by Midhun HP News | Sep 25, 2026 | Latest News, കായികം
നഗോയ: ഏഷ്യന്‍ ഗെയിംസ് പുരുഷ ടി20 ക്രിക്കറ്റ് പോരാട്ടത്തില്‍ കരുത്തരായ അഫ്ഗാനിസ്ഥാനെ അട്ടിമറിച്ച് നേപ്പാള്‍! 5 വിക്കറ്റ് വിജയമാണ് നേപ്പാള്‍ ആഘോഷിച്ചത്. ആദ്യം ബാറ്റ് ചെയ്ത അഫ്ഗാനിസ്ഥാന്‍ നിശ്ചിത ഓവറില്‍ 7 വിക്കറ്റ് നഷ്ടത്തില്‍ 102 റണ്‍സ് മാത്രമാണ് നേടിയത്. നേപ്പാള്‍ 17.2 ഓവറില്‍ 5 വിക്കറ്റ് നഷ്ടത്തില്‍ 103 റണ്‍സ് അടിച്ചെടുത്താണ് വിജയം സ്വന്തമാക്കിയത്.
34 റണ്‍സെടുത്ത സന്ദീപ് ജോറയാണ് നേപ്പാളിന്റെ ടോപ് സ്‌കോറര്‍. 33 റണ്‍സെടുത്ത രോഹിത് പോഡലും തിളങ്ങി. ക്യാപ്റ്റന്‍ ദീപേന്ദ്ര സിങ് അയ്‌രിയാണ് (15) രണ്ടക്കം കടന്ന മറ്റൊരാള്‍. മൂവരുടേയും അവസരോചിത ബാറ്റിങാണ് ടീമിന് അവിസ്മരണീയ വിജയം സമ്മാനിച്ചത്.
നേരത്തെ ആദ്യം ബാറ്റ് ചെയ്ത അഫ്ഗാന്‍ ബാറ്റിങ് നിരയെ നേപ്പാള്‍ വെള്ളം കുടിപ്പിച്ചു. 4 ഓവറില്‍ 21 റണ്‍സ് വഴങ്ങി 4 വിക്കറ്റുകള്‍ വീഴ്ത്തിയ കുശാല്‍ ബുര്‍ടല്‍, 4 ഓവറില്‍ 13 റണ്‍സ് മാത്രം വഴങ്ങി 3 വിക്കറ്റെടുത്ത ലളിത് രാജ്ബന്‍ഷി എന്നിവരുടെ ബൗളിങാണ് അഫ്ഗാനെ അടിതെറ്റിച്ചത്.
30 വീതം റണ്‍സെടുത്ത ഫൈസല്‍ഖാന്‍ അഹമദ്‌സായ്, നജിബുല്ല സാദ്രാന്‍ എന്നിവര്‍ക്ക് മാത്രമാണ് പിടിച്ചു നില്‍ക്കാന്‍ സാധിച്ചത്. എട്ടാമനായി എത്തി പുറത്താകാതെ 17 റണ്‍സടിച്ച നന്‍ഗെയാലിയ ഖാന്‍ ആണ് സ്‌കോര്‍ 100 കടത്തിയത്.
by Midhun HP News | Sep 24, 2026 | Latest News, കായികം, ജില്ലാ വാർത്ത
നഗോയ: ഏഷ്യന്‍ ഗെയിംസില്‍ ഇന്ത്യയ്ക്ക് വെള്ളി മെഡല്‍ ലഭിച്ചു. വുഷുവില്‍ ഇന്ത്യന്‍ താരം റോഷിബിന ദേവിയാണ് വെള്ളി മെഡല്‍ നേടിയത്. ഫൈനലില്‍ ചൈനയുടെ ഴാങ് സിയൂവിനോട് ഇന്ത്യയുടെ റോഷിബിന പരാജയപ്പെടുകയായിരുന്നു. തുഴച്ചിലില്‍ ഇന്ത്യയ്ക്ക് വെങ്കലവും ലഭിച്ചിട്ടുണ്ട്.
