by Midhun HP News | Oct 26, 2026 | Latest News, ജില്ലാ വാർത്ത
തിരുവനന്തപുരം: സംസ്ഥാനത്ത് ഇന്നും തീവ്രമഴയ്ക്ക് സാധ്യത. നാലു ജില്ലകളില്‍ ഇന്ന് ഓറഞ്ച് അലര്‍ട്ട് പുറപ്പെടുവിച്ചിട്ടുണ്ട്. പത്തനംതിട്ട, ഇടുക്കി, പാലക്കാട്, മലപ്പുറം ജില്ലകളിലാണ് തീവ്രമഴ മുന്നറിയിപ്പ്. തിരുവനന്തപുരം, കൊല്ലം, ആലപ്പുഴ, കോട്ടയം, എറണാകുളം, തൃശൂര്‍, കോഴിക്കോട്, വയനാട് ജില്ലകളില്‍ യെല്ലോ അലര്‍ട്ടും പുറപ്പെടുവിച്ചിട്ടുണ്ട്.
ഒറ്റപ്പെട്ടയിടങ്ങളില്‍ ഇടിമിന്നലോട് കൂടിയ മഴയ്ക്കും മണിക്കൂറില്‍ 40-50 കിലോമീറ്റര്‍ വരെ വേഗതയില്‍ ശക്തമായ കാറ്റിനും സാധ്യതയുള്ളതായി കേന്ദ്ര കാലാവസ്ഥ വകുപ്പ് അറിയിച്ചു. തെക്കുകിഴക്കന്‍ അറബിക്കടലിലും കേരളം തീരത്തിനും മുകളിലായി ന്യൂനമര്‍ദ്ദം സ്ഥിതിചെയ്യുന്നു. ന്യൂനമര്‍ദ്ദവുമായി ബന്ധപ്പെട്ട ചക്രവാതച്ചുഴിയില്‍ നിന്ന് കേരളത്തിലൂടെ വടക്കന്‍ തമിഴ്നാട് തീരം വരെ ന്യൂനമര്‍ദ്ദ പാത്തി ട്രഫ് സ്ഥിതിചെയ്യുന്നു.
മധ്യ ബംഗാള്‍ ഉള്‍ക്കടലിലും തെക്കുകിഴക്കന്‍ ബംഗാള്‍ ഉള്‍ക്കടലിലും മുകളായിലായി തീവ്രന്യൂനമര്‍ദ്ദം സ്ഥിതിചെയ്യുന്നു. അതിതീവ്ര ന്യൂനമര്‍ദ്ദമായി ശക്തിപ്രാപിച്ച് ഇന്ന് മധ്യബംഗാള്‍ ഉള്‍ക്കടലിലും അതിനോട് ചേര്‍ന്ന മധ്യപടിഞ്ഞാറന്‍ ബംഗാള്‍ ഉള്‍ക്കടലിലുമായി ചുഴലിക്കാറ്റായി ശക്തിപ്രാപിക്കാനും ഒക്ടോബര്‍ 27-ന് രാവിലെ മധ്യപടിഞ്ഞാറന്‍ ബംഗാള്‍ ഉള്‍ക്കടലില്‍ ശക്തമായ ചുഴലിക്കാറ്റായി മാറാനും സാധ്യതയുണ്ട്.
തുടര്‍ന്ന് വടക്കുപടിഞ്ഞാറന്‍ ദിശയില്‍ നീങ്ങുന്ന ഇത് കൂടുതല്‍ ശക്തിപ്രാപിച്ച് അതിശക്തമായ ചുഴലിക്കാറ്റായി മാറുകയും ഒക്ടോബര്‍ 28-ന് രാവിലെ ആന്ധ്രാപ്രദേശ് തീരത്തിന് സമീപം മധ്യപടിഞ്ഞാറന്‍ ബംഗാള്‍ ഉള്‍ക്കടലില്‍ എത്തിച്ചേരുകയും ഉച്ചയ്ക്ക് മുമ്പ് ആന്ധ്രാപ്രദേശ് യാനം തീരങ്ങള്‍ക്കിടയിലൂടെ ബാപട്ലക്കും വിശാഖപട്ടണത്തിനും ഇടയിലുള്ള മണിക്കൂറില്‍ 115-125 കിലോമീറ്ററും പരമാവധി വേഗം മണിക്കൂറില്‍ 140 കിലോമീറ്റര്‍ വരെയും അതിശക്തമായ ചുഴലിക്കാറ്റായി കരയില്‍ പ്രവേശിക്കാന്‍ സാധ്യത.
