by Midhun HP News | Oct 22, 2026 | Latest News, ദേശീയ വാർത്ത
ഹോർമുസ് കടലിടുക്കിലൂടെ യാത്ര ചെയ്യുകയായിരുന്ന എണ്ണക്കപ്പലിന് നേരെ ആക്രമണം. 21 ഇന്ത്യാക്കാരടക്കം ആക്രമണം നേരിട്ട എംടി അൽ ദസ്‌മ കപ്പലിലുണ്ടായിരുന്ന എല്ലാ ജീവനക്കാരും സുരക്ഷിതരെന്നാണ് വിവരം. കപ്പലിന് നേരെ മിസൈൽ ആക്രമണം നടന്നെന്നാണ് സംശയം. കുവൈറ്റ് പതാക വഹിച്ച കപ്പലായിരുന്നു ഇത്. ആക്രമണ വിവരം അറിഞ്ഞ് കേന്ദ്ര തുറമുഖ ഷിപ്പിങ് ജലഗതാഗത വകുപ്പ് മന്ത്രി സർബാനന്ദ സോനോവാൾ വിഷയത്തിൽ ഇടപെട്ടു.
ആക്രമണത്തെ തുടർന്ന് കപ്പലിൽ തീപിടുത്തമുണ്ടായി. ഏറെ നേരത്തെ പരിശ്രമത്തിനൊടുവിൽ തീ അണയ്ക്കാൻ സാധിച്ചെന്ന് ടൈംസ് കുവൈറ്റ് റിപ്പോർട്ട് ചെയ്യുന്നു. ഒമാൻ തീരത്തോട് ചേർന്ന് ബുഖായ്ക്ക് പടിഞ്ഞാറ് 11 നോട്ടിക്കൽ മൈൽ അകലെ വെച്ച് ഒക്ടോബർ 21 നാണ് ആക്രമണം ഉണ്ടായതെന്ന് യു.കെ മാരിടൈം ട്രേഡ് ഓപ്പറേഷൻസ് സ്ഥിരീകരിച്ചിട്ടുണ്ട്. കപ്പൽ ഇതേ സ്ഥലത്ത് തന്നെയാണുള്ളത്. ഷിപ്പിങ് കമ്പനിയുമായി ബന്ധപ്പെടുന്നുണ്ടെന്നും സ്ഥിതിഗതികൾ സസൂക്ഷ്‌മം നിരീക്ഷിക്കുകയാണെന്നും കേന്ദ്രമന്ത്രി എക്‌സ് ഹാൻഡിൽ വഴി വ്യക്തമാക്കി.
ഇടക്കാല തെരഞ്ഞെടുപ്പിൻ്റെ പശ്ചാത്തലത്തിൽ സംഘർഷത്തിൽ നിന്ന് തത്കാലത്തേക്ക് അമേരിക്ക ഉൾവലിഞ്ഞതിന് പിന്നാലെ കടുത്ത ആക്രമണമാണ് ഹോർമുസിൽ ഇറാൻ അഴിച്ചുവിടുന്നത്. ആഗോളതലത്തിൽ എണ്ണവില ഉയർത്തുകയെന്ന ലക്ഷ്യത്തോടെ എണ്ണക്കപ്പലുകൾ ഉന്നമിട്ടാണ് ആക്രമണം. എണ്ണവില ഉയർന്നാൽ അമേരിക്കയിൽ ഇത് ജനങ്ങളെ ബുദ്ധിമുട്ടിലാക്കുമെന്നും അതിലൂടെ ട്രംപിന് എതിരായ ജനവിധി ഉണ്ടാകുമെന്നും ഇറാന പ്രതീക്ഷിക്കുന്നു.
ഒക്ടോബർ 16-ന് 15 ഇന്ത്യൻ നാവികരുള്ള ‘എംടി എസ്ടി 3’ എണ്ണക്കപ്പലിനും, ഒക്ടോബർ 14-ന് റൊമാനിയക്ക് സമീപം 9 ഇന്ത്യൻ നാവികരുള്ള ‘യര ജെ’ എന്ന ചരക്കുകപ്പലിനും നേരെ സമാനമായ ആക്രമണങ്ങൾ നടന്നിരുന്നു. ഈ കപ്പലുകളിലുണ്ടായിരുന്ന എല്ലാ ഇന്ത്യൻ പൗരന്മാരും സുരക്ഷിതരാണെന്ന് അധികൃതർ നേരത്തെ വ്യക്തമാക്കിയിരുന്നു.
by Midhun HP News | Oct 22, 2026 | Latest News, കേരളം
തിരുവനന്തപുരം: പാറശ്ശാലയിൽ റെയിൽവേ ട്രാക്കിൽ മണ്ണിടിഞ്ഞുവീണ് ട്രെയിൻ എഞ്ചിൻ പാളം തെറ്റി. ബിലാസ്പൂർ-തിരുനെൽവേലി എക്സ്പ്രസ് ട്രെയിനാണ് അപകടത്തിൽപ്പെട്ടത്. കനത്ത മഴയിൽ പുലർച്ചെ രണ്ടു മണിയോടെ ട്രാക്കിലേക്ക് മണ്ണിടിഞ്ഞ് വീഴുകയായിരുന്നു. എഞ്ചിന്റെ നാല് വീലുകൾ പാളം തെറ്റി. അപകടത്തിൽ ആർക്കും പരിക്കില്ല. മണ്ണ് നീക്കാനുള്ള ശ്രമം തുടരുകയാണ്.
പരശുറാം എക്സ്പ്രസ്സ്‌ ഉൾപ്പെടെ വൈകും. താംബരം–തിരുവനന്തപുരം സെൻട്രൽ സ്പെഷ്യൽ ട്രെയിൻ (06163), മധുര-പുനലൂർ എക്സ്പ്രസ് (16729), താംബരം–തിരുവനന്തപുരം സെൻട്രൽ അമൃത് ഭാരത് എക്സ്പ്രസ് (16121) എന്നീ ട്രെയിനുകൾ പിടിച്ചിട്ടു. നിലവധി ട്രെയിനുകൾ വൈകുമെന്നും റെയിൽവേ അധികൃതർ അറിയിച്ചു.
by Midhun HP News | Oct 22, 2026 | Latest News, ജില്ലാ വാർത്ത
തിരുവനന്തപുരം: കേരള അറബിക് ടീച്ചേഴ്സ് ഫെഡറേഷൻ (കെ.എ.ടി.എഫ്) തിരുവനന്തപുരം ജില്ലാ കമ്മിറ്റിയുടെ ആഭിമുഖ്യത്തിൽ മണക്കാട് ശ്രീ.ചിത്തിര തിരുനാൾ ഗവ.വി & എച്ച്.എസ് സ്കൂളിൽ ജഡ്ജ്മെന്റ് & സർവീസ് ശിൽപ്പശാല സംഘടിപ്പിച്ചു.
മാപ്പിള കലകളുടെയും അറബിക് കലോത്സവത്തിന്റെയും വിധിനിർണയ രീതികൾ, സർവീസ് സംബന്ധമായ വിഷയങ്ങൾ എന്നിവയിൽ അധ്യാപകർക്ക് കൂടുതൽ അറിവും വ്യക്തതയും നൽകുക എന്ന ലക്ഷ്യത്തോടെയായിരുന്നു ശിൽപശാല സംഘടിപ്പിച്ചത്. മാപ്പിള കലകളുടെ വിധി നിർണയത്തിലെ മാനദണ്ഡങ്ങൾ, അറബിക് കലോത്സവത്തിലെ മത്സര ഇനങ്ങളുടെ മൂല്യനിർണയ രീതികൾ, വിധികർത്താക്കൾ പാലിക്കേണ്ട ചട്ടങ്ങളും ഉത്തരവാദിത്വങ്ങളും എന്നിവയിലധിഷ്ഠിതമായിരുന്നു ശില്പശാല. അധ്യാപകരുടെ സർവീസ് സംബന്ധമായ സംശയങ്ങൾക്കും പ്രശ്നങ്ങൾക്കും വ്യക്തത നൽകുന്ന ചർച്ചകളും ശിൽപശാലയിൽ നടന്നു.
അധ്യാപകരുടെ അക്കാദമിക മികവ് ഉയർത്തുന്നതിനും കലോത്സവ വിധിനിർണയം കൂടുതൽ സുതാര്യവും കാര്യക്ഷമവുമാക്കുന്നതിനും സർവീസ് കാര്യങ്ങളിൽ അവബോധം വളർത്തുന്നതിനും ശിൽപ്പശാല സഹായകമായി.
