by Midhun HP News | Oct 21, 2026 | Latest News, കേരളം
തിരുവനന്തപുരം: കോവളത്തെ സ്പായുടെ മറവിൽ പ്രായപൂർത്തിയാകാത്ത പെൺകുട്ടിയെ ലൈംഗിക ചൂഷണത്തിന് ഇരയാക്കിയ കേസിൽ ശക്തമായ നടപടിയുണ്ടാകുമെന്ന് ഡിജിപി റവാഡ ചന്ദ്രശേഖർ. സംഭവത്തിൽ ഉൾപ്പെട്ട മനുഷ്യക്കടത്ത് അതീവ ഗൗരവത്തോടെയാണ് പൊലീസ് കാണുന്നതെന്നും സംസ്ഥാനത്തെ സ്പാകൾ കേന്ദ്രീകരിച്ച് കർശനവും വ്യാപകവുമായ പരിശോധനകൾ നടത്തുമെന്നും അദ്ദേഹം വ്യക്തമാക്കി.
കോവളം സ്പാ കേന്ദ്രീകരിച്ച് നടന്ന പെൺവാണിഭ സംഘത്തിലെ പ്രധാന കണ്ണി തിരുവനന്തപുരം നഗരസഭയിലെ ഹെൽത്ത് ഇൻസ്പെക്ടറായ അനുരൂപാണെന്നാണ് പൊലീസിന്റെ കണ്ടെത്തൽ. ഇയാളുടെ ഉടമസ്ഥതയിലുള്ള നാല് ബാങ്ക് അക്കൗണ്ടുകളിൽ നിന്നായി ലക്ഷക്കണക്കിന് രൂപയുടെ അസ്വാഭാവിക പണമിടപാടുകൾ കണ്ടെത്തിയിട്ടുണ്ട്. ഉള്ളൂർ സോണൽ ഓഫീസിലെ ജൂനിയർ ഹെൽത്ത് ഇൻസ്പെക്ടറായി ജോലിയിൽ പ്രവേശിച്ച ശേഷമാണ് അനുരൂപ് സ്പാ ബിസിനസുകളിലേക്ക് കടന്നത്. പീഡനം നടന്ന കോവളത്തെ സ്പാ ഇയാളുടെ ബെനാമി സ്ഥാപനമാണെന്ന് വ്യക്തമായിട്ടുണ്ട്. കൂടാതെ മറ്റ് രണ്ട് സ്പാകളുടെ നടത്തിപ്പിലും ഇയാൾക്ക് നേരിട്ട് പങ്കാളിത്തമുണ്ടെന്നാണ് പൊലീസിന്റെ പ്രാഥമിക നിഗമനം. ആന്ധ്രാ സ്വദേശിനിയായ പതിനാറുകാരിയെ കോവളത്ത് എത്തിച്ചതും അനുരൂപുമായി സംസാരിച്ചതിന് ശേഷമാണ്.
അറസ്റ്റിലായതിനെത്തുടർന്ന് തിരുവനന്തപുരം മേയർ വി.വി. രാജേഷ് അനുരൂപിനെ സർവീസിൽ നിന്ന് സസ്പെൻഡ് ചെയ്തിരുന്നു. സംഭവത്തിന്റെ ഗൗരവം കണക്കിലെടുത്ത് ഇയാളെ സർവീസിൽ നിന്ന് സ്ഥിരമായി പിരിച്ചുവിടാനുള്ള നടപടികളിലേക്ക് നഗരസഭ കടന്നിരിക്കുകയാണ്.
മാതൃസഹോദരി വിറ്റത് കമ്മീഷൻ വ്യവസ്ഥയിൽ; കുട്ടിക്ക് ക്രൂരപീഡനം
അതേസമയം, കേസിൽ മനസ്സാക്ഷിയെ മരവിപ്പിക്കുന്ന വിവരങ്ങളാണ് പുറത്തുവരുന്നത്. മാതാപിതാക്കൾ ചെറുപ്പത്തിലേ മരിച്ചുപോയ ആന്ധ്രാ സ്വദേശിനിയായ പെൺകുട്ടിയെ വളർത്തിയത് അമ്മയുടെ സഹോദരിയായിരുന്നു. എന്നാൽ, പോറ്റി വളർത്തിയ ആ മാതൃസഹോദരി തന്നെയാണ് പതിനാറ് വയസ്സ് തികയും മുൻപേ കുട്ടിയെ ലൈംഗിക ചൂഷണത്തിനായി വിറ്റത്. ഓരോ തവണ പീഡനത്തിന് ഇരയാക്കുമ്പോഴും 1,000 മുതൽ 4,000 രൂപ വരെ എന്ന കമ്മീഷൻ വ്യവസ്ഥയിലാണ് കുട്ടിയെ കോവളത്തെ സ്പായിലെത്തിച്ചതെന്ന് പൊലീസ് കണ്ടെത്തി.
