by Midhun HP News | Oct 2, 2025 | Latest News, ജില്ലാ വാർത്ത
തിരുവനന്തപുരം: ശബരിമല സ്വര്ണപ്പാളി അടക്കമുള്ള വിവാദങ്ങളില് സമഗ്ര അന്വേഷണം വേണമെന്ന് തിരുവിതാംകൂര് ദേവസ്വം ബോര്ഡ് ഹൈക്കോടതിയില് ആവശ്യപ്പെടും. നിലവില് ദേവസ്വം വിജിലന്സാണ് അന്വേഷണം നടത്തുന്നത്. ഇതിനുപുറമേ, ക്രൈംബ്രാഞ്ച് അല്ലെങ്കില് കോടതി നിയോഗിക്കുന്ന പ്രത്യേക അന്വേഷണ സംഘം എല്ലാകാര്യങ്ങളും സമഗ്രമായി അന്വേഷിക്കണമെന്നാകും ബോര്ഡ് അഭിഭാഷകന് ആവശ്യപ്പെടുക. ഇക്കാര്യം നിര്ദേശിക്കാന് ദേവസ്വം മന്ത്രി തിരുവിതാംകൂര് ദേവസ്വം ബോര്ഡിന് നിര്ദേശം നല്കിയതായാണ് സൂചന.
1999 മുതല് 2025 വരെ ദേവസ്വം ഭാരവാഹികളായിരുന്നവര്, അംഗങ്ങള്, മന്ത്രിമാര്, എഴുത്തുകുത്തുകള് തുടങ്ങിയ എല്ലാക്കാര്യങ്ങളും അന്വേഷണ പരിധിയില് കൊണ്ടു വരണമെന്നാണ് സര്ക്കാര് നിലപാട്. ഹൈക്കോടതിയുടെ അനുമതിയില്ലാതെ സ്പോണ്സറായ ഉണ്ണികൃഷ്ണന് പോറ്റിക്ക് സ്വര്ണപ്പാളി സംസ്ഥാനത്തിന് പുറത്തേക്ക് കൊണ്ടുപോകാന് അനുമതി നല്കിയത് വിവാദമായിരുന്നു. ഇതേത്തുടര്ന്നാണ് ഹൈക്കോടതി ഇക്കാര്യത്തില് സമഗ്ര അന്വേഷണം നടത്താന് ദേവസ്വം വിജിലന്സിന് നിര്ദേശം നല്കിയത്.
ഇതിനു പിന്നാലെയാണ് ഇക്കാര്യങ്ങളിലടക്കം ഉദ്യോഗസ്ഥ തലത്തില് വീഴ്ചയുണ്ടായതായി കണ്ടെത്തുന്നത്. വീഴ്ചയുണ്ടായത് തിരുവിതാംകൂര് ദേവസ്വം ബോര്ഡ് പ്രസിഡന്റ് പി എസ് പ്രശാന്ത് സമ്മതിക്കുകയും ചെയ്തിരുന്നു. സ്വര്ണം പൂശിയത് ചെമ്പായി മാറുന്നു, ചട്ടം മറികടന്ന് മറ്റു സംസ്ഥാനങ്ങളിലേക്ക് കൊണ്ടുപോകാന് അനുവദിക്കുന്നു, സ്വര്ണപ്പാളി ഉപയോഗിച്ച് മറ്റു സംസ്ഥാനങ്ങളില് വ്യാപകമായ പണപ്പിരിവ് തുടങ്ങി പല തരത്തിലുള്ള തട്ടിപ്പു വിവരങ്ങളാണ് പുറത്തു വന്നത്. വിവാദങ്ങള്ക്ക് പിന്നാലെ കാണാതായ ദ്വാരപാലക ശില്പ്പത്തിന്റെ പീഠം സ്പോണ്സറുടെ ബന്ധുവിന്റെ വീട്ടില് നിന്നും കണ്ടെത്തിയിരുന്നു.