സംസ്ഥാന ജഡ്ജ്മെന്റ് പാനലിസ്റ്റുകളായ ഹാഷിം ചുനക്കര, അബ്ദുൽ വാഹിദ് വെമ്പായം, അബുൽ ഖൈർ തുടങ്ങിയവർ വിവിധ സെഷനുകൾക്ക് നേതൃത്വം നൽകി.
മുസ്ലിം ലീഗ് തിരുവനന്തപുരം ജില്ലാ ജനറൽ സെക്രട്ടറി മാഹിൻ അബൂബക്കർ ശിൽപശാല ഉദ്ഘാടനം ചെയ്തു. കോർപറേഷൻ വാർഡ് കൗൺസിലർ സജീന ടീച്ചർ, തിരുവനന്തപുരം മണ്ഡലം സെക്രട്ടറി ഹലീൽ റഹ്മാൻ, ആർ.എ.ടി.എഫ്. ജില്ല പ്രസിഡണ്ട് എ.അഹ്മദലി എന്നിവർ ആശംസകൾ നേർന്നു. ജില്ലാ പ്രസിഡണ്ട് എച്ച്.മുജീബ് റഹ്മാൻ, ജില്ലാ ജനറൽ സെക്രട്ടറി പി.കെ.സക്കരിയ്യ, ട്രഷറർ സുലൈഖ താഴത്ത് പ്രസംഗിച്ചു.
ജില്ലാ ഭാരവാഹികളായ ഷബീർ തിരുവല്ലം, അൻസാറുദ്ദീൻ പാലോട്, ശാബിൻ വള്ളക്കടവ്, അബ്ദു ശുഹൂദ്, നാസർ കരിച്ചാറ, ത്വാഹിറ കണിയാപുരം, അൻസാരി കാട്ടാക്കട, ശൈമ ബാലരാമപുരം, ഹാസിലുദ്ദീൻ അഴീക്കോട്, സെറീന ആറ്റിങ്ങൽ, സജ്ന പിരപ്പൻകോട് ഷാജിലുദ്ദീൻ കിളിമാനൂർ, ഷാഹിദ കമലേശ്വരം, അജാദ്.ഇ.എ, വി.വി.അബ്ദുന്നാസർ, എ.എസ്.നിയാസ് പാറശ്ശാല, റാഷിദ അമ്പലത്തറ, സജീലബീവി, ഷമീൻ ബീമാപ്പളളി, ബി.ഷഫീഖ്, എസ്.സുമയ്യ വെമ്പായം, കെ.ബുഷ്റ കിളിമാനൂർ, എസ്.ഷഹീനബീവി, ഇ.അബ്ദുന്നാസർ, നിഷാദ് വളളക്കടവ് തുടങ്ങിയവർ നേതൃത്വം നൽകി.
by Midhun HP News | Oct 22, 2026 | Latest News, ദേശീയ വാർത്ത
മുംബൈ: നടന്‍ ടൈഗര്‍ ഷറോഫിന് നേരെ വെടിയുതിര്‍ത്ത പ്രതികള്‍ നടന്‍ രണ്‍കബീറിനെയും ലക്ഷ്യമിട്ടിരുന്നതായി വിവരം. പ്രതികള്‍ രണ്‍വീറിന്റെ ബാന്ദ്രയിലെ വസതി നീരീക്ഷിച്ചിരുന്നതായും പ്രതികള്‍ കൂടുതല്‍ താരങ്ങളെ ലക്ഷ്യമിട്ടോയെന്നും അന്വേഷിക്കുമെന്നും മുംബൈ പൊലീസ് പറഞ്ഞു.
ലോറന്‍സ് ബിഷ്‌ണോയ് ഗുണ്ടാസംഘാംഗമായ അനില്‍ പണ്ഡിറ്റിന്റെ നിര്‍ദേശപ്രകാരം കുനാല്‍, സുമിത് എന്നിവരാണ് അമൃത്സറില്‍നിന്നു തോക്കും 20 തിരകളും ശേഖരിച്ചതെന്നാണ് റിപ്പോര്‍ട്ടുകള്‍. പിടിയിലായ രാധയും ബബിതയുമാണു ട്രെയിന്‍മാര്‍ഗം അവ മുംബൈയിലെത്തിച്ച് അക്രമികള്‍ക്കു കൈമാറിയത്. മുംബൈയില്‍ പ്രതികള്‍ക്കൊപ്പം താമസിച്ച ജതിന്‍, സമീര്‍ എന്നിവരെയും മുംബൈ പൊലീസ് അറസ്റ്റ് ചെയ്തു. ഇവര്‍ക്ക് ആയുധം എത്തിച്ച് നല്‍കിയ ഉറവിടം, കൂടുതല്‍ വ്യക്തികളുടെ പങ്കാളിത്തം എന്നിവ അന്വേഷണസംഘം പരിശോധിച്ചുവരികയാണെന്ന് അന്വേഷണസംഘം അറിയിച്ചു.
