by Midhun HP News | Oct 17, 2026 | Latest News, ജില്ലാ വാർത്ത
കീഴാറ്റിങ്ങൽ: ലോക ഭക്ഷ്യദിനത്തോടനുബന്ധിച്ച് വൈ എൽ എം യു പി എസ്സിൽ നാടൻ ഭക്ഷ്യമേള സംഘടിപ്പിച്ചു. ഈ വർഷത്തെ ലോക ഭക്ഷ്യ ദിന സന്ദേശമായ ‘ഇന്ന് നവീകരിക്കൂ നാളെപോഷിപ്പിക്കു’ എന്ന ആശയത്തെ അടിസ്ഥാനമാക്കിയായിരുന്നു മേള.
സ്കൂൾ പ്രധാന അധ്യാപിക ബിനു ഷെറീന മേള ഉദ്ഘാടനം ചെയ്തു. ഭക്ഷ്യസുരക്ഷ, ഭക്ഷണം പാഴാക്കാതിരിക്കാൻ, നാടൻ ഭക്ഷണത്തിന്റെ പ്രാധാന്യം, പോഷകാഹാരത്തിന്റെ ആവശ്യകത എന്നിവയെ കുറിച്ച് ടീച്ചർ കുട്ടികൾക്ക് വിശദീകരിച്ചു കൊടുത്തു. വിദ്യാർത്ഥികൾ വീടുകളിൽ നിന്നു കൊണ്ടുവന്ന പോഷക സമൃദ്ധമായ നാടൻ വിഭവങ്ങൾ, ചെറുധാന്യങ്ങൾ, പച്ചക്കറികൾ, പഴവർഗ്ഗങ്ങൾ എന്നിവ മേളയിൽ പ്രദർശിപ്പിച്ചു. സുരക്ഷയുമായി ബന്ധപ്പെട്ട പോസ്റ്റർ പ്രദർശനവും സംഘടിപ്പിച്ചു. സോഷ്യൽ സയൻസ് സയൻസ് ക്ലബ്ബിന്റെ നേതൃത്വത്തിൽ ആയിരുന്നു പരിപാടികൾ സംഘടിപ്പിച്ചത്. അധ്യാപകരായ അഞ്ജലി, രശ്മി എന്നിവർ നേതൃത്വം നൽകി.
by Midhun HP News | Oct 17, 2026 | Latest News, ജില്ലാ വാർത്ത
വർക്കല: വർക്കല റെയിൽവേ സ്റ്റേഷനിലെ ഒന്നാം നമ്പർ പ്ലാറ്റ്ഫോമിലേക്ക് സ്കൂട്ടർ ഓടിച്ചുകയറ്റിയ സംഭവം റെയിൽവേ സ്റ്റേഷനിലെ സുരക്ഷാ സംവിധാനങ്ങളെക്കുറിച്ച് ആശങ്ക ഉയർത്തുന്നു. അനന്തപുരി എക്സ്പ്രസ് സ്റ്റേഷനിലെത്തുന്നതിന് തൊട്ടുമുമ്പാണ് ഒരാൾ സ്കൂട്ടറുമായി പ്ലാറ്റ്ഫോമിലേക്ക് പ്രവേശിച്ച് പിന്നിലിരുന്ന യാത്രക്കാരനെ ഇറക്കിയത്.
റെയിൽവേ സ്റ്റേഷന് സമീപം ഇലക്ട്രിസിറ്റി ബോർഡ് ഓഫീസിന് എതിർവശത്തുള്ള താൽക്കാലിക പ്രവേശന കവാടത്തിലൂടെയാണ് സ്കൂട്ടറുമായി ഇയാൾ എത്തിയത്. പ്രവേശന കവാടത്തിൽവച്ച് ഓട്ടോ തൊഴിലാളികൾ ഇയാളെ തടയാൻ ശ്രമിച്ചെങ്കിലും താൻ പൊലീസ് ഇൻസ്പെക്ടറാണെന്ന് അവകാശപ്പെട്ട് ബഹളംവയ്ക്കുകയായിരുന്നുവെന്ന് തൊഴിലാളികൾ പറയുന്നു.
