by Midhun HP News | Oct 26, 2026 | Latest News, ജില്ലാ വാർത്ത
വേങ്ങോട്: അശാസ്‌ത്രീയമായ ഓട നിർമ്മാണം നിമിത്തം 16 -ാoമൈൽ വേങ്ങോട് റോഡിൽ തോന്നയ്ക്കൽ സർവ്വീസ് സഹകരണ ബാങ്കിനു സമീപം കൊടുംവളവിൽ മഴക്കാലത്ത് വലിയ തോതിൽ ഉള്ള വെള്ളക്കെട്ട് ഉണ്ടാകുന്നതും വാഹനങ്ങൾ അപകടത്തിൽപ്പെടുന്നതും ബ്രേക്ക്ഡൗൺ ആകുന്നതും പതിവായിരിക്കുന്നു.
ലക്ഷങ്ങൾ ചെലവിട്ട് കഴിഞ്ഞ മന്ത്രിസഭയുടെ അവസാന കാലത്താണ് ഓട നിർമ്മിച്ചത്. റോഡിനേക്കാൾ ഉയരത്തിൽ ഓടയുടെ നിർമ്മാണം നടത്തിയതിൽ ഉണ്ടായ വീഴ്ചയാണ് ഇത്തരത്തിൽ വെള്ളക്കെട്ട് ഉണ്ടാകാൻ കാരണമാകുന്നത് എന്ന് യു.ഡി.എഫ് പോത്തൻ കോട് പഞ്ചായത്ത് ചെയർമാൻ ആർ.എസ്.വിനോദ് മണി പറഞ്ഞു. ഇതിന് ശാശ്വത പരിഹാരം ഉണ്ടാക്കാത്ത പക്ഷം ശക്തമായ സമരപപാടികൾ സംഘടിപ്പിക്കാനും യു.ഡി.എഫ് യോഗം തീരുമാനിച്ചിട്ടുണ്ട്.
by Midhun HP News | Oct 26, 2026 | Latest News, ദേശീയ വാർത്ത
ഹൈദരാബാദ്: തന്നെ കല്യാണം കഴിച്ചില്ലെങ്കില്‍ ജീവനൊടുക്കുമെന്ന് സഹപ്രവര്‍ത്തകനെ വിഡിയോ കോളിലൂടെ ഭീഷണിപ്പെടുത്തിയ ശേഷം 29കാരിയെ വീട്ടില്‍ തൂങ്ങിമരിച്ചനിലയില്‍ കണ്ടെത്തി. ഉത്തര്‍പ്രദേശ് സ്വദേശിനിയായ സോഫ്റ്റ് വെയര്‍ എന്‍ജിനീയറെയാണ് ഹൈദരാബാദിലെ വീട്ടില്‍ മരിച്ചനിലയില്‍ കണ്ടെത്തിയത്. ഹൈദരാബാദിലെ മൈന്‍ഡ് സ്‌പേസ് ഐടി കോറിഡോറിലെ സോഫ്റ്റ് വെയര്‍ കമ്പനിയില്‍ ജോലി ചെയ്യുന്ന അര്‍ച്ചന ചൗധരിയാണ് മരിച്ചത്.
ഞായറാഴ്ച രാവിലെയാണ് സംഭവം. സംഭവത്തിന് പിന്നാലെ പൊലീസ് കേസെടുത്ത് അന്വേഷണം ആരംഭിച്ചു. മരണത്തിലേക്ക് നയിച്ച സാഹചര്യങ്ങളെ കുറിച്ച് അന്വേഷിക്കുമെന്ന് പൊലീസ് പറഞ്ഞു. ഞായറാഴ്ച പുലര്‍ച്ചെ 2.30 ഓടേയാണ് അര്‍ച്ചന തന്റെ സഹപ്രവര്‍ത്തകനെ വിഡിയോ കോള്‍ ചെയ്തത്. ഹൈദരാബാദിന് പുറത്ത് തന്റെ അമ്മയ്‌ക്കൊപ്പം ഒരു ചടങ്ങില്‍ പങ്കെടുക്കുകയായിരുന്നു ഈ സമയത്ത് സഹപ്രവര്ത്തകന്. തന്നെ വിവാഹം കഴിച്ചില്ലെങ്കില്‍ ജീവനൊടുക്കുമെന്ന് അര്‍ച്ചന സഹപ്രവര്‍ത്തകനെ ഭീഷണിപ്പെടുത്തിയതായും പൊലീസ് പറയുന്നു.