രണ്‍വീറിനെ അക്രമിസംഘം നിരീക്ഷിച്ചിരുന്നതായി വിവരം ലഭിച്ചതിന്റെ അടിസ്ഥാനത്തില്‍ അന്വേഷണസംഘം അക്കാര്യവും പരിശോധിക്കും പ്രതികള്‍ ഇത്തരം നിരീക്ഷണം നടത്തിയത് സിനിമാ താരങ്ങളെ ലക്ഷ്യമിട്ടുള്ള വലിയ പദ്ധതിയുടെ ഭാഗമാണോ എന്ന സാധ്യതയും വെടിവയ്പിനു മുന്‍പുള്ള പ്രതികളുടെ നീക്കങ്ങളും വിശദമായി പരിശോധിക്കുമെന്ന് അന്വേഷണസംഘം അറിയിച്ചു. സംഘം നടന്‍ സല്‍മാന്‍ ഖാനെയാണ് ആദ്യം ലക്ഷ്യമിട്ടിരുന്നതെന്നും എന്നാല്‍, വീടിനു പുറത്തും യാത്രാവേളയിലുമുള്ള സുരക്ഷ കണ്ട് പിന്‍വാങ്ങുകയായിരുന്നെന്നു പൊലീസ് പറഞ്ഞു. 2024 ല്‍ സല്‍മാന്‍ ഖാന്റെ വസതിക്കുനേരെ വെടിവയ്പ് നടന്ന ശേഷം സുരക്ഷ ശക്തമാക്കിയിരുന്നു. വൈ-പ്ലസ് സുരക്ഷയാണുള്ളത്.
അതേസമയം, നടന്‍ ടൈഗര്‍ ഷറോഫിനു നേരെ ലോറന്‍സ് ബിഷ്‌ണോയ് ഗുണ്ടാസംഘം വെടിയുതിര്‍ത്ത കേസില്‍ 7 പേര്‍ കൂടി അറസ്റ്റിലായി. ഹരിയാന, യുപി എന്നിവിടങ്ങളില്‍ നിന്നായി 4 പേരും മുംബൈയില്‍ നിന്നു 2 പേരും ഗുജറാത്തില്‍ നിന്ന് ഒരാളുമാണു പിടിയിലായത്. അതോടെ, കേസില്‍ അറസ്റ്റിലായവരുടെ എണ്ണം പത്തായി.
അതേസമയം, നടന്‍ ടൈഗര്‍ ഷറോഫിനു നേരെ ലോറന്‍സ് ബിഷ്‌ണോയ് ഗുണ്ടാസംഘം വെടിയുതിര്‍ത്ത കേസില്‍ 7 പേര്‍ കൂടി അറസ്റ്റിലായി. ഹരിയാന, യുപി എന്നിവിടങ്ങളില്‍ നിന്നായി 4 പേരും മുംബൈയില്‍ നിന്നു 2 പേരും ഗുജറാത്തില്‍ നിന്ന് ഒരാളുമാണു പിടിയിലായത്. അതോടെ, കേസില്‍ അറസ്റ്റിലായവരുടെ എണ്ണം പത്തായി.
by Midhun HP News | Oct 22, 2026 | Latest News, കായികം
ക്രൈസ്റ്റ് ചര്‍ച്ച്: വെസ്റ്റ്ഇന്‍ഡീസിനെതിരായ ടി20 പരമ്പരയുടെ ആവേശം കെട്ടടങ്ങും മുന്‍പ് ഇന്ത്യ അടുത്ത അങ്കത്തിന് ഇറങ്ങുന്നു. ന്യൂസിലന്‍ഡിനെതിരായ അഞ്ച് മത്സര ടി20 പരമ്പരയിലെ ആദ്യമത്സരം ഇന്ന് ക്രൈസ്റ്റ് ചര്‍ച്ചിലെ ഹാഗ് ലി ഓവല്‍ സ്‌റ്റേഡിയത്തില്‍ ഇന്ത്യന്‍ സമയം ഉച്ചയ്ക്ക് 12.30നാണ് മത്സരം.
