by Midhun HP News | Oct 7, 2026 | Latest News, ദേശീയ വാർത്ത
ഡല്‍ഹി: തന്നില്‍ വിശ്വാസമര്‍പ്പിച്ചതിന് രാജ്യത്തെ ജനങ്ങള്‍ക്ക് മുന്നില്‍ ശിരസ് നമിക്കുന്നുവെന്ന് പ്രധാനമന്ത്രി നരേന്ദ്ര മോദി. ഭരണസാരഥ്യത്തില്‍ 25 വര്‍ഷം പൂര്‍ത്തിയായ വേളയില്‍ ബിജെപി സംഘടിപ്പിച്ച പൊതുയോഗത്തില്‍ സംസാരിക്കുകയായിരുന്നു പ്രധാനമന്ത്രി.
‘2001 ഒക്ടോബര്‍ 7-ന് ഞാന്‍ ഗുജറാത്ത് മുഖ്യമന്ത്രിയായി സത്യപ്രതിജ്ഞ ചെയ്യുമ്പോള്‍ ഇങ്ങനെയൊരു നാഴികകല്ല് പിന്നിടുമെന്ന് ഒരിക്കലും കരുതിയിരുന്നില്ല. ഇന്ന്, ഭരണസാരഥ്യത്തില്‍ ഞാന്‍ തുടര്‍ച്ചയായ 25 വര്‍ഷത്തെ സേവനം പൂര്‍ത്തിയാക്കിയിരിക്കുന്നു. ജനങ്ങളുടെ നിരന്തരമായ അനുഗ്രഹം കൊണ്ടാണ് ഇത് സാധ്യമായത്. രാജ്യത്തെ ജനങ്ങള്‍ക്കും ബിജെപിക്കും എന്‍ഡിഎയ്ക്കും സഹപ്രവര്‍ത്തകര്‍ക്കും നന്ദി അറിയിക്കുന്നു.
സേവ തന്നെയാണ് ധര്‍മം എന്നുപറഞ്ഞ നരേന്ദ്രമോദി; അധികാരമോഹമല്ല, മറിച്ച് ഒരു ദൗത്യത്തിനായാണ് താന്‍ ജീവിക്കുന്നതെന്ന് പറഞ്ഞു. തന്റെ കുട്ടിക്കാലം അനുസ്മരിച്ച മോദി സ്‌കൂളില്‍ ആദ്യമെത്തുന്ന വിദ്യാര്‍ഥികളില്‍ ഒരാളായിരുന്നു താന്‍ എന്നു പറഞ്ഞു. ‘ഗുരുനാഥന്‍മാര്‍ പലകാര്യങ്ങളും ഞങ്ങളെ പഠിപ്പിച്ചിരുന്നു. ക്ലാസില്‍ ഏറ്റവും ആദ്യം എത്തുന്ന കുട്ടികളില്‍ എന്റെ പേര് എപ്പോഴും ഉണ്ടാകുമായിരുന്നു. പഠിക്കാനുള്ള ആഗ്രഹം എന്റെ ജീവിതത്തിന്റെ ഭാഗമായി, ഇന്നും എന്നെ ഒരു വിദ്യാര്‍ഥിയായിട്ടാണ് ഞാന്‍ കാണുന്നത്. ദിവസവും എന്തെങ്കിലും പുതിയ കാര്യം പഠിക്കാന്‍ ഞാന്‍ ശ്രമിക്കുന്നു,’ പ്രധാനമന്ത്രി പറഞ്ഞു.
തന്നെ എന്തെങ്കിലും പഠിപ്പിച്ച ഓരോ വ്യക്തിയോടും ഓരോ അനുഭവത്തോടും എന്നും കടപ്പെട്ടിരിക്കുന്നുവെന്ന് മോദി പറഞ്ഞു. ‘എന്നെ പഠിപ്പിച്ചവര്‍ എനിക്ക് വിനയമാണ് പകര്‍ന്നുതന്നത്. എന്നെ താഴെയിറക്കാന്‍ ശ്രമിച്ചവര്‍ വീണ്ടും എങ്ങനെ ഉയിര്‍ത്തെഴുന്നേല്‍ക്കണമെന്ന് എന്നെ പഠിപ്പിച്ചു. എന്നെ പിന്തുണച്ചവര്‍ എനിക്ക് ധൈര്യം തന്നപ്പോള്‍, വിമര്‍ശകര്‍ ആത്മപരിശോധന നടത്താന്‍ പഠിപ്പിച്ചു. എന്നോടൊപ്പം നിന്നവര്‍ വിശ്വാസത്തിന്റെ ശക്തി എനിക്ക് കാണിച്ചുതന്നു,’ മോദി പറഞ്ഞു.