തുടർന്ന് തൊഴിലാളികളുടെ എതിർപ്പ് അവഗണിച്ച് തടസ്സങ്ങൾ മറികടന്ന് അതിവേഗത്തിൽ സ്കൂട്ടർ ഒന്നാം നമ്പർ പ്ലാറ്റ്ഫോമിലേക്ക് ഓടിച്ചുകയറ്റുകയായിരുന്നു. പ്ലാറ്റ്ഫോമിലെത്തിയ ഇയാൾ സ്കൂട്ടറിന് പിന്നിലിരുന്ന യാത്രക്കാരനെ അവിടെ ഇറക്കി.
സംഭവത്തിന്റെ ചിത്രങ്ങൾ പകർത്തിയ ഓട്ടോ തൊഴിലാളികൾ വിവരം റെയിൽവേ സ്റ്റേഷൻ മാനേജരെ അറിയിച്ചു.
യാത്രക്കാരുടെ സുരക്ഷ ഉറപ്പാക്കേണ്ട റെയിൽവേ സ്റ്റേഷനിലെ പ്ലാറ്റ്ഫോമിലേക്ക് ഇരുചക്രവാഹനം ഓടിച്ചുകയറ്റിയ സംഭവം ഗൗരവമായ സുരക്ഷാ ചോദ്യങ്ങളാണ് ഉയർത്തുന്നത്. പ്രത്യേകിച്ച് ട്രെയിൻ എത്തുന്നതിന് തൊട്ടുമുമ്പ് ഇത്തരമൊരു സംഭവം ഉണ്ടായത് സ്റ്റേഷനിലെ പ്രവേശന നിയന്ത്രണ സംവിധാനങ്ങളുടെ കാര്യക്ഷമതയെക്കുറിച്ചും ചോദ്യങ്ങൾ ഉയർത്തുന്നു.
താൻ പൊലീസ് ഇൻസ്പെക്ടറാണെന്ന് ഇയാൾ അവകാശപ്പെട്ടതായി ഓട്ടോ തൊഴിലാളികൾ പറയുന്നുണ്ടെങ്കിലും ഇക്കാര്യം സ്ഥിരീകരിച്ചിട്ടില്ല.
സംഭവത്തിന്റെ പശ്ചാത്തലത്തിൽ റെയിൽവേ സ്റ്റേഷനിലെ താൽക്കാലിക പ്രവേശന കവാടങ്ങളിലുൾപ്പെടെ സുരക്ഷാ സംവിധാനങ്ങളും വാഹനപ്രവേശന നിയന്ത്രണവും ശക്തമാക്കണമെന്ന ആവശ്യം ഉയർന്നിട്ടുണ്ട്.
by Midhun HP News | Oct 17, 2026 | Latest News, കേരളം
വിദ്യയുടെയും ജ്ഞാനത്തിന്റെയും കലകളുടെയും അധിദേവതയായ സരസ്വതീദേവിയെ ആരാധിക്കുന്ന വിശേഷദിനമാണ് നവരാത്രിയിലെ പൂജവയ്പ്പ്. അറിവിനോടുള്ള ആദരവും പഠനത്തോടുള്ള പ്രതിബദ്ധതയും ആത്മീയചൈതന്യവും ഒത്തുചേരുന്ന ഈ ദിവസം പുസ്തകങ്ങൾ, പഠനോപകരണങ്ങൾ, സംഗീതോപകരണങ്ങൾ, തൊഴിൽപരമായി ഉപയോഗിക്കുന്ന ഉപകരണങ്ങൾ എന്നിവ ദേവീസന്നിധിയിൽ സമർപ്പിച്ച് പൂജിക്കുന്നു. അജ്ഞാനത്തിന്റെ അന്ധകാരം അകറ്റി അറിവിന്റെ വെളിച്ചത്തിലേക്ക് നയിക്കണമെന്ന പ്രാർഥനയാണ് ഈ ആചാരത്തിന്റെ കാതൽ.
