുകളിലായാണ് മഹാബലി പുരത്തേക്ക് എത്തിച്ചത്. 38 കുടുംബങ്ങളെ ചെന്നൈയിലേക്ക് കൊണ്ടുവന്നതായി ടിവികെ ഭാരവാഹികള് പറഞ്ഞു. എന്നാല്, ആചാരപരമായ ചടങ്ങുകളുള്ളതിനാല് ചില കുടുംബങ്ങള് മഹാബലിപുരത്ത് എത്തിയിട്ടില്ല. വിജയ് കരൂരില് വരാതെ റിസോര്ട്ടിലേക്ക് വിളിപ്പിച്ചതില് ചില കുടുംബങ്ങള് അതൃപ്തിയുണ്ടെന്നും റിപ്പോര്ട്ടുകളുണ്ട്. കരൂര് സന്ദര്ശിച്ച് മരിച്ചവരുടെ കുടുംബങ്ങളെ കാണാനായിരുന്നു വിജയ് ആദ്യം പദ്ധതിയിട്ടിരുന്നത്. സുരക്ഷാ പ്രശ്നങ്ങള് ചൂണ്ടിക്കാട്ടി നീക്കം ഉപേക്ഷിക്കുകയായിരുന്നു.
കണ്സള്ട്ടന്സി സ്ഥാപനമായ വോയ്സ് ഓഫ് കോമണ്സിന്റെ നേതൃത്വത്തിലാണ് പരിപാടി സംഘടിപ്പിക്കുന്നത്. രാവിലെ 10 മണിയോടെ വിജയ് ആരംഭിക്കുന്ന പരിപാടിയില് മരിച്ച 41 പേരുടെ ഫോട്ടോയ്ക്ക് മുന്നില് മെഴുകുതിരി കത്തിച്ച് ആദരാഞ്ജലി അര്പ്പിക്കും. പിന്നീട് കുടുംബത്തിന് അനുവദിച്ച മുറിയില് എത്തി കുടുംബങ്ങളുമായി വ്യക്തിപരമായി വിജയ് കൂടിക്കാഴ്ച നടത്തും. ഉച്ചഭക്ഷണത്തിന് ശേഷം ഉച്ചകഴിഞ്ഞ് 3 മണിയോടെ യോഗം അവസാനിക്കുന്ന നിലയിലാണ് ക്രമീകരണങ്ങള്. കരൂര് ദുരന്തത്തില് മരിച്ചവരുടെ കുടുംബങ്ങള്ക്ക് വിജയ് പ്രഖ്യാപിച്ച 20 ലക്ഷം രൂപ മരിച്ചവരുടെ കുടുംബങ്ങളുടെ ബാങ്ക് അക്കൗണ്ടിലേക്ക് നിക്ഷേപിച്ചിരുന്നു.
അതിനിടെ, കരൂര് ദുരന്തവുമായി ബന്ധപ്പെട്ട അന്വേഷണം സിബിഐ ഏറ്റെടുത്തു. സംസ്ഥാന പൊലീസ് രജിസ്റ്റര് ചെയ്ത എഫ്ഐആറിന് പകരം പുതിയ എഫ്ഐആര് രജിസ്റ്റര് ചെയ്തു. സംഭവ സ്ഥലം സന്ദര്ശിച്ച് ഇരകളുടെയും കുടുംബത്തിന്റെയും മൊഴിയെടുപ്പ് തുടങ്ങിയെന്നും സിബിഐ അറിയിച്ചു.
സ്കൂള് കായിക മേളയില് പ്രായത്തട്ടിപ്പ്
തിരുവനന്തപുരം: സംസ്ഥാന സ്കൂള് കായിക മേളയുടെ മാറ്റിന് മങ്ങലേല്പ്പിച്ച് പ്രായത്തട്ടിപ്പ് പരാതി. സീനിയര് പെണ്കുട്ടികളുടെ 200 മീറ്റര് ഓട്ടത്തില് അത്ലറ്റിനെ പ്രായം തിരുത്തി മത്സരിപ്പിച്ചെന്നാണ് ആക്ഷേപം. അണ്ടര് 19 വിഭാഗത്തില് കുട്ടികള് മത്സരിക്കേണ്ട വിഭാഗത്തില് കോഴിക്കോട് പുല്ലൂരാംപാറ സ്കൂളിനായി മത്സരിച്ച വിദ്യാര്ഥിനിക്ക് 21 വയസുണ്ടെന്ന് വ്യക്തമാക്കുന്ന രേഖകള് പുറത്തുവന്നു.
ഉത്തര്പ്രദേശുകാരിയായ ജ്യോതി ഉപാധ്യായ എന്ന പെണ്കുട്ടിയുടെ മേളയിലെ പങ്കാളിത്തമാണ് പുതിയ വിവാദങ്ങള്ക്ക് വഴിവച്ചിരിക്കുന്നത്. 100, 200 മീറ്റര് സ്പിന്റ് ഇനങ്ങളില് മത്സരിച്ച ജ്യോതി വെള്ളി നേടിയിരുന്നു. ഇതിന് പിന്നാലെയാണ് മത്സരങ്ങളില് നാലാം സ്ഥാനത്തെത്തിയ തൃശൂര് ആളൂര് ആര്എംഎച്ച്എസ്എസും പാലക്കാട് ജില്ലാ ടീമും പരാതിയുമായി രംഗത്തെത്തിയത്. ഇന്ത്യന് അത്ലറ്റിക്സ് ഫെഡറേഷന്റെ ഡാറ്റ ബേസ് അനുസരിച്ച് 2004 മേയ് നാലിന് ജനിച്ച ജ്യോതിക്ക്, 21 വയസ്സും അഞ്ചു മാസവും 21 ദിവസവും പ്രായമുണ്ടെന്നാണ് വ്യക്തമാക്കുന്നുന്നത്. റിപ്പോര്ട്ടുകള് പുറത്തുവന്ന സാഹചര്യത്തില് മത്സരങ്ങളുടെ ഫലം റദ്ദാക്കുമെന്നാണ് റിപ്പോര്ട്ടുകള്.
അതേസമയം, ഇതരസംസ്ഥാന താരങ്ങളെ ഇത്തരത്തില് എത്തിക്കുന്നതിന് പിന്നില് വന് സാമ്പത്തിക ഇടപാടുണ്ടെന്നാണ് പുതിയ റിപ്പോര്ട്ടുകള്. ആധാര് കാര്ഡുകള് ഉള്പ്പടെ വയസ് തെളിയിക്കുന്ന രേഖകള് കൃത്രിമം നടത്തിയാണ് കുട്ടികളെ എത്തിക്കുന്നത്. ഇതിനായി ഏജന്റുമാര് പ്രവര്ത്തിക്കുന്നുണ്ട്. സബ് ജില്ലാ മത്സരങ്ങള്ക്ക് തൊട്ടുമുന്പാണ് കുട്ടികള് സ്കൂളുകളില് പ്രവേശനം നേടുന്നത്. പതിനായിരം മുതല് മുപ്പതിനായിരം വരെയാണ് കുട്ടികള്ക്കായി ഇതിന് ലഭിക്കുന്നത്.
Recent Comments