ദേവസ്വം മന്ത്രിയും ദേവസ്വം ബോര്ഡ് പ്രസിഡന്റ് പി എസ് പ്രശാന്തും തമ്മിലുള്ള ചര്ച്ചയിലാണ് പ്രത്യേക അന്വേഷണം ആവശ്യപ്പെടാന് തീരുമാനിച്ചത്. ഒന്നും മറയ്ക്കാനില്ലെന്നും, എല്ലാക്കാര്യങ്ങളും വെളിച്ചത്തു വരട്ടെ എന്നുമാണ് സര്ക്കാര് നിലപാട്. സ്വര്ണപ്പാളി ഒരിക്കലും ഉണ്ണികൃഷ്ണന് പോറ്റിയുടെ കൈവശം കൊടുത്തുവിടാന് പാടില്ലായിരുന്നുവെന്നും, അങ്ങനെ കൊടുത്തുവിട്ടതില് ഉദ്യോഗസ്ഥരുടെ കാര്യത്തില് വീഴ്ചയുണ്ടായിട്ടുണ്ടെന്നും ദേവസ്വം ബോര്ഡ് പ്രസിഡന്റ് പി എസ് പ്രശാന്ത് വ്യക്തമാക്കിയിരുന്നു.
by Midhun HP News | Oct 2, 2025 | Latest News, ജില്ലാ വാർത്ത
രാഷ്ട്രപിതാവ് മഹാത്മാഗാന്ധിയുടെ 156 – >o ജന്മദിനം ആറ്റിങ്ങൽ കിഴക്കേ നാലുമുക്ക് ജംഗ്ഷനിൽ ഈസ്റ്റ് മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ഛായാ ചിത്രത്തിൽ പുഷ്പാർപ്പണവും, അനുസ്മരണവും നടത്തി.
എൻ ജി ഒ അസോസിയേഷൻ സംസ്ഥാന കമ്മിറ്റി അംഗം ബി.ഷിബുകുമാർ ഉദ്ഘാടനം ചെയ്തു. മണ്ഡലം പ്രസിഡന്റ് എച്ച് ബഷീർ അധ്യക്ഷത വഹിച്ചു. ആർ തുളസീദാസ്, ഷൈജു ചന്ദ്രൻ, കിരൺ കൊല്ലമ്പുഴ, എം.സിയാദ്, വക്കം സുധ, ആർ.അരുൺകുമാർ, കെ.മധുസൂദനൻ പിള്ള തുടങ്ങിയവർ സംസാരിച്ചു.
by Midhun HP News | Oct 2, 2025 | Latest News
പത്തനംതിട്ട: ശബരിമല സ്വര്ണപ്പാളി വിവാദത്തില് പ്രതികരണവുമായി തിരുവിതാംകൂര് ദേവസ്വം ബോര്ഡ് പ്രസിഡന്റ് പി എസ് പ്രശാന്ത്. 2019 ല് ഉദ്യോഗസ്ഥ തലത്തില് വീഴ്ച ഉണ്ടായിട്ടുണ്ട്. അതില് സംശയമൊന്നുമില്ല. സ്വര്ണപ്പാളി ഒരിക്കലും ഉണ്ണികൃഷ്ണന് പോറ്റിയുടെ കൈവശം കൊടുത്തുവിടാന് പാടില്ലായിരുന്നു. അങ്ങനെ കൊടുത്തുവിട്ടതില് ഉദ്യോഗസ്ഥരുടെ കാര്യത്തില് വീഴ്ചയുണ്ടായിട്ടുണ്ട്. 1999 മുതല് 2025 വരെയുള്ള കാര്യങ്ങള് അന്വേഷിച്ച് എല്ലാക്കാര്യങ്ങളും പുറത്തു വരട്ടെയെന്നും പ്രശാന്ത് പറഞ്ഞു.