പെൺകുട്ടി ലൈംഗിക ചൂഷണത്തിന് വഴങ്ങുന്നുണ്ടെന്ന് ഉറപ്പുവരുത്താനായി വളർത്തമ്മയും ഭർത്താവും ഇതേ സ്പായിൽത്തന്നെ ശുചീകരണ ജീവനക്കാരായി ജോലിക്ക് കയറുകയും ചെയ്തു. പീഡനത്തെ കുട്ടി എതിർത്തപ്പോഴെല്ലാം വളർത്തമ്മയും ഭർത്താവും ചേർന്ന് അതിക്രൂരമായി ഉപദ്രവിച്ചു. പൊള്ളലേൽപ്പിച്ചതിന്റെ ഉൾപ്പെടെയുള്ള പാടുകൾ പെൺകുട്ടിയുടെ ശരീരത്തിൽ കണ്ടെത്തിയിട്ടുണ്ട്.
കുട്ടിയെ വിറ്റ വളർത്തമ്മ, ഭർത്താവ്, സ്പാ നടത്തിപ്പുകാരായ അനുരൂപ് ഉൾപ്പെടെയുള്ളവർ എന്നിവർ നിലവിൽ പൊലീസിന്റെ പിടിയിലായിട്ടുണ്ട്. സ്പായിലെത്തി പെൺകുട്ടിയെ പീഡിപ്പിച്ച സന്ദർശകരെ കണ്ടെത്താനാണ് പൊലീസ് ഇപ്പോൾ ഊർജ്ജിതമായ അന്വേഷണം നടത്തുന്നത്. തമിഴും മലയാളവും സംസാരിക്കുന്ന നിരവധി ആളുകൾ തന്നെ ചൂഷണം ചെയ്തിട്ടുണ്ടെന്ന് കുട്ടി മൊഴി നൽകിയിട്ടുണ്ട്. സ്പായിൽ സിസിടിവി ദൃശ്യങ്ങളോ സന്ദർശക രജിസ്റ്ററോ സൂക്ഷിച്ചിട്ടില്ലാത്തതിനാൽ, പ്രതികളുടെയും സ്ഥാപനത്തിന്റെയും ഫോൺ കോൾ രേഖകൾ വിശദമായി പരിശോധിച്ച് സന്ദർശകരിലേക്ക് അന്വേഷണം വ്യാപിപ്പിച്ചിരിക്കുകയാണ് പൊലീസ്.
by Midhun HP News | Oct 21, 2026 | Latest News, കേരളം
ഡല്‍ഹി: അടുത്ത വര്‍ഷം നിയമസഭ തെരഞ്ഞെടുപ്പ് നടക്കാനിരിക്കുന്ന അഞ്ചു സംസ്ഥാനങ്ങളില്‍ തെരഞ്ഞെടുപ്പ് മുന്നൊരുക്കങ്ങള്‍ ഊര്‍ജ്ജിതമാക്കി തെരഞ്ഞെടുപ്പ് കമ്മീഷന്‍. മണിപ്പൂര്‍, ഉത്തര്‍പ്രദേശ്, ഉത്തരാഖണ്ഡ്, പഞ്ചാബ്, ഗോവ എന്നീ സംസ്ഥാനങ്ങളിലാണ് അടുത്ത വര്‍ഷം തെരഞ്ഞെടുപ്പ് നടക്കാനിരിക്കുന്നത്. ഒരുക്കങ്ങള്‍ വിലയിരുത്താനായി തെരഞ്ഞെടുപ്പ് കമ്മീഷനിലെ മുതിര്‍ന്ന ഉദ്യോഗസ്ഥര്‍ അടങ്ങുന്ന സംഘം മണിപ്പൂരിലെത്തി.
തെരഞ്ഞെടുപ്പ് തീയതികള്‍ പ്രഖ്യാപിക്കുന്നതിന് മുന്നോടിയായി, ഡെപ്യൂട്ടി തെരഞ്ഞെടുപ്പ് കമ്മീഷണര്‍മാരുടെ നേതൃത്വത്തിലുള്ള സംഘങ്ങള്‍ സംസ്ഥാനങ്ങള്‍ സന്ദര്‍ശിക്കുന്നുണ്ട്. ഉത്തരാഖണ്ഡില്‍ ഇതിനകം സന്ദര്‍ശനം നടത്തി. ഒക്ടോബര്‍ 28-ന് പഞ്ചാബില്‍ സന്ദര്‍ശനം നടത്താന്‍ തീരുമാനിച്ചിട്ടുണ്ട്. ഗോവ സന്ദര്‍ശന തീയതികള്‍ പുനഃക്രമീകരിച്ചുവരികയാണ്. യു പി സന്ദര്‍ശന വിവരങ്ങള്‍ അന്തിമമായിട്ടില്ല.