‘ഓരോ പ്രതിസന്ധിയും എന്റെ സഹനശക്തി പരീക്ഷിക്കാനുള്ള അവസരമായി, ഓരോ വിജയവും എന്റെ ഉത്തരവാദിത്തം വര്‍ധിപ്പിച്ചു, ഓരോ നേട്ടവും വലിയ ലക്ഷ്യങ്ങളിലേക്ക് മുന്നേറാനുള്ള ധൈര്യവും ദൃഢനിശ്ചയവും എനിക്ക് നല്‍കി,’ അദ്ദേഹം കൂട്ടിച്ചേര്‍ത്തു. 2001-ലെ ഭൂജിലെ ഭൂകമ്പത്തില്‍ പുനര്‍നിര്‍മാണം എങ്ങനെയായിരിക്കണമെന്ന് താന്‍ പഠിച്ചു; പരാജയങ്ങളില്‍ നിന്ന് എങ്ങനെ ഉയിര്‍ത്തെഴുന്നേല്‍ക്കണമെന്ന് ചന്ദ്രയാന്‍ ദൗത്യം പഠിപ്പിച്ചു; രാജ്യത്തിന്റെ കൂട്ടായ്മയുടെ പ്രാധാന്യം കോവിഡ് പ്രതിസന്ധി തന്നെ ബോധ്യപ്പെടുത്തി. കൂടാതെ, നല്ലതും ചീത്തയുമായ അനുഭവങ്ങള്‍ക്കിടയിലും മുന്നോട്ട് പോകാന്‍ പ്രചോദിപ്പിച്ചതിന് മാധ്യമങ്ങളോടും മോദി നന്ദി പറഞ്ഞു.
സാംസ്‌കൃത പാരമ്പര്യവും മഹത്തായ ചിന്തകളും നിറഞ്ഞ രാജ്യത്തിനായുള്ള സേവനം എപ്പോഴും തനിക്ക് വലിയ ശക്തിയാണ് പകര്‍ന്നുനല്‍കിയിട്ടുള്ളത്. ‘വേദങ്ങള്‍ മുതല്‍ വിവേകാനന്ദന്‍ വരെ നീളുന്ന, ആയിരക്കണക്കിന് വര്‍ഷങ്ങളുടെ സാംസ്‌കാരിക പാരമ്പര്യമുള്ള, മനുഷ്യന്റെ മാനവികതയിലുള്ള വിശ്വാസം വീണ്ടെടുത്ത രാജ്യത്തിനായി സേവനം അനുഷ്ഠിക്കുമ്പോള്‍ എനിക്ക് ഒരിക്കല്‍ പോലും ഒറ്റപ്പെട്ടതായി തോന്നിയിട്ടില്ല,’ അദ്ദേഹം വ്യക്തമാക്കി.
ഇന്നത്തെ ദിവസം വെറുമൊരു ഓര്‍മ്മപ്പെടുത്തല്‍ മാത്രമല്ലെന്നും ഭാവിയിലേക്കുള്ള ദൃഢമായ ഒരു പ്രതിജ്ഞ പുതുക്കല്‍ കൂടിയാണെന്നും പ്രധാനമന്ത്രി കൂട്ടിച്ചേര്‍ത്തു. ‘നമുക്ക് തീര്‍ച്ചയായും അത് സാധ്യമാകും’ 2047-ലേക്കുള്ള രാജ്യത്തിന്റെ വികസന യാത്രയ്ക്ക് ഇത് കരുത്ത് പകരുന്നുവെന്നും മോദി കൂട്ടിച്ചേര്‍ത്തു.
by Midhun HP News | Oct 7, 2026 | Latest News, കായികം
ബുസാൻ റെഡ് കാർപ്പറ്റിൽ മലയാളത്തിന്റെ അഭിമാന ചിത്രം ‘ചെവിട്ടോർമ്മ’. ദക്ഷിണ കൊറിയയിൽ നടക്കുന്ന ഏഷ്യയിലെ ഏറ്റവും വലിയ ചലച്ചിത്ര മേളകളിലൊന്നായ 31-ാമത് ബുസാൻ അന്താരാഷ്ട്ര ചലച്ചിത്രമേളയുടെ റെഡ് കാർപ്പറ്റിൽ ചെവിട്ടോർമ പ്രദർശനത്തിനൊരുങ്ങുന്നത്.