ഉണ്ണികൃഷ്ണന് പോറ്റി ആരാണെന്ന് ദേവസ്വം ബോര്ഡിന് കൃത്യമായ ധാരണയില്ല. അദ്ദേഹം തന്നെയാണ് ചര്ച്ചകള്ക്ക് തുടക്കം കുറിച്ചത്. അതില് സന്തോഷമുണ്ട്. ദേവസ്വം ബോര്ഡിനെ പ്രതികൂട്ടിലാക്കാന് ഉണ്ണികൃഷ്ണന് പോറ്റി ശ്രമിച്ചു. എന്നാല്, ആ കുഴിയില് അദ്ദേഹം തന്നെ വീണു. എല്ലാക്കാര്യങ്ങളിലും സമഗ്രമായ അന്വേഷണം നടത്താൻ കോടതിയോട് ആവശ്യപ്പെടണമെന്നാണ് ദേവസ്വം ബോര്ഡിന്റെ നിലപാട്.
ശബരിമലയെന്ന പവിത്രമായ ആരാധനാലയത്തെ സംശയത്തിന്റെ നിഴലില് നിര്ത്തി മുന്നോട്ടു പോകാനാവില്ല. 1994 ലാണ് വിജയ് മല്യ സ്വര്ണം പൂശല് നടത്തിയത്. അതു മുതല് 2025 വരെയുള്ള കാര്യങ്ങള് സമഗ്രമായി അന്വേഷിക്കണമെന്നാണ് തിരുവിതാംകൂര് ദേവസ്വം ബോര്ഡിന്റെ നിലപാട്. അക്കാര്യം കോടതിയോട് ആവശ്യപ്പെടുമെന്ന് ബോര്ഡ് പ്രസിഡന്റ് പി എസ് പ്രശാന്ത് പറഞ്ഞു.
സ്വര്ണപ്പാളിയുമായി ബന്ധപ്പെട്ട വിവാദങ്ങള്, അതിന്റെ നിറമാകട്ടെ, തൂക്കമാകട്ടെ, അളവാകട്ടെ, ഉണ്ണികൃഷ്ണന് പോറ്റിയെപ്പോലുള്ള അവതാരങ്ങളാകട്ടെ ഇതിനെയെല്ലാം കുറിച്ച് സമഗ്രമായ അന്വേഷണം വേണം. ഉണ്ണികൃഷ്ണന് പോറ്റിയെന്നല്ല, ശബരിമലയുമായി ബന്ധപ്പെട്ട ഏതു കാര്യവും അന്വേഷണ വിധേയമാക്കണം. ഇക്കാര്യത്തില് ഞങ്ങള്ക്ക് ഒന്നും ഒളിക്കാനും മറയ്ക്കാനും ഇല്ലെന്നും തിരുവിതാംകൂര് ദേവസ്വം ബോര്ഡ് പ്രസിഡന്റ് പ്രശാന്ത് വ്യക്തമാക്കി.
by Midhun HP News | Oct 2, 2025 | Latest News, ദേശീയ വാർത്ത
ന്യൂഡല്ഹി: രാജ്യത്തുടനീളം ഇ-സിം സേവനം ആരംഭിക്കാന് പദ്ധതിയിട്ട് പൊതുമേഖല ടെലികോം ഓപ്പറേറ്ററായ ബിഎസ്എന്എല്. ടാറ്റ കമ്മ്യൂണിക്കേഷന്സിന്റെ സഹായത്തോടെ പദ്ധതി നടപ്പാക്കാനാണ് ബിഎസ്എന്എല് ലക്ഷ്യമിടുന്നത്. ഫിസിക്കല് സിം കാര്ഡിന്റെ ആവശ്യമില്ലാതെ തന്നെ മൊബൈല് കണക്ടിവിറ്റി സാധ്യമാക്കാന് ഇത് സഹായിക്കും.