തുടര്‍ന്ന് സഹപ്രവര്ത്തകന് അര്‍ച്ചനയെ പലതവണ ബന്ധപ്പെടാന്‍ ശ്രമിച്ചെങ്കിലും മറുപടി ലഭിച്ചില്ല. പുലര്‍ച്ചെ 5.30ന് ഇയാള്‍ അര്‍ച്ചനയുടെ ഫ്‌ലാറ്റില്‍ എത്തിയപ്പോള്‍ വാതില്‍ അകത്തുനിന്ന് പൂട്ടിയ നിലയിലായിരുന്നു. വിവരം അറിഞ്ഞ് പൊലീസ് സ്ഥലത്തെത്തി വാതില്‍ തകര്‍ത്ത് അകത്തുകടന്നപ്പോഴാണ് യുവതിയെ മരിച്ചനിലയില്‍ കണ്ടെത്തിയതെന്നും പൊലീസ് പറയുന്നു.
by Midhun HP News | Oct 26, 2026 | Latest News, കേരളം
കൊച്ചി: രണ്ടാഴ്ചയ്ക്കിടെ ഏകദേശം 7000 രൂപ ഇടിഞ്ഞ സ്വര്‍ണവിലയില്‍ ഇന്നും നേരിയ മുന്നേറ്റം. പവന് 120 രൂപയാണ് വര്‍ധിച്ചത്. 1,04,680 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 15 രൂപയാണ് വര്‍ധിച്ചത്. 13,085 രൂപയാണ് ഒരു ഗ്രാം സ്വര്‍ണത്തിന്റെ വില. കഴിഞ്ഞ ദിവസം പവന് 80 രൂപയാണ് കൂടിയത്.
ആഗോള വിപണിയിലെ എണ്ണവില അടക്കമുള്ള വിഷയങ്ങളാണ് സ്വര്‍ണവിലയെ സ്വാധീനിക്കുന്നത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ഇപ്പോഴും ബാരലിന് 114 ഡോളറിന് മുകളിലാണ്. ഇതിന്റെ ഫലമായി പണപ്പെരുപ്പ നിരക്ക് കൂടുമെന്നതിനാല്‍ വീണ്ടും പലിശനിരക്ക് വര്‍ധിപ്പിക്കാന്‍ യുഎസ് ഫെഡറല്‍ റിസര്‍വ് തയ്യാറായേക്കുമെന്ന റിപ്പോര്‍ട്ടുകളാണ് കഴിഞ്ഞ ദിവസങ്ങളില്‍ വിപണിയില്‍ പ്രതിഫലിച്ചത്. പലിശനിരക്ക് കൂട്ടിയാല്‍ സ്വര്‍ണത്തിന്റെ ആകര്‍ഷണം കുറയുമെന്നാണ് വിപണി വിദഗ്ധര്‍ പറയുന്നത്.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Oct 26, 2026 | Latest News, ദേശീയ വാർത്ത
ഡല്‍ഹി: കേന്ദ്ര ആഭ്യന്തര മന്ത്രി അമിത് ഷായെ അപകീര്‍ത്തിപ്പെടുത്തിയെന്ന കേസില്‍ രാഹുല്‍ ഗാന്ധിയെ കോടതി കുറ്റവിമുക്തനാക്കി. ഉത്തര്‍പ്രദേശിലെ സുല്‍ത്താന്‍പുര്‍ പ്രത്യേക കോടതിയാണ് വിധി പുറപ്പെടുവിച്ചത്. രാഹുല്‍ ഗാന്ധിയുടെ പരാമര്‍ശത്തില്‍ അപകീര്‍ത്തിപരമായ ഒന്നും ഇല്ലെന്ന് അഡീഷണല്‍ ചീഫ് ജുഡീഷ്യല്‍ മജിസ്‌ട്രേട്ട് ശുഭം വര്‍മ വ്യക്തമാക്കി.