മത്സ്യത്തൊഴിലാളി ജാഗ്രത നിര്‍ദേശം
കേരള – കര്‍ണാടക – ലക്ഷദ്വീപ് തീരങ്ങളില്‍ ഇന്നും മത്സ്യബന്ധനത്തിന് പോകാന്‍ പാടില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു. കേരള – കര്‍ണാടക – ലക്ഷദ്വീപ് തീരങ്ങളില്‍ മണിക്കൂറില്‍ 35 മുതല്‍ 45 കിലോമീറ്റര്‍ വരെയും ചില അവസരങ്ങളില്‍ മണിക്കൂറില്‍ 55 കിലോമീറ്റര്‍ വരെയും വേഗതയില്‍ ശക്തമായ കാറ്റിനും മോശം കാലാവസ്ഥയ്ക്കും സാധ്യത.
പ്രത്യേക ജാഗ്രത നിര്‍ദേശം
ബംഗാള്‍ ഉള്‍ക്കടല്‍: പുലര്‍ച്ചെ മുതല്‍ മധ്യകിഴക്കന്‍ ബംഗാള്‍ ഉള്‍ക്കടലിലും അതിനോട് ചേര്‍ന്നുള്ള തെക്കുകിഴക്കന്‍ ബംഗാള്‍ ഉള്‍ക്കടലിലും കാറ്റിന്റെ വേഗത മണിക്കൂറില്‍ 70 മുതല്‍ 80 കിലോമീറ്റര്‍ വരെയും ചില അവസരങ്ങളില്‍ മണിക്കൂറില്‍ 90 കിലോമീറ്റര്‍ വരെയും ഉയരാന്‍ സാധ്യത. അതിനുശേഷം, ഈ പ്രദേശങ്ങളില്‍ കാറ്റിന്റെ വേഗത കുറഞ്ഞ് ഒക്ടോബര്‍ 26 രാത്രിയോടെ മണിക്കൂറില്‍ 50-60 കിലോമീറ്ററും ചില അവസരങ്ങളില്‍ മണിക്കൂറില്‍ 70 കിലോമീറ്ററും, ഒക്ടോബര്‍ 27 ഉച്ചയോടെ കാറ്റിന്റെ വേഗത മണിക്കൂറില്‍ 40-50 കിലോമീറ്ററും ചില അവസരങ്ങളില്‍ മണിക്കൂറില്‍ 60 കിലൊമീറ്റര്‍ വരെ ആകാന്‍ സാധ്യതയുണ്ട്. തുടര്‍ന്ന് കാറ്റിന്റെ വേഗത ക്രമേണ കുറയാന്‍ സാധ്യത.
by Midhun HP News | Oct 26, 2026 | Latest News, കേരളം
കൊച്ചി: ചേരാനെല്ലൂരില്‍ ജഡ്ജിയുടെ പ്രായപൂര്‍ത്തിയാകാത്ത മകന്‍ ഓടിച്ച് സ്‌കൂട്ടര്‍ യാത്രക്കാരന്‍ മരിച്ച സംഭവത്തില്‍ ഹൈക്കോടതി റിപ്പോര്‍ട്ട് തേടി. നടന്ന സംഭവങ്ങള്‍ ജുഡീഷ്യറിയ്ക്ക് അവമതിപ്പുണ്ടാക്കിയെന്ന് കോടതി വിലയിരുത്തി. ഹൈക്കോടതി രജിസ്ട്രിയോടാണ് റിപ്പോര്‍ട്ട് തേടിയത്. വാഹനത്തിന്റെ ആര്‍ സി ഓണര്‍ ജഡ്ജിയാണോയെന്ന് പരിശോധിക്കുകയാണ്. അതില്‍ റിപ്പോര്‍ട്ട് ലഭിച്ചശേഷം ജഡ്ജിയെ സസ്‌പെന്‍ഡ് ചെയ്‌തേക്കുമെന്നാണ് വിവരം.
മോട്ടോര്‍ ആക്‌സിഡന്റ് ക്ലെയിം ട്രിബ്യൂണല്‍ ജഡ്ജിയുടെ മകനാണ് വാഹനാപകടം ഉണ്ടാക്കിയത്. അപകടത്തില്‍ സ്‌കൂട്ടര്‍ യാത്രക്കാരനായ തട്ടുകടക്കാരന്‍ ജയബാലകൃഷ്ണനാണ് മരിച്ചത്. കേസില്‍ ജഡ്ജിയെ പ്രതി ചേര്‍ക്കാന്‍ പൊലീസ് മടിച്ചതില്‍ വലിയ പ്രതിഷേധം ഉയര്‍ന്നിരുന്നു. ഹൈക്കോടതി റിപ്പോര്‍ട്ട് തേടിയതിന് പിന്നാലെ ചേരാനെല്ലൂര്‍ പൊലീസ് ജഡ്ജിയെ കേസില്‍ പ്രതിയാക്കിയിട്ടുണ്ട്.