പരമ്പരാഗതമായ രീതിയില് സിം ഇട്ട് മൊബൈല് കണക്ടിവിറ്റി സാധ്യമാക്കുന്ന രീതിക്ക് പകരം ക്യൂ ആര് കോഡ് സ്കാന് ചെയ്ത് മൊബൈല് കണക്ഷന് ആക്ടീവ് ആക്കുന്ന രീതിക്ക് തുടക്കമിടാനാണ് ബിഎസ്എന്എല് പദ്ധതിയിടുന്നത്. ഡ്യുവല് സിം ഫോണ് ഉള്ളവര്ക്കും യാത്ര ചെയ്യുന്നവര്ക്കും പ്രാദേശിക നെറ്റ്വര്ക്കുകളുമായി എളുപ്പത്തില് കണക്റ്റ് ചെയ്യാന് ആഗ്രഹിക്കുന്നവര്ക്കും ഇ-സിം സേവനം ഉപയോഗപ്രദമായിരിക്കുമെന്നാണ് റിപ്പോര്ട്ടുകള് വ്യക്തമാക്കുന്നത്. ഫിസിക്കല് സിം കാര്ഡുകള്ക്ക് പകരം 2ജി/3ജി/4ജി സേവനങ്ങള് ബിഎസ്എന്എല്ലിന്റെ ഇ-സിമ്മുകള് വാഗ്ദാനം ചെയ്യുന്നു. ഡ്യുവല് സിം മൊബൈല് ഫോണുള്ള ഉപയോക്താക്കള്ക്ക് ഫിസിക്കല് സിമ്മിനൊപ്പം ഒരു ഇ-സിമ്മും ഉപയോഗിക്കാം.
ടാറ്റാ കമ്മ്യൂണിക്കേഷന്സിന്റെ ജിഎസ്എംഎ അംഗീകൃത സബ്സ്ക്രിപ്ഷന് മാനേജ്മെന്റ് പ്ലാറ്റ്ഫോമായ മൂവ് ആണ് ഇ-സിം സേവനങ്ങള് നല്കുന്നത്. ടാറ്റ കമ്മ്യൂണിക്കേഷന്സ് കൊളാബറേഷന് സര്വീസസ് പ്രൈവറ്റ് ലിമിറ്റഡ് (ടിസിസിഎസ്പിഎല്) വഴിയാണ് ഇത് വിതരണം ചെയ്യുന്നത്. പൊതുമേഖലാ ടെലികോം കമ്പനിയായ ബിഎസ്എന്എല്ലിനെ സംബന്ധിച്ച് ഇ-സിം സേവനങ്ങള് ആരംഭിക്കുന്നത് ഒരു സുപ്രധാന ചുവടുവയ്പ്പായിരിക്കുമെന്നും റിപ്പോര്ട്ടുകള് ചൂണ്ടിക്കാണിക്കുന്നു.
by Midhun HP News | Oct 2, 2025 | Latest News, കേരളം
നടനും മിമിക്ര കലാകാരനും ഗായകനും അവതാരകനുമൊക്കെയായി മലയാളി അടുത്തറിഞ്ഞ താരമാണ് കലാഭവന് നവാസ്. തമാശ പറഞ്ഞ് ചിരിപ്പിക്കാനും പാട്ടുപാടി ഉള്ളു തൊടാനും നവാസിന് ഒരുപോലെ സാധിച്ചിരുന്നു. നിനച്ചിരിക്കാതെ മരണം നവാസിനെ കവര്ന്നെടുത്ത് പോയതിന്റെ ഞെട്ടലില് നിന്നും അദ്ദേഹത്തിന്റെ പ്രിയപ്പെട്ടവര് ഇപ്പോഴും മുക്തരായിട്ടില്ല.
നവാസ് മരിക്കുന്നതിന്റെ തലേദിവസം ഭാര്യ രഹ്നയ്ക്കായി പാടി പാട്ടിന്റെ വിഡിയോ പങ്കുവച്ചിരിക്കുകയാണ് മകന് റിഹാന് നവാസ്. മരിക്കുന്നതിന്റെ തലേദിവസം നവാസും കുടുംബവും പങ്കെടുത്തൊരു കല്യാണത്തില് നിന്നുള്ളതാണ് വിഡിയോ. സോഷ്യല് മീഡിയയുടെ നെഞ്ചിലൊരു നീറ്റലായി മാറിയിരിക്കുകയാണ് നവാസിന്റെ വിഡിയോ.