വുഷു വനിതാ വിഭാഗം 60 കിലോഗ്രാം വിഭാഗത്തില്‍ കടുത്ത പോരാട്ടത്തിനൊടുവിലാണ് രോഷിബിന പരാജയം സമ്മതിച്ചത്. ഏഷ്യന്‍ ഗെയിംസില്‍ വുഷുവില്‍ റോഷിബിനയുടെ ഹാട്രിക് മെഡല്‍ നേട്ടമാണിത്. 2018 ഏഷ്യന്‍ ഗെയിംസില്‍ വെങ്കലവും, 2022 ല്‍ വെള്ളിയും നേടിയിരുന്നു.
തുഴച്ചിലില്‍ ഇന്ത്യയുടെ സല്‍മാന്‍ ഖാന്‍- സത്‌നം സിങ് സഖ്യമാണ് വെങ്കലം നേടിയത്. പുരുഷ വിഭാഗം ഡബിള്‍ സ്‌കള്‍സിലാണ് ഇന്ത്യന്‍ ജോഡി മെഡല്‍ നേടിയത്. തുഴച്ചില്‍ മത്സരങ്ങളില്‍ ഇന്ത്യയുടെ ആദ്യ മെഡല്‍ നേട്ടമാണിത്. മെഡല്‍ വേട്ടയില്‍ ചൈനയാണ് ഒന്നാമത്. ഒരു സ്വര്‍ണം അടക്കം 13 മെഡലുകളുമായി ഇന്ത്യ 14-ാം സ്ഥാനത്താണ്.
by Midhun HP News | Sep 22, 2026 | Latest News, കായികം
നഗോയ: ഏഷ്യന്‍ ഗെയിംസില്‍ ഇന്ത്യയുടെ ആദ്യ സ്വര്‍ണം വനിതാ ക്രിക്കറ്റ് ടീമിലൂടെ. കഴിഞ്ഞ തവണ സ്വന്തമാക്കിയ സ്വര്‍ണം ഹര്‍മന്‍പ്രീതും സംഘവും ഇത്തവണയും നിലനിര്‍ത്തി. ഏഷ്യാ കപ്പില്‍ പരാജയപ്പെടുത്തി കിരീടം സ്വന്തമാക്കിയതിനു പിന്നാലെ ശ്രീലങ്കന്‍ വനിതകളെ ഏഷ്യന്‍ ഗെയിംസ് ഫൈനലിലും ഇന്ത്യ വീഴ്ത്തി. 147 റണ്‍സിന്റെ പടുകൂറ്റന്‍ ജയത്തോടെയാണ് ഇന്ത്യയുടെ സ്വര്‍ണ വേട്ട. ബാറ്റിങിലും ബൗളിങിലും ഇന്ത്യന്‍ വനിതകളുടെ സമ്പൂര്‍ണ ആധിപത്യമാണ് ഗ്രൗണ്ടില്‍ കണ്ടത്.
ആദ്യം ബാറ്റ് ചെയ്ത ഇന്ത്യ നിശ്ചിത ഓവറില്‍ റെക്കോര്‍ഡ് ടോട്ടലാണ് പടുത്തുയര്‍ത്തിയത്. 3 വിക്കറ്റ് നഷ്ടത്തില്‍ 216 റണ്‍സ്. വിജയത്തിലേക്ക് ബാറ്റെടുത്ത ശ്രീലങ്കയുടെ പോരാട്ടം 15.4 ഓവറില്‍ വെറും 69 ണ്‍സില്‍ അവസാനിപ്പിക്കാന്‍ ഇന്ത്യയ്ക്കു സാധിച്ചു.
ഏഷ്യന്‍ ഗെയിംസില്‍ ഇതോടെ ഇന്ത്യയുടെ ആകെ മെഡല്‍ 7 ആയി. ഒരു സ്വര്‍ണം, 4 വെള്ളി, 2 വെങ്കലം മെഡലുകളാണ് ഇന്ത്യ സ്വന്തമാക്കിയത്.