അപകട വിവരം അറിയിച്ചപ്പോൾ 17 കാരന്റെ പിതാവായ ജഡ്ജി ധാർഷ്ട്യത്തോടെ സംസാരിച്ചെന്ന് ജയബാലകൃഷ്ണന്റെ ബന്ധുക്കൾ ആരോപിക്കുന്നു. നീ എന്നെ നിയമം പഠിപ്പിക്കരുതെന്നാണ് പ്രതിയുടെ അച്ഛനായ ജഡ്ജി പറഞ്ഞത്. തങ്ങളെ ചോദ്യംചെയ്യാൻ വരേണ്ടെന്നും പറഞ്ഞു. മകൻ ആദ്യമായാണ് വാഹനം ഓടിക്കുന്നതെന്നും ജഡ്ജി പറഞ്ഞിരുന്നു. പ്രതിയുടെ പിതാവ് ജഡ്ജിയാണെന്ന് അറിഞ്ഞപ്പോൾ പൊലീസിന്റെ സമീപനം മാറിയെന്ന് ജയപാലകൃഷ്ണന്റെ സഹോദരനും ആരോപിച്ചു. സംഭവത്തിൽ ജഡ്ജിക്കെതിരേയും കേസെടുക്കണമെന്നും ബന്ധുക്കൾ ആവശ്യപ്പെട്ടിരുന്നു.
by Midhun HP News | Oct 26, 2026 | Latest News, ജില്ലാ വാർത്ത
തിരുവനന്തപുരം: നാളെ (ഒക്ടോബര്‍ 27) ട്രെയിന്‍ ഗതാഗതത്തില്‍ ഭാഗീക നിയന്ത്രണം. കളമശ്ശേരി സ്റ്റേഷനില്‍ ഇലക്ട്രോണിക് ഇന്റര്‍ലോക്കിങ് പ്രവൃത്തികള്‍ നടക്കുന്നതിനാല്‍ ട്രെയി ഗതാഗതത്തില്‍ നിയന്ത്രണം ഏര്‍പ്പെടുത്തിയത്.
നാളെ(ഒക്ടോബര്‍ 27) ബംഗളൂരു-എറണാകുളം വന്ദേഭാരത് ഭാഗികമായി റദ്ദാക്കിയതായും ചില ട്രെയിനുകള്‍ വൈകുമെന്നും റെയില്‍വേ അറിയിച്ചു. കെഎസ്ആര്‍ ബംഗളൂരു-എറണാകുളം ജങ്ഷന്‍(26651) വന്ദേഭാരത് എക്‌സ്പ്രസ് ചൊവ്വാഴ്ച തൃശ്ശൂരിനും എറണാകുളത്തിനും ഇടയില്‍ റദ്ദാക്കി. വന്ദേഭാരത് എക്‌സ്പ്രസ് തൃശ്ശൂരില്‍ യാത്ര അവസാനിപ്പിക്കും.
എറണാകുളം ജങ്ഷന്‍-കെഎസ്ആര്‍ ബംഗളൂരു(26652) ചൊവ്വാഴ്ച തൃശ്ശൂരില്‍നിന്നാകും പുറപ്പെടുക. എറണാകുളത്തിനും തൃശ്ശൂരിനും ഇടയില്‍ സര്‍വീസ് റദ്ദാക്കി. വൈകിട്ട് 3.20ന് ട്രെയിന്‍ തൃശ്ശൂരില്‍നിന്ന് പുറപ്പെടും.
എറണാകുളം ജങ്ഷന്‍-ഹസ്രത് നിസാമുദ്ദീന്‍ മംഗള ലക്ഷദ്വീപ് സൂപ്പര്‍ഫാസ്റ്റ് എക്‌സ്പ്രസ്(12617) 27 ന് ഉച്ചയ്ക്ക് 02.55നാകും എറണാകുളം ജങ്ഷനില്‍നിന്ന് പുറപ്പെടുക. മംഗളൂരു സെന്‍ട്രല്‍-കന്യാകുമാരി പരശുറാം എക്‌സ്പ്രസ്( 16649) ഒരുമണിക്കൂറും 15 മിനിറ്റും വൈകും. തിരുവനന്തപുരം സെന്‍ട്രല്‍-ലോകമാന്യതിലക് നേത്രാവതി സൂപ്പര്‍ഫാസ്റ്റ് എക്‌സ്പ്രസ്(16346) ഒരുമണിക്കൂറും 20 മിനിറ്റും വൈകും. തിരുനെല്‍വേലി-ജാംനഗര്‍ എക്‌സ്പ്രസ്(19577) 40 മിനിറ്റ് വൈകും.