ജുലൈ 31 ന് എടുത്ത വിഡിയോ ആണിത്. ലൊക്കേഷനില് നിന്നുമാണ് നവാസ് കല്യാണത്തില് പങ്കെടുക്കാനെത്തുന്നത്. ഉമ്മിച്ചിയുടെ നിര്ബന്ധത്തെ തുടര്ന്നാണ് വാപ്പിച്ചി കല്യാണത്തിന് എത്തിയതെന്നും റിഹാന് പറയുന്നുണ്ട്. അതായിരുന്നു അവര് തമ്മിലുള്ള അവസാന കൂടിക്കാഴ്ചയെന്നും റിഹാന് പറയുന്നു. റിഹാന്റെ കുറിപ്പിലേക്ക്:
പ്രിയരേ, ഇത് വാപ്പിച്ചി ഇടവേളയില് ഉമ്മിച്ചിക്ക് പാടി കൊടുത്ത പാട്ടാണ്. ജൂലൈ 31 , വാപ്പിച്ചിയും ഉമ്മിച്ചിയും അറ്റന്ഡ് ചെയ്ത കല്യാണം. വാപ്പിച്ചി ഞങ്ങളെ വിട്ട് പോകുന്നതിന്റെ തലേദിവസം എടുത്ത വീഡിയോ. കല്യാണത്തിന് ലൊക്കേഷനില് നിന്നും വരാമെന്നു പറഞ്ഞെങ്കിലും പറഞ്ഞ സമയത്ത് വര്ക്ക് കഴിഞ്ഞില്ല. ഉച്ചക്ക് 12:30 ആയി.ആ സമയത്ത് വന്നാല് കല്യാണം കഴിയുമെന്ന് വാപ്പിച്ചി പറഞ്ഞെങ്കിലും.
‘ഉമ്മിച്ചി സമ്മതിച്ചില്ല, വാപ്പിച്ചിയെ കാണാനുള്ള കൊതി കൊണ്ട് ഉമ്മിച്ചി വാശി പിടിച്ചു, ലൊക്കേഷനിലെ ഇടവേളയില് ഉമ്മിച്ചിയെ കാണാന് വാപ്പിച്ചി ഓടിയെത്തി. വാപ്പിച്ചി വളരെ ഹെല്ത്തി ആയിരുന്നു. അവിടെ വെച്ചു അവര് അവസാനമായി കണ്ടു. രണ്ടു പേരും അറിഞ്ഞില്ല, അത് അവസാന കാഴ്ചയായിരുന്നെന്ന്. വാപ്പിച്ചി ലൊക്കേഷനിലേയ്ക്കും ഉമ്മിച്ചി വീട്ടിലേയ്ക്കും മടങ്ങി. ‘വാപ്പിച്ചിയും ഉമ്മിച്ചിയും രണ്ട് ലോകത്തിരുന്ന് രണ്ട് പേരും ഇപ്പോഴും പ്രണയിക്കുന്നു’.
by Midhun HP News | Oct 2, 2025 | Latest News, ജില്ലാ വാർത്ത, മരണം
ആറ്റിങ്ങൽ: ഗേൾസ് ഹയർ സെക്കൻഡറി സ്കൂളിന് സമീപം സാജു നിവാസിൽ (എം.ആർ.എ:17) പി മാധവൻ കുട്ടി (78) (എക്സ് ഇന്ത്യൻ നേവി) അന്തരിച്ചു.
ഭാര്യ: എസ് തുളസീഭായി.
മക്കൾ: എം.റ്റി സാജു (ജേണലിസ്റ്റ്), സജി കൃഷ്ണപ്രസാദ് (സിവിൽ എഞ്ചിനീയർ).
സഞ്ചയനം തിങ്കളാഴ്ച രാവിലെ 9 മണിക്ക്
Recent Comments