വിധി കേൾക്കാനായി ലോക്സഭ പ്രതിപക്ഷ നേതാവായ രാഹുൽ ഗാന്ധി സുൽത്താൻപൂർ കോടതിയിൽ നേരിട്ട് ഹാജരായിരുന്നു. രാഹുലിനെ കുറ്റക്കാരനെന്ന് കണ്ടെത്താൻ തക്ക തെളിവുകൾ ഇല്ലെന്ന് കോടതി വിലയിരുത്തി. കോടതി വിധിയെ രാഹുൽ ഗാന്ധിയുടെ അനുയായികൾ സ്വാഗതം ചെയ്തു. ‘സത്യമേവ ജയതേ’ എന്ന് കോൺഗ്രസ് ട്വീറ്റ് ചെയ്തു.
2018 ല്‍ കര്‍ണാടകയിലെ തെരഞ്ഞെടുപ്പിനിടെ ബംഗളൂരുവില്‍ വെച്ച് അമിത് ഷായ്‌ക്കെതിരെ രാഹുല്‍ഗാന്ധി അപകീര്‍ത്തികരമായ പരാമര്‍ശം നടത്തിയെന്നാണ് ആരോപണം. രാഹുലിന്റെ പരാമര്‍ശത്തിനെതിരെ ബിജെപി ജില്ലാ വൈസ് പ്രസിഡന്റായിരുന്ന വിജയ് മിശ്രയാണ് പരാതി നല്‍കിയത്. പരാതിയില്‍ സുല്‍ത്താന്‍പുരിലെ എംപി/എംഎല്‍എ പ്രത്യേക കോടതിയാണ് കേസെടുത്തത്.
‘ബിജെപിയുടെ ദേശീയ അധ്യക്ഷന്‍ ഒരു കൊലക്കേസ് പ്രതിയാണെന്ന കാര്യം ഇന്ത്യയിലെ ജനങ്ങള്‍ മറന്നുപോകുന്നു. അതാണ് സത്യം. സത്യസന്ധതയെക്കുറിച്ചും മാന്യതയെക്കുറിച്ചും വാചാലരാകുന്ന പാര്‍ട്ടിയുടെ അധ്യക്ഷ സ്ഥാനത്തിരിക്കുന്നത് കൊലക്കുറ്റം ആരോപിക്കപ്പെട്ട ഒരാളാണ്’ എന്നാണ് രാഹുല്‍ ഗാന്ധി പറഞ്ഞത്. സൊഹ്‌റാബുദീന്‍ ഷെയ്ഖ് വ്യാജ ഏറ്റുമുട്ടല്‍ കേസിനെ കുറിച്ച് പരാമര്‍ശിക്കവേയാണ് രാഹുല്‍ ഇക്കാര്യം പറഞ്ഞത്.
by Midhun HP News | Oct 26, 2026 | Latest News, കേരളം
മലപ്പുറം: ഒതുക്കുങ്ങലിൽ അമിതവേഗതയിൽ മദ്യലഹരിയിൽ പാഞ്ഞെത്തിയ കാറിടിച്ച് സ്കൂട്ടർ യാത്രികനായ സ്കൂൾ അധ്യാപകന് ദാരുണാന്ത്യം. ഒതുക്കുങ്ങൽ പാലേമാട് കുഴിപ്പുറം സ്വദേശി ഷറഫുദ്ദീൻ (36) ആണ് മരിച്ചത്. സ്വകാര്യ സ്കൂളിൽ താൽക്കാലിക അധ്യാപകനായി ജോലി ചെയ്തുവരികയായിരുന്നു. കാറോടിച്ചിരുന്ന പാറപ്പുറം സ്വദേശി അക്ബർ അലിയെ (36) പൊലീസ് അറസ്റ്റ് ചെയ്തു.
ഞായറാഴ്ച രാത്രി പത്ത് മണിയോടെ ഒതുക്കുങ്ങലിൽ വെച്ചായിരുന്നു അപകടം . സുഹൃത്ത് ഹബീബുമൊത്ത് സ്കൂട്ടറിൽ യാത്ര ചെയ്യുകയായിരുന്ന ഷറഫുദ്ദീനെ അക്ബർ അലി ഓടിച്ച കാർ നിയന്ത്രണംവിട്ട് ഇടിച്ചുതെറിപ്പിക്കുകയായിരുന്നു.