ഇന്ത്യക്കായി ഒരിക്കല്‍ കൂടി സ്പിന്നര്‍മാര്‍ കളം വാണു. ദീപ്തി ശര്‍മ, ശ്രേയങ്ക പാട്ടീല്‍, ഷെഫാലി വര്‍മ, ശ്രീചരണി എന്നിവരുടെ പന്തുകള്‍ക്ക് മുന്നില്‍ ലങ്കന്‍ വനിതകള്‍ ഉത്തരംമുട്ടി നിന്നു. ദീപ്തി 4 ഓവറില്‍ വെറും 6 റണ്‍സ് മാത്രം വഴങ്ങി 3 വിക്കറ്റുകള്‍ വീഴ്ത്തി. ഷെഫാലി, ശ്രീചരണി, ശ്രേയങ്ക പാട്ടീല്‍ എന്നിവര്‍ 2 വീതം വിക്കറ്റുകള്‍ സ്വന്തമാക്കി.
കൂറ്റന്‍ ലക്ഷ്യത്തിലേക്ക് ബാറ്റെടുത്ത ശ്രീലങ്കന്‍ നിരയില്‍ ക്യാപ്റ്റന്‍ ചമരി അട്ടപ്പട്ടുവിന് മാത്രമാണ് ക്രീസില്‍ കുറച്ചു നേരമെങ്കിലും പിടിച്ചു നില്‍ക്കാന്‍ പറ്റിയത്. താരം 21 പന്തില്‍ 5 ഫോറുകള്‍ സഹിതം 29 റണ്‍സെടുത്തു. എന്നാല്‍ ദീപ്തി ശര്‍മ ബൗള്‍ ചെയ്യാന്‍ വന്നതിനു പിന്നാലെ ക്യാപ്റ്റന്റെ ചെറുത്തു നില്‍പ്പും അവസാനിച്ചു. കവിഷ ദില്‍ഹരിയാണ് രണ്ടക്കം കടന്ന മറ്റൊരു ശ്രീലങ്കന്‍ ബാറ്റര്‍. എന്നാല്‍ താരത്തിനും അധികം ആയുസുണ്ടായില്ല. ദീപ്തി തന്നെ കവിഷയേയും മടക്കി. 11 റണ്‍സാണ് താരം നേടിയത്. പുറത്താകാതെ 14 റണ്‍സെടുത്ത കൗശിനി നുത്യാംഗനയാണ് പിടിച്ചു നില്‍ക്കാന്‍ നോക്കിയ മറ്റൊരാള്‍. താരമാണ് ലങ്കന്‍ നിരയില്‍ ഏക സിക്‌സര്‍ പറത്തിയത്.
ഏഷ്യന്‍ ഗെയിംസ് വനിതാ ക്രിക്കറ്റില്‍ ഒരു ടീം നേടുന്ന ഏറ്റവും വലിയ ടീം ടോട്ടലെന്ന റെക്കോര്‍ഡ് സ്‌കോറുയര്‍ത്തിയാണ് ഇന്ത്യ കളം വാണത്. ഹോങ്കോങ് ചൈന മംഗോളിയക്കെതിരെ നേടിയ 202 റണ്‍സായിരുന്നു ഇതുവരെയുള്ള മികച്ച ടോട്ടല്‍. ഈ റെക്കോര്‍ഡാണ് ഇന്ത്യ പഴങ്കഥയാക്കിയത്.
ടോസ് നേടി ആദ്യം ബാറ്റ് ചെയ്ത ഇന്ത്യ അര്‍ധ സെഞ്ച്വറി നേടിയ വൈസ് ക്യാപ്റ്റന്‍ സ്മൃതി മന്ധാനയുടേയും സ്മൃതിയ്‌ക്കൊപ്പം മിന്നല്‍ തുടക്കം നല്‍കിയ ഷെഫാലി വര്‍മയുടേയും ഫോമിലേക്ക് മടങ്ങിയെത്തിയ വിക്കറ്റ് കീപ്പര്‍ ബാറ്റര്‍ റിച്ച ഘോഷിന്റേയും ബാറ്റിങ് കരുത്തിലാണ് റെക്കോര്‍ഡ് സ്‌കോര്‍ ഉയര്‍ത്തിയത്. സ്മൃതി 45 പന്തില്‍ 7 സിക്‌സും 5 ഫോറും സഹിതം 79 റണ്‍സെടുത്തു. ഷെഫാലി മൂന്ന് വീതം സിക്‌സും ഫോറും സഹിതം 29 പന്തില്‍ 48 റണ്‍സുമായും മടങ്ങി.