ലോകത്തിന്റെ വിവിധ ഭാഗങ്ങളിൽ നിന്നുമെത്തിയ ആയിരക്കണക്കിന് ചലച്ചിത്രപ്രേമികളെയും അന്താരാഷ്ട്ര മാധ്യമങ്ങളെയും സാക്ഷിനിർത്തിയാണ് മലയാളത്തിന്റെ ഈ അഭിമാന ചിത്രം റെഡ് കാർപ്പറ്റിൽ ശ്രദ്ധാ കേന്ദ്രമായത്. ഈ വർഷത്തെ ബുസാൻ അന്താരാഷ്ട്ര ചലച്ചിത്രമേളയിലേക്ക് മലയാളത്തിൽ നിന്നും തിരഞ്ഞെടുക്കപ്പെട്ട ഏക ചിത്രമാണ് ‘ചെവിട്ടോർമ്മ’.
ചിത്രത്തിന്റെ രചനയും സംവിധാനവും നിർവ്വഹിച്ചിരിക്കുന്നത് ലിയോ തദേവൂസ് ആണ്. ചിത്രത്തിന്റെ വേൾഡ് പ്രീമിയറിനോടനുബന്ധിച്ച് നടന്ന ചടങ്ങിൽ സംവിധായകൻ ലിയോ തദേവൂസ്, അഭിനേതാക്കളായ ദിലീഷ് പോത്തൻ, പൗളി വത്സൻ, സ്റ്റാൻ സ്റ്റീഫൻ, നിർമ്മാതാക്കളായ സ്റ്റീഫൻ സക്കറിയാസ്, ലോഗൻ രവി തുടങ്ങിയവർ റെഡ് കാർപ്പറ്റി‌ലെത്തി. ഒക്ടോബർ 8 ന് മേളയിലെ പ്രശസ്തമായ ‘ഏഷ്യൻ സിനിമാ പനോരമ’ വിഭാഗത്തിൽ ചിത്രം പ്രദർശിപ്പിക്കും.
by Midhun HP News | Oct 7, 2026 | Latest News, കേരളം
തിരുവനന്തപുരം: സംസ്ഥാനത്തിന്റെ വര്‍ധിച്ചുവരുന്ന വൈദ്യുതി ആവശ്യകത നിറവേറ്റുന്നതിനും ഭാവിയിലെ ഊര്‍ജ സുരക്ഷ ഉറപ്പാക്കുന്നതിനുമായി കേന്ദ്ര പൊതുമേഖലാ സ്ഥാപനമായ എന്‍ടിപിസിയുമായി (NTPC) ചേര്‍ന്ന് നിര്‍ണായക പദ്ധതികള്‍ നടപ്പിലാക്കാന്‍ ഒരുങ്ങി കേരളം. ഡല്‍ഹിയില്‍ നടന്ന ഉയര്‍ന്നതല ചര്‍ച്ചയിലാണ് സംസ്ഥാനത്തിന്റെ ഊര്‍ജ മേഖലയ്ക്ക് വന്‍ കുതിപ്പേകുന്ന തീരുമാനങ്ങള്‍ കൈക്കൊണ്ടത്.
പുനരുപയോഗ ഊര്‍ജ സംഭരണത്തിനായി കായംകുളത്ത് 2000 MWh ശേഷിയുള്ള ബാറ്ററി എനര്‍ജി സ്റ്റോറേജ് സിസ്റ്റം (BESS) സ്ഥാപിക്കാന്‍ തീരുമാനമായി. കെഎസ്ഇബി, എന്‍ടിപിസി, എന്‍ടിപിസി ഗ്രീന്‍ എനര്‍ജി ലിമിറ്റഡ് എന്നിവര്‍ സംയുക്തമായാണ് പദ്ധതി നടപ്പിലാക്കുക. ഇതിന് പുറമെ, 2027 മാര്‍ച്ചോടെ പോത്തന്‍കോട്, ശ്രീകണ്ഠപുരം എന്നിവിടങ്ങളില്‍ 80 MWh വീതം ശേഷിയുള്ള ബിഇഎസ്എസ് പദ്ധതികളും കമ്മീഷന്‍ ചെയ്യും.
ഉടന്‍ നേരിടുന്ന വൈദ്യുതി ക്ഷാമം പരിഹരിക്കുന്നതിനായി മഹാരാഷ്ട്രയിലെ എന്‍.ടി.പി.സി സിന്നര്‍ പദ്ധതിയില്‍ നിന്ന് 300 MW വരെ വൈദ്യുതി യൂണിറ്റിന് 5.18 നിരക്കില്‍ ലഭ്യമാക്കാന്‍ ധാരണയായി. ഒപ്പം കായംകുളത്ത് എന്‍.ടി.പി.സി നടപ്പാക്കുന്ന 27 MW സോളാര്‍ പദ്ധതിയുടെ തുടര്‍നടപടികള്‍ വേഗത്തിലാക്കാനും യോഗത്തില്‍ തീരുമാനമായിട്ടുണ്ട്.സംസ്ഥാനത്തിന്റെ ദീര്‍ഘകാല ആവശ്യങ്ങള്‍ക്കായി സമര്‍പ്പിത വൈദ്യുതി നിലയം സ്ഥാപിക്കണമെന്ന് എന്‍.ടി.പി.സിയോട് ആവശ്യപ്പെടുകയും, രാമഗുണ്ടം പവര്‍ പ്ലാന്റില്‍ നിന്ന് വൈദ്യുതി ലഭ്യമാക്കുന്നതിനുള്ള ധാരണാപത്രത്തില്‍ ഒപ്പുവെക്കാന്‍ എന്‍.ടി.പി.സി സന്നദ്ധത അറിയിക്കുകയും ചെയ്തു. കൂടാതെ കെ.എസ്.ഇ.ബിയുടെ സാങ്കേതിക, മാനേജ്‌മെന്റ് പ്രവര്‍ത്തനങ്ങള്‍ കൂടുതല്‍ കാര്യക്ഷമമാക്കാന്‍ എന്‍.ടി.പി.സിയുടെ പ്രൊഫഷണല്‍ സഹായവും ലഭ്യമാക്കും.
by Midhun HP News | Oct 7, 2026 | Latest News, ജില്ലാ വാർത്ത
തിരുവനന്തപുരം: സംസ്ഥാനത്തെ കെഎസ്ആര്‍ടിസി ബസ് ടെര്‍മിനലുകളില്‍ സാനിറ്ററി നാപ്കിന്‍ കുറഞ്ഞ വിലയ്ക്ക് ലഭ്യമാക്കുന്ന പദ്ധതിക്ക് തുടക്കമായി. സാനിറ്ററി നാപ്കിന്‍ വെന്‍ഡിംഗ് മെഷീന്റെയും ഇന്‍സിനറേറ്ററിന്റെയും പ്രവര്‍ത്തനോദ്ഘാടനം തമ്പാനൂര്‍ കെഎസ്ആര്‍ടിസി ബസ് ടെര്‍മിനലില്‍ വനിതാ, ശിശു വികസന, തൊഴില്‍ വകുപ്പ് മന്ത്രി ബിന്ദു കൃഷ്ണ നിര്‍വഹിച്ചു. സ്ത്രീകളുടെ അന്തസ്സും ആരോഗ്യവും സംരക്ഷിക്കുന്നത് സമൂഹം ഒരുക്കുന്ന അടിസ്ഥാനസൗകര്യത്തിന്റെ ഭാഗമായി കാണണമെന്ന് മന്ത്രി ബിന്ദു കൃഷ്ണ പറഞ്ഞു.
വിമന്‍ ഓണ്‍ ദ മൂവ് ആന്‍ഡ് മെന്‍സ്ട്ര്വല്‍ നീഡ്സ് എന്ന് പേരിട്ട പദ്ധതിയിലൂടെ യാത്രാവേളയില്‍ സ്ത്രീകള്‍ക്ക് കുറഞ്ഞ നിരക്കില്‍ സാനിറ്ററി നാപ്കിനുകള്‍ ലഭ്യമാക്കുകയും ഉപയോഗശേഷം പരിസ്ഥിതി സൗഹൃദമായി സംസ്‌കരിക്കുന്നതിന് ഇന്‍സിനറേറ്റര്‍ സൗകര്യം ഒരുക്കുകയും ചെയ്യുന്നു. 14 ജില്ലകളിലും ഓരോ കെഎസ്ആര്‍ടിസി ബസ് ടെര്‍മിനലിലാണ് ആദ്യഘട്ടത്തില്‍ പദ്ധതി നടപ്പാക്കുന്നത്. തമ്പാനൂര്‍, കരുനാഗപ്പള്ളി, പത്തനംതിട്ട, ആലപ്പുഴ, കോട്ടയം, മൂന്നാര്‍, എറണാകുളം സെന്‍ട്രല്‍, തൃശ്ശൂര്‍, പാലക്കാട്, മലപ്പുറം, കോഴിക്കോട്, മാനന്തവാടി, കണ്ണൂര്‍, കാസര്‍ഗോഡ് ബസ് സ്റ്റാന്‍ഡുകളിലാണ് മെഷീന്‍ സ്ഥാപിച്ചിട്ടുള്ളത്. 93 കെഎസ്ആര്‍ടിസി ഡിപ്പോകളിലേക്കും പദ്ധതി വ്യാപിപ്പിക്കും. തുടര്‍ന്ന് ടൂറിസം കേന്ദ്രങ്ങളിലും പൊതുവിടങ്ങളിലും സാനിറ്ററി നാപ്കിന്‍ വെന്‍ഡിംഗ് മെഷീനും ഇന്‍സിനറേറ്ററും സ്ഥാപിക്കും. സര്‍ക്കാരിന്റെ നൂറുദിന കര്‍മപദ്ധതിയുടെ ഭാഗമായാണ് പദ്ധതി നടപ്പാക്കുന്നത്.
കെഎസ്ആര്‍ടിസി ടെര്‍മിനലുകളിലെ ശുചിമുറിക്ക് സമീപമാണ് മെഷീന്‍ സ്ഥാപിച്ചിട്ടുള്ളത്. ഒരു പാക്കറ്റില്‍ മൂന്ന് സാനിറ്ററി നാപ്കിനുകള്‍ ഉണ്ടാകും. 10 രൂപയാണ് വില. എച്ച്.എല്‍.എല്ലിന്റെ സഹകരണത്തോടെയാണ് വനിതാ ശിശുവികസനവകുപ്പ് പദ്ധതി നടപ്പാക്കുന്നത്. മെഷീനുകളുടെ പരിപാലനം കെഎസ്ആര്‍ടിസി നിര്‍വഹിക്കും.
ഉദ്ഘാടനചടങ്ങില്‍ വനിതാ ശിശുവികസനവകുപ്പ് ഡയറക്ടര്‍ വി വിഘ്നേശ്വരി സ്വാഗതം ആശംസിച്ചു. തമ്പാനൂര്‍ വാര്‍ഡ് കൗണ്‍സിലര്‍ ആര്‍ ഹരികുമാര്‍ അധ്യക്ഷത വഹിച്ചു. കെഎസ്ആര്‍ടിസി സിഎംഡി ഡോ. പി എസ് പ്രമോജ് ശങ്കര്‍ ആശംസകള്‍ നേര്‍ന്നു.
by Midhun HP News | Oct 7, 2026 | Latest News, കേരളം
പാലക്കാട്: മണ്ണാർക്കാടിനടുത്ത് കണ്ടമംഗലത്ത് കുടുംബവഴക്കിനൊടുവിൽ വയോധികയായ ഭാര്യക്ക് കുത്തേറ്റു. സംഭവത്തിൽ ഭർത്താവിനെ മണ്ണാർക്കാട് പൊലീസ് കസ്റ്റഡിയിലെടുത്തു. കണ്ടമംഗലം സ്വദേശി രാമചന്ദ്രൻ (72), ഭാര്യ ശാന്ത എന്നിവർക്കാണ് പരസ്പരമുള്ള ആക്രമണത്തിൽ പരിക്കേറ്റത്. ഇന്നലെ രാത്രി എട്ടരയോടെയാണ് സംഭവം.