ഇത്തവണത്തെ പൂജവയ്പ്പ് എപ്പോൾ?
ഒക്ടോബർ 18 ഞായറാഴ്ചയാണ് പൂജവയ്പ്പ്. മലയാളമാസം 1202 തുലാം ഒന്നിന് ദുർഗാഷ്ടമി വരുന്നു. അന്ന് വൈകിട്ട് ക്ഷേത്രം തുറക്കുന്ന സമയം മുതൽ പൂജവയ്ക്കാം. അസ്തമയസമയത്ത് അഷ്ടമിതിഥി വരുന്ന ദിവസമാണ് പൊതുവേ പൂജവയ്പ്പിനായി പരിഗണിക്കുന്നത്. വൈകുന്നേരം അഷ്ടമിതിഥി ലഭിക്കാത്ത സാഹചര്യത്തിൽ അതിനു മുമ്പുള്ള ദിവസമാണ് പൂജവയ്പ്പിനായി സ്വീകരിക്കുക. ഒക്ടോബർ 18-ന് അഷ്ടമിതിഥി ലഭിക്കുന്നതിനാൽ അന്നുതന്നെ പൂജവയ്ക്കാം.
നവരാത്രിയും ദേവീസങ്കൽപ്പങ്ങളും
നവരാത്രിയിൽ ദുർഗ, ലക്ഷ്മി, സരസ്വതി എന്നീ ദേവീസങ്കൽപ്പങ്ങൾക്ക് പ്രത്യേക പ്രാധാന്യമുണ്ട്. ദുർഗാദേവി ശക്തിയുടെയും ധർമസംരക്ഷണത്തിന്റെയും പ്രതീകമാണ്. ലക്ഷ്മീദേവി ഐശ്വര്യത്തെയും സമൃദ്ധിയെയും പ്രതിനിധാനം ചെയ്യുന്നു. സരസ്വതീദേവിയാകട്ടെ വിദ്യയുടെയും ജ്ഞാനത്തിന്റെയും കലകളുടെയും പ്രതീകമാണ്. നവരാത്രിയുടെ അവസാന ദിവസങ്ങളിലാണ് സരസ്വതീപൂജയ്ക്ക് വിശേഷപ്രാധാന്യം ലഭിക്കുന്നത്.
വിദ്യാർഥികൾ പാഠപുസ്തകങ്ങളും പഠനോപകരണങ്ങളും പൂജയ്ക്കു വയ്ക്കുന്നു. സംഗീതജ്ഞർ സംഗീതോപകരണങ്ങളും കലാകാരന്മാർ തങ്ങളുടെ പ്രവർത്തനങ്ങളുമായി ബന്ധപ്പെട്ട ഉപകരണങ്ങളും സമർപ്പിക്കുന്നു. തൊഴിലാളികളും സാങ്കേതികവിദഗ്ധരും ഉപജീവനത്തിനായി ഉപയോഗിക്കുന്ന ഉപകരണങ്ങൾ പൂജവയ്ക്കുന്ന പതിവുമുണ്ട്. അറിവ് നേടുന്നതിനും അധ്വാനത്തിലൂടെ ജീവിതം മുന്നോട്ടുകൊണ്ടുപോകുന്നതിനും സഹായിക്കുന്ന ഉപകരണങ്ങളോടുള്ള ആദരവാണ് ഈ ആചാരത്തിലൂടെ പ്രകടമാകുന്നത്.