പിന്നാലെയാണ് റിച്ചയുടെ കാമിയോ ഇന്നിങ്സ്. ഫോം കണ്ടെത്താന്‍ സാധിക്കാതെ വിഷമിച്ച താരം നിര്‍ണായക പോരാട്ടത്തില്‍ മികവിലേക്ക് ഉയര്‍ന്നത് ഇന്ത്യക്ക് ബലമായി. റിച്ച 22 പന്തില്‍ 6 ഫോറും 3 സിക്‌സും സഹിതം 49 റണ്‍സുമായി പുറത്താകാതെ നിന്നു. അവസാന ഓവറില്‍ രണ്ട് സിക്‌സും ഒരു ഫോറും സഹിതം ഇന്ത്യ 25 റണ്‍സ് വാരിയാണ് 216 റണ്‍സെന്ന മി്കച്ച ടോട്ടല്‍ ഉയര്‍ത്തിയത്.
ബാറ്റിങിന് ഇറങ്ങിയ ഇന്ത്യക്കായി സ്മൃതി- ഷെഫാലി സഖ്യം പറക്കും തുടക്കമാണ് നല്‍കിയത്. ഓപ്പണിങില്‍ ഇരുവരും ചേര്‍ന്നു 10 ഓവറില്‍ 99 റണ്‍സെടുത്താണ് പിരിഞ്ഞത്. പത്താം ഓവറിലെ അവസാന പന്തിലാണ് ഷെഫാലി അര്‍ധ സെഞ്ച്വറിക്ക് രണ്ട് റണ്‍സ് അകലെ വീഴുന്നത്. ബംഗ്ലാദേശിനെതിരെ കത്തും ഫോമില്‍ ബാറ്റ് വീശിയ ഇരുവരും സമാന മികവ് ഫൈനലിലും ആവര്‍ത്തിച്ചു.
ക്യാപ്റ്റന്‍ ഹര്‍മന്‍പ്രീത് കൗര്‍ 17 പന്തില്‍ 19 റണ്‍സുമായി മടങ്ങി. ഭാരതി ഫൂല്‍മാലി 7 റണ്‍സുമായി പുറത്താകാതെ നിന്നു.
by Midhun HP News | Sep 19, 2026 | Latest News, കായികം, ജില്ലാ വാർത്ത
നഗോയ: ഏഷ്യയുടെ ഏറ്റവും വലിയ കായിക മാമാങ്കമായ ഏഷ്യന്‍ ഗെയിംസിന്റെ ഔദ്യോഗിക ഉദ്ഘാടനം ഇന്ന്. നഗോയയിലെ പലോമ മിസുഹോ അത്‌ലറ്റിക് സ്‌റ്റേഡിയത്തില്‍ ഇന്ത്യന്‍ സമയം ഉച്ചയ്ക്ക് 2.30 മുതലാണ് ഉദ്ഘാടന ചടങ്ങുകള്‍. ജപ്പാന്‍ ചക്രവര്‍ത്തി നാരുഹിതോ ചടങ്ങുകള്‍ ഉദ്ഘാടനം ചെയ്യും. ചക്രവര്‍ത്തിനി മസാകോ, രാജകുമാരന്‍ അകിഷിനോ, രാജകുമാരി കികോ എന്നിവരും ചടങ്ങില്‍ പങ്കെടുക്കും. ഗെയിംസിന്റെ ഓണററി പ്രസിഡന്റാണ് രാജകുമാരന്‍ അകിഷിനോ. ജപ്പാനിലെ പ്രമുഖരായ കായിക താരങ്ങളും ചടങ്ങിനെത്തും.
ജപ്പാന്റെ ചരിത്രവും കലാ സാസ്‌കാരിക പാരമ്പര്യവും നിറയുന്ന ദൃശ്യ വിരുന്നും ഉദ്ഘാടന ചടങ്ങില്‍ അരങ്ങേറും. ‘ചേര്‍ച്ചയുള്ള ഹൃദയതാളം’ എന്ന ആശയത്തിലാണ് പരിപാടികള്‍. ‘ഒരൊറ്റ ഏഷ്യ’ എന്ന സങ്കല്‍പ്പമാണ് ഏഷ്യന്‍ ഗെയിംസിന്റെ ആശയം. ഹോനോഹോന്‍ ആണ് ഇത്തവണത്തെ ഭാഗ്യചിഹ്നം. ഉദ്ഘാടന ചടങ്ങുകൾ സോണി സ്പോർട്സ് ചാനലുകളിലും ഓൺ ലൈനിൽ സോണി ലിവിലും തത്സമയം കാണാം.
