by Midhun HP News | Dec 3, 2024 | Latest News, കേരളം
കണ്ണൂർ: കാർ കുളത്തിലേക്ക് മറിഞ്ഞ് യുവാവ് മരിച്ചു. കണ്ണൂർ അങ്ങാടിക്കടവ് സ്വദേശി ഇമ്മാനുവൽ ആണ് മരിച്ചത്. കനത്ത മഴയിൽ ഒടിഞ്ഞു വീണ മരക്കൊമ്പ് കാറിലേക്ക് വീഴാതിരിക്കാൻ വെട്ടിച്ചപ്പോഴാണ് അപകടം. നിയന്ത്രണം വിട്ട് കാർ കുളത്തിലേക്ക് മറിയുകയായിരുന്നു.
ഇന്ന് പുലർച്ചെയോടെയാണ് അപകടമുണ്ടായത്. ഒരു പരീക്ഷ കഴിഞ്ഞ് ഇന്ന് പുലർച്ചെ ഇമ്മാനുവൽ നാട്ടിലേക്ക് മടങ്ങാനായി തലശ്ശേരിയിൽ എത്തി. കാർ ഇവിടെ നിർത്തിയിട്ടതായിരുന്നു. ഇവിടെ നിന്നു കാറിൽ മടങ്ങുന്നതിനിടെ വീടിനു തൊട്ടടുത്തു വച്ചു തന്നെയാണ് അപകടം സംഭവിച്ചത്.ഡ്രൈവിങിനിടെ കനത്ത മഴയിൽ മരക്കൊമ്പ് പൊട്ടി വീഴുന്നത് ഇമ്മാനുവൽ കണ്ടു. ഇതോടെയാണ് കാർ വെട്ടിച്ചത്. വണ്ടി ഒരു തെങ്ങിൽ ഇടിച്ച് റോഡരികിലുണ്ടായിരുന്ന വലിയ കുളത്തിലേക്ക് പതിക്കുകയായിരുന്നു. ശബ്ദം കേട്ട് നാട്ടുകാർ എത്തി ഇമ്മാനുവലിനെ പുറത്തെടുത്തു. ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
by Midhun HP News | Dec 3, 2024 | Latest News, ജില്ലാ വാർത്ത
തിരുവനന്തപുരം: കോവിഡ് 19 വാക്സിനേഷന് യുവാക്കള്ക്കിടയില് മരണനിരക്ക് വര്ധിക്കുന്നതിന് കാരണമാകുന്നു എന്ന പ്രചാരണം തെറ്റെന്നു തെളിയിച്ച് സര്ക്കാര് കണക്കുകള്. 2019 നും 2023 നും ഇടയില് 35-44 പ്രായ പരിധിയിലുള്ള യുവാക്കളുടെ ഇടയില് മരണനിരക്കില് കാര്യമായ മാറ്റമൊന്നും ഇല്ലെന്ന് സര്ക്കാര് കണക്കുകള് വ്യക്തമാക്കുന്നതായി ദി ന്യൂ ഇന്ത്യന് എക്സ്പ്രസ് റിപ്പോര്ട്ട് ചെയ്യുന്നു.
ഈ പ്രായപരിധിയിലെ മരണനിരക്ക് താരതമ്യേന സ്ഥിരത പുലര്ത്തുകയാണ്. 2019ല് 3.30 ശതമാനമാണ് മരണനിരക്ക്. ഇത് കോവിഡിന് മുന്പുള്ള കാലമാണ്. വാക്സിനേഷന് എടുത്തതിന് ശേഷമുള്ള 2022, 2023 വര്ഷങ്ങളില് ഇത് യഥാക്രമം 3.13 ശതമാനം, 3.23 ശതമാനം എന്നിങ്ങനെയാണ്. 2020ലും 2021ലും മരണനിരക്ക് 3.29 ശതമാനവും 3.23 ശതമാനവുമാണ്.