ഇടിയുടെ ആഘാതത്തിൽ റോഡിലേക്ക് തെറിച്ചുവീണ ഷറഫുദ്ദീന് തലയ്ക്കും ശരീരത്തിനും അതീവ ഗുരുതരമായി പരിക്കേറ്റു. അപകടം കണ്ടുനിന്ന നാട്ടുകാരും യാത്രക്കാരും ചേർന്ന് ഇരുവരെയും ഉടൻതന്നെ സമീപത്തെ സ്വകാര്യ ആശുപത്രിയിൽ എത്തിച്ചെങ്കിലും അർധരാത്രിയോടെ ഷറഫുദ്ദീൻ മരണത്തിന് കീഴടങ്ങി. കൂടെയുണ്ടായിരുന്ന സുഹൃത്ത് ഹബീബ് പരിക്കുകളോടെ ചികിത്സയിലാണ്.
നാട്ടുകാർ തടഞ്ഞുവെച്ച കാർ ഡ്രൈവർ അക്ബർ അലിയെ പൊലീസ് കസ്റ്റഡിയിലെടുത്തു. തുടർന്ന് നടത്തിയ വിശദമായ വൈദ്യപരിശോധനയിൽ ഇയാൾ അപകടസമയത്ത് കടുത്ത മദ്യലഹരിയിലായിരുന്നുവെന്ന് സ്ഥിരീകരിച്ചതായി പൊലീസ് അറിയിച്ചു. പ്രതിക്കെതിരെ മനഃപൂർവ്വമല്ലാത്ത നരഹത്യ ഉൾപ്പെടെയുള്ള വകുപ്പുകൾ ചുമത്തിയാണ് കേസ് രജിസ്റ്റർ ചെയ്തിരിക്കുന്നത്. ഇയാളുടെ അറസ്റ്റ് രേഖപ്പെടുത്തി തുടർനിയമനടപടികൾ സ്വീകരിച്ചു വരികയാണെന്ന് പൊലീസ് വ്യക്തമാക്കി.
by Midhun HP News | Oct 26, 2026 | Latest News, ജില്ലാ വാർത്ത
പോലീസിനെ കണ്ടു ഭയന്ന് ഇരുചക്ര വാഹനത്തിൽ പോയ യുവാക്കൾ അപകടത്തിൽ പെട്ടു. ഒരാൾ മരിച്ചു. അഞ്ചുതെങ്ങ് കിടങ്ങിൽ വിജേഷ് (ഉണ്ണി) (30) പോലീസ് ജീപ്പ് കണ്ട് ബൈക്ക് വേഗത്തിൽ ഓടിച്ചു നിയന്ത്രണം വിട്ട് കടയ്ക്കാവൂർ വിളയിൽമൂലയിൽ വച്ച് കൈവരി ഇല്ലാത്ത ഭാഗത്ത് നിന്നും താഴേക്ക് വീണ് അപകടം സംഭവിക്കുകയായിന്നു. തുടർന്ന് ആശുപത്രിയിൽ ചികിത്സയിൽ ഇരിക്കേ മരണപ്പെട്ടു. ഇന്ന് പുലർച്ചേയായിരുന്നു അപകടം.
സംഭവത്തിൽ അഞ്ചുതെങ്ങ് സ്വദേശികളായ മറ്റ് രണ്ട് പേർക്ക് പരുക്ക് പറ്റി. ഇവരിൽ ഒരാൾ മെഡിക്കൽ കോളേജ് ആശുപത്രിയിൽ ചികിത്സയിലാണ്. നിലവിൽ തിരുവനന്തപുരം മെഡിക്കൽ കൊളേജ് ആശുപത്രിയിൽ സൂക്ഷിച്ചിട്ടുള്ള മൃതദേഹം പോസ്റ്റ്‌ മൊർട്ടം നടപടികൾക്ക് ശേഷം ബന്ധുക്കൾക്ക് വിട്ടുകൊടുക്കും. കൂടുതൽ വിവരങ്ങൾ അറിവായിട്ടില്ല.
അമ്മ : ബിന്ദു
അച്ഛൻ : സച്ചി
സഹോദരങ്ങൾ : സനൽ, ഗ്രീഷ്മ
Recent Comments