by Midhun HP News | Oct 28, 2026 | Latest News, കേരളം
കൊച്ചി: നെടുമ്പാശേരി മിനി കൂപ്പര്‍ അപകടത്തില്‍ പ്രതികളായ സുഹൈല്‍ സജീവിന്റെയും കൂട്ടുപ്രതികളുടേയും ജാമ്യാപേക്ഷയില്‍ കോടതി ഇന്ന് വിധി പറയും. എറണാകുളം ജില്ലാ സെഷൻസ് കോടതിയാണ് വിധി പ്രസ്താവിക്കുക. പ്രതികളുടെ റിമാന്‍ഡ് കാലാവധി 14 ദിവസം പിന്നിട്ട സാഹചര്യത്തിലാണ് ജാമ്യാപേക്ഷ നല്‍കിയിരിക്കുന്നത്. സാക്ഷി മൊഴി ഇനിയും രേഖപ്പെടുത്താനുള്ളതിനാല്‍ പ്രതികള്‍ക്ക് ജാമ്യം നല്‍കരുതെന്നാണ് പ്രോസിക്യൂഷന്‍ ആവശ്യപ്പെട്ടിട്ടുള്ളത്.
കഴിഞ്ഞ തിങ്കളാഴ്ച ജാമ്യാപേക്ഷയിൽ വാദം പൂർത്തിയായിരുന്നു. അന്വേഷണം പൂർത്തിയായ സാഹചര്യത്തിൽ ജാമ്യം അനുവദിക്കണമെന്നാണ് പ്രതിഭാഗം ആവശ്യപ്പെട്ടത്. എന്നാൽ പുതിയ സിസിടിവി ദൃശ്യങ്ങളും പുതിയ തെളിവുകളും ലഭ്യമായ സാഹചര്യത്തിൽ പ്രതികളെ വീണ്ടും കസ്റ്റഡിയിൽ വേണമെന്ന് പൊലീസ് ആവശ്യപ്പെട്ടേക്കും. പ്രതികൾ സാമ്പത്തികശേഷി ഉള്ളവരായതിനാൽ സാക്ഷികളെ സ്വാധീനിക്കാൻ സാധ്യതയുണ്ടെന്നും പ്രോസിക്യൂഷൻ ഉന്നയിച്ചേക്കും.
മുഖ്യപ്രതിയായ 19 കാരന്‍ സുഹൈല്‍ സജീവിനെ വെട്ടിലാക്കി, കേസിലെ മൂന്നാം പ്രതി ജോയലിന്റെ ശബ്ദ സന്ദേശം ലഭിച്ചതും പൊലീസ് കോടതിയില്‍ സമര്‍പ്പിച്ചിട്ടുണ്ട്. അപകടം നടന്നശേഷം രാവിലെ 9.25 ന് ജോയല്‍ സുഹൃത്തിന് അയച്ച ശബ്ദസന്ദേശമാണ് പുറത്തു വന്നത്. മദ്യപിച്ച് വാഹനം ഓടിച്ചത് വ്യക്തമാക്കുന്നതാണ് ശബ്ദസന്ദേശത്തിലെ ഉള്ളടക്കം
‘ബാറില്‍ പോയി മദ്യപിച്ചു. നേരത്തെ മദ്യപിച്ചതിന് പുറത്താണ് കഴിച്ചത്. ഞാനും അടിച്ചു ഒരു ബിയര്‍. തിരിച്ചുവരുന്ന വഴി ഭയങ്കര സ്പീഡിനാണ് വണ്ടി ഓടിച്ചത്. സ്‌കൂട്ടറില്‍ ഇടിച്ചു, മൂന്നുപേരും തെറിച്ചുവീണു. നിനവ് ആണ് എന്നോടും അമീനോടും വിട്ടോളാന്‍ പറഞ്ഞത്. മൂന്നുപേരും സ്പോട്ടില്‍ തീര്‍ന്നു. ഓ.. ആ വിറയല്‍ മാറിയിട്ടില്ല. ആ സുഹൈല്‍ പറയുകയാണ് ബാപ്പ നോക്കിക്കോളുമെന്ന്. നാട്ടുകാര്‍ അതു കേട്ടിട്ട് ഇടി കൊടുത്തു. നിനവിനും കിട്ടി ഇടി’ എന്നാണ് ജോയല്‍ ശബ്ദസന്ദേശത്തില്‍ പറയുന്നത്.
