by Midhun HP News | Sep 24, 2026 | Latest News, ജില്ലാ വാർത്ത
ആറ്റിങ്ങൽ ദേശീയപാതയിൽ മാമം ജംക്ഷന് സമീപത്തെ വളവ്, അപകടക്കെണിയാകുന്നതായി പരാതി. മാമം ജംക്ഷന് സമീപം തിരക്കേറിയ ഭാഗത്തോട് ചേർന്ന വളവിൽ അപകടങ്ങൾ പതിവാണന്ന് നാട്ടുകാർ പറയുന്നു.കഴിഞ്ഞ ദിവസം ഇവിടെ രണ്ട് അപകടങ്ങൾ നടന്നു. പുലർച്ചെയോടെ കരുനാഗപ്പള്ളി സ്വദേശികൾ എയർപോർട്ടിലേക്ക് പോയ വാഹനം റോഡരികിലെ മൺതിട്ടയിലേക്ക് ഇടിച്ചു കയറി നഗരസഭ സ്ഥാപിച്ചിരുന്ന തെരുവുവിളക്കുകൾ തകർത്തു.
വൈകുന്നേരം ഉണ്ടായ മറ്റൊരു അപകടത്തിൽ സൂപ്പർഫാസ്റ്റും ഇരുചക്ര വാഹനവും കൂട്ടിയിടിച്ചു. രണ്ട് അപകടങ്ങളിലും വാഹനങ്ങൾ തകർന്നുവെങ്കിലും ആളപായമില്ല. വലിയകുന്ന് താലൂക്ക് ആശുപത്രി, ചിറ്റാറ്റിൻകര- ഇട‌യ്ക്കോട് ഭാഗങ്ങളിൽ നിന്നുള്ള വാഹനങ്ങൾ ദേശീയ പാതയിലേക്ക് കയറുന്നത് ഈ വളവിനോട് ചേർന്നാണ് .
ഈ വഴി ദേശീയ പാതയിലേയ്ക്ക് കയറുന്ന വാഹനങ്ങൾക്കും, തിരിച്ച് ദേശീയ പാതയിലേക്ക് ഇറങ്ങുന്ന വാഹ നങ്ങളിലെ യാത്രക്കാർക്കും ഇവിടം ഏറെ ബുദ്ധിമുട്ടാണ് സൃഷ്ടിച്ചു വരുന്നത് .ദേശീയ പാത റോഡ് പുറമ്പോക്കിലെ
പാതയോരത്തെ മൺതിട്ടയും, അവിടെ വളർന്ന് പന്തലിച്ചു നിൽ ക്കുന്ന വള്ളി പടർപ്പുകളും ഡ്രൈവർമാരുടെ കാഴച മറക്കു ന്നതാണ് അപകടങ്ങൾ പതിവാകാൻ കാരണമെന്നാണ് നാട്ടുകാരുടെ പരാതി.
പലപ്പോഴും തലനാരിഴക്കാണ് വൻ അപകടങ്ങൾ വഴിമാറുന്നതെന്നും നാട്ടുകാർ പറഞ്ഞു. മാമം ജംക്ഷൻ മുതൽ മാമം പാലം വരെയുള്ള ഭാഗത്ത് റോഡിന്റെ വശങ്ങളിലെ ഉയരക്കുറവും അപകട ഭീഷണി ഉയർത്തുന്നു.
ഇരുചക്ര വാഹനയാത്രക്കാർ അടക്കമുള്ളവർ ഇവിടെ ഇതിനോടകം നിരവധി അപകടങ്ങളിൽ പെട്ട് കഴിഞ്ഞു . ഈ ഭാഗത്ത് റോഡിൻ്റെ കിഴക്കു വശത്തായി പലയിടത്തും റോഡിൻ്റെ വശങ്ങളിൽ കോൺക്രീറ്റ് ഇളകി മാറി വൻ കുഴികളും രൂപപ്പെട്ടിട്ടുണ്ട്. ഇതും അപകട ഭീഷണി ഉയർത്തുന്നു.