വാക്സിന് പാര്ശ്വഫലങ്ങള് കാരണമാണ് യുവാക്കളില് ഹൃദയാഘാതം ഉണ്ടാവുന്നതെന്ന് പഠനങ്ങളിലൊന്നും തെളിയിച്ചിട്ടില്ല. മരണ നിരക്കു സംബന്ധിച്ച സര്ക്കാര് കണക്കുകളും ഈ പ്രായപരിധിയിലുള്ളവരുടെ മരണത്തെ വാക്സിനേഷനുമായി ബന്ധിപ്പിക്കാനാവില്ലെന്നാണ് വ്യക്തമാക്കുന്നത്.
സംസ്ഥാനത്ത് അകാലമരണങ്ങളെക്കുറിച്ച് കാര്യമായ പഠനങ്ങളൊന്നും നടന്നിട്ടില്ലെങ്കിലും ലഭ്യമായ മരണനിരക്ക് കണക്കുകള് വാക്സിനുകള് സുരക്ഷിതമാണെന്ന ആരോഗ്യ വിദഗ്ധരുടെ അവകാശവാദത്തെ പിന്തുണയ്ക്കുന്നു. കേരളത്തില് 18-44 പ്രായപരിധിയിലുള്ള 1,29,45,396 പേരാണ് കോവിഡ് -19 വാക്സിന്റെ ആദ്യ ഡോസ് സ്വീകരിച്ചത്. 1,08,60,254 പേര് വാക്സിന്റെ രണ്ടാം ഡോസും സ്വീകരിച്ചിട്ടുണ്ട്.
അടുത്തിടെ പ്രത്യേകിച്ച് ജോലി സമയത്തോ വ്യായാമ വേളയിലോ വ്യക്തമായ കാരണമില്ലാതെ യുവാക്കള്ക്ക് മരണം സംഭവിക്കുന്നത് ഏറെ ചര്ച്ചകള്ക്കു വഴിവച്ചിരുന്നു. കോവിഡ് വാക്സിനാണ് ഇതിനു കാരണം എന്നായിരുന്നു പലരും അവകാശപ്പെട്ടത്.
‘ഏതെങ്കിലും ചെറുപ്പക്കാരന് മരിച്ചാല് വാക്സിന് കാരണമാണെന്ന നിഗമനത്തില് എത്തുന്ന പ്രവണതയാണ് കണ്ടുവരുന്നത്. വാക്സിനുമായി ബന്ധപ്പെട്ട അപകടസാധ്യതകള് നിലനില്ക്കുമെന്ന് കരുതുന്നതും തെറ്റാണ്. വാക്സിനേഷന് യുവാക്കളില് ചില പ്രശ്നങ്ങള് ഉണ്ടാക്കുമെന്നതിന് തെളിവുകളുണ്ട്. എന്നാല് ഈ കേസുകള് വളരെ അപൂര്വമാണ്. മരണനിരക്ക് അത് പ്രതിഫലിപ്പിക്കുന്നു’- ശ്രീചിത്ര തിരുനാള് ഇന്സ്റ്റിറ്റ്യൂട്ട് ഫോര് മെഡിക്കല് സയന്സസ് ആന്ഡ് ടെക്നോളജിയിലെ എപ്പിഡെമിയോളജിസ്റ്റും എമറിറ്റസ് പ്രൊഫസറുമായ ഡോ. വി രാമന്കുട്ടി പറഞ്ഞു.
ലഭ്യമായ ഏറ്റവും സുരക്ഷിതമായ വാക്സിനുകളില് ഒന്നാണ് കോവിഷീല്ഡ് എന്ന് കോവിഡ്, വയോജന വാക്സിനേഷനെ കുറിച്ച് സംസ്ഥാനത്തിന് ഉപദേശം നല്കുന്ന വിദഗ്ധ സമിതിയുടെ തലവനും ആരോഗ്യ വിദഗ്ധനുമായ ഡോ. ബി ഇക്ബാല് സ്ഥിരീകരിക്കുന്നു.