കേസില്‍ സുഹൈല്‍ സജീവ്, നിനവ്, അമീന്‍ എന്നിവരാണ് പ്രതികളായിട്ടുള്ളത്. ഒക്ടോബര്‍ 11 ന് പുലര്‍ച്ചെയാണ് നെടുമ്പാശേരി അത്താണി സിഗ്‌നലിനു സമീപം അപകടമുണ്ടായത്. കാറും ബൈക്കും കൂട്ടിയിടിച്ച് സ്‌കൂട്ടര്‍ യാത്രക്കാരായ രണ്ട് യുവതികളും യുവാവുമാണ് മരിച്ചത്. വയനാട് മടക്കിമല സന്തോഷ് ഭവനില്‍ ദേവിക (21), മംഗലാപുരം സുള്ള്യ കനകമഞ്ചല്‍ ഇബ്രാഹിമിന്റെ മകന്‍ ഇയാസ് (21), പാലക്കാട് കരിമ്പ ഇടക്കുറിശ്ശി മുള്ളന്‍കുഴി പ്രദീപ് കുമാറിന്റെ മകള്‍ ഗോപിക (21) എന്നിവരാണ് മരിച്ചത്.
by Midhun HP News | Oct 27, 2026 | Latest News, കേരളം
കൊച്ചി: ചേരാനെല്ലൂരില്‍ പതിനേഴുകാരന്‍ ഓടിച്ച കാര്‍ ഇടിച്ച് സ്‌കൂട്ടര്‍ യാത്രക്കാരന്‍ മരിച്ച സംഭവത്തില്‍ വീഴ്ച വരുത്തിയ പൊലീസുകാര്‍ക്കെതിരെ നടപടി. എസ്എച്ച്ഒ ഉള്‍പ്പെടെ നാല് പൊലീസുകാരെ സസ്‌പെന്‍ഡ് ചെയ്തു. സിഐ ശ്യാംകുമാര്‍, എസ്എച്ച്ഒ വിശ്വജിത്ത്, സിപിഒ അരുണ്‍, എഎസ്‌ഐ മനോജ് എന്നിവര്‍ക്കെതിരെയാണ് നടപടി സ്വീകരിച്ചത്.
അപകടം നടന്ന അന്ന് കാര്‍ ഓടിച്ച ജഡ്ജിയുടെ മകനെ സ്‌റ്റേഷന്‍ ജാമ്യത്തില്‍ വിട്ടത് വലിയ പ്രതിഷേധത്തിന് ഇടയാക്കിയിരുന്നു. മാഞ്ഞാലി സ്വദേശി ജയബാലകൃഷ്ണന്‍ ആണ് അപകടത്തില്‍ മരിച്ചത്. ജയബാലകൃഷ്ണന്റെ കുടുംബത്തിന്റെ പ്രതിഷേധത്തെ തുടര്‍ന്നാണ് പതിനേഴുകാരനെതിരെ കൂടുതല്‍ വകുപ്പുകള്‍ ചുമത്താൻ പൊലീസ് തീരുമാനിച്ചത്.
നേരത്തെ എഡിജിപി പി വിജയന്‍ സംഭവസ്ഥലം സന്ദര്‍ശിച്ചിരുന്നു. ചേരാനെല്ലൂര്‍ സ്റ്റേഷനിലെത്തി അന്വേഷണ പുരോഗതി വിലയിരുത്തിയശേഷമാണ് എഡിജിപി പി വിജയന്‍ അപകടം നടന്ന സ്ഥലം സന്ദര്‍ശിച്ചത്. കൊച്ചി സിറ്റി പൊലീസ് കമ്മീഷണര്‍ കാളിരാജ് മഹേഷ് കുമാര്‍, ജില്ലയിലെ ഉയര്‍ന്ന പൊലീസ് ഉദ്യോഗസ്ഥര്‍ തുടങ്ങിയവര്‍ എഡിജിപിക്കൊപ്പമുണ്ടായിരുന്നു.