by Midhun HP News | Oct 26, 2026 | Latest News, ജില്ലാ വാർത്ത
ആറ്റിങ്ങൽ : ആറ്റിങ്ങലിൽ പോലീസ് ഉദ്യോഗസ്ഥനെ ഭാര്യ വീട്ടിൽ തൂങ്ങി മരിച്ച നിലയിൽ കണ്ടെത്തി. പോത്തൻകോട് സ്വദേശിയും വിജിലൻസ് ആൻഡ് ആന്റി കറപ്ഷൻസ് ബ്യൂറോ മരുതുംകുഴി ഇൻസ്പെക്ടറും ആയിരുന്ന ബിനീഷ് ലാൽ ( 50 ) ആണ് മരണപ്പെട്ടത്. ഭാര്യ വീടായ ഊരുപോയ്ക ബി എസ് ഭവനിൽ വീട്ടിലെ ഫാനിലാണ് തൂങ്ങി നിന്നത്. പോസ്റ്റ്മോർട്ടം നടപടികൾക്കായി മൃതദേഹം മെഡിക്കൽ കോളേജ് ആശുപത്രിയിലേക്ക് മാറ്റി. കുറ്റാന്വേഷണ മികവിനുള്ള 2025-ലെ കേന്ദ്ര ആഭ്യന്തരമന്ത്രിയുടെ ‘കേന്ദ്രീയ ഗൃഹമന്ത്രി ദക്ഷത പദക്’ മെഡൽ നേടിയിരുന്നു. അഞ്ചുതെങ്ങ് പോലീസ് സ്റ്റേഷൻ എസ്.എച്ച്.ഒ ആയി സേവനമനുഷ്ഠിച്ചിട്ടുണ്ട്.
കാട്ടാക്കടയിലും ഇൻസ്പെക്ട‌റായി പ്രവർത്തിച്ചിട്ടുണ്ട്. അഞ്ചുതെങ്ങിലെ പ്രമുഖമായ ചില ക്രമിനൽ, അസ്വാഭാവിക മരണക്കേസുകളിൽ അദ്ദേഹം അന്വേഷണത്തിന് നേതൃത്വം നൽകിയിട്ടുണ്ട്.
ഭാര്യ ദിവ്യ ആറ്റിങ്ങൽ സബ് കോടതിയിലെ ജീവനക്കാരിയാണ്. 12 വയസ്സായ ആൺകുട്ടിയും 8 വയസ്സായ പെൺകുട്ടിയും ഉണ്ട്. ആറ്റിങ്ങൽ പോലീസ് സ്ഥലത്തെത്തി തുടർനടപടികൾ സ്വീകരിച്ചുവരുന്നു.
by Midhun HP News | Oct 26, 2026 | Latest News, ജില്ലാ വാർത്ത
പ്രിയദർശിനി പദ്ധതി നടപ്പിലാക്കിയ റൂട്ടുകളിൽ സർവീസ് നടത്തുന്ന സ്വകാര്യ ബസുകൾക്ക് ഡിസൽ അടിക്കാനും തൊഴിലാളികൾക്ക് മാന്യമായ വേതനം നൽകാനുമുള്ള ദിവസ വരുമാനം ലഭിക്കാതെ സ്വകാര്യബസ് വ്യവസായ മേഖല സാമ്പത്തികമായി തകർന്നു കൊണ്ടിരിക്കുകയാണെന്ന് ബസ് ഓപറേറ്റേഴ്സ് ഫെഡറേഷൻ. ഒരു ലിറ്റർ ഡീസലിന് എട്ട് രൂപയും സർവീസിനാവശ്യമായ സ്പെയർ പാർട്സ്, ടയർ, ഓയിൽ, ചേസിസ്, ബോഡി മെറ്റീരിയൽസ് മുതലായവക്ക് വലിയ വില വർദ്ധനവും വന്ന സാഹചര്യത്തിലാണ് പ്രിയദർശിനി പദ്ധതി നടപ്പിലാക്കിയത്.