വീട്ടിൽ പൂജവയ്ക്കുന്ന വിധം
വീട്ടിൽ പൂജവയ്ക്കാൻ വൃത്തിയുള്ളതും ശാന്തവുമായ ഒരിടം തെരഞ്ഞെടുക്കാം. അവിടെ പീഠമൊരുക്കി പട്ടുവിരിച്ച് സരസ്വതീദേവിയുടെ ചിത്രം സ്ഥാപിക്കാം. ചിത്രത്തിനു മുന്നിൽ നിലവിളക്ക് തെളിച്ച് പുഷ്പമാല ചാർത്താം. അവിൽ, മലർ, കൽക്കണ്ടം, മുന്തിരി തുടങ്ങിയ നിവേദ്യങ്ങൾ സമർപ്പിച്ച് പ്രാർഥിക്കുകയും ചെയ്യാം.
ചില ആചാരക്രമങ്ങളിൽ പൂജാപീഠത്തിന്റെ മധ്യത്തിൽ സരസ്വതീദേവിയെ സങ്കൽപ്പിച്ച് വടക്കുഭാഗത്ത് ഗുരുവിനെയും വേദവ്യാസനെയും തെക്കുഭാഗത്ത് ഗണപതിയെയും ദക്ഷിണാമൂർത്തിയെയും സങ്കൽപ്പിച്ച് പൂജിക്കുന്ന രീതിയുമുണ്ട്. കുടുംബപാരമ്പര്യത്തിനും ഉപാസനാക്രമത്തിനും അനുസരിച്ച് ആചാരങ്ങളിൽ വ്യത്യാസങ്ങൾ വരാം.
പുസ്തകങ്ങൾ, പേനകൾ, കമ്പ്യൂട്ടർ, സംഗീതോപകരണങ്ങൾ, മറ്റ് പഠനോപകരണങ്ങൾ,വാഹനം എന്നിവ വൃത്തിയാക്കി പൂജയ്ക്കായി സമർപ്പിക്കാം. തൊഴിൽപരമായി ഉപയോഗിക്കുന്ന ഉപകരണങ്ങളും യന്ത്രങ്ങളും പൂജവയ്ക്കാവുന്നതാണ്. സമർപ്പിക്കുന്ന വസ്തുക്കളിൽ ദേവീസാന്നിധ്യം സങ്കൽപ്പിച്ച് ഭക്തിയോടെയും ആദരവോടെയും പ്രാർഥിക്കുകയാണ് പ്രധാനം.
പൂജവച്ച പുസ്തകങ്ങളും ഉപകരണങ്ങളും പൂജ അവസാനിക്കുന്നതുവരെ സാധാരണ ഉപയോഗത്തിനായി എടുക്കാതിരിക്കുന്നതാണ് ആചാരം. ഈ ദിവസങ്ങളിൽ വീട്ടിൽ ദീപം തെളിച്ച് പ്രാർഥിക്കുകയും സരസ്വതീമന്ത്രങ്ങളോ ഗായത്രീമന്ത്രമോ ഭക്തിപൂർവം ജപിക്കുകയും ചെയ്യാം.
പൂജവയ്പ്പ് ; അറിവിനെ ആദരിക്കാനും പഠനത്തിന് ജീവിതത്തിൽ അർഹമായ സ്ഥാനം നൽകാനുമുള്ള ഓർമപ്പെടുത്തലാണ്. കുട്ടികളിൽ പഠനത്തോടുള്ള താൽപര്യം വളർത്താനും പുസ്തകങ്ങളോടും ഗുരുക്കന്മാരോടും ആദരവ് പുലർത്തുന്ന മനോഭാവം രൂപപ്പെടുത്താനും ഈ ആഘോഷം സഹായിക്കുന്നു.
വിദ്യാഭ്യാസം പരീക്ഷകളിൽ വിജയം നേടുന്നതിനുള്ള മാർഗം മാത്രമല്ല. വിവേകവും വിനയവും ധാർമികബോധവും വളർത്തി മനുഷ്യനെ ഉത്തമ വ്യക്തിത്വത്തിലേക്ക് നയിക്കുന്ന പ്രക്രിയ കൂടിയാണ് അത്. അതിനാൽ വിദ്യാദേവതയെ ആരാധിക്കുന്നതിനൊപ്പം നേടുന്ന അറിവ് ജീവിതത്തിൽ പ്രാവർത്തികമാക്കാനും ശ്രമിക്കണം.