റോഡിന്റെ വശം ചേർന്ന് വരുന്ന വാഹനങ്ങളാണ് ഇവിടെ അപകടത്തിൽപ്പെടുന്നത്. മാമത്ത് ദേശീയപാതയിലെ അപകടക്കെണി ഒഴിവാക്കണമെന്ന് ആവശ്യപ്പെട്ട് നാട്ടുകാർ ദേശീയപാത അധികൃതർക്ക് പരാതി നൽകിയതിനെ തുടർന്ന് ഉദ്യോഗസ്ഥരെത്തി എസ്റ്റിമേറ്റും കണക്കാക്കിയെങ്കിലും ഭരണാനുമതി വൈകുന്നതാണ് പണികൾ നടക്കാൻ തടസ്സമായി പറയപ്പെടുന്നത്.എത്രയും വേഗം ദേശീയപാത പുറമ്പോക്കിലെ മൺതിട്ട നീക്കംചെയ്തു, ബൈ റോഡുകൾ സന്ധിക്കുന്ന ബെൽ മൌത്തുകൾ വികസിപ്പിച്ചു റോഡിന് സമാന്തരമായി യാത്ര ചെയ്തു ദേശീയപാതയിലേക്ക് കയറാൻ വേണ്ട നിർമ്മാണം ചെയ്താൽ പ്രദേശത്തു അടിക്കടി ഉണ്ടാകുന്ന അപകടങ്ങൾക്ക് പരിഹാരം ആകുമെന്നാണ് പറയുന്നത്.
by Midhun HP News | Sep 24, 2026 | Latest News, കേരളം
കൊല്ലം: മാതാ അമൃതാനന്ദമയി ദേവിയുടെ 73-ാം ജന്മദിനം വിശ്വസേവാദിനമായി ആചരിക്കും. ഈ മാസം 26, 27 തീയതികളിലായി അമൃതപുരി അമൃത വിശ്വവിദ്യാപീഠം ക്യാംപസിലാണ് വിപുലമായ പരിപാടികള്‍ നടക്കുന്നത്. 26-ന് വൈകീട്ട് അഞ്ചിന് നടക്കുന്ന പൊതുപരിപാടി കേന്ദ്ര ആഭ്യന്തര മന്ത്രി അമിത്ഷാ ഉദ്ഘാടനം ചെയ്യും.
27-ന് രാവിലെ 11 മണിക്ക് നടക്കുന്ന ഔദ്യോഗിക ചടങ്ങില്‍ ഉപരാഷ്ട്രപതി സിപി രാധാകൃഷ്ണന്‍ മുഖ്യാതിഥിയായി പങ്കെടുക്കും. വിശ്വസേവാദിനത്തോടനുബന്ധിച്ച് 50 കോടി രൂപയുടെ ജീവകാരുണ്യപദ്ധതികള്‍ക്ക് മഠം തുടക്കം കുറിക്കും.
ആദ്ധ്യാത്മിക, വൈജ്ഞാനിക, ശാസ്ത്ര മേഖലയിലെ പ്രഗത്ഭര്‍ക്ക് മഠം നല്‍കുന്ന അമൃതകീര്‍ത്തി പുരസ്‌കാരം 26ന് വൈകീട്ട് നടക്കുന്ന ചടങ്ങില്‍ സമ്മാനിക്കും. മുന്‍ ഗവര്‍ണറും പ്രമുഖ അഭിഭാഷകനും ഗ്രന്ഥകാരനുമായ പിഎസ് ശ്രീധരന്‍ പിള്ളയാണ് ഈ വര്‍ഷത്തെ അമൃതകീര്‍ത്തി പുരസ്‌കാരത്തിന് അര്‍ഹനായത്. 1,23,456 രൂപയും ആര്‍ട്ടിസ്റ്റ് നമ്പൂതിരി രൂപകല്‍പന ചെയ്ത സരസ്വതീ ശില്‍പവും പ്രശസ്തി പത്രവുമടങ്ങുന്നതാണ് പുരസ്‌കാരം.
ചടങ്ങില്‍ കേന്ദ്ര സഹമന്ത്രി സുരേഷ് ഗോപി, സംസ്ഥാന ആഭ്യന്തര മന്ത്രി രമേശ് ചെന്നിത്തല, ആരോഗ്യ-ദേവസ്വം വകുപ്പ് മന്ത്രി കെ മുരളീധരന്‍ തുടങ്ങിയവര്‍ പങ്കെടുക്കും. ചടങ്ങില്‍ അസമിലെ പ്രളയദുരിതാശ്വാസ പ്രവര്‍ത്തന നിധിയിലേക്ക് മാതാ അമൃതാനന്ദമയി മഠം നല്‍കുന്ന രണ്ട് കോടി രൂപ കൈമാറും. 27ന് രാവിലെ ഒമ്പതിന് ശ്രീ ഗുരു പാദുക പൂജ, തുടര്‍ന്ന് അമ്മയുടെ നേതൃത്വത്തില്‍ സത്സംഗം, വിശ്വശാന്തി പ്രാര്‍ത്ഥന, ഭജന എന്നിവ നടക്കും. രാവിലെ 11 മണിക്ക് ഉപരാഷ്ട്രപതി ഉദ്ഘാടനം ചെയ്യുന്ന ഔദ്യോഗിക ചടങ്ങില്‍ ഗവര്‍ണര്‍ രാജേന്ദ്ര വിശ്വനാഥ് അര്‍ലേകര്‍, മുഖ്യമന്ത്രി വിഡി സതീശന്‍, കേന്ദ്ര വ്യോമയാന മന്ത്രി കിഞ്ചരാപ്പു രാംമോഹന്‍ നായിഡു, സംസ്ഥാന മന്ത്രിമാര്‍, എംപിമാര്‍, എംഎല്‍എമാര്‍ തുടങ്ങിയവര്‍ പങ്കെടുക്കും.