അപകടത്തില്‍ മരിച്ച സ്‌കൂട്ടര്‍ യാത്രക്കാരന്‍ തട്ടുകടക്കാരനായ ജയബാലകൃഷ്ണന്റെ വീടും എഡിജിപി പി വിജയന്‍ സന്ദര്‍ശിച്ചു. സംഭവത്തില്‍ പൊലീസിന് വീഴ്ചയുണ്ടായിട്ടുണ്ടോയെന്ന് പരിശോധിക്കുമെന്നായിരുന്നു എഡിജിപിയുടെ പ്രതികരണം. ‘ബഹുമാനപ്പെട്ട ആഭ്യന്തരമന്ത്രി പറഞ്ഞത് കേട്ടിരിക്കുമല്ലോ. ഇതില്‍ എന്ത് വീഴ്ചയാണ് സംഭവിച്ചത്, ആരൊക്കെയാണ് കാരണക്കാര്‍, എന്നിവയെല്ലാം പരിശോധിക്കാനാണ് താന്‍ ഇവിടെ വന്നിരിക്കുന്നത്. ഇതുമായി ബന്ധപ്പെട്ട എല്ലാവരെയും കണ്ടിട്ടേ പോകൂ’വെന്നും എഡിജിപി പി വിജയന്‍ പറഞ്ഞു.
‘ജഡ്ജി എന്നോ പൊലീസ് എന്നോ വ്യത്യാസം ഇതിനകത്തില്ല. തെറ്റ് ചെയ്തിട്ടുണ്ടെങ്കില്‍ നിയമപരമായ നടപടികള്‍ എല്ലാവര്‍ക്കും ഉണ്ടായിരിക്കും. കുടുംബം ഉന്നയിച്ച ആവശ്യങ്ങള്‍ ന്യായമാണ്. കുടുംബത്തിന് നീതി ഉറപ്പാക്കും. കുടുംബം ഉന്നയിച്ച ആരോപണങ്ങള്‍ പരിശോധിക്കും. സ്റ്റേഷനിലെ അടക്കം സിസിടിവി ദൃശ്യങ്ങള്‍ പരിശോധിക്കും. കുടുംബം പറഞ്ഞിട്ടുള്ള കാര്യങ്ങളിലാണ് പരിഗണനയില്‍ ആദ്യത്തേതായുള്ളത്. അതുമായി ബന്ധപ്പെട്ട് റെക്കോര്‍ഡുകളും മറ്റും പരിശോധിച്ചശേഷമാകും അനന്തര നടപടികള്‍ കൈക്കൊള്ളുക.’
എഐജി അനുജ് പലിവാള്‍ അടക്കം പ്രത്യേക സംഘവുമായിട്ടാണ് എഡിജിപി ചേരാനെല്ലൂരിലെത്തിയത്. പൊലീസ് സ്റ്റേഷനില്‍ നടന്ന കാര്യങ്ങളും സിസിടിവി ദൃശ്യങ്ങളും അടക്കം പരിശോധിക്കും. സംഭവസ്ഥലത്ത് പോയി അപകടവുമായി ബന്ധപ്പെട്ട വിവരങ്ങളും ശേഖരിച്ചിട്ടുണ്ട്. കണ്ടെത്തലിന്റെ അടിസ്ഥാനത്തില്‍ ഒരുപാട് താമസിക്കാതെ നടപടിയുണ്ടാകും. ജഡ്ജിയെ അറസ്റ്റ് ചെയ്യുന്നത് തന്റെ മാത്രം കയ്യിലുള്ള കാര്യമല്ല. കോടതിയുടെ അനുമതി അടക്കം വേണം. അതിനായി പൊലീസ് ഫാസ്റ്റായി മൂവ് ചെയ്തിട്ടുണ്ടെന്നും എഡിജിപി പി വിജയന്‍ വ്യക്തമാക്കി.
ആഭ്യന്തര വകുപ്പ് മന്ത്രി രമേശ് ചെന്നിത്തലയുടെ നിര്‍ദേശപ്രകാരമാണ് എഡിജിപി നേരിട്ട് ചേരാനെല്ലൂരിലെത്തി സ്ഥിതിഗതികള്‍ വിലയിരുത്തിയത്. നിലവില്‍ അന്വേഷണം ജില്ലാ ക്രൈംബ്രാഞ്ചിന് കൈമാറിയിരിക്കുകയാണ്. ചേരാനല്ലൂര്‍ അപകടം കൈകാര്യം ചെയ്തതില്‍ പൊലീസിന് വീഴ്ച സംഭവിച്ചെന്ന് ആഭ്യന്തരമന്ത്രി രമേശ് ചെന്നിത്തല നിയമസഭയില്‍ പറഞ്ഞിരുന്നു. പൊലീസ് തെറ്റ് ചെയ്തിട്ടുണ്ടെങ്കില്‍ അതിനെ കണ്ണടച്ച് ന്യായീകരിക്കേണ്ട ഒരു ബാധ്യതയും സര്‍ക്കാറിനില്ല. ജഡ്ജിയുടെ മകനല്ല, ആരുടെ മകനായാലും നിയമം എല്ലാവര്‍ക്കും ഒരുപോലെയാണ്. പൊലീസ് ഉദ്യോഗസ്ഥര്‍ കാണിച്ചത് തെറ്റാണെന്നും രമേശ് ചെന്നിത്തല പറഞ്ഞു.
by Midhun HP News | Oct 27, 2026 | Latest News, മരണം
ആറ്റിങ്ങൽ: വാളക്കാട് തേരി മുക്കിന് സമീപം സ്നേഹതീരം റസിഡൻസിയിൽ ആദവിൽ ആൻ്റണി ലാസർ (75) (റിട്ടയേർഡ് ജീവനക്കാരൻ,ഗവ: ഹൈസ്കൂൾ അവനവഞ്ചേരി)അന്തരിച്ചു. ഭാര്യ കുഞ്ഞുമോൾ ആന്റണി.
മക്കൾ: അനു കെ ആൻ്റണി (ന്യുസിലാൻഡ്), ആനി കെ ആൻ്റണി. മരുമക്കൾ: സുമിത്ത്(ന്യൂസിലൻഡ്), വിൽസൺ. മരണാനന്തര ചടങ്ങുകൾ വെള്ളിയാഴ്ച രാവിലെ 11 മണിക്ക്.
by Midhun HP News | Oct 27, 2026 | Latest News, കായികം
വെല്ലിംഗ്ടണ്‍: ന്യൂസിലന്‍ഡിനെതിരായ ടി20 പരമ്പരയിലെ മൂന്നാം മത്സരത്തിൽ 8 വിക്കറ്റിന്‍റെ ആധികാരിക ജയവുമായി ടി20 പരമ്പര സ്വന്തമാക്കി ഇന്ത്യ. ആദ്യം ബാറ്റ് ചെയ്ത് ന്യൂസിലന്‍ഡ് ഉയര്‍ത്തിയ 199 റണ്‍സിന്‍റെ വിജയലക്ഷ്യം അഭിഷേക് ശര്‍മയുടെ റെക്കോര്‍ഡ് സെഞ്ചുറിയുടെ(38 പന്തില്‍ 113) യും വൈഭസ് സൂര്യവംശിയുടെ വെടിക്കെട്ട് ബാറ്റിംഗിന്‍റെയും(19 പന്തില്‍ 45) കരുത്തില്‍ 6.4 ഓവര്‍ ബാക്കിനിര്‍ത്തി നാല് വിക്കറ്റ് നഷ്ടത്തില്‍ ഇന്ത്യ മറികടന്നു. 15 പന്തില്‍ അര്‍ധസെഞ്ചുറി തികച്ച അഭിഷേക് 35 പന്തില്‍ സെഞ്ചുറിയിലെത്തി. 11 സിക്സും 9 ഫോറും അടങ്ങുന്നതാണ് അഭിഷേകിന്‍റെ വെടിക്കെട്ട് സെഞ്ചുറി.
അഭിഷേകിനൊപ്പം പവര്‍ പ്ലേയില്‍ തകര്‍ത്തടിച്ച വൈഭവ് 19 പന്തില്‍ നാല് സിക്സും നാല് ഫോറും അടക്കമാണ് 45 റണ്‍സെടുത്തത്. മലയാളി താരം സഞ്ജു സാംസണും(13 പന്തില്‍ 18) ക്യാപ്റ്റൻ ശ്രേയസ് അയ്യരും(10 പന്തില്‍ 5) വിജയത്തിനരികെ വീണെങ്കിലും നമൻ ധിറും(4*) തിലക് വര്‍മയും(1*) ചേര്‍ന്ന് ഇന്ത്യയെ വിജയവര കടത്തി. ജയത്തോടെ അഞ്ച് മത്സര ടി20 പരമ്പര ഇന്ത്യ 3-0ന് സ്വന്തമാക്കി. പരമ്പരയിലെ നാലാം മത്സരം വെള്ളിയാഴ്ച ഓക്‌ലന്‍ഡില്‍ നടക്കും. സ്കോര്‍ ന്യൂസിലന്‍ഡ് 20 ഓവറില്‍ 198-3, ഇന്ത്യ 13.2 ഓവറില്‍ 199-4.
അഭിഷേക് ആറാട്ട്-വൈഭവ് വെടിക്കെട്ട്
199 റണ്‍സ് വിജയലക്ഷ്യത്തിലേക്ക് ബാറ്റ് വീശിയ ഇന്ത്യക്കായി അഭിഷേക് ശര്‍മക്കൊപ്പം വൈഭവ് സൂര്യവംശിയാണ് ഇന്നിംഗ്സ് ഓപ്പണ്‍ ചെയ്തത്. ജേക്കബ് ഡഫിയെറിഞ്ഞ ആദ്യ പന്ത് തന്നെ ബൗണ്ടറി കടത്തിയാണ് വൈഭവ് തുടങ്ങിയത്. നേരിട്ട ആദ്യ പന്ത് സിക്സിന് തൂക്കിയ അഭിഷേകും വൈഭവും ചേര്‍ന്ന് ആദ്യ ഓവറില്‍ തന്നെ 26 റണ്‍സടിച്ചു.ആദ്യം മില്‍നെ എറിഞ്ഞ രണ്ടാം ഓവറിലും അടിതുടര്‍ന്ന ഇരുവരും ചേര്‍ന്ന് 17 റണ്‍സ് കൂടി അടിച്ചെടുത്തു. അഭിഷേകിനെ വീഴ്ത്താന്‍ മൂന്നാം ഓവറില്‍ മൈക്കല്‍ ബ്രേസ്‌വെല്ലിനെ കൊണ്ടുവെന്നെങ്കിലും രണ്ട് സിക്സും രണ്ട് ഫോറും പറത്തിയ അഭിഷേകും വൈഭവും ചേര്‍ന്ന് ഇന്ത്യയെ 50 കടത്തി.നാലാം ഓവറില്‍ പന്തെറിയാനെത്തിയ കെയ്ല്‍ ജൈമിസണെതിരെ 20 റണ്‍സും അഞ്ചാം ഓവറില്‍ ആദം മില്‍നെക്കെതിരെ 16 റണ്‍സും അടിച്ച് അഭിഷേക്-വൈഭവ് സഖ്യം ഇന്ത്യയെ 100 കടത്തി.
15 പന്തില്‍ അഭിഷേക് അര്‍ധസെഞ്ചുറി തികച്ചു. പവര്‍ പ്ലേയിലെ അവസാന ഓവറില്‍ ജേക്കബ് ഡഫിക്കെതിരെ 18 റണ്‍സ് കൂടി നേടി ഇന്ത്യയെ 118 റണ്‍സിലെത്തിച്ചതോടെ ടി20 ചരിത്രത്തിലെ ഏറ്റവും ഉയര്‍ന്ന പവര്‍ പ്ലേ സ്കോറെന്ന റെക്കോര്‍ഡും സ്വന്തമാക്കി. പവര്‍പ്ലേക്ക് ശേഷവും അഭിഷേക് അടി തുടര്‍ന്നു. എട്ടാം ഓവറിലെ ആദ്യ പന്തില്‍ വൈഭവിനെ പുറത്താക്കി ഫിഷര്‍ കിവീസിന് നേരിയ ആശ്വാസം നല്‍കി. 29 പന്തില്‍ 95 റണ്‍സിലെത്തിയ അഭിഷേക് ജൈമിസണെ ബൗണ്ടറി കടത്തി 35 പന്തില്‍ സെഞ്ചുറി തികച്ചു. പിന്നാലെ വീണ്ടും സിക്സും ഫോറും പറത്തിയ അഭിഷേക് പത്താം ഓവറിലെ അവസാന പന്തില്‍ വീണു. വിജയത്തിനരികെ ശ്രേയസ് അയ്യര്‍(10 പന്തില്‍ 5), സഞ്ജു സാംസണും(13 പന്തില്‍ 18) നിരാശപ്പെടുത്തി മടങ്ങിയെങ്കിലും നമൻ ധിറും തിലക് വര്‍മയും ചേര്‍ന്ന് ഇന്ത്യയെ അനായാസം വിജയവര കടത്തി. കിവീസിനായി കെയ്ൽ ജൈമിസണ്‍ രണ്ട് വിക്കറ്റെടുത്തു.