ഒറ്റ ഒളിംപിക്സിൽ രണ്ട് മെഡലുകൾ നേടിയ ഷൂട്ടർ മനു ഭാക്കറും ഷോട്പുട്ടിൽ തുടരെ രണ്ട് തവണ ഏഷ്യൻ ഗെയിംസ് സ്വർണം സ്വന്തമാക്കിയ തജീന്ദർപാൽ സിങും ഉദ്ഘാടന വേദിയിൽ ഇന്ത്യൻ പതാകയേന്തും. ഇന്ത്യൻ കായിക രംഗത്തെ രണ്ട് തലമുറകളെ പ്രതിനിധാനം ചെയ്യുന്ന താരങ്ങളാണ് ഇരുവരും. 503 അംഗങ്ങളുള്ള വമ്പൻ സംഘമാണ് ഇന്ത്യയ്ക്കായി ഇത്തവണ ഗെയിംസിനായി കളത്തിൽ ഇറങ്ങുന്നത്.
കഴിഞ്ഞ 75 വര്‍ഷമായി അരങ്ങേറുന്ന പോരാട്ടത്തിന്റെ 20ാം അധ്യായമാണ് ഇത്തവണ. 45 രാജ്യങ്ങളില്‍ നിന്നുള്ള കായിക താരങ്ങള്‍ 43 മത്സരങ്ങളിലാണ് മാറ്റുരയ്ക്കുന്നത്. ക്രിക്കറ്റ് അടക്കമുള്ള ചില പോരാട്ടങ്ങള്‍ നേരത്തെ തന്നെ ആരംഭിച്ചിട്ടുണ്ട്.
ജപ്പാന്‍ ഇത് മൂന്നാം തവണയാണ് ആതിഥേയരാകുന്നത്. 1958ല്‍ ടോക്യോയും 1994ല്‍ ഹിരോഷിമയുമാണ് വേദികളായത്. ഇത്തവണ ജപ്പാന്റെ തുറമുഖ നഗരമായ ഐച്ചി നഗോയയിലാണ് പോരാട്ടങ്ങള്‍. 16 ദിവസമാണ് ഏഷ്യന്‍ ഗെയിംസ് പോരാട്ടങ്ങള്‍ ഇത്തവണ അരങ്ങേറുന്നത്. ഓഗസ്റ്റ് 22 മുതല്‍ ആരംഭിച്ച ദീപശിഖ യാത്ര ഉദ്ഘാടന വേദിയില്‍ അവസാനിപ്പിക്കും. ദീപ ശിഖയില്‍ നിന്നുള്ള ദീപം വേദിയിലെ കൂറ്റന്‍ ദീപത്തിലേക്ക് പകരുന്നതോടെ മത്സരങ്ങള്‍ക്ക് ഔദ്യോഗിക ആരംഭമാകും.
അത്‌ലറ്റിക്‌സ് മത്സരങ്ങള്‍ ഈ മാസം 23 മുതലാണ് ആരംഭിക്കുന്നത്. കഴിഞ്ഞ തവണ ഗെയിംസില്‍ ഇന്ത്യ മികച്ച പ്രകടനമാണ് നടത്തിയത്. 28 സ്വര്‍ണം ഉള്‍പ്പെടെ 106 മെഡലുകള്‍ നേടി ഇന്ത്യ നാലാം സ്ഥാനത്തെത്തി. ചൈനയാണ് നിലവിലെ ചാംപ്യന്‍മാര്‍.