ചടങ്ങില്‍ അമൃത ആശുപത്രിയുടെ നേതൃത്വത്തില്‍ നടത്തുന്ന സൗജന്യ അവയവമാറ്റ ശസ്ത്രക്രിയകള്‍ ഉള്‍പ്പെടെയുള്ള ചികിത്സാ സഹായം (20 കോടി), മഠത്തിന് കീഴിലുള്ള സ്വാശ്രയ സംഘങ്ങള്‍ക്കുള്ള ധനസഹായം, തൃശ്ശൂര്‍ വെടിക്കെട്ട് ദുരന്തത്തില്‍ മരിച്ചവരുടെ കുടുംബാംഗങ്ങള്‍ക്കും കടല്‍ക്ഷോഭത്തെ തുടര്‍ന്ന് കൊല്ലം നീണ്ടകരയിലും തിരുവനന്തപുരം മുതലപ്പൊഴിയിലുമുണ്ടായ ബോട്ട് അപകടത്തില്‍ മരിച്ച മത്സ്യത്തൊഴിലാളികളുടെ കുടുംബങ്ങള്‍ക്കുമുള്ള ധനസഹായ പ്രഖ്യാപനം എന്നിവ നടക്കും. പ്രധാന ചടങ്ങിനുശേഷം സമൂഹവിവാഹവും നടക്കും.
by Midhun HP News | Sep 24, 2026 | Latest News, കേരളം
പത്തനംതിട്ട: സ്വര്‍ണപ്പാളി കേസില്‍ എസ്‌ഐടി അന്വേഷണം തുടരുന്നതിനിടെ, ശബരിമലയിലെ സ്വര്‍ണക്കിരീടവും കവര്‍ന്നതായി സൂചന. സ്‌ട്രോങ് റൂമില്‍ നിന്നാണ് കിരീടം കാണാതായതെന്നും കണക്കെടുപ്പിലാണ് ഇക്കാര്യം സ്ഥിരീകരിച്ചതെന്നുമാണ് റിപ്പോര്‍ട്ടുകള്‍ വ്യക്തമാക്കുന്നത്.
തമിഴ്‌നാട്ടില്‍നിന്നുള്ള ഭക്തന്‍ 2012ല്‍ സമര്‍പ്പിച്ച 55.75 പവന്റെ കിരീടം കവര്‍ന്നതായാണ് റിപ്പോര്‍ട്ടുകള്‍ പുറത്തുവന്നത്. പകരം ഡ്യൂപ്ലിക്കറ്റ് കിരീടം വച്ചെന്നാണ് വിവരം. അതേസമയം സ്വര്‍ണക്കിരീടം നഷ്ടപ്പെട്ടിട്ടില്ലെന്നാണ് തിരുവാഭരണം കമ്മീഷണര്‍ പറയുന്നത്. യഥാര്‍ഥ കിരീടവും അതേ മാതൃകയിലുള്ള മറ്റൊരു കിരീടവുമുണ്ട്. മൂല്യമുള്ള പലതിനും സമാനമായ മാതൃക സൂക്ഷിക്കാറുണ്ടെന്നും തിരുവാഭരണം കമ്മീഷണര്‍ ദേവസ്വം കമ്മീഷണര്‍ക്ക് നല്‍കിയ വിശദീകരണത്തില്‍ പറയുന്നു. വാര്‍ത്തകളിലൂടെ മാത്രമാണ് കിരീടം നഷ്ടപ്പെട്ട വിവരം അറിഞ്ഞതെന്നും കിരീടം നഷ്ടപ്പെട്ടെങ്കില്‍ അത് ഗൗരവമായ കാര്യമാണെന്നും ദേവസ്വം ബോര്‍ഡ് പ്രസിഡന്റ് കെ ജയകുമാര്‍ പറഞ്ഞു. ശബരിമലയിലെ സ്‌ട്രോങ് റൂമില്‍ സ്വര്‍ണക്കിരീടം ഇല്ലെങ്കില്‍ കിരീടം ആറന്മുളയില്‍ ഉണ്ടാവേണ്ടതാണ്. ആറന്മുളയിലും സ്വര്‍ണക്കിