ഗ്യാനേഷ് കുമാറിനെ നീക്കണം; പ്രമേയം പാസാക്കി കേരള നിയമസഭ

by Midhun HP News | Oct 12, 2026 | Latest News, ജില്ലാ വാർത്ത

തിരുവനന്തപുരം: മുഖ്യ തെരഞ്ഞെടുപ്പ് കമ്മീഷണർ സ്ഥാനത്തുനിന്നും ഗ്യാനേഷ് കുമാറിനെ നീക്കണമെന്ന് ആവശ്യപ്പെടുന്ന പ്രമേയം കേരള നിയമസഭ പാസാക്കി. മുഖ്യമന്ത്രി വി.ഡി. സതീശനാണ് നിയമസഭാ ചട്ടം 118 പ്രകാരം സഭയിൽ പ്രമേയം അവതരിപ്പിച്ചത്. ഇതോടെ മുഖ്യ തെരഞ്ഞെടുപ്പ് കമ്മീഷണർക്കെതിരെ പ്രമേയം പാസാക്കുന്ന രാജ്യത്തെ ആദ്യ നിയമസഭയായി കേരളം മാറി.

ഭരണപക്ഷത്തിന് പുറമെ പ്രതിപക്ഷത്തെ ഇടത് അംഗങ്ങളും പ്രമേയത്തെ പിന്തുണച്ചു. എന്നാൽ സഭയിലുണ്ടായിരുന്ന മൂന്ന് ബിജെപി അംഗങ്ങൾ മാത്രമാണ് പ്രമേയത്തെ എതിർത്തത്. തുടർന്ന് സഭയ്ക്ക് പുറത്തിറങ്ങിയ ബിജെപി അംഗങ്ങൾ പ്രമേയത്തിന്റെ പകർപ്പ് പരസ്യമായി കത്തിച്ച് പ്രതിഷേധം രേഖപ്പെടുത്തി.

മുഖ്യ തെരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ട് രാജ്യതലസ്ഥാനത്ത് സംയുക്ത പ്രതിപക്ഷ പാർട്ടികളും കോക്രോച്ച് ജനതാ പാർട്ടിയും (സിജെപി) വിദ്യാർത്ഥി സംഘടനകളും ശക്തമായ പ്രക്ഷോഭം തുടരുന്നതിനിടയിലാണ് കേരള സർക്കാരിന്റെ നിർണ്ണായകമായ ഈ രാഷ്ട്രീയ നീക്കം. സ്വതന്ത്രവും നീതിയുക്തവുമായ തെരഞ്ഞെടുപ്പ് പ്രക്രിയയെ അട്ടിമറിക്കുന്നുവെന്ന ആക്ഷേപങ്ങൾ ശക്തമാകുന്ന സാഹചര്യത്തിലാണ് സംസ്ഥാന നിയമസഭ ഭരണഘടനാപരമായ വഴിയിലൂടെ പ്രമേയം പാസാക്കി കേന്ദ്രത്തിന് മുന്നറിയിപ്പ് നൽകിയത്.

അനുസ്മരണ യോഗം സംഘടിപ്പിച്ചു

by Midhun HP News | Oct 12, 2026 | Latest News, ജില്ലാ വാർത്ത

ആറ്റിങ്ങൽ: സി.പി.ഐ.എം ആറ്റിങ്ങൽ വെസ്റ്റ് ലോക്കൽകമ്മിറ്റിയുടെ ആഭിമുഖ്യത്തിൽ ഏര്യയാ കമ്മിറ്റി അംഗമായിരുന്ന കെ. സുകുമാരപിള്ളയുടെ അഞ്ചാം ചരമവാർഷിക അനുസ്മരണ യോഗം സംഘടിപ്പിച്ചു.

അനുസ്മരണ യോഗം സി.പി.ഐ.എം തിരുവനന്തപുരം ജില്ലാ സെക്രട്ടേറിയറ്റ് അംഗം ആർ രാമു ഉദ്ഘാടനം ചെയ്തു. ഏര്യാ കമ്മിറ്റി സെക്രട്ടറി ആർ സുഭാഷ് അനുസ്മരണ പ്രഭാഷണം നടത്തി. ആറ്റിങ്ങൽ മുനിസിപ്പൽ ചെയർമാൻ എം പ്രദീപ്, ഏരിയാ കമ്മിറ്റി അംഗങ്ങളായ ആർ രാജു, സി ദേവരാജൻ, സി.ജി വിഷ്ണു ചന്ദ്രൻ, ലോക്കൽകമ്മിറ്റി സെക്രട്ടറി അഡ്വ എൻ മോഹനൻ നായർ, ലോക്കൽകമ്മിറ്റി അംഗം എസ് സതീഷ് കുമാർ, ബ്രാഞ്ച് സെക്രട്ടറി അശോക് കുമാർ എന്നിവർ പങ്കെടുത്തു.

മുദാക്കൽ യൂണിറ്റ് സമ്മേളനം സംഘടിപ്പിച്ചു

by Midhun HP News | Oct 12, 2026 | Latest News, ജില്ലാ വാർത്ത

ചിറയിൻകീഴ് മേഖലയിലെ മുദാക്കൽ യൂണിറ്റ് സമ്മേളനം ജില്ലാ പ്രസിഡന്റ് ധനീഷ് ചന്ദ്രൻ ഉദ്ഘാടനം ചെയ്തു. തുടർന്ന് നടന്ന യൂണിറ്റ് ഭാരവാഹി തെരഞ്ഞെടുപ്പിൽ ജില്ലാ ജനറൽ സെക്രട്ടറി വെള്ളറട രാജേന്ദ്രൻ വരണാധികാരിയായി പുതിയ യൂണിറ്റ് കമ്മിറ്റിയെ തിരഞ്ഞെടുത്തു. പ്രസിഡന്റായി മുദാക്കൽ സജുവിനെയും പുതിയ ഭരണസമിതി കമ്മിറ്റിയെയും യോഗം തിരഞ്ഞെടുത്തു.

ആറ്റിങ്ങൽ ഐ.ഡി.എ ശാഖയുടെ ദന്ത പരിശോധനാ ക്യാമ്പ് നടന്നു

by Midhun HP News | Oct 12, 2026 | Latest News, ജില്ലാ വാർത്ത

ആറ്റിങ്ങൽ: ഇന്ത്യൻ ഡെന്റൽ അസോസിയേഷൻ ആറ്റിങ്ങൽ ശാഖ സി.ഡി.എച്ച് വിംഗിന്റെ ആഭിമുഖ്യത്തിൽ അതിഥി തൊഴിലാളികൾക്കായി ബോധവത്കരണ പരിപാടിയും ദന്ത പരിശോധനാ ക്യാമ്പും വായിലെ ക്യാൻസർ സ്ക്രീനിംഗും സംഘടിപ്പിച്ചു. ആർ.കെ ചവാൻ ഇൻഫ്രാസ്ട്രക്ചർ പ്രൈവറ്റ് ലിമിറ്റഡ് ഓഫീസിൽ വെച്ച് ഒക്ടോബർ 11 ന് നടന്ന പരിപാടിയിൽ ഡോ. മീര മുരളി ബോധവത്കരണ ക്ലാസ്സ് എടുത്തു. ഡോ. തൗഫീന എച്ച്, ഡോ. മീര മുരളി, ഡോ. സുദിൻ എസ് എന്നിവർ ക്യാമ്പിന് നേതൃത്വം നൽകി.

കടയ്ക്കാവൂരിൽ പത്താം ക്ലാസ് വിദ്യാർത്ഥിനി മരിച്ച നിലയിൽ

by Midhun HP News | Oct 12, 2026 | Latest News, ജില്ലാ വാർത്ത

കടയ്ക്കാവൂർ: നിലയ്ക്കാമുക്ക് സിദ്ധിവിലാസത്തിൽ ഷാൻ, അനീഷ ദമ്പതികളുടെ മകൾ സിദ്ദിയെ വീട്ടിൽ മരിച്ച നിലയിൽ കണ്ടെത്തി. ആറ്റിങ്ങൽ ഗവൺമെന്റ് ഗേൾസ് ഹയർ സെക്കൻഡറി സ്കൂളിലെ പത്താം ക്ലാസ് വിദ്യാർത്ഥിനിയാണ്.

മാതാപിതാക്കൾ നിയമപരമായി വേർപിരിഞ്ഞതിനെ തുടർന്ന് സിദ്ദി മാതാവ് അനീഷയോടൊപ്പമായിരുന്നു താമസം. ട്യൂഷൻ സെന്ററിൽ നിന്നും വിനോദയാത്ര പോകുന്നതുമായി ബന്ധപ്പെട്ട് വീട്ടിൽ വിലക്കിയിരുന്നതായി അടുത്ത ബന്ധുക്കൾ പറഞ്ഞു.

കിടപ്പുമുറിയിൽ തൂങ്ങിയ നിലയിൽ കണ്ടെത്തിയ കുട്ടിയെ അമ്മ കത്രിക ഉപയോഗിച്ച് കയർ മുറിച്ചുമാറ്റി കല്ലമ്പലത്തെ സ്വകാര്യ ആശുപത്രിയിൽ എത്തിക്കുകയായിരുന്നു. എന്നാൽ ആശുപത്രിയിലെത്തിക്കുന്നതിന് മുമ്പുതന്നെ മരണം സംഭവിച്ചിരുന്നതായി ഡോക്ടർമാർ അറിയിച്ചു. കടയ്ക്കാവൂർ പോലീസ് തുടർ നിയമനടപടികൾക്കായി മൃതദേഹം പാരിപ്പള്ളി മെഡിക്കൽ കോളേജ് ആശുപത്രിയിലേക്ക് മാറ്റി. ഞായറാഴ്ച രാത്രി 8.40 ഓടു കൂടിയായിരുന്നു സംഭവം.