നിലവില്‍ ടെക്‌ബോള്‍ വനിതാ സിംഗിള്‍സില്‍ ഇന്ത്യയുടെ ജോക്കിം ഡിസൂസ സെമിയിലെത്തിയിട്ടുണ്ട്. മിക്‌സഡ് ഡബിള്‍സില്‍ ജോക്കിം ഡിസൂസയും മുഹമ്മദ് അനസും ചേര്‍ന്ന സഖ്യം വെങ്കല മെഡല്‍ പോരിനും യോഗ്യത നേടിയിട്ടുണ്ട്.
വനിതാ ടി20 ക്രിക്കറ്റിലെ നിലവിലെ സ്വര്‍ണ ജേതാക്കളായ ഇന്ത്യ ഇത്തവണയും സെമിയിലെത്തിയിട്ടുണ്ട്. ആതിഥേയരായ ജപ്പാനെ ക്വാര്‍ട്ടറില്‍ വീഴ്ത്തിയാണ് ഇന്ത്യന്‍ മുന്നേറ്റം. ബംഗ്ലാദേശാണ് സെമിയിലെ എതിരാളികള്‍.
by Midhun HP News | Sep 18, 2026 | Latest News, കായികം
നഗോയ: ഏഷ്യന്‍ ഗെയിംസ് വനിതാ ക്രിക്കറ്റ് സ്വര്‍ണം നിലനിര്‍ത്താന്‍ ഇന്ത്യ ഇറങ്ങുന്നു. ക്വാര്‍ട്ടറിലേക്ക് നേരിട്ട് പ്രവേശനം കിട്ടിയ ഹര്‍മന്‍പ്രീത് കൗറും സംഘവും ഇന്ന് ആതിഥേയരായ ജപ്പാനെയാണ് നേരിടാനിറങ്ങുന്നത്. ജയിച്ചാല്‍ സെമി ഉറപ്പിക്കാം. നഗോയയിലെ നിഷിനില്‍ കൊറോഗി സ്‌പോര്‍ട്‌സ് പാര്‍ക്കില്‍ ഇന്ന് രാവിലെ ഇന്ത്യന്‍ സമയം 10.30 മുതലാണ് പോരാട്ടം. കഴിഞ്ഞ തവണ ശ്രീലങ്കയെ 19 റണ്‍സിന് വീഴ്ത്തിയാണ് ഇന്ത്യ സ്വര്‍ണം സ്വന്തമാക്കിയത്.
കഴിഞ്ഞ ദിവസം എട്ടാം തവണയും ഏഷ്യാ കപ്പ് കിരീടം ഇന്ത്യ നേടിയിരുന്നു. കിരീട നേട്ടത്തിന്റെ ആത്മവിശ്വാസത്തിലാണ് ഇന്ത്യ ഏഷ്യന്‍ ഗെയിംസ് പോരിനെത്തുന്നത്.ഓപ്പണിങില്‍ സ്മൃതി മന്ധാനയും ഷെഫാലി വര്‍മയും ചേര്‍ന്ന സഖ്യം മിന്നും ഫോമിലാണ്. ഇരുവരുടേയും സ്പിന്നര്‍മാര്‍ടേയും മികവിലാണ് കഴിഞ്ഞ ദിവസം ഇന്ത്യ ഏഷ്യാ കപ്പുയര്‍ത്തിയത്. അതേസമയം മധ്യനിര വേണ്ടത്ര സ്ഥിരത പുലര്‍ത്താത്തത് ഇന്ത്യക്ക് ആശങ്കയുണ്ടാക്കുന്നുണ്ട്.
സെമിക്ക് മുന്‍പുള്ള പരിശീലന മത്സരമായിരിക്കും ഇന്ത്യയെ സംബന്ധിച്ച് ഇന്നത്തെ പോര്. കഴിഞ്ഞ ഏഷ്യന്‍ ഗെയിംസില്‍ ക്രിക്കറ്റില്‍ പങ്കെടുക്കാത്ത രാജ്യമാണ് ജപ്പാന്‍. അവസാനമായി അവര്‍ ഒരു അന്താരാഷ്ട്രി മത്സരം കളിച്ചത് ഏഷ്യന്‍ ക്രിക്കറ്റ് കൗണ്‍സില്‍ സംഘടിപ്പിച്ച പ്രീമിയര്‍ കപ്പിലാണ്. ഇതില്‍ വിജയിക്കുന്ന ടീമുകള്‍ക്കാണ് വനിതാ ഏഷ്യ കപ്പ് ടി20യില്‍ കളിക്കാന്‍ യോഗ്യത കിട്ടുന്നത്.