‘ഈ പ്രായപരിധിയിലുള്ള ആളുകള് മരിക്കുന്നതിന് നിരവധി കാരണങ്ങളുണ്ട്. സാംക്രമികേതര രോഗങ്ങളും സാംക്രമിക രോഗങ്ങളും മൂലം മരണ ഭീഷണി നിലനില്ക്കുന്നുണ്ട്. വളരെക്കാലം മുമ്പ് പുറത്തിറക്കിയ വാക്സിനുകള്ക്ക് പകരം പ്രമേഹ നിയന്ത്രണം, പൊണ്ണത്തടി, കോവിഡിന് ശേഷമുള്ള പ്രശ്നങ്ങള് എന്നിവയെക്കുറിച്ച് ആളുകള് ചര്ച്ച ചെയ്യണം’- ഡോ. ബി ഇക്ബാല് പറഞ്ഞു.
by Midhun HP News | Dec 3, 2024 | Latest News, ജില്ലാ വാർത്ത
ആറ്റിങ്ങൽ: കഴിഞ്ഞ കുറച്ചു മാസക്കാലമായി ആറ്റിങ്ങൽ സബ് ട്രഷറിയുടെ കീഴിൽ കുറഞ്ഞ മുദ്രവിലയുള്ള 10,20,50,100,500 മുദ്രപത്രങ്ങൾ കിട്ടാനില്ലായിരുന്നു. ഇതുമൂലം സ്കൂൾ സർട്ടിഫിക്കുകൾക്കും, കരാറുകൾ എഴുതുന്നതിനും, പഞ്ചായത്ത്, മുൻസിപ്പാലിറ്റി ലൈസൻസുകൾക്കും, വിദേശരാജ്യങ്ങളിലെ എംബസി മുഖാന്തരം സാക്ഷ്യപ്പെടുത്തി വരേണ്ട മുദ്രപത്രങ്ങൾക്ക് വേണ്ടി ജനങ്ങൾ നെട്ടോട്ടമായിരുന്നു. ഈ വിഷയത്തിന് പരിഹാരമായി കൊണ്ട് ആറ്റിങ്ങലിൽ e സ്റ്റാമ്പ് സംവിധാനം നിലവിൽ വന്നു. ഇനി ആവശ്യക്കാരന് ഏത് തുകയുടെ മുദ്രപത്രമായാലും ആറ്റിങ്ങലിലെ വെണ്ടർ ഓഫീസിൽ നിന്ന് ലഭിക്കും. ആദ്യ ദിവസങ്ങളിൽ e സ്റ്റാമ്പ് പത്രം ഒരാൾക്ക് ലഭിക്കാൻ 5 മുതൽ 10 മിനിറ്റ് വരെ സമയമെടുക്കും എന്ന് ആറ്റിങ്ങലിലെ സ്റ്റാമ്പ് വെണ്ടർമാർ അറിയിച്ചു.
by Midhun HP News | Dec 3, 2024 | Latest News, ജില്ലാ വാർത്ത
കേരളാ പോലീസും മോട്ടോർ വാഹന വകുപ്പും ഇ-ചെല്ലാൻ മുഖേന നൽകിയിട്ടുള്ള ട്രാഫിക് ഫൈനുകളിൽ 2021 വർഷം മുതൽ യഥാസമയം പിഴ അടക്കാൻ സാധിക്കാത്തതും നിലവിൽ കോടതിയിൽ ഉള്ളതുമായ ചെല്ലാനുകളിൽ പ്രോസിക്യൂഷൻ നടപടികൾക്ക് ശുപാർശ ചെയ്തിട്ടുള്ളവ ഒഴികെയുള്ള എല്ലാ ചെല്ലാനുകളും പിഴയൊടുക്കി തുടർനടപടികളിൽ നിന്നും ഒഴിവാകുവാൻ തിരുവനന്തപുരം ജില്ലാ പോലീസും മോട്ടോർ വാഹന വകുപ്പും (എൻഫോഴ്സസ്മെൻറ് വിഭാഗം) ചേർന്ന് അദാലത്ത് സംഘടിപ്പിക്കുന്നു.