ക്യാപ്റ്റന്‍ ശ്രേയസ് അയ്യരുടെ നേതൃത്വത്തിലിറങ്ങുന്ന ഇന്ത്യന്‍ ടീമിന്റെ പ്രതീക്ഷ മുഴുവന്‍ ബാറ്റിങ് നിരയിലാണ്. അഭിഷേക്- ശര്‍മ സഞ്ജു സാംസണ്‍ ഓപ്പണിങ് ജോഡി നല്‍കുന്ന തുടക്കം മധ്യനിരയില്‍ ഇഷാന്‍ കിഷന്‍, ശ്രേയസ്, തിലക് വര്‍മ തുടങ്ങിയവര്‍ ഏറ്റുപിടിച്ചാല്‍ ഇന്ത്യക്ക് കാര്യങ്ങള്‍ എളുപ്പമാകും. വിന്‍ഡീസ് പരമ്പരയില്‍ അവസരം ലഭിക്കാതിരുന്ന പതിനഞ്ചുകാരന്‍ വൈഭവ് സൂര്യവംശിക്ക് ന്യൂസിലന്‍ഡിലും ബെഞ്ചിലായിരിക്കും സ്ഥാനമെന്നാണ് റിപ്പോര്‍ട്ടുകള്‍.
നാലുവര്‍ഷത്തിനുശേഷം ദേശീയ ടീമിലേക്ക് തിരിച്ചെത്തിയ പേസര്‍ ഭുവനേശ്വര്‍ കുമാര്‍ ഇന്ന് ഇലവനില്‍ ഇടംപിടിച്ചേക്കും. വിന്‍ഡീസിനെതിരായ അഞ്ചാം ടി20യില്‍ ഭുവിയെ ഇലവനില്‍ ഉള്‍പ്പെടുത്തിയിരുന്നെങ്കിലും മഴ മൂലം ഉപേക്ഷിച്ചിരുന്നതിനാല്‍ ഗ്രൗണ്ടില്‍ ഇറങ്ങാന്‍ സാധിച്ചില്ല. ഭുവിക്കൊപ്പം അര്‍ഷ്ദീപ് സിങും പ്രിന്‍സ് യാദവും പേസ് നിരയില്‍ എത്തിയേക്കും.
by Midhun HP News | Oct 22, 2026 | Latest News, കേരളം
തിരുവനന്തപുരം: സംസ്ഥാനത്ത് ഞായറാഴ്ച വരെ അതിശക്തമായ മഴ തുടരുമെന്ന് കേന്ദ്രകാലാവസ്ഥ വകുപ്പ്. തീവ്രമഴ കണക്കിലെടുത്ത് വിവിധ ജില്ലകളില്‍ ഇന്ന് ഓറഞ്ച് അലര്‍ട്ട് പ്രഖ്യാപിച്ചു. എറണാകുളം, തൃശൂര്‍, മലപ്പുറം, കോഴിക്കോട് ജില്ലകളിലാണ് ഓറഞ്ച് അലര്‍ട്ട്. എല്ലാ ജില്ലകളിലും ശക്തമായ മഴ മുന്നറിയിപ്പുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, പാലക്കാട്, വയനാട്, കണ്ണൂര്‍, കാസര്‍കോട് ജില്ലകളിലാണ് യെല്ലോ അലര്‍ട്ട്.
ഓറഞ്ച് അലര്‍ട്ട്.
24/10/2026: കോഴിക്കോട്, കണ്ണൂര്‍, കാസര്‍കോട്
25/10/2026: ഇടുക്കി, എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട്, വയനാട് ജില്ലകളില്‍ കേന്ദ്ര കാലാവസ്ഥ വകുപ്പ് ഓറഞ്ച് അലര്‍ട്ട് പ്രഖ്യാപിച്ചിരിക്കുന്നു. ഒറ്റപ്പെട്ടയിടങ്ങളില്‍ അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്. 24 മണിക്കൂറില്‍ 115.6 mm മുതല്‍ 204.4 mm വരെ മഴ ലഭിക്കുമെന്നാണ് അതിശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അര്‍ത്ഥമാക്കുന്നത്. ഇടിമിന്നലോടു കൂടിയ മഴയാണ് പ്രതീക്ഷിക്കുന്നത്. .