കുട്ടികൾക്ക് പുസ്തകങ്ങളുടെ പ്രാധാന്യം മനസ്സിലാക്കിക്കൊടുക്കാനും പഠനത്തിൽ ശ്രദ്ധയും ചിട്ടയും വളർത്താനും പൂജവയ്പ്പ് അവസര മൊരുക്കുന്നു. അതേസമയം, അറിവ് നേടുന്നതിന് പ്രായപരിധിയില്ലെന്ന സന്ദേശവും ഈ ആഘോഷം പകരുന്നു. ജീവിതത്തിന്റെ ഓരോ ഘട്ടത്തിലും പുതിയ കാര്യങ്ങൾ പഠിക്കാനും അറിവ് വികസിപ്പിക്കാനും കഴിയണം.
ദേവീസന്നിധിയിൽ പുസ്തകങ്ങൾ സമർപ്പിക്കുമ്പോൾ അറിവ് പകർന്നുതരുന്ന ഗുരുക്കന്മാരെയും മാതാപിതാക്കളെയും സ്മരിക്കുന്നതും ഉചിതമാണ്. അറിവ് നേടുക മാത്രമല്ല, അത് സമൂഹത്തിന്റെ നന്മയ്ക്കായി വിനിയോഗിക്കുക എന്നതും വിദ്യയുടെ യഥാർഥ ലക്ഷ്യമാണ്.
ഭക്തിയും വിശ്വാസവും നിറഞ്ഞ അന്തരീക്ഷത്തിൽ ആചരിക്കുന്ന പൂജവയ്പ്പ് മനസ്സിന് ശാന്തിയും പഠനത്തിന് പ്രചോദനവും പകരട്ടെ. വിദ്യാദേവതയായ സരസ്വതിയുടെ അനുഗ്രഹത്താൽ എല്ലാവരുടെയും ജീവിതത്തിൽ ജ്ഞാനവും വിവേകവും ഐശ്വര്യവും നിറയട്ടെ.
by Midhun HP News | Oct 17, 2026 | Latest News, ജില്ലാ വാർത്ത
ഡല്‍ഹി: രാജ്യത്ത് ജനസംഖ്യാ കണക്കെടുപ്പ് നടപടികള്‍ക്കായി എയ്ഡഡ്, അണ്‍ എയ്ഡഡ് സ്വകാര്യ സ്ഥാപനങ്ങളിലെയും അധ്യാപകരെയും ജീവനക്കാരെയും ഇനിമുതല്‍ നിയമിക്കാമെന്ന് വ്യക്തമാക്കി കേന്ദ്രസര്‍ക്കാര്‍. ഇതുമായി ബന്ധപ്പെട്ട 1990ലെ സെന്‍സസ് ചട്ടങ്ങളിലാണ് കേന്ദ്രസര്‍ക്കാര്‍ ഭേദഗതി വരുത്തിയത്. സ്വകാര്യ സ്‌കൂള്‍ അധ്യാപകരെ സെന്‍സസ് പ്രവര്‍ത്തികള്‍ക്ക് നിയോഗിക്കുന്നതിനെതിരെ വിവിധ ഹൈക്കോടതികള്‍ സ്റ്റേ ഉത്തരവുകള്‍ പുറപ്പെടുവിച്ച പശ്ചാത്തലത്തിലാണ് കേന്ദ്രസര്‍ക്കാരിന്റെ നീക്കം.
