by Midhun HP News | Jun 5, 2025 | Latest News, ജില്ലാ വാർത്ത
തിരുവനന്തപുരത്ത് അധ്യാപകർ തമ്മിലുള്ള കുടിപ്പകയിൽ ബലിയാടായി വിദ്യാർഥിനി. കിളിമാനൂർ രാജാ രവിവർമ്മ ഗേൾസ് ഹയർ സെക്കൻഡറി സ്കൂളിലാണ് സംഭവം. അധ്യാപകർ തമ്മിലുള്ള തർക്കത്തിൽ പ്ലസ് വൺ വിദ്യാർഥിയെ കുറിച്ച് വ്യാജ പ്രചാരണം നടത്തി. എതിർ ചേരിയിലെ അധ്യാപകൻ വിദ്യാർഥിനിയെ ലൈംഗികമായി ഉപദ്രവിച്ചുവെന്നായിരുന്നു പ്രചാരണം. നാണക്കേട് കാരണം പഠനം ഉപേക്ഷിച്ചുവെന്ന് വിദ്യാർഥിനി മാധ്യമങ്ങളോട് പറഞ്ഞു.
അസുഖ ബാധിതയായ വിദ്യാർത്ഥിനി നാല് മാസം അവധി എടുത്തപ്പോഴാണ് വ്യാജ പ്രചാരണം നടത്തിയത്. സ്കൂളിലെ വാട്സ് ആപ്പ് ഗ്രൂപ്പിൽ ഉൾപ്പടെ വിദ്യാർഥിനിയുടെ പേര് പറഞ്ഞു അധിക്ഷേപിച്ചു. സിഡബ്ല്യൂസിയിലും പോലീസിലും അധ്യാപിക വ്യാജ പരാതി നൽകിയെന്നു കുടുംബം. സിഡബ്ല്യൂസി അന്വേഷണത്തിൽ ഉൾപ്പടെ വ്യാജ പ്രചാരണം എന്നു കണ്ടെത്തി. നാണക്കേടിനെ തുടർന്ന് വിദ്യാർഥിനി പ്ലസ് വൺ പഠനം ഉപേക്ഷിക്കുകയായിരുന്നു.
സ്കൂളിലെ മാനേജ്മെന്റ് തലത്തിൽ വിവിധ വിഷയങ്ങളിൽ തർക്കം കേസ് ആയി നിലനിൽക്കുന്നുണ്ട്. അധ്യാപകൻ ഉപദ്രവിച്ചുവെന്ന് സ്കൂളിലെ അധ്യാപിക തന്നെയാണ് പ്രചരിപ്പിച്ചതെന്ന് വിദ്യാർഥിനി പറഞ്ഞു. സ്കൂളിലെ അധ്യാപകനുമായി പരിചയം പോലും ഉണ്ടായിരുന്നില്ല. വാട്സ് ആപ്പ് ഗ്രൂപ്പിൽ ഇല്ലാ കഥകൾ വന്നപ്പോൾ പഠിക്കാൻ പോലും തോന്നിയില്ലെന്ന് വിദ്യാർഥിനി പറഞ്ഞു. വ്യാജ പ്രചാരണം അറിഞ്ഞ് മറ്റുള്ളവർ അറിഞ്ഞു വലിയ നാണക്കേട് ഉണ്ടായി. നാണക്കേട് കാരണം മുടി മുറിച്ചു നടക്കേണ്ട അവസ്ഥ ഉണ്ടായെന്ന് പെൺകുട്ടി പറയുന്നു.