വീട്ടിലുണ്ടായ വാക്കുതർക്കം രൂക്ഷമായതോടെ രാമചന്ദ്രൻ കൈയിലുണ്ടായിരുന്ന കത്തിയെടുത്ത് ശാന്തയെ കുത്തുകയായിരുന്നു. കുത്തേറ്റ് ചോരവാർന്ന നിലയിലും ശാന്ത സമീപത്തുണ്ടായിരുന്ന വടിയെടുത്ത് രാമചന്ദ്രനെ ശക്തമായി തിരിച്ചടിച്ചു. ബഹളം കേട്ടെത്തിയ നാട്ടുകാരും വിവരമറിഞ്ഞെത്തിയ പൊലീസും ചേർന്ന് ചോരയിൽ കുളിച്ചുകിടന്ന ഇരുവരെയും ഉടൻതന്നെ വട്ടമ്പലത്തെ സ്വകാര്യ ആശുപത്രിയിൽ എത്തിച്ചു.പ്രാഥമിക ചികിത്സയ്ക്ക് ശേഷം ഇരുവരെയും പാലക്കാട് ജില്ലാ ആശുപത്രിയിലേക്ക് മാറ്റിയെങ്കിലും ശാന്തയുടെ വയറ്റിലേറ്റ മുറിവ് ആഴത്തിലുള്ളതായതിനാൽ വിദഗ്ദ്ധ ചികിത്സയ്ക്കായി ഇവരെ തൃശൂർ മെഡിക്കൽ കോളജ് ആശുപത്രിയിലേക്ക് മാറ്റി . തലയ്ക്കടിയേറ്റ രാമചന്ദ്രനെ പൊലീസ് നിരീക്ഷണത്തിൽ ചികിത്സ നൽകിയ ശേഷം കസ്റ്റഡിയിലെടുത്തു.മണ്ണാർക്കാട് പൊലീസ് അന്വേഷണം ആരംഭിച്ചിട്ടുണ്ട്.
by Midhun HP News | Oct 7, 2026 | Latest News, ദേശീയ വാർത്ത
മുംബൈ: പണപ്പെരുപ്പം പിടിച്ചുനിര്‍ത്തുന്നതിന് മുഖ്യ പലിശനിരക്ക് കൂട്ടി റിസര്‍വ് ബാങ്കിന്റെ പണ, വായ്പ നയ പ്രഖ്യാപനം. റിപ്പോ നിരക്കില്‍ കാല്‍ശതമാനത്തിന്റെ വര്‍ധനയാണ് വരുത്തിയത്. റിപ്പോ നിരക്കില്‍ 25 ബേസിക് പോയിന്റിന്റെ വര്‍ധന വരുത്തിയതോടെ റിപ്പോ നിരക്ക് 5.50 ശതമാനമായി ഉയര്‍ന്നു. റിപ്പോ നിരക്ക് കൂട്ടിയതോടെ ഭവന, വാഹന വായ്പകളുടെ പലിശ നിരക്ക് ഉയരും.
മൂന്ന് വര്‍ഷത്തിന് ശേഷമാണ് റിപ്പോ നിരക്കില്‍ വര്‍ധനവുണ്ടാകുന്നത്. 2025ല്‍ വിവിധ ഘട്ടങ്ങളിലായി റിപ്പോനിരക്കില്‍ 125 ബേസിക് പോയിന്റിന്റെ കുറവാണ് റിസര്‍വ് ബാങ്ക് വരുത്തിയത്. തുടര്‍ന്നുള്ള നാല് പോളിസി മീറ്റിങ്ങുകളില്‍ റിപ്പോ നിരക്ക് 5.25 ശതമാനമായി നിലനിര്‍ത്തിയിരുന്നു.
വര്‍ധിച്ചുവരുന്ന പണപ്പെരുപ്പ അപകടസാധ്യതകളും ക്രൂഡ് ഓയില്‍ വിലയിലെ വര്‍ധനയുമാണ് പലിശനിരക്ക് കൂട്ടാന്‍ റിസര്‍വ് ബാങ്കിനെ പ്രേരിപ്പിച്ചത്. 2027 സാമ്പത്തിക വര്‍ഷത്തില്‍ കൂടുതല്‍ പലിശ വര്‍ധനയ്ക്കുള്ള സാധ്യതയും വിദഗ്ധര്‍ പ്രവചിക്കുന്നു.
Recent Comments