സ്വകാര്യ അണ്‍ എയ്ഡഡ് സ്‌കൂളിലെ ജീവനക്കാര്‍ തദ്ദേശസ്വയം ഭരണ സ്ഥാപനങ്ങളുടെ പരിധിയില്‍ വരില്ലെന്നും അതിനാല്‍ അവരെ നിര്‍ബന്ധിതമായി സെന്‍സസ് ജോലിക്ക് നിയോഗിക്കാന്‍ സര്‍ക്കാരിന് അധികാരമില്ലെന്നും ചൂണ്ടിക്കാട്ടി അലഹബാദ്, ബോംബെ, പഞ്ചാബ് – ഹരിയാന ഹൈക്കോടതികള്‍ അധ്യാപകര്‍ക്ക് അനുകൂലമായി സ്റ്റേ അനുവദിച്ചിരുന്നു. ഈ നിയമപരമായ തടസ്സം നീക്കാനാണ് കേന്ദ്രം നേരിട്ട് ചട്ടങ്ങളില്‍ മാറ്റം വരുത്തിയത്.
രജിസ്ട്രാര്‍ ജനറല്‍ ഓഫ് ഇന്ത്യ(ആര്‍ജിഐ) മൃത്യഞ്ജയ് കുമാര്‍# നാരായണ്‍ പുറപ്പെടുവിച്ച പുതിയ ഗസറ്റ് വിജ്ഞാപനപ്രകാരം സംസ്ഥാനങ്ങള്‍ക്കും കേന്ദ്രഭരണ പ്രദേശങ്ങള്‍ക്കും എന്യുമറേറ്റര്‍മാരായി അധ്യാപകരെയും ക്ലാര്‍ക്കുമാരെയും മറ്റ് ഉദ്യോഗസ്ഥരെയും നിയമിക്കാന്‍ പൂര്‍ണ അധികാരമുണ്ടാകും. കേന്ദ്ര സംസ്ഥാന സര്‍ക്കാരുകള്‍, തദ്ദേശ സ്ഥാപനങ്ങള്‍, പൊതുമേഖല സ്ഥാപനങ്ങള്‍, ബാങ്കുകള്‍, കമ്പനികള്‍ എന്നിയിലെ ക്ലാര്‍ക്കുമാരെയും പുതിയ ഭേദഗതി പ്രകാരം സെന്‍സസ് ഓഫീസര്‍മാരായി നിയമിക്കാം. കോവിഡ് വ്യാപനത്തെ തുടര്‍ന്ന് 2021ല്‍ നടപ്പാക്കേണ്ടിയിരുന്ന കണക്കെടുപ്പാണ് ഇപ്പോള്‍ വൈകി നടക്കുന്നത്.
by Midhun HP News | Oct 17, 2026 | Latest News, ജില്ലാ വാർത്ത
ആറ്റിങ്ങൽ: കോരാണി കടയിൽ വീട്ടിൽ സനിൽകുമാർ (കോരാണി സനിൽ) (65)അന്തരിച്ചു. ആറ്റിങ്ങൽ ചുടുകാട് ഗ്രീൻ വില്ല എന്ന വീട്ടിൽ വാടകയ്ക്ക് താമസിച്ചു വരുകയായിരുന്നു. ആറ്റിങ്ങൽ കെ എച്ച് ആർ എ സെക്രട്ടറിയായിരുന്നു.
by Midhun HP News | Oct 17, 2026 | Latest News, കേരളം
കൊച്ചി: നെടുമ്പാശേരിയില്‍ ആഡംബരകാര്‍ സ്‌കൂട്ടറിനു പിന്നിലിടിച്ച് മൂന്ന് പേര്‍ കൊല്ലപ്പെട്ട കേസില്‍ പ്രതികളുടെ ജാമ്യാപേക്ഷയില്‍ കോടതി ഇന്ന് (ശനിയാഴ്ച്ച) വിധി പറയും. കേസില്‍ ഒന്നാം പ്രതി സുഹൈല്‍ സജീവ് മദ്യപിച്ചെന്ന് അറിഞ്ഞിട്ടും വാഹനമോടിക്കാന്‍ പ്രേരിപ്പിച്ച കുറ്റത്തിന് അറസ്റ്റിലായ 2,3,4 പ്രതികളായ നിനവ്, ജോയല്‍, അമീര്‍ എന്നിവരുടെ ജാമ്യാപേക്ഷയാണ് അങ്കമാലി മജിസ്‌ട്രേറ്റ് കോടതി പരിഗണിച്ചത്. ഇതില്‍ ഇന്ന് കോടതി വിധി പറയും.