പ്ലസ് വണ്ണിൽ പഠിക്കുന്നതിനിടെയാണ സൈലന്റ് ഫിക്സ് എന്ന അസുഖം പിടിപെടുന്നത്. തിരുവനന്തപുരം മെഡിക്കൽ കോളജിൽ ചികിത്സയിൽ പ്രവേശിച്ചതിനെ തുടർന്ന് നാല് മാസം സ്കൂളിൽ പോയിരുന്നില്ല. അസുഖം മാറി സ്കൂളിൽ പോകണം എന്നുണ്ടായിരുന്നുവെന്നും എന്നാൽ ആളുകൾ ഇത്തരം കാര്യങ്ങൾ അറിഞ്ഞു എങ്ങനെ പെരുമാറുമെന്ന് പേടിയായെന്നും പെൺകുട്ടി പറയുന്നു. ഇനി പഠിക്കാൻ സ്കൂളിൽ പോകാൻ പോലും പേടിയാണ്. പഠിക്കുന്നത് എന്തിനെന്ന ലക്ഷ്യം പോലും ഇല്ലാതായെന്ന് പെൺകുട്ടി മാധ്യമങ്ങളോട് കൂട്ടിച്ചേർത്തു.
ഒരു അധ്യയന വർഷം നഷ്ടമായി. തന്നെ കുറിച്ച് കള്ള കഥകൾ പ്രചരിപ്പിച്ച അധ്യാപികയെ തുടരാൻ അനുവദിക്കരുതെന്നാണ് പെൺകുട്ടി ആവശ്യപ്പെടുന്നത്. കഷ്ടപ്പെട്ട് പഠിച്ചിട്ടും ഈ ഗതി വന്നതിൽ വലിയ വിഷമമെന്നും വിദ്യാർത്ഥിനി തുറന്നു പറയുന്നു. ദുരനുഭവം സംബന്ധിച്ച് മന്ത്രിക്കും പരാതി നൽകിയിട്ടുണ്ട്. കൂടുതൽ നിയമനടപടിയുമായി മുന്നോട്ടു പോകാനാണ് കുടുംബത്തിന്റെ തീരുമാനം.
by Midhun HP News | Jun 5, 2025 | Latest News, ദേശീയ വാർത്ത
റിയാദ്: ഹജ്ജ് തീത്ഥാടനത്തിലെ സുപ്രധാന ചടങ്ങായ അറഫ സംഗമം ഇന്ന്. 160 രാജ്യങ്ങളില്നിന്നായി 18 ലക്ഷത്തോളം തീര്ഥാടകര് വ്യാഴാഴ്ച അറഫ മൈതാനിയില് സംഗമിക്കും. ബുധന് പകലോടെ മഴുവന് തീര്ഥാടകരും മിനായില് എത്തിയതോടെ ഈ വര്ഷത്തെ ഹജ്ജ് തീര്ത്ഥാടനത്തിന് തുടക്കമായിരുന്നു. ഇവിടെനിന്ന് സുബ്ഹി നമസ്കാരത്തിനുശേഷം വ്യാഴം പുലര്ച്ചെ അറഫ സംഗമത്തിനായി നീങ്ങും. 160 രാജ്യങ്ങളില്നിന്നായി 18 ലക്ഷത്തോളം തീര്ഥാടകര് വ്യാഴാഴ്ച അറഫ മൈതാനിയില് സംഗമിക്കും.
ഹജ്ജിലെ പ്രധാന ചടങ്ങുകളില് ഒന്നാണ് അറഫ സംഗമം. നമിറാ പള്ളിയില് വ്യാഴം പകല് നടക്കുന്ന പ്രഭാഷണത്തോടെ ചടങ്ങുകള്ക്ക് തുടക്കമാകും. ഹജ്ജ് വേളയില് പ്രവാചകന് മുഹമ്മദ് നബി നടത്തിയ പ്രഭാഷണത്തെ അനുസ്മരിച്ചാണ് അറഫ പ്രഭാഷണം. മലയാളമുള്പ്പടെ നിരവധി ഭാഷകളില് തത്സമയ വിവര്ത്തനം ലഭ്യമാകും. ഉച്ചമുതല് സൂര്യാസ്തമയം വരെയാണ് സംഗമം.
അറഫയില് പ്രാര്ത്ഥന പൂര്ത്തിയാക്കി തീര്ഥാടകര് സൂര്യാസ്തമയശേഷം മുസ്ദലിഫയിലേക്ക് നീങ്ങും. വെള്ളി പുലര്ച്ചെ മിനായില് തിരിച്ചെത്തും. അവിടെ ജംറയില് കല്ലേറു കര്മം നിര്വഹിച്ച് മുടി മുറിക്കുന്നതോടെ ഹജ്ജിന് അര്ധവിരാമമാകും. വെള്ളിയാഴ്ച ഗള്ഫില് ബലിപെരുന്നാളാണ്. തീര്ഥാടകര് തുടര്ന്നുള്ള രണ്ടു ദിവസംകൂടി മിനായില് ചെലവിട്ട് ബാക്കി കര്മങ്ങള് പൂര്ത്തിയാക്കും. ശനിയാഴ്ചയാണ് കേരളത്തില് ബലി പെരുന്നാള്.
മലയാളികളടക്കം ഇന്ത്യയില്നിന്നെത്തിയ 1,22,422 തീര്ഥാടകരെ ബുധന് രാവിലെ മിനായില് എത്തിച്ചതായി ഇന്ത്യന് ഹജ്ജ് മിഷന് അറിയിച്ചു. കേരളത്തില്നിന്ന് സംസ്ഥാന ഹജ്ജ് കമ്മിറ്റി മുഖേനെ 16,341 തീര്ഥാടകരും സ്വകാര്യ ഗ്രൂപ്പുകള് വഴി ആയിരത്തോളം പേരും ഹജ്ജിനെത്തിയിട്ടുണ്ടെന്നാണ് കണക്കുകള്. 107 ഹജ്ജ് ഇന്സ്പെക്ടര്മാരും തീര്ഥാടകരെ അനുഗമിക്കുന്നു. വിവിധ ആശുപത്രികളില് ചികിത്സയില് കഴിയുന്ന മലയാളികളായ ഇരുപതോളംപേരെ നേരിട്ട് അറഫയില് എത്തിക്കും. മൂന്നുപേര് മരിച്ചു.
by Midhun HP News | Jun 5, 2025 | Latest News, കേരളം
കോട്ടയം: സൗഹൃദംസ്ഥാപിച്ച് നഗ്നചിത്രങ്ങളെടുത്തശേഷം ഭീഷണിപ്പെടുത്തി യുവാവില് നിന്നും 60 ലക്ഷവും 61 പവനും തട്ടിയെടുത്ത സംഭവത്തില് പ്രതിയായ യുവതി പൊലീസില് കീഴടങ്ങി. കോടതി മുന്കൂര് ജാമ്യം നിഷേധിച്ചതിനെ തുടര്ന്നാണ് കോട്ടയം അതിരമ്പുഴ അമ്മഞ്ചേരി കുമ്മണ്ണൂര് വീട്ടില് ധന്യ അര്ജുന് (37) കീഴടങ്ങിയത്. അമേരിക്കയില് സോഫ്റ്റ്വേര് എന്ജിനീയറായ അയല്വാസിയായ യുവാവിനെ ഭീഷണിപ്പെടുത്തി ധന്യ പണം തട്ടിയെന്നാണ് കേസ്. ഗാന്ധിനഗര് പൊലീസ് സ്റ്റേഷനിലെ ഉദ്യോഗസ്ഥൻ ലൈംഗികബന്ധവും മദ്യവും കൈക്കൂലിയായി ആവശ്യപ്പെട്ടു എന്ന് പരാതി നല്കി കേസില് കുടുക്കിയ സംഭവത്തിലും പ്രതിയാണ് ധന്യ. .