ഇന്ത്യന്‍ ടീം: ഹര്‍മന്‍പ്രീത് കൗര്‍ (ക്യാപ്റ്റന്‍), സ്മൃതി മന്ധാന, ഷെഫാലി വര്‍മ, റിച്ച ഘോഷ്, ദീപ്തി ശര്‍മ, ഭാര്‍തി ഫൂല്‍മാലി, ഗുന്‍ലാല്‍ കമാലിനി, ശ്രീചരണി, ക്രാന്തിഗൗഡ്, നന്ദനി ശര്‍മ, രാധാ യാദവ്, അരുന്ധതി റെഡ്ഡി, രേണുക സിങ്, ശ്രേയങ്ക പാട്ടീല്‍.
by Midhun HP News | Sep 14, 2026 | Latest News, കായികം
ലണ്ടൻ: ടെസ്റ്റ് ക്രിക്കറ്റിൽ റെക്കോർഡുകൾ സ്ഥാപിച്ച് മുന്നേറുന്ന ഇംഗ്ലണ്ട് നായകൻ ജോ റൂട്ടിന് മറ്റൊരു അപൂർവ നേട്ടം കൂടി. ടെസ്റ്റ് ക്രിക്കറ്റിന്റെ 147 വർഷത്തെ ചരിത്രത്തിൽ ആദ്യമായി നാലാം ഇന്നിങ്സിൽ 2000 റൺസ് തികയ്ക്കുന്ന ആദ്യ ബാറ്ററെന്ന അപൂർവ നേട്ടമാണ് താരം സ്വന്തമാക്കിയത്. പാകിസ്ഥാനെതിരായ മൂന്നാം ടെസ്റ്റ് പോരാട്ടത്തിന്റെ രണ്ടാം ഇന്നിങ്സിൽ ഇംഗ്ലണ്ടിനായി അർധ സെഞ്ച്വറി നേടി പുറത്താകാതെ നിന്നാണ് റൂട്ട് നേട്ടത്തിലെത്തിയത്. രണ്ടാം ഇന്നിങ്സിൽ ഇംഗ്ലീഷ് നായകൻ 62 റൺസെടുത്തു.
ടെസ്റ്റ് ക്രിക്കറ്റിൽ ഒരു ബാറ്ററെ സംബന്ധിച്ച് നാലാം ഇന്നിങ്സ് ബാറ്റിങ് എന്നത് കനത്ത വെല്ലുവിളിയാണ്. പിച്ച് ബാറ്റിങിനു ഏറ്റവും ദുഷ്കരമാകുന്ന ഘട്ടമായിരിക്കും ഒരു ടെസ്റ്റിന്റെ നാലാം ഇന്നിങ്സ്. ലക്ഷ്യം മുന്നിൽ വച്ചുള്ള ബാറ്റിങാകുമ്പോൾ ഓരോ വിക്കറ്റും നിർണായകമാണ്. അതിന്റെ സമ്മർദ്ദവും ബാറ്റർക്കുണ്ടാകും. എന്നാൽ റൂട്ട് ഈ സമ്മർദ്ദ സാഹചര്യങ്ങളെ കരുത്താക്കി മാറ്റിയാണ് 2000 റൺസെന്ന അപൂർവ നേട്ടം സ്വന്തമാക്കിയത്.
റൂട്ടിന് പിന്നിൽ നേട്ടത്തിലുള്ളവരിൽ ഒരാൾ പോലും 1700 റൺസിന് മുകളിൽ നാലാം ഇന്നിങ്സിൽ റൺസെടുത്തിട്ടില്ലെന്ന പ്രത്യേകതയമുണ്ട്. റൂട്ടിന് നിലവിൽ 2059 റൺസുണ്ട്. സച്ചിന് 1625 റൺസും അലിസ്റ്റർ കുക്കിനും ഗ്രെയിം സ്മിത്തിനും 1611 റൺസ് വീതവും ശിവ്നരയെൻ ചന്ദർ പോളിന് 1580 റൺസുമാണ് നാലാം ഇന്നിങ്സിലുള്ളത്.