നേരത്തെ ടോസ് നഷ്ടമായി ആദ്യം ബാറ്റ് ചെയ്ത ന്യൂസിലന്‍ഡ് ഡാരില്‍ മിച്ചലിന്‍റെ വെടിക്കെട്ട് അര്‍ധസെഞ്ചുറി മികവില്‍ 20 ഓവറില്‍ 200 റണ്‍സടിച്ചു. 52 പന്തില്‍ 89 റണ്‍സെടുത്ത് ടോപ് സ്കോററായ മിച്ചലിന് പുറമെ ഫിന്‍ അലന്‍(25 പന്തില്‍ 40), ബെവോൺ ജേക്കബ്സ്(23 പന്തില്‍ 39 എന്നിവരും കിവീസിനായി തിളങ്ങി. ഇന്ത്യക്കായി അര്‍ഷ്ദീപ് സിംഗ് 33 റണ്‍സിന് ഒരു വിക്കറ്റെടുത്തപ്പോള്‍ നിതീഷ് കുമാര്‍ റെഡ്ഡി 23 റണ്‍സിന് ഒരു വിക്കറ്റെടുത്തു.
by Midhun HP News | Oct 27, 2026 | Latest News, കേരളം
ഇരിട്ടി: കേരളത്തെയും കർണാടകയിലെ കുടകിനെയും ബന്ധിപ്പിക്കുന്ന പ്രധാന അന്തർസംസ്ഥാന പാതയായ മാക്കൂട്ടം–പെരുമ്പാടി ചുരം റോഡിൽ യാത്രാദുരിതം രൂക്ഷമാകുന്നു. റോഡിലെ കൂറ്റൻ കുഴികളിൽപ്പെട്ട് വലിയ ചരക്കുവാഹനങ്ങൾ കേടായി വഴിയിൽ കുടുങ്ങുന്നതും മണിക്കൂറുകളോളം ഗതാഗതം സ്തംഭിക്കുന്നതും പതിവാകുന്നു. കഴിഞ്ഞദിവസം രാത്രി 11 മണിക്ക് ആരംഭിച്ച രൂക്ഷമായ ഗതാഗതക്കുരുക്ക് പുലർച്ചെ നാലോടെയാണ് ഭാഗികമായെങ്കിലും നീങ്ങിയത്. ചരക്കുലോറികളും ദീർഘദൂര ബസുകളും ഉൾപ്പെടെ നൂറുകണക്കിന് വാഹനങ്ങളാണ് മലനിരകളിൽ മണിക്കൂറുകളോളം കുടുങ്ങിക്കിടന്നത്.
മഴ കനത്തതോടെ റോഡിലെ വൻ കുഴികളിൽ വെള്ളം നിറഞ്ഞുനിൽക്കുകയാണ്. രാത്രികാലങ്ങളിൽ ഡ്രൈവർമാർക്ക് ഈ കുഴികൾ തിരിച്ചറിയാൻ കഴിയാത്തത് വലിയ അപകടങ്ങൾക്കാണ് വഴിവെക്കുന്നത്. കുഴിയിൽപ്പെട്ട് വാഹനങ്ങൾ തകരാറിലാകുന്നതോടെ, കൊടുംവളവുകളുള്ള ചുരത്തിൽ പിന്നാലെ വരുന്ന വാഹനങ്ങൾക്കും മുന്നോട്ടുപോകാനാകാത്ത സാഹചര്യമാണുള്ളത്. ഇത് സാധാരണ യാത്രക്കാരെയും അന്തർസംസ്ഥാന ചരക്കുനീക്കത്തെയും ഒരുപോലെ ബാധിക്കുന്നു.
പെരുമ്പാടിയിൽനിന്ന് കേരള അതിർത്തി വരെയുള്ള 5.9 കിലോമീറ്റർ റോഡ് 11.75 കോടി രൂപ ചെലവഴിച്ച് മൂന്ന് റീച്ചുകളായി അടുത്തിടെയാണ് നവീകരിച്ചത്. എന്നാൽ മഴ പെയ്തതോടെ ഇതിൽ ഏകദേശം 1.1 കിലോമീറ്റർ ഭാഗത്തെ ടാറിങ് പൂർണ്ണമായും ഒലിച്ചുപോയി തകർന്നു. മെതിയടിപ്പാറ ഹനുമാൻ ക്ഷേത്രത്തിന് സമീപമാണ് റോഡ് ഏറ്റവും അപകടകരമായ നിലയിലുള്ളത്.
നവീകരണം കഴിഞ്ഞ് മാസങ്ങൾക്കകം റോഡ് തകർന്നടിഞ്ഞത് നിർമ്മാണത്തിന്റെ ഗുണനിലവാരത്തെയും മേൽനോട്ടത്തെയും കുറിച്ച് വ്യാപക പരാതികൾക്ക് ഇടയാക്കിയിട്ടുണ്ട്. റോഡരികുകൾ കോൺക്രീറ്റ് ചെയ്യാത്തതിനാൽ ടാറിങ്ങിൽനിന്ന് പുറത്തേക്ക് മാറുന്ന വാഹനങ്ങളുടെ ചക്രങ്ങൾ ചെളിയിലേക്ക് താഴുന്നതും അപകടസാധ്യത വർദ്ധിപ്പിക്കുന്നു.
നേരത്തെ നവീകരിക്കാതെ മാറ്റിവെച്ച 5.8 കിലോമീറ്റർ ഭാഗത്തും വലിയ കുഴികൾ രൂപപ്പെട്ട് റോഡ് ശോചനീയാവസ്ഥയിലാണ്. പെരുമ്പാടി–ബിട്ടംകാല റൂട്ടിലെ 14 കിലോമീറ്റർ പാത 40 കോടി രൂപ ചെലവിൽ നവീകരിക്കാനുള്ള ശുപാർശ കർണാടക സർക്കാരിന്റെ പരിഗണനയിലാണെങ്കിലും തുടർനടപടികൾ വൈകുകയാണ്. തകർന്ന ഭാഗങ്ങളിൽ അടിയന്തരമായി അറ്റകുറ്റപ്പണി നടത്തി പാത പൂർണ്ണമായും ഗതാഗതയോഗ്യമാക്കണമെന്നും, സമഗ്ര പുനർനിർമ്മാണം വേഗത്തിലാക്കണമെന്നുമാണ് പ്രദേശവാസികളുടെയും നിത്യയാത്രക്കാരുടെയും ആവശ്യം.
by Midhun HP News | Oct 27, 2026 | Latest News, കേരളം
കൊച്ചി: ആലുവ മാര്‍ത്താണ്ഡവര്‍മ പഴയ പാലം അറ്റകുറ്റപ്പണിക്കായി ബുധനാഴ്ച അടയ്ക്കും. നവംബര്‍ ആറു വരെ അറ്റകുറ്റപ്പണികള്‍ നടക്കുന്നതിനാല്‍ ആലുവയില്‍ പൊലീസ് ഗതാഗത നിയന്ത്രണം ഏര്‍പ്പെടുത്തി. കൊച്ചി വിമാനത്താവളത്തിലേക്കു പോകുന്ന യാത്രക്കാര്‍ ഗതാഗത നിയന്ത്രണം മനസ്സിലാക്കി യാത്ര നേരത്തേ തുടങ്ങണമെന്ന് അധികൃതര്‍ അറിയിച്ചു. സിയാലും ഇതു സംബന്ധിച്ചു നിര്‍ദേശം നല്‍കിയിട്ടുണ്ട്. ആവശ്യമെങ്കില്‍ ആലുവ നഗരത്തിലും ഗതാഗത നിയന്ത്രണമുണ്ടാകും.
എറണാകുളം, വൈറ്റില ഭാഗങ്ങളില്‍ നിന്നു വരുന്ന ഭാരവാഹനങ്ങള്‍ ഇടപ്പള്ളിയില്‍ നിന്നു തിരിഞ്ഞു ചേരാനല്ലൂര്‍ സിഗ്‌നല്‍, പറവൂര്‍, കൊടുങ്ങല്ലൂര്‍ റോഡ് വഴി പോകണം. കാക്കനാട് ഭാഗത്തു നിന്നു വരുന്ന ഭാരവാഹനങ്ങള്‍ കളമശേരി കണ്ടെയ്‌നര്‍ റോഡ് വഴി പറവൂര്‍, കൊടുങ്ങല്ലൂര്‍ റൂട്ട് വഴി പോകണം.
തൃശൂര്‍ ഭാഗത്തു നിന്ന് എറണാകുളം ഭാഗത്തേക്കു വരുന്ന ഭാരവാഹനങ്ങള്‍ ഇരിങ്ങാലക്കുടയില്‍ നിന്നു തിരിഞ്ഞു കൊടുങ്ങല്ലൂര്‍, പറവൂര്‍, ചേരാനല്ലൂര്‍ സിഗ്‌നല്‍ റോഡ് വഴി പോകണം. ടിപ്പര്‍, കണ്ടെയ്‌നര്‍ ലോറികള്‍ മുതല്‍ ഗ്യാസ് പെട്രോളിയം ടാങ്കര്‍ വരെ ഉള്ളവയ്ക്ക് ഇതു ബാധകമാണ്.
തൃശൂര്‍ ഭാഗത്തു നിന്ന് ആലുവയിലേക്കു വരുന്ന ഭാരവാഹനങ്ങള്‍ അങ്കമാലിയില്‍ നിന്നു തിരിഞ്ഞു കാലടി, പെരുമ്പാവൂര്‍ റോഡ് വഴി പോകണം.കളമശേരി, അങ്കമാലി ഭാഗങ്ങളില്‍ നിന്ന് ഭാരവാഹനങ്ങള്‍ ആലുവ ഭാഗത്തേക്കു കടത്തിവിടില്ല. വരാപ്പുഴ, കടുങ്ങല്ലൂര്‍ ഭാഗങ്ങളില്‍ നിന്ന് ആലുവ ഭാഗത്തേക്കു വരുന്ന എല്ലാ വാഹനങ്ങളും കടുങ്ങല്ലൂര്‍ ജങ്ഷനില്‍ നിന്നു തിരിഞ്ഞു യുസി കോളജ് റോഡ് വഴി പറവൂര്‍ കവല സിഗ്‌നലില്‍ എത്തി വലത്തേക്കു പോകണം. ആലുവയില്‍ നിന്നു വരാപ്പുഴ, കടുങ്ങല്ലൂര്‍ ഭാഗങ്ങളിലേക്കുള്ള വാഹനങ്ങള്‍ തോട്ടയ്ക്കാട്ടുകര ജംഗ്ഷനില്‍ നിന്ന് ഇടത്തേക്കു തിരിഞ്ഞു കടുങ്ങല്ലൂര്‍ റോഡ് വഴി പോകാം. പറവൂര്‍ കവല-തോട്ടയ്ക്കാട്ടുകര സര്‍വീസ് റോഡിലൂടെ പറവൂര്‍ കവലയില്‍ നിന്നു ഗതാഗതം അനുവദിക്കില്ലെന്നും അധികൃതര്‍ അറിയിച്ചു.
അങ്കമാലി, പറവൂര്‍ ഭാഗത്തു നിന്നു വരുന്ന ബസുകള്‍ ഉള്‍പ്പെടെയുള്ള മുഴുവന്‍ വാഹനങ്ങളും പറവൂര്‍ കവലയില്‍ നിന്നു മണപ്പുറം ഭാഗത്തേക്കു തിരിയാതെ ഹൈവേയിലൂടെ മാത്രം സഞ്ചരിക്കണം. മാര്‍ത്താണ്ഡവര്‍മ പുതിയ പാലത്തില്‍ കൂടി ഇരുവശങ്ങളിലേക്കും ഒരു വരിയായി ഗതാഗതം അനുവദിക്കുമെന്നും അധികൃതര്‍ വ്യക്തമാക്കി.
Recent Comments