2022 മാര്ച്ച് മുതല് 2024 ഡിസംബര് കാലയളവിലായിരുന്നു സംഭവം. ഭാര്യയുടെ പഠനസൗകര്യത്തിനായി അമ്മഞ്ചേരിയില് പ്രതിയുടെ വീടിനടുത്ത് വാടകയ്ക്ക് താമസിച്ചിരുന്ന യുവാവാണ് തട്ടിപ്പിന് ഇരയായത്. യുവാവിനോട് അടുപ്പം സ്ഥാപിച്ച ധന്യ സ്വകാര്യചിത്രങ്ങള് പകര്ത്തി ചിത്രങ്ങള് പരാതിക്കാരന്റെ ബന്ധുക്കള്ക്കും മറ്റും അയച്ചുകൊടുക്കുമെന്ന് ഭീഷണിപ്പെടുത്തി പണം കൈക്കലാക്കുകയായിരുന്നു. പലതവണകളായി 60 ലക്ഷം രൂപ യുവതിയും ഭര്ത്താവ് അര്ജുനും ചേര്ന്ന് തട്ടിയെടുത്തു. പ്രതികളുടെ സുഹൃത്തായ മണര്കാട് സ്വദേശി അലന് തോമസും യുവാവിനെ ഭീഷണിപ്പെടുത്തി പണം വാങ്ങിയിരുന്നു.
പണത്തിന് പുറമെ യുവാവിന്റെ ബാങ്ക് ലോക്കറില് സൂക്ഷിച്ചിരുന്ന കുടുംബാംഗങ്ങളുടെ 61 പവന് സ്വര്ണാഭരണങ്ങളും തട്ടിയെടുത്തു. ഇതിന് ശേഷമാണ് യുവാവ് പരാതി നല്കിയത്. പിന്നാലെ ധന്യ മുന്കൂര് ജാമ്യത്തിന് കോടതിയെ സമീപിക്കുകയും ചെയ്തു. ജാമ്യാപേക്ഷ ഹൈക്കോടതി തള്ളിയതോടെയാണ് ഇവര് കീഴടങ്ങിയത്. ഗര്ഭിണിയായതിനാല് ഇവര്ക്ക് കോടതി ജാമ്യംനല്കി.
by Midhun HP News | Jun 5, 2025 | Latest News, ദേശീയ വാർത്ത
ന്യൂഡല്ഹി: റെയില്വെ തത്കാല് ടിക്കറ്റ് ബുക്കിങ്ങില് ആധാര് കാര്ഡുകളുമായി ഐആര്സിടിസി അക്കൗണ്ടുകള് ലിങ്ക് ചെയ്ത അക്കൗണ്ട് ഉടമകള്ക്ക് മുന്ഗണന. തത്കാല് ടിക്കറ്റ് വില്പ്പന സമയ സ്ലോട്ടുകളുടെ ആദ്യ 10 മിനിറ്റുകളിലാണ് ഇത്തരം അക്കൗണ്ട് ഉടമകള്ക്ക് മുന്ഗണന ലഭിക്കുക. ടിക്കറ്റ് ബുക്കിങ്ങില് ഉപഭോക്താക്കള്ക്ക് മുന്ഗണന നല്കാനാണ് പുതിയ നീക്കമെന്ന് കേന്ദ്ര റെയില്വേ മന്ത്രി അശ്വിനി വൈഷ്ണവ് വ്യക്തമാക്കുന്നു.
നിലവില്, തത്കാല് വിന്ഡോ തുറക്കുന്നതിന്റെ ആദ്യ 10 മിനിറ്റിനുള്ളില് അംഗീകൃത ഐആര്സിടിസി ഏജന്റുമാര്ക്ക് പോലും ടിക്കറ്റ് ബുക്ക് ചെയ്യാന് അനുവാദമില്ല. എന്നാല് ഇനിമുതല് തത്കാല് ടിക്കറ്റ് വില്പ്പനയുടെ ആദ്യ 10 മിനിറ്റിനുള്ളില് ആധാറുമായി ബന്ധിപ്പിച്ചിട്ടുള്ള അക്കൗണ്ട് ഉടമകള്ക്ക് ബുക്കിങ്ങില് മുന്ഗണന ലഭിക്കും. ആധാര് നമ്പറുമായി ബന്ധിപ്പിക്കാത്ത അക്കൗണ്ടുകളുടെ ആധികാരികത ഉറപ്പാക്കാന് പ്രത്യേക പരിശോധന നടത്താനും ഐആര്സിടിസി തീരുമാനിച്ചതായി റെയില്വേ അറിയിച്ചു. സംശയാസ്പദമായി പ്രവര്ത്തിക്കുന്ന അക്കൗണ്ടുകള് കണ്ടെത്തി പ്രവര്ത്തനം തടയാനാണ് നീക്കം.
ഓണ്ലൈന് പ്ലാറ്റ്ഫോവുകള് വഴി പ്രതിദിനം 2,25,000 യാത്രക്കാര് തത്കാല് ടിക്കറ്റുകള് ബുക്ക് ചെയ്യുന്നുണ്ടെന്നാണ് ഔദ്യോഗിക കണക്കുകള്. മെയ് 24 നും ജൂണ് 2 നും ഇടയില് ബുക്കിങ്ങ് വിന്ഡോ തുറന്നതിന് ശേഷമുള്ള ആദ്യ മിനിറ്റില് ശരാശരി 1,08,000 എസി ക്ലാസ് ടിക്കറ്റുകളില് 5,615 എണ്ണം മാത്രമേ ബുക്ക് ചെയ്തിട്ടുള്ളൂ. രണ്ടാം മിനിറ്റില് 22,827 ടിക്കറ്റുകള് ബുക്ക് ചെയ്തു. എസി ക്ലാസില്, വിന്ഡോ തുറന്നതിന്റെ ആദ്യ 10 മിനിറ്റിനുള്ളില് ശരാശരി 67,159 ടിക്കറ്റുകള് ഓണ്ലൈനായി ബുക്ക് ചെയ്തു. ഓണ്ലൈനായി ബുക്ക് ചെയ്ത എല്ലാ ടിക്കറ്റുകളുടെ കണക്കുകളില് 62.5 ശതമാനം വരുന്നതാണ് ഈ കണക്കുകള്.
ബാക്കിവന്ന 37.5 ശതമാനം ടിക്കറ്റുകളും ചാര്ട്ട് തയ്യാറാക്കുന്നതിന് മുന്പുള്ള 10 മിനിറ്റുകള്ക്കിടയില് ബുക്ക് ചെയ്യപ്പെട്ടു. അതില് 3.01 ശതമാനം തത്കാല് ടിക്കറ്റുകള് വിന്ഡോ തുറന്ന് 10 മണിക്കൂറിലധികം കഴിഞ്ഞാണ് ബുക്ക് ചെയ്തതെന്നും റെയില്വേ അവകാശപ്പെട്ടു.
നോണ്-എസി വിഭാഗത്തില് മെയ് 24 മുതല് ജൂണ് 2 വരെ പ്രതിദിനം ശരാശരി 1,18,567 ടിക്കറ്റുകള് ഓണ്ലൈനായി ബുക്ക് ചെയ്തു. ഇതില് ഏകദേശം 4 ശതമാനം വരുന്ന 4,724 ടിക്കറ്റുകള് ആദ്യ മിനിറ്റിനുള്ളില് ബുക്ക് ചെയ്തു, അതേസമയം 20,786 ടിക്കറ്റുകള് (ഏകദേശം 17.5% ) രണ്ടാം മിനിറ്റിലും ബുക്ക് ചെയ്തു. വിന്ഡോ തുറന്നതിന് ശേഷമുള്ള ആദ്യ 10 മിനിറ്റിനുള്ളില് ഏകദേശം 66.4 ശതമാനം ടിക്കറ്റുകള് വിറ്റു. കൂടാതെ, വിന്ഡോ തുറന്നതിന്റെ ആദ്യ മണിക്കൂറിനുള്ളില് ഏകദേശം 84.02 ശതമാമനം ടിക്കറ്റുകള് വില്പന നടത്താനായി. ബാക്കിയുള്ള ടിക്കറ്റുകള് അടുത്ത 10 മണിക്കൂറിനുള്ളില് വിറ്റുപോയതായും കണക്കുകള് പറയുന്നു.