ടെസ്റ്റിൽ ഏറ്റവും കൂടുതൽ ഫിഫ്റ്റി
ഇന്ത്യൻ ഇതിഹാസം സച്ചിൻ ടെണ്ടുൽക്കറുടെ മറ്റൊരു ടെസ്റ്റ് റെക്കോർഡ് റൂട്ട് കഴിഞ്ഞ ദിവസം തകർത്തിരുന്നു. ടെസ്റ്റിൽ ഏറ്റവും കൂടുതൽ അർധ സെഞ്ച്വറികൾ നേടുന്ന താരമെന്ന സച്ചിന്റെ റെക്കോർഡാണ് റൂട്ട് സ്വന്തം പേരിലേക്ക് മാറ്റിയത്. പാകിസ്ഥാനെതിരായ രണ്ടാം ഇന്നിങ്സിലെ അർധ സെഞ്ച്വറിക്കു പിന്നാലെയാണ് റെക്കോർഡ് നേട്ടം. ടെസ്റ്റിൽ ഇംഗ്ലീഷ് നായകൻ നേടുന്ന 69ാം അർധ സെഞ്ച്വറിയാണിത്. സച്ചിൻ 68 അർധ സെഞ്ച്വറികളാണ് റെഡ് ബോൾ ക്രിക്കറ്റിൽ സ്വന്തമാക്കിയത്.
എഡ്ജ്ബാസ്റ്റനിൽ നടന്ന മൂന്നാമത്തേയും അവസാനത്തേയും ടെസ്റ്റിൽ ഇംഗ്ലണ്ടിന് 130 റൺസായിരുന്നു ലക്ഷ്യം. ഈ ലക്ഷ്യത്തിലേക്ക് ബാറ്റ് ചെയ്യവേയാണ് റൂട്ട് പുറത്താകാതെ 69 പന്തിൽ 62 റൺസ് അടിച്ചെടുത്തത്. 8 ഫോറുകൾ സഹിതമാണ് അർധ സെഞ്ച്വറി.
1000 റൺസ്
എഡ്ജ്ബാസ്റ്റൻ പിച്ചിൽ 1000 റൺസിലധികം നേടുന്ന ആദ്യ ബാറ്ററെന്ന നേട്ടവും മത്സരത്തിൽ റൂട്ട് സ്വന്തമാക്കി. ഇംഗ്ലണ്ടിലെ നാല് വ്യത്യസ്ത ടെസ്റ്റ് വേദികളിൽ ആയിരം അതിനു മുകളിൽ റൺസ് നേടുന്ന താരമായും റൂട്ട് മാറി. ലോർഡ്സിൽ 2203 റൺസും മാഞ്ചസ്റ്ററിൽ 1128 റൺസും, ഓവലിൽ 1050 റൺസും റൂട്ട് നേടിയിട്ടുണ്ട്. നേരത്തെ ദക്ഷിണാഫ്രിക്കൻ ഇതിഹാസം ജാക്വിസ് കാലിസും ഓസ്ട്രേലിയൻ ഇതിഹാസം റിക്കി പോണ്ടിങും സമാന നേട്ടം സ്വന്തം നാട്ടിലെ പിച്ചുകളിൽ സ്വന്തമാക്കിയിട്ടുണ്ട്.
പാകിസ്ഥാനെതിരായ മൂന്ന് ടെസ്റ്റ് മത്സരങ്ങളടങ്ങിയ പരമ്പര 3-0ത്തിന് ഇംഗ്ലണ്ട് തൂത്തുവാരി. മൂന്നാമത്തേയും അവസാനത്തേയും ടെസ്റ്റില്‍ 8 വിക്കറ്റ് വിജയം സ്വന്തമാക്കിയാണ് ഇംഗ്ലണ്ട് പരമ്പര പിടിച്ചത്. 130 റണ്‍സ് വിജയ ലക്ഷ്യത്തിലേക്ക് ബാറ്റേന്തിയ ആതിഥേയര്‍ 2 വിക്കറ്റ് നഷ്ടത്തില്‍ ലക്ഷ്യത്തിലെത്തി.
Recent Comments