ഉത്തര്‍പ്രദേശ് നിയമസഭയുടെ കാലാവധി അടുത്ത വര്‍ഷം മെയ് 22-ന് അവസാനിക്കും. മണിപ്പൂര്‍ (60 എംഎല്‍എമാര്‍), ഗോവ (40), പഞ്ചാബ് (117), ഉത്തരാഖണ്ഡ് (70) എന്നീ സംസ്ഥാനങ്ങളിലെ നിയമസഭകളുടെ കാലാവധി 2027 മാര്‍ച്ചിലും അവസാനിക്കുകയാണ്. നിയമസഭ തെരഞ്ഞെടുപ്പ് നടക്കാനിരിക്കുന്ന അഞ്ച് സംസ്ഥാനങ്ങളില്‍ നിലവില്‍ പ്രത്യേക സംക്ഷിപ്ത വോട്ടര്‍പട്ടിക പുതുക്കല്‍ നടപടികള്‍ നടന്നുവരികയാണ്. 17 സംസ്ഥാനങ്ങളിലും കേന്ദ്രഭരണ പ്രദേശങ്ങളിലും അന്തിമ വോട്ടര്‍പട്ടിക ജനുവരി 4-ന് പ്രസിദ്ധീകരിക്കും.
by Midhun HP News | Oct 21, 2026 | Latest News, കേരളം
തൃശൂർ: ചാവക്കാട് വീടിന് മുന്നിൽ നിർത്തിയിട്ടിരുന്ന കാർ മോഷ്ടിക്കാൻ ശ്രമിച്ച പ്രതിയെ നാട്ടുകാർ സാഹസികമായി പിന്തുടർന്ന് പിടികൂടി പൊലീസിൽ ഏൽപ്പിച്ചു. ചാവക്കാട് ബസ് സ്റ്റാൻഡിന് വടക്ക് പണിക്കവീട്ടിൽ ഷക്കീറിന്റെ കാറാണ് മോഷണശ്രമത്തിന് ഇരയായത്. സംഭവത്തിൽ മന്നലാംകുന്ന് കിണർ സ്വദേശി നബീലിനെയാണ് ചാവക്കാട് പൊലീസ് കസ്റ്റഡിയിലെടുത്തത്.
കഴിഞ്ഞദിവസം രാത്രി 9:30 ഓടെയായിരുന്നു സംഭവം. കാർ മോഷ്ടിക്കാൻ ശ്രമിക്കുന്നതിനിടെ അബദ്ധത്തിൽ വാഹനത്തിന്റെ ഹോൺ അടിച്ചതാണ് പ്രതിക്ക് വിനയായത്. പെട്ടെന്ന് കാറിന്റെ ഹോൺ ശബ്ദം കേട്ട് വീട്ടുകാർ പുറത്തിറങ്ങി നോക്കിയപ്പോൾ കാറിൽ നിന്ന് ഒരാൾ ചാടിയിറങ്ങി ഓടുന്നത് കണ്ടു. ഉടൻതന്നെ വീട്ടുകാർ ഇയാളെ പിന്തുടർന്നെങ്കിലും രക്ഷപ്പെടാൻ ശ്രമിച്ചു. എന്നാൽ വീട്ടുപരിസരത്ത് സ്ഥാപിച്ചിരുന്ന സിസിടിവി ക്യാമറകൾ പരിശോധിച്ചതോടെ മോഷ്ടാവിന്റെ രൂപം വ്യക്തമായി പതിഞ്ഞത് നാട്ടുകാർക്ക് സഹായകരമായി.
തുടർന്ന് നടത്തിയ തെരച്ചിലിൽ ഷക്കീറിന്റെ സഹോദരൻ ഷബീർ ഇയാളെ കണ്ടെത്തുകയും വിവരങ്ങൾ ചോദിച്ചറിയാൻ ശ്രമിക്കുകയും ചെയ്തു. ഇയാളുടെ ചിത്രം മൊബൈൽ ഫോണിൽ പകർത്താൻ തുടങ്ങിയതോടെ പ്രതി അക്രമാസക്തനാവുകയും ഷബീറിനെ ആക്രമിക്കാൻ ശ്രമിച്ചശേഷം വീണ്ടും ഓടുകയും ചെയ്തു. ഇതോടെ നാട്ടുകാർ സംഘടിച്ച് ഇയാളെ വളഞ്ഞു.
ഒടുവിൽ സമീപത്തെ വീടിന്റെ വിറകുപുരയിൽ ഒളിച്ചിരുന്ന പ്രതിയെ നാട്ടുകാർ കയ്യോടെ പിടികൂടുകയായിരുന്നു. നാട്ടുകാർ ഇയാളെ പരിശോധിച്ചപ്പോൾ കാറിൽ നിന്ന് കാണാതായ വീട്ടുരുടമയുടെ പേഴ്സും കാറിന്റെ താക്കോലും ഇയാളുടെ പോക്കറ്റിൽ നിന്ന് കണ്ടെടുത്തു. വിവരമറിഞ്ഞ് ഉടൻതന്നെ സ്ഥലത്തെത്തിയ ചാവക്കാട് പൊലീസ് പ്രതിയെ കസ്റ്റഡിയിലെടുത്തു. ഇയാളെ വിശദമായി ചോദ്യം ചെയ്തുവരികയാണ്.
by Midhun HP News | Oct 21, 2026 | Latest News, കേരളം
കോട്ടയം: പാമ്പാടി പതിമൂന്നാം മൈലില്‍ ബസിന് അടിയില്‍പ്പെട്ട് സ്‌കൂട്ടര്‍ യാത്രികരായ രണ്ട് യുവതികള്‍ മരിച്ചു. മീനടം വട്ടക്കാവുങ്കല്‍ തോമസിന്റെ മകള്‍ ആഷ്ലി ആന്‍ തോമസ് (25), പാമ്പാടി കടുംവുംഭാഗം ഫാദര്‍ കുര്യാക്കോസിന്റെ മകള്‍ കൃപ മെറിന്‍ കുര്യന്‍ (25) എന്നിവരാണ് മരിച്ചത്. ഇന്ന് രാവിലെയായിരുന്നു അപകടം.
രണ്ടുപേരും അപകട സ്ഥലത്തുതന്നെ മരിച്ചു. പാമ്പാടി പൊലീസ് സ്ഥലത്തെത്തി മേല്‍നടപടി സ്വീകരിച്ചു.
by Midhun HP News | Oct 21, 2026 | Latest News, ദേശീയ വാർത്ത
ഡൽഹി: സിഎംആർഎൽ–എക്സാലോജിക് മാസപ്പടി ഇടപാടുമായി ബന്ധപ്പെട്ട് മുൻ മുഖ്യമന്ത്രി പിണറായി വിജയൻ, മകൾ ടി. വീണ, മരുമകനും മുൻ മന്ത്രിയുമായ പി.എ. മുഹമ്മദ് റിയാസ് എന്നിവർക്ക് കേരള ഹൈക്കോടതി ഡിവിഷൻ ബെഞ്ചിൽ അപ്പീൽ ഫയൽ ചെയ്യാൻ അർഹതയുണ്ടെന്ന് സുപ്രീം കോടതി. വിജിലൻസ് എഫ്ഐആർ രജിസ്റ്റർ ചെയ്യണമെന്ന കേരള ഹൈക്കോടതി സിംഗിൾ ബെഞ്ച് ഉത്തരവിനെതിരെ പിണറായി വിജയനടക്കം നൽകിയ ഹർജി പരിഗണിക്കുകയായിരുന്നു കോടതി.
എൻഫോഴ്സ്മെന്റ് ഡയറക്ടറേറ്റ് കൈമാറിയ വിവരങ്ങളുടെ അടിസ്ഥാനത്തിൽ വിജിലൻസ് എഫ്ഐആർ രജിസ്റ്റർ ചെയ്യണമെന്ന സിംഗിൾ ബെഞ്ച് ഉത്തരവിനെതിരെ അപ്പീൽ നൽകാൻ ഇവർക്ക് തടസ്സമില്ലെന്നാണ് പരമോന്നത കോടതി ഉത്തരവിട്ടത്.
ഹർജിക്കാർക്ക് അപ്പീൽ നൽകാൻ അവകാശമില്ലെന്ന് ചൂണ്ടിക്കാട്ടി ഹർജി തള്ളിയ ഹൈക്കോടതി ഡിവിഷൻ ബെഞ്ചിന്റെ മുൻ ഉത്തരവ് സുപ്രീം കോടതി റദ്ദാക്കി. ഹൈക്കോടതി ഡിവിഷൻ ബെഞ്ചിൽ അപ്പീൽ ഫയൽ ചെയ്യുന്നതിനായി, നിലവിൽ സംസ്ഥാന വിജിലൻസ് ആൻഡ് ആന്റി കറപ്ഷൻ ബ്യൂറോ രജിസ്റ്റർ ചെയ്ത എഫ്ഐആറിലെ തുടരന്വേഷണം സുപ്രീം കോടതി ഏഴ് ദിവസത്തേക്ക് സ്റ്റേ ചെയ്തു. ജഡ്ജിമാരായ ജോയ്മല്യ ബാഗ്ചി, വി. മോഹന എന്നിവരടങ്ങിയ പ്രത്യേക ബെഞ്ചാണ് നിർണ്ണായക ഉത്തരവ് പുറപ്പെടുവിച്ചത്.
സിംഗിൾ ബെഞ്ചിന്റെ പരിഗണനയിലുണ്ടായിരുന്ന റിട്ട് ഹർജിയിൽ ഹർജിക്കാർ കക്ഷികളായിരുന്നില്ല. എന്നാൽ, ഇവർക്കെതിരെ പ്രഥമദൃഷ്ട്യാ ബോധ്യപ്പെടുന്ന കുറ്റകൃത്യങ്ങളുണ്ടെന്ന് സിംഗിൾ ബെഞ്ച് നിരീക്ഷിച്ച സാഹചര്യത്തിൽ, അവർ തീർച്ചയായും ഈ ഉത്തരവിലൂടെ ബാധിക്കപ്പെടുന്നവരും പരാതി ഉന്നയിക്കാൻ അർഹതയുള്ളവരുമാണെന്ന് സുപ്രീം കോടതി വിലയിരുത്തി. എഫ്ഐആർ രജിസ്റ്റർ ചെയ്യാൻ നിർദ്ദേശിക്കുന്നതിന് മുൻപ് ആരോപണവിധേയരുടെ വാദം കേൾക്കേണ്ടതില്ലെന്ന ഇഡിയുടെയും ഹർജിക്കാരന്റെയും വാദങ്ങൾ കോടതി തള്ളി.