തല്ക്കാല് ടിക്കറ്റുകള് ബുക്ക് ചെയ്യുന്നതില് ഓട്ടോമേറ്റഡ് സംവിധാനങ്ങള് ഉപയോഗിക്കുന്നു എന്നതിന്റെ തെളിവാണ് കണക്കുകള് എന്നാണ് റെയില്വെ പറയുന്നത്. വിന്ഡോ തുറന്നതിന് 8 മുതല് 10 മണിക്കൂര് ശേഷവും ഏകദേശം 12 ശതമാനം തത്കാല് ടിക്കറ്റുകള് ബുക്ക് ചെയ്യപ്പെടുന്നത് ഇതിന്റെ ഭാഗമാണെന്നാണ് ഐആര്സിടിസിയുടെ വിലയിരുത്തല്.
by Midhun HP News | Jun 5, 2025 | Latest News, കേരളം
തിരുവനന്തപുരം: സംസ്ഥാനത്തെ നിലവിലുള്ള ഇരട്ട പാതയ്ക്ക് സമാന്തരമായി മൂന്നാമത്തെയും നാലാമത്തെയും റെയില്വേ ലൈനുകള് എന്ന റെയില്വേ നിര്ദേശം അപ്രായോഗികം എന്ന് ഇ ശ്രീധരന്. കേരളത്തിലെ റെയില്വേ വികസനവുമായി ബന്ധപ്പെട്ട കാര്യങ്ങളില്, മുഖ്യമന്ത്രി പിണറായി വിജയനുമായുള്ള കൂടിക്കാഴ്ചയ്ക്ക് ശേഷം കേന്ദ്ര റെയില്വേ മന്ത്രി അശ്വിനി വൈഷ്ണവ് പങ്കുവച്ച പദ്ധതി സംസ്ഥാനത്ത് പ്രായോഗികമല്ലെന്നാണ് ഇ ശ്രീധരന്റെ നിലപാട്. സില്വര് ലൈനിന് ബദലായുള്ള പാത സംബന്ധിച്ച് സര്ക്കാറിന് സമര്പ്പിച്ച റിപ്പോര്ട്ടിലാണ് ഇക്കാര്യം പരാമര്ശിക്കുന്നത്.
തിരുവനന്തപുരം: സംസ്ഥാനത്തെ നിലവിലുള്ള ഇരട്ട പാതയ്ക്ക് സമാന്തരമായി മൂന്നാമത്തെയും നാലാമത്തെയും റെയില്വേ ലൈനുകള് എന്ന റെയില്വേ നിര്ദേശം അപ്രായോഗികം എന്ന് ഇ ശ്രീധരന്. കേരളത്തിലെ റെയില്വേ വികസനവുമായി ബന്ധപ്പെട്ട കാര്യങ്ങളില്, മുഖ്യമന്ത്രി പിണറായി വിജയനുമായുള്ള കൂടിക്കാഴ്ചയ്ക്ക് ശേഷം കേന്ദ്ര റെയില്വേ മന്ത്രി അശ്വിനി വൈഷ്ണവ് പങ്കുവച്ച പദ്ധതി സംസ്ഥാനത്ത് പ്രായോഗികമല്ലെന്നാണ് ഇ ശ്രീധരന്റെ നിലപാട്. സില്വര് ലൈനിന് ബദലായുള്ള പാത സംബന്ധിച്ച് സര്ക്കാറിന് സമര്പ്പിച്ച റിപ്പോര്ട്ടിലാണ് ഇക്കാര്യം പരാമര്ശിക്കുന്നത്.
സെമി ഹൈസ്പീഡ് റെയില് പദ്ധതിയായ സില്വര് ലൈനിനായുള്ള സംസ്ഥാന സര്ക്കാരിന്റെ നിര്ദ്ദേശത്തില് താല്പ്പര്യമില്ലെന്ന് കേന്ദ്രം അറിയിച്ചിരുന്നു. സാങ്കേതികവും പാരിസ്ഥിതികവുമായ കാരണങ്ങളാല് കെ-റെയില് കോര്പ്പറേഷന് മുന്നോട്ടുവച്ച പദ്ധതി അംഗീകരിക്കാന് കഴിയില്ലെന്നാണ് കേന്ദ്ര റെയില്വേ മന്ത്രാലയം വ്യക്തമാക്കിയത്. ഇതേത്തുടര്ന്ന് ഇ ശ്രീധരന്റെ ബദല് നിര്ദ്ദേശം പരിശോധിക്കാന് സംസ്ഥാനം കേന്ദ്രത്തോട് ആവശ്യപ്പെട്ടിരുന്നു. ഇ ശ്രീധരന്റെ നിര്ദ്ദേശം കഴിഞ്ഞ ഫെബ്രുവരിയില് കേന്ദ്രത്തിന് മുന്നില് സര്ക്കാര് സമര്പ്പിച്ചിരുന്നു എന്ന് മുഖ്യമന്ത്രിയോട് ഒപ്പമുണ്ടായിരുന്ന കെ വി തോമസ് അറിയിച്ചിരുന്നു. എന്നാല് അവര് ഇതുവരെ അത് വിശദമായി പഠിച്ചിട്ടില്ല. പുതിയ പദ്ധതി നിര്ദേശത്തില് ഉടന് തന്നെ അന്തിമ തീരുമാനം മെട്രോമാന് ഇ ശ്രീധരനെ അറിയിക്കുമെന്ന് കേന്ദ്രസര്ക്കാര് വ്യക്തമാക്കിയിട്ടുണ്ടെന്നും സര്ക്കാര് വൃത്തങ്ങള് അറിയിച്ചിരുന്നു.
ഇതിനിടെയാണ് വടക്ക് നിന്ന് തെക്കന് കേരളത്തിലേക്കുള്ള മൂന്നാമത്തെയും നാലാമത്തെയും പാതകള് കേന്ദ്ര റെയില്വേ മന്ത്രാലയത്തിന്റെ സജീവ പരിഗണനയിലാണ്. കേന്ദ്ര റെയില്വേ മന്ത്രി അശ്വിനി വൈഷ്ണവ് എക്സില് കുറിച്ചത്. ഇതുവഴി യാത്രക്കാര്ക്കും ചരക്കുകള്ക്കും റെയില് മാര്ഗം കൂടുതല് ഉപയോഗിക്കാന് കഴിയുമെന്നും മന്ത്രി ചൂണ്ടിക്കാട്ടിയിരുന്നു.
by Midhun HP News | Jun 5, 2025 | Latest News, ജില്ലാ വാർത്ത
തിരുവനന്തപുരം: പ്ലസ് വണ് പ്രവേശനത്തിന് എസ്എസ്എല്സി സര്ട്ടിഫിക്കറ്റിന് പകരം മറ്റ് രേഖകള് പരിഗണിക്കുമെന്ന് വിദ്യാഭ്യാസമന്ത്രി വി ശിവന്കുട്ടി. ജാതി, താമസസ്ഥലം എന്നിവ തെളിയിക്കാന് മറ്റു രേഖകള് പരിഗണിക്കും. സ്ഥിര താമസരേഖയായി റേഷന് കാര്ഡ് പരിഗണിക്കും. ഡിജി ലോക്കറില് എസ്എസ്എല്സി സര്ട്ടിഫിക്കറ്റുകള് ലഭ്യമാകാത്തത് പ്ലസ് വണ് പ്രവേശനത്തെ ബാധിക്കാതിരിക്കുക ലക്ഷ്യമിട്ടാണ് സര്ക്കാര് നിര്ദേശം.
പ്ലസ് വണ്ണിന് സംവരണ സീറ്റില് പ്രവേശനം കിട്ടിയവര് ജാതി തെളിയിക്കാന് ട്രാന്സ്ഫര് സര്ട്ടിഫിക്കറ്റ് രേഖയായി പരിഗണിക്കും. എസ്എസ്എല്സി സര്ട്ടിഫിക്കറ്റ് ലഭ്യമാകാത്ത സാഹചര്യം പരിഗണിച്ചാണ് നിര്ദേശം. ഇത്തവണ ഡിജിലോക്കറില് മാര്ക്ക് വിവരങ്ങള് മാത്രമാണ് ലഭ്യമാക്കിയിരുന്നത്. കഴിഞ്ഞ വര്ഷം വിദ്യാര്ത്ഥിയുടെ സമ്പൂര്ണ വിവരങ്ങളടങ്ങിയ എസ്എസ്എല്സി സര്ട്ടിഫിക്കറ്റിന്റെ ഡിജിറ്റല് കോപ്പി ലഭ്യമാക്കിയിരുന്നു.
സേ പരീക്ഷക്കുശേഷം ഡിജിലോക്കറില് മതിയായ രേഖകള് അപ്ലോഡ് ചെയ്യുമെന്ന് വിദ്യാഭ്യാസ മന്ത്രി പറഞ്ഞു. ഹയര് സെക്കന്ഡറി വിഭാഗത്തില് സംസ്ഥാനത്ത് എവിടെയും നിലവില് സീറ്റ് ക്ഷാമമില്ല. നിലവില് പ്ലസ് വണ് സീറ്റുകള് അധികമാണ്. മലപ്പുറത്ത് കഴിഞ്ഞ വര്ഷവും സീറ്റ് അധികമായിരുന്നു. കുറ്റമറ്റ രീതിയില് പ്ലസ് വണ് പ്രവേശന നടപടികള് പുരോഗമിക്കുകയാണെന്നും മന്ത്രി പറഞ്ഞു.
ബസുകളിൽ കുട്ടികൾ നേരിടുന്ന ബുദ്ധിമുട്ട് ഒരിക്കലും അംഗീകരിക്കില്ലെന്നും കൺസെഷൻ ഇല്ലെന്നു കരുതി കുട്ടിയെ ഇറക്കി വിടാൻ പാടില്ലെന്നും മന്ത്രി ശിവൻകുട്ടി പറഞ്ഞു. ബസ് കൃത്യമായി സ്റ്റോപ്പിൽ നിർത്തണം. സ്കൂൾ ബസിൽ രണ്ട് ദിവസം കുട്ടി വന്നില്ല എന്ന് കരുതി ഇറക്കി വിടാൻ പാടില്ല. ഒരു അച്ചടക്കത്തിന്റെ പേരിലും മുടിമുറിക്കുന്നത് പോലുള്ള കാടത്ത നിലപാട് പറ്റില്ല. അത്തരക്കാർക്കെതിരെ കർശന നടപടിയെടുക്കും. പോക്സോ കേസ് പ്രതിയെ ഫോർട്ട് ഹൈസ്കൂളിലെ പ്രവേശനോത്സവത്തിൽ പങ്കെടുപ്പിച്ചത് തെറ്റാണെന്നും വിഷയത്തിൽ നടപടി സ്വീകരിക്കുമെന്നും മന്ത്രി പറഞ്ഞു.
Recent Comments