2024 ഡിസംബർ 05, 06, 07 തീയതികളിൽ തിരുവനന്തപുരം റൂറൽ ജില്ലാ പോലീസ് മേധാവിയുടെ കാര്യാലയത്തിൽ
(PMG, വികാസ് ഭവൻ KSRTC പെട്രോൾ പമ്പിന് എതിർവശം) വച്ച് സംഘടിപ്പിച്ചിരിക്കുന്ന ഈ അദാലത്തിൽ രാവിലെ 10 മണി മുതൽ വൈകിട്ട് 4 മണി വരെ പൊതുജനങ്ങൾക്ക് നേരിട്ട് എത്തി പിഴ ഒടുക്കാവുന്നതാണ്. പ്രസ്തുത അദാലത്തുമായി ബന്ധപ്പെട്ട വിവരങ്ങൾക്ക് 9497980117 (പോലീസ്) എന്ന ഫോൺ നമ്പരിലും trsmtvmrl.pol@kerala.gov.in എന്ന ഇ-മെയിൽ വിലാസത്തിലും ബന്ധപ്പെടാവുന്നതാണ്.
by Midhun HP News | Dec 3, 2024 | Latest News, ജില്ലാ വാർത്ത
തിരുവനന്തപുരം: സംസ്ഥാനത്ത് ഇന്നും കനത്ത മഴ തുടരും. രണ്ട് ജില്ലകളില് ഓറഞ്ച് അലര്ട്ടുണ്ട്. ഏഴ് ജില്ലകളില് യെല്ലോ മുന്നറിയിപ്പ്. കണ്ണൂര്, കാസര്ക്കോട് ജില്ലകളിലാണ് ഓറഞ്ച് മുന്നറിയിപ്പ്. എറണാകുളം, ഇടുക്കി, തൃശൂര്, പാലക്കാട്, മലപ്പുറം, കോഴിക്കോട്, വയനാട് ജില്ലകളിലാണ് യല്ലോ അലര്ട്ട്.
തൃശൂര് ജില്ലയില് അടുത്ത മൂന്ന് മണിക്കൂറില് ഒറ്റപ്പെട്ടയിടങ്ങളില് ശക്തമായ മഴയ്ക്കും മണിക്കൂറില് 40 കിലോമീറ്റര് വരെ വേഗതയില് ശക്തമായ കാറ്റിനും സാധ്യത. കണ്ണൂര്, കാസര്ക്കോട് ജില്ലകളില് അടുത്ത മൂന്ന് മണിക്കൂറില് ഒറ്റപ്പെട്ടയിടങ്ങളില് ശക്തമായ / ഇടത്തരം മഴയ്ക്കും മണിക്കൂറില് 40 കിലോമീറ്റര് വരെ വേഗതയില് ശക്തമായ കാറ്റിനും സാധ്യതയെന്നു കേന്ദ്ര കാലാവസ്ഥാ വകുപ്പ് അറിയിക്കുന്നു.
മത്സ്യത്തൊഴിലാളി ജാഗ്രതാ നിര്ദ്ദേശം
കേരള, കര്ണാടക തീരങ്ങളില് ഇന്നും ലക്ഷദ്വീപ് പ്രദേശത്ത് ഇന്ന് മുതല് 5 വരെയും മത്സ്യബന്ധനത്തിന് പോകാന് പാടില്ലെന്ന് കേന്ദ്ര കാലാവസ്ഥാ വകുപ്പ് അറിയിച്ചു. കര്ണാടക തീരങ്ങളില് മണിക്കൂറില് 35 മുതല് 45 കിലോമീറ്റര് വരെയും ചില അവസരങ്ങളില് മണിക്കൂറില് 55 കിലോമീറ്റര് വരെയും വേഗതയില് ശക്തമായ കാറ്റിന് സാധ്യത. ലക്ഷദ്വീപ് പ്രദേശത്ത് മണിക്കൂറില് 35 മുതല് 45 കിലോമീറ്റര് വരെയും ചില അവസരങ്ങളില് മണിക്കൂറില് 55 കിലോമീറ്റര് വരെയും വേഗതയില് ശക്തമായ കാറ്റിന് സാധ്യത.
ഇടിമിന്നല് ജാഗ്രതാ നിര്ദേശം
നാളെ വരെ കേരളത്തില് ഒറ്റപ്പെട്ടയിടങ്ങളില് ഇടിമിന്നലോടു കൂടിയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
by Midhun HP News | Dec 3, 2024 | Latest News, കേരളം
ആലപ്പുഴയിൽ 5 മെഡിക്കല് വിദ്യാർത്ഥികളുടെ മരണത്തിനിടയാക്കിയ വാഹനാപകടത്തില് അപകടത്തിന്റെ ആഘാതം ഉയർത്തിയത് ഓവർലോഡ്.
ഏഴ് പേർക്ക് സഞ്ചരിക്കാവുന്ന ടവേര കാറില് 12 പേരാണ് ഉണ്ടായിരുന്നതെന്ന് മോട്ടോർ വാഹന വകുപ്പ് ഉദ്യോഗസ്ഥർ പ്രാഥമിക പരിശോധനയ്ക്ക് ശേഷം പറഞ്ഞു. വാഹനം ഓടിച്ച വിദ്യാർത്ഥിയുമായി സംസാരിച്ച ശേഷമാണ് ഉദ്യോഗസ്ഥർ ഇക്കാര്യം പറഞ്ഞത്. ഒൻപത് മണിയോടെയാണ് അപകടം ഉണ്ടായത്. ആ സമയം ഒരു മണിക്കൂറോളമായി ആലപ്പുഴ നഗരപ്രദേശത്ത് നല്ല മഴയായിരുന്നു. മഴ മൂലം കാഴ്ച മങ്ങിയതും അപകടത്തിന് വഴിവെച്ചിട്ടുണ്ടാകാമെന്ന് ഉദ്യോഗസ്ഥർ വ്യക്തമാക്കി.
ആലപ്പുഴ വണ്ടാനം മെഡിക്കല് കോളജിലെ ഒന്നും രണ്ടും വർഷ മെഡിക്കല് വിദ്യാർത്ഥികളാണ് അപകടത്തില്പെട്ടത്. ആലപ്പുഴയില് നിന്നും കായംകുളത്തേക്ക് പോകുകായിരുന്ന ഫാസ്റ്റ് പാസഞ്ചർ ബസിലേക്കാണ് കാർ ഇടിച്ചുകയറിയത്.
2010 മോഡല് ടവേര കാറാണ് അപകടത്തില്പെട്ടത്. വാഹനം പൂർണമായി തകർന്നിട്ടുണ്ട്. ശ്രീദീപ് (പാലക്കാട്) മുഹമ്മദ് ഇബ്രാഹിം, ദേവാനന്ദ് (ലക്ഷദ്വീപ്), മുഹമ്മദ് ജബ്ബാർ (കണ്ണൂർ) ആയുഷ് ഷാജി (ആലപ്പുഴ) എന്നിവരാണ് മരിച്ചത്. ചികിത്സയില് കഴിയുന്ന ഒരു കുട്ടിയുടെ നിലയും ഗുരുതരമാണ്. വണ്ടാനം മെഡിക്കല് കോളേജിലും ജനറല് ആശുപത്രിയിലുമായിട്ടാണ് കുട്ടികളെ പ്രവേശിപ്പിച്ചിട്ടുളളത്.
Recent Comments