“കള്ളപ്പണം വെളുപ്പിക്കൽ നിരോധന നിയമത്തിലെ 66(2) വകുപ്പ് പ്രകാരമുള്ള വിവരങ്ങളുടെ അടിസ്ഥാനത്തിൽ സർക്കാർ സ്വമേധയാ രജിസ്റ്റർ ചെയ്ത കേസല്ല ഇത്. മറിച്ച്, ഭരണഘടനാ കോടതിയുടെ നേരിട്ടുള്ള ഉത്തരവിലൂടെയാണ് എഫ്ഐആറും അന്വേഷണവും ആരംഭിച്ചത്. ഇഡി കൈമാറിയ രേഖകൾ കുറ്റകൃത്യം വ്യക്തമാക്കുന്നുണ്ടെന്നും അതിനാൽ എഫ്ഐആർ രജിസ്റ്റർ ചെയ്യാൻ സർക്കാർ ബാധ്യസ്ഥരാണെന്നും സിംഗിൾ ബെഞ്ച് ചൂണ്ടിക്കാട്ടിയിരുന്നു. ഈ നിരീക്ഷണത്തെ ചോദ്യം ചെയ്യാൻ ആരോപണവിധേയർക്ക് അനുവാദം നൽകിയില്ലെങ്കിൽ, എഫ്ഐആറിനെതിരെയുള്ള അവരുടെ തുടർന്നുള്ള നിയമപോരാട്ടങ്ങളെ അത് ദോഷകരമായി ബാധിക്കും,” കോടതി നിരീക്ഷിച്ചു.
ബിഎൻഎസ്എസ് പുതിയ വ്യവസ്ഥകളും കോടതി വിധിയിൽ പരാമർശിച്ചു. മുൻപുണ്ടായിരുന്ന സിആർപിസി 156(3) വകുപ്പിൽ നിന്ന് വ്യത്യസ്തമായി, പുതിയ ബിഎൻഎസ്എസ് 175(4) വകുപ്പ് പ്രകാരം എഫ്ഐആർ രജിസ്റ്റർ ചെയ്യാൻ കോടതികൾ ഉത്തരവിടുന്നതിന് മുൻപ് ബന്ധപ്പെട്ട പൊതുപ്രവർത്തകന്റെയോ ഉന്നത ഉദ്യോഗസ്ഥന്റെയോ വിശദീകരണം തേടേണ്ടതുണ്ട്. ഒരു കേസിൽ എഫ്ഐആർ ഇടുന്നതിന് മുൻപ് തന്നെ സാധ്യതയുള്ള പ്രതിക്ക് നിയമം നൽകുന്ന സംരക്ഷണത്തിന്റെ വ്യാപ്തിയാണ് ഇതിലൂടെ വ്യക്തമാകുന്നതെന്നും ബെഞ്ച് ചൂണ്ടിക്കാട്ടി.
കൂടാതെ, എഫ്ഐആർ രജിസ്റ്റർ ചെയ്യാൻ മാത്രമല്ല, അന്വേഷണം ആരംഭിക്കാനും അന്തിമ റിപ്പോർട്ട് സമർപ്പിക്കാനും സിംഗിൾ ബഞ്ച് നിർദ്ദേശിച്ചിട്ടുണ്ട്. അഴിമതി നിരോധന നിയമപ്രകാരം അന്വേഷണം പൂർത്തിയാക്കണമെങ്കിൽ പ്രത്യേക നിയമപരമായ അനുമതികൾ ആവശ്യമാണ്. ഈ സാഹചര്യത്തിൽ ഹർജിക്കാർക്ക് അപ്പീൽ നൽകാൻ അവകാശമുണ്ടെന്ന് വ്യക്തമാക്കിയ സുപ്രീം കോടതി, വിഷയത്തിന്റെ മെറിറ്റിലേക്ക് കടക്കുന്നില്ലെന്നും വ്യക്തമാക്കി. ഡിവിഷൻ ബെഞ്ചിന് നിയമപരമായ വസ്തുതകൾ പരിശോധിച്ച് ഇടക്കാല ആശ്വാസത്തിൽ സ്വതന്ത്രമായി തീരുമാനമെടുക്കാമെന്നും ഉത്തരവിൽ വ്യക്തമാക്കുന്നു.
കേസ് പരിഗണിച്ചപ്പോൾ ഹർജിക്കാർക്ക് വേണ്ടി ഹാജരായ മുതിർന്ന അഭിഭാഷകൻ സിദ്ധാർത്ഥ് ലൂത്ര സിംഗിൾ ബെഞ്ചിന്റെയും ഡിവിഷൻ ബെഞ്ചിന്റെയും നടപടികളെ നിശിതമായി വിമർശിച്ചു. പൊതുതാൽപര്യ ഹർജികൾ പരിഗണിക്കാൻ റോസ്റ്റർ അധികാരമില്ലാതിരുന്നിട്ടും സിംഗിൾ ബെഞ്ച് ഈ ഹർജിയിൽ തീർപ്പുകൽപ്പിച്ചുവെന്നും, എന്നാൽ ഇതിനെതിരെ അപ്പീൽ നൽകാൻ ഡിവിഷൻ ബെഞ്ച് അനുമതി നിഷേധിച്ചുവെന്നും അദ്ദേഹം ചൂണ്ടിക്കാട്ടി. ഒരു വിചിത്രമായ കേസാണ് ഇതെന്ന് വിശേഷിപ്പിച്ച ലൂത്ര, ഡിവിഷൻ ബെഞ്ച് അപ്പീലിന് അനുമതി നൽകാതിരുന്നതിലെ വൈരുദ്ധ്യവും ഉയർത്തിക്കാട്ടി.
ഹർജിക്കാർക്ക് അപ്പീൽ നൽകാൻ അനുമതി നൽകാമായിരുന്നുവെന്ന് ജസ്റ്റിസ് വി. മോഹനയും വ്യക്തമാക്കി. കള്ളപ്പണം വെളുപ്പിക്കൽ നിരോധന നിയമത്തിലെ (പി.എം.എൽ.എ) സെക്ഷൻ 66(2) പ്രകാരം ഇ.ഡി നൽകുന്ന വിവരങ്ങൾ എഫ്.ഐ.ആർ രജിസ്റ്റർ ചെയ്യാൻ നിർബന്ധിത സ്വഭാവമുള്ളതാണോ (Mandate) എന്ന സുപ്രധാന വിഷയം ജസ്റ്റിസ് ജോയ്മല്യ ബാഗ്ചി ഉന്നയിച്ചു. “സിംഗിൾ ജഡ്ജി ഒരിടത്ത് ഇത് നിർബന്ധിതമാണെന്ന് പറയുന്നു, മറ്റൊരിടത്ത് പ്രാഥമിക പരിശോധന ആവശ്യമാണെന്നും വ്യക്തമാക്കുന്നു,” അദ്ദേഹം ചൂണ്ടിക്കാട്ടി. പ്രാഥമിക അന്വേഷണം വേണമെന്ന നിലപാട് സ്വീകരിച്ചിരുന്ന സംസ്ഥാന സർക്കാരിനും സിംഗിൾ ബെഞ്ച് ഉത്തരവിനെതിരെ അപ്പീൽ പോകാമായിരുന്നില്ലേ എന്നും ജസ്റ്റിസ് ബാഗ്ചി ചോദിച്ചു.
ആരോപണവിധേയർക്കെതിരെ നേരിട്ട് എഫ്.ഐ.ആർ ഇടാൻ നിർദ്ദേശിച്ചിട്ടില്ലെന്ന കാരണത്താൽ അവർ ബാധിക്കപ്പെട്ടവരല്ലെന്ന ഡിവിഷൻ ബെഞ്ചിന്റെ യുക്തിയെ കോടതി തള്ളിപ്പറഞ്ഞു. ഇ.ഡി കൈമാറിയ വിവരങ്ങളിൽ ഇവരുടെ പേരുകൾ വ്യക്തമായി പ്രതിപാദിച്ചിരിക്കെ, ഇവർ എങ്ങനെ പരാതിക്കാരല്ലെന്ന് പറയാൻ സാധിക്കുമെന്ന് കോടതി ചോദിച്ചു. “ഞങ്ങൾ അന്വേഷണത്തിന് എതിരല്ല. നിലവിലെ എഫ്.ഐ.ആർ നിലനിൽക്കും, എന്നാൽ അപ്പീൽ കോടതി വിഷയത്തിൽ അന്തിമതീരുമാനം എടുക്കുന്നത് വരെ ഒരുവിധ അന്വേഷണവും ഉണ്ടാകില്ല,” ജസ്റ്റിസ് ബാഗ്ചി വ്യക്തമാക്കി.
ഇ.ഡിയുടെ വാർത്താക്കുറിപ്പ് വന്നതിന് തൊട്ടുപിന്നാലെ, എതിർകക്ഷികളെ ഉൾപ്പെടുത്താതെ എന്തിനാണ് ഇത്ര ധൃതിപിടിച്ച് റിട്ട് ഹർജി ഫയൽ ചെയ്തതെന്ന് ഹൈക്കോടതിയിലെ ഹർജിക്കാരനായ അഡ്വ. കെ.എം. ഷാജഹാന്റെ അഭിഭാഷകനോട് ജസ്റ്റിസ് മോഹന ചോദിച്ചു. ഡിവിഷൻ ബെഞ്ച് വിഷയം പരിഗണിക്കുന്നതിന് മുൻപ് തന്നെ സംസ്ഥാന വിജിലൻസ് തിടുക്കപ്പെട്ട് എഫ്.ഐ.ആർ രജിസ്റ്റർ ചെയ്ത വിവരവും സംസ്ഥാനം കോടതിയെ അറിയിച്ചു.
എന്നാൽ, വിജയ് മദൻലാൽ ചൗധരി കേസിലെ സുപ്രീം കോടതി ഉത്തരവ് പ്രകാരം സിംഗിൾ ബെഞ്ചിന്റെ നിർദ്ദേശം നിയമപരമായി ശരിയാണെന്നും എഫ്.ഐ.ആർ രജിസ്റ്റർ ചെയ്യുന്നതിന് മുൻപ് പ്രതികളുടെ വാദം കേൾക്കേണ്ടതില്ലെന്നുമുള്ള നിലപാടാണ് ഹർജിക്കാരന്റെ അഭിഭാഷകൻ സ്വീകരിച്ചത്. ഇ.ഡിക്ക് വേണ്ടി ഹാജരായ മുതിർന്ന അഭിഭാഷകൻ സോഹെബ് ഹുസൈൻ, എക്സാലോജിക്-സിഎംആർഎൽ കമ്പനികളുടെ ഇടപാടുകളിൽ എസ്.എഫ്.ഐ.ഒ അന്വേഷണം നടക്കുന്നുണ്ടെന്ന് കോടതിയെ അറിയിച്ചു. പ്രഥമദൃഷ്ട്യാ കുറ്റകൃത്യങ്ങൾ കണ്ടെത്തിയതിനാലാണ് പി.എം.എൽ.എ സെക്ഷൻ 66(2) പ്രകാരം സംസ്ഥാനത്തിന് വിവരങ്ങൾ കൈമാറിയതെന്നും, ടി. വീണയും മുൻ മന്ത്രിയായ ഭർത്താവും വിദേശത്തേക്ക് വൻതോതിൽ പണം കടത്തിയെന്നതടക്കമുള്ള വിവരങ്ങൾ അന്വേഷണത്തിൽ പുറത്തുവന്നിട്ടുണ്ടെന്നും അദ്ദേഹം വാദിച്ചു.
നേരത്തെ ഒക്ടോബർ 16-ന് എഫ്.ഐ.ആർ രജിസ്റ്റർ ചെയ്തതിനെത്തുടർന്ന് അറസ്റ്റ് അടക്കമുള്ള നടപടികൾക്ക് സാധ്യതയുണ്ടെന്ന് ചൂണ്ടിക്കാട്ടി സിദ്ധാർത്ഥ് ലൂത്ര കേസ് ചീഫ് ജസ്റ്റിസ് സഞ്ജീവ് ഖന്നയ്ക്ക് മുന്നിൽ അടിയന്തരമായി ലിസ്റ്റ് ചെയ്യാൻ ആവശ്യപ്പെട്ടിരുന്നു. തുടർന്ന് ദസറ അവധിക്ക് ശേഷം ഒക്ടോബർ 26-നോ 27-നോ കേസ് പരിഗണിക്കാമെന്ന് വ്യക്തമാക്കിയെങ്കിലും, ലൂത്രയുടെ ശക്തമായ ആവശ്യത്തെത്തുടർന്ന് അവധിക്കാല പ്രത്യേക ബെഞ്ചിന് വിടുകയായിരുന്നു. “ഇപ്പോൾ എഫ്.ഐ.ആർ രജിസ്റ്റർ ചെയ്തിരിക്കുകയാണ്. അദ്ദേഹത്തിന് നിയമപരിരക്ഷ ലഭിക്കണം, അതാണ് ആശങ്ക. അല്ലെങ്കിൽ 82 വയസ്സുള്ള ഒരു വ്യക്തി കസ്റ്റഡിയിലാകും,” എന്നായിരുന്നു അന്ന് ലൂത്ര ഉയർത്തിയ വാദം. സഹപ്രതികളായ ടി. വീണ, പി.എ. മുഹമ്മദ് റിയാസ് എന്നിവർക്ക് വേണ്ടി മുതിർന്ന അഭിഭാഷകൻ എൻ. ഹരിഹരനും വാദമുഖങ്ങൾ നിരത്തി.
കേസിന്റെ നാൾവഴി:
അഡ്വ. കെ.എം. ഷാജഹാൻ നൽകിയ റിട്ട് ഹർജിയിലാണ് അഴിമതി നിരോധന നിയമപ്രകാരം എഫ്.ഐ.ആർ രജിസ്റ്റർ ചെയ്യാൻ ഹൈക്കോടതി സിംഗിൾ ബെഞ്ച് വിജിലൻസിന് നിർദ്ദേശം നൽകിയത്. ഇ.ഡി സെക്ഷൻ 66(2) പ്രകാരം വിവരം കൈമാറിയാൽ പ്രാഥമിക അന്വേഷണം ആവശ്യമില്ലെന്നായിരുന്നു സിംഗിൾ ബെഞ്ച് നിരീക്ഷണം. ഇതിനെതിരെ ഒക്ടോബർ 15-ന് പിണറായിയും കുടുംബവും നൽകിയ അപ്പീൽ ഡിവിഷൻ ബെഞ്ച് തള്ളുകയായിരുന്നു.
2017 മുതൽ 2020 വരെയുള്ള കാലയളവിൽ യാതൊരു സേവനവും നൽകാതെ സിഎംആർഎൽ കമ്പനി വീണയുടെ എക്സാലോജിക് സൊല്യൂഷൻസിന് പ്രതിമാസം തുകകൾ കൈമാറിയെന്നതാണ് കേസ്. ആഗസ്റ്റ് 19-ന് കേസിൽ കോടിക്കണക്കിന് രൂപയുടെ ഹവാല ഇടപാടുകൾ നടന്നിട്ടുണ്ടെന്ന് വ്യക്തമാക്കി ഇ.ഡി വാർത്താക്കുറിപ്പ് ഇറക്കിയിരുന്നു.
തുടർന്ന് സെപ്റ്റംബർ 7-ന് പിണറായി വിജയൻ, വീണ, റിയാസ് എന്നിവർക്കെതിരെ കേസെടുക്കാൻ ഇ.ഡി സംസ്ഥാന പോലീസ് മേധാവിക്ക് കത്തുനൽകി. എന്നാൽ സംഭവം ക്രൈംബ്രാഞ്ചിന് വിടാനും പ്രത്യേക അന്വേഷണ സംഘം പ്രാഥമിക അന്വേഷണം നടത്താനുമായിരുന്നു ആഭ്യന്തര വകുപ്പ് ഉത്തരവിട്ടത്. ഇതിനിടയിലാണ് സിംഗിൾ ബെഞ്ച് നേരിട്ട് എഫ്.ഐ.ആർ ഇടാൻ നിർദ്ദേശിച്ചതും അത് സുപ്രീം കോടതി വരെയുള്ള നിയമപോരാട്ടത്തിലേക്ക് വഴിമാറിയതും.
by Midhun HP News | Oct 21, 2026 | Latest News, കേരളം
കണ്ണൂർ: അറിവിന്റെ ലോകത്തേക്ക് ഹരിശ്രീ കുറിച്ച് കുരുന്നുകൾ ചുവടുവെച്ചു. വിജയദശമി നാളിൽ വിദ്യാരംഭ ചടങ്ങുകൾക്കായി കണ്ണൂർ ജില്ലയിലെ പ്രധാന ക്ഷേത്രങ്ങളിലും സാംസ്കാരിക കേന്ദ്രങ്ങളിലും അതിരാവിലെ മുതൽ വലിയ തിരക്കാണ് അനുഭവപ്പെട്ടത്. വടക്കേ മലബാറിലെ പ്രധാന സരസ്വതീ സങ്കേതമായ പള്ളിക്കുന്ന് മൂകാംബിക ക്ഷേത്രത്തിൽ പുലർച്ചെ മുതൽ തന്നെ നൂറുകണക്കിന് കുട്ടികളെയാണ് രക്ഷിതാക്കൾ എഴുത്തിനിരുത്താനായി എത്തിച്ചത്.
പള്ളിക്കുന്ന് മൂകാംബിക ക്ഷേത്രത്തിൽ കാട്ടുമാടം ഇളയടത്ത് ഈശാനൻ നമ്പൂതിരി, മനങ്ങാട്ട് ഇല്ലത്ത് ശങ്കരനാരായണ പ്രസാദ്, ചാലക്കുന്ന് ശങ്കരൻ നമ്പൂതിരി, മംഗലം ഉണ്ണികൃഷ്ണൻ നമ്പൂതിരി, കൊടുവള്ളി ഉണ്ണികൃഷ്ണൻ നമ്പൂതിരി തുടങ്ങിയ പ്രമുഖ ആചാര്യന്മാർ കുരുന്നുകൾക്ക് അറിവിന്റെ ആദ്യക്ഷരം പകർന്നുനൽകി. സ്വർണ്ണമോതിരം കൊണ്ട് നാവിലും തുടർന്ന് നെല്ലിലും അരിയിലും ‘ഹരിശ്രീ ഗണപതയേ നമഃ’ എന്ന് കുരുന്നുകളെക്കൊണ്ട് എഴുതിച്ചതോടെ അവർ അറിവിന്റെ പുത്തൻ ലോകത്തേക്ക് പ്രവേശിച്ചു.
പള്ളിക്കുന്നിന് പുറമെ ജില്ലയിലെ പ്രശസ്തമായ മറ്റ് ക്ഷേത്രങ്ങളിലും വിപുലമായ വിദ്യാരംഭ ചടങ്ങുകൾ നടന്നു. ചെറുകുന്ന് അന്നപൂർണേശ്വരി ക്ഷേത്രം, മുഴക്കുന്ന് മൃദംഗശൈലേശ്വരി ക്ഷേത്രം, ഇരിക്കൂർ മാമാനിക്കുന്നു ദേവീക്ഷേത്രം, വളപട്ടണം കളരിവാതുക്കൽ ക്ഷേത്രം തുടങ്ങിയ പുണ്യകേന്ദ്രങ്ങളിലെല്ലാം അതിരാവിലെ തന്നെ രക്ഷിതാക്കൾ കുട്ടികളുമായി എത്തിച്ചേർന്നിരുന്നു.വിജയദശമി നാളിലെ പ്രത്യേക പൂജകൾക്ക് ശേഷം രാവിലെ ഗ്രന്ഥമെടുപ്പ് ചടങ്ങും നടന്നു. ക്ഷേത്രങ്ങൾക്ക് പുറമെ ജില്ലയിലെ പ്രമുഖ വായനശാലകളിലും സാംസ്കാരിക സ്ഥാപനങ്ങളിലും എഴുത്തിനിരുത്ത് ചടങ്ങുകൾ ഭക്തിസാന്ദ്രമായ അന്തരീക്ഷത്തിൽ സംഘടിപ്പിച്ചു.
Recent Comments