അത് പോലെ വിദ്യാർത്ഥികളുടെ മിനിമം ടിക്കറ്റ് നിരക്ക് പതിനാലു വർഷം മുമ്പ് നിശ്ചയിച്ച ഒരു രൂപ എന്നതും വർദ്ധനവ് വരുത്താതെ ഇപ്പോഴും തുടരുകയാണ്. ഈ സാഹചര്യത്തിൽ സ്വകാര്യ ബസ് വ്യവസായത്തെ സംരക്ഷിക്കണമെന്നാവശ്യപ്പെട്ട് ബസ് ഓപറേറ്റേഴ്സ് ഫെഡറേഷൻ സംസ്ഥാന പ്രസിഡണ്ട് കെ.കെ. തോമസ്, വൈസ് പ്രസിഡണ്ട് ശരണ്യ മനോജ് എന്നിവർ ഒക്ടോബർ 27 മുതൽ തിരുവനന്തപുരം സെക്ടറിയേറ്റ് നടയിൽ ആവശ്യങ്ങൾ നേടിയെടുക്കുന്നത് വരെ അനിശ്ചിത കാല നിരാഹാര സമരം അനുഷ്ഠിക്കുകയാണ്
1 പ്രിയദർശിനി പദ്ധതി കാരണം ദുരിതമനുഭവിക്കുന്ന സ്വകാര്യ ബസ് വ്യവസായത്തെ സംരക്ഷിക്കുക
2 പത്മകുമാർ കമ്മീഷൻ റിപ്പോർട്ട് എത്രയും പെട്ടെന്ന് നടപ്പിലാക്കുക.
3 വിദ്യാർത്ഥികളുടെ ടിക്കറ്റ് നിരക്ക് ഉൾപ്പെടെ ബസ് ചാർജ് വർദ്ധിപ്പിക്കുക
4 RT ഓഫീസുമായി ബന്ധപ്പെട്ട് നിയമപരമായി ലഭിക്കേണ്ട സർവീസ് തടസ്സവാദങ്ങളില്ലാതെ ലഭ്യമാക്കുക
മുതലായ അടിയന്തിര ആവശ്യങ്ങൾ ഉന്നയിച്ചു കൊണ്ടാണ് ഫെഡറേഷൻ നേതാക്കൾ നിരാഹാരസമരം നടത്തുന്നത്.
കലക്ട്രേറ്റു മാർച്ച്, പ്രതിഷേധ കൺവെൻഷൻ, സെക്രട്ടറിയേറ്റ് മാർച്ച് മുതലായ പ്രക്ഷോഭ സമരങ്ങൾ നടത്തിയതിന് ശേഷവും സർക്കാരിന്റെ ഭാഗത്ത് നിന്ന് യാതൊരു അനുകൂല നടപടിയും ഉണ്ടാവാത്ത സാഹചര്യത്തിലാണ് നിരാഹാര സമരം നടത്താൻ ഫെഡറേഷൻ നിർബന്ധിതമായത്.
by Midhun HP News | Oct 26, 2026 | Latest News, കേരളം
തൃശ്ശൂര്‍ ചേലക്കരയില്‍ റിട്ട. എസ്‌ഐ ഷോക്കേറ്റ് മരിച്ചു. വെങ്ങാനല്ലൂര്‍ സ്വദേശി ജോയ് (56) ആണ് മരിച്ചത്. ഇന്നലെ രാത്രി 8 മണിയോടെ ആയിരുന്നു അപകടം. വീട്ടിലെത്താത്തതിനെത്തുടര്‍ന്ന് ബന്ധുക്കള്‍ നടത്തിയ തെരച്ചിലിലാണ് മൃതദേഹം കണ്ടെത്തിയത്. വീടിന് അടുത്ത പാടത്ത് വെച്ചായിരുന്നു സംഭവം. പാടത്ത് സ്ഥാപിച്ച സോളാര്‍ വേലിയില്‍ നിന്നും ഷോക്കേറ്റത് ആകാമെന്നാണ് പ്രാഥമിക നിഗമനം.
പാടത്ത് അനക്കം ഇല്ലാതെ കിടക്കുന്നത് കണ്ട ഭാര്യ നാട്ടുകാരെ വിവരമറിയിക്കുകയായിരുന്നു. ഉടന്‍ നാട്ടുകാര്‍ ചേര്‍ന്ന് ചേലക്കരയിലെ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മൃതദേഹം ചേലക്കര സ്വകാര്യ ആശുപത്രി മോര്‍ച്ചറിയില്‍. ചേലക്കര പൊലീസ് അന്വേഷണം ആരംഭിച്ചു. സംസ്‌കാരം പോസ്റ്റുമോര്‍ട്ടത്തിനുശേഷം. അമ്മ: മേരി. ഭാര്യ: ഷിജി. മക്കള്‍: യവന, യുവ. സഹോദരങ്ങള്‍: ബാബു, സണ്ണി, ലീന.
Recent Comments