23 വയസ്സില്‍ താഴെയുള്ള പ്രതികള്‍ക്ക് മദ്യം വിളമ്പിയതിന് ബാറുകളുടെ ലൈസന്‍സ് റദ്ദാക്കാതിരിക്കാതിരിക്കാന്‍ 7 ദിവസത്തിനകം തീരുമാനമെടുക്കാന്‍ എക്‌സൈസ് കമ്മീഷണര്‍ക്ക് ഹൈക്കോടതി നിര്‍ദേശവും നല്‍കി.
മൂന്നു പേര്‍ സ്‌കൂട്ടറില്‍ സഞ്ചരിക്കുകയായിരുന്നു അതുകൊണ്ടാണ് ഇടിച്ചത് എന്നായിരുന്നു ജാമ്യാപേക്ഷ പരിഗണിക്കവേ പ്രതിഭാഗത്തിന്റെ വാദം. എന്നാല്‍ അതുകൊണ്ട് ഇടിക്കാമോ എന്ന് കോടതി ചോദിച്ചു. അവര്‍ സഞ്ചരിച്ചത് നിയമലംഘനമാണെന്ന് പ്രതിഭാഗം വാദിച്ചപ്പോള്‍ അവര്‍ മരിച്ചു പോയില്ലേ ഇനി ഇനി നടപടി എടുക്കാന്‍ കഴിയില്ലെന്ന് കോടതി മറുപടി പറഞ്ഞു. ഇതൊരു സാധാരണ അപകടം മാത്രമാണെന്നാണ് പ്രതിഭാഗത്തിന്റെ വാദം.
എന്നാല്‍ തങ്ങള്‍ക്കെതിരെ വലിയ ഗൂഢാലോചന നടക്കുന്നുണ്ടെന്നും മാധ്യമങ്ങളിലൂടെയും സാമൂഹിക മാധ്യമങ്ങളിലൂടെയും വ്യക്തിഹത്യ നടത്തുകയാണെന്നും ഇതിന്റെ ഭാഗമായാണ് കുറ്റകരമായ നരഹത്യ ഉള്‍പ്പടെയുള്ള വകുപ്പുകള്‍ ചുമത്തിയതെന്നും ഇത് നിലനില്‍ക്കില്ലെന്നും പ്രതിഭാഗം വാദിച്ചു. എന്നാല്‍ ഗുരുതരമായ പ്രാഥമിക തെളിവുകള്‍ പ്രതികള്‍ക്ക് എതിരാണെന്ന് പ്രോസിക്യൂഷന്‍ കോടയില്‍ സമര്‍ത്ഥിച്ചു. പ്രതിയും കൂടെയുള്ളവരും മദ്യപിച്ചതിന് തെളിവുണ്ട്.
അനുവദനീമായതിലും 5.3 ഇരട്ടി മദ്യം ഒന്നാം പ്രതിയായ സുഹൈല്‍ കഴിച്ചിരുന്നു എന്നാണ് പരിശോധനഫലമെന്നും പ്രോസിക്യൂഷന്‍ കോടതിയില്‍ വ്യക്തമാക്കി. അന്വേഷണത്തിന്റെ ഈ സുപ്രധാനഘട്ടത്തില്‍ പ്രതികള്‍ക്ക് ജാമ്യം നല്‍കരുതെന്ന് പ്രോസിക്യൂഷനും മരണമടഞ്ഞവര്‍ക്കുവേണ്ടി ഹാജരായ അഭിഭാഷകരും വാദിച്ചു. തുടര്‍ന്ന് കേസ് വിധി പറയാനായി മാറ്റുകയായിരുന്നു.
Recent Comments