യെല്ലോ അലര്‍ട്ട്
22/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, പാലക്കാട്, വയനാട്, കണ്ണൂര്‍, കാസര്‍കോട്
23/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട്
24/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്‍, പാലക്കാട്, മലപ്പുറം, വയനാട്
25/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, കണ്ണൂര്‍, കാസര്‍കോട് എന്നീ ജില്ലകളില്‍ കേന്ദ്ര കാലാവസ്ഥ വകുപ്പ് യെല്ലോ അലര്‍ട്ട് പ്രഖ്യാപിച്ചിരിക്കുന്നു. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില്‍ 64.5 മില്ലിമീറ്ററില്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അര്‍ത്ഥമാക്കുന്നത്. ഇടിമിന്നലോടു കൂടിയ മഴയാണ് പ്രതീക്ഷിക്കുന്നത്.
തെക്കുപടിഞ്ഞാറന്‍ ബംഗാള്‍ ഉള്‍ക്കടലില്‍ തമിഴ്നാട് തീരത്തിന് സമീപം ന്യൂനമര്‍ദ്ദം രൂപപ്പെട്ടു. തായ്ലന്‍ഡ് കടലിടുക്കിനും അതിനോട് ചേര്‍ന്ന തായ്ലന്‍ഡ്, മ്യാന്‍മര്‍ പ്രദേശത്തിനും മുകളിലായി ചക്രവാതച്ചുഴി സ്ഥിതിചെയ്യുന്നു. ഈ ചക്രവാതച്ചുഴി വടക്കന്‍ ആന്‍ഡമാന്‍ കടലിലേക്ക് പ്രവേശിച്ചു. തുടര്‍ന്ന് പടിഞ്ഞാറ്-വടക്കുപടിഞ്ഞാറ് ദിശയിലേക്ക് നീങ്ങി. ഇതിന്റെ സ്വാധീനഫലമായി ഒക്ടോബര്‍ 23-ഓടെ തെക്കുകിഴക്കന്‍ ബംഗാള്‍ ഉള്‍ക്കടലിലും അതിനോട് ചേര്‍ന്ന മധ്യ-കിഴക്കന്‍ ബംഗാള്‍ ഉള്‍ക്കടലിലും ന്യൂനമര്‍ദ്ദം രൂപപ്പെടാന്‍ സാധ്യത. തുടര്‍ന്ന് ഇത് വടക്കുപടിഞ്ഞാറന്‍ ദിശയിലേക്ക് നീങ്ങുകയും അടുത്ത മൂന്ന് ദിവസങ്ങളില്‍ കൂടുതല്‍ ശക്തിപ്രാപിക്കാനും സാധ്യതയെന്ന് മുന്നറിയിപ്പില്‍ പറയുന്നു.
മത്സ്യത്തൊഴിലാളി ജാഗ്രത നിർദേശം
കേരള – ലക്ഷദ്വീപ് തീരങ്ങളിൽ 25/10/2026 വരെയും കർണാടക തീരത്ത് 23/10/2026 മുതൽ 25/10/2026 വരെയും മത്സ്യബന്ധനത്തിന് പോകാൻ പാടില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു.
25/10/2026 വരെ കേരള – ലക്ഷദ്വീപ് തീരങ്ങളിൽ മണിക്കൂറിൽ 35 മുതൽ 45 കിലോമീറ്റർ വരെയും ചില അവസരങ്ങളിൽ മണിക്കൂറിൽ 55 കിലോമീറ്റർ വരെയും വേഗതയിൽ ശക്തമായ കാറ്റിനും മോശം കാലാവസ്ഥയ്ക്കും സാധ്യത.
23/10/20206 മുതൽ 25/10/2026 വരെ: കർണാടക തീരങ്ങളിൽ മണിക്കൂറിൽ 35 മുതൽ 45 കിലോമീറ്റർ വരെയും ചില അവസരങ്ങളിൽ മണിക്കൂറിൽ 55 കിലോമീറ്റർ വരെയും വേഗതയിൽ ശക്തമായ കാറ്റിനും മോശം കാലാവസ്ഥയ്ക്കും സാധ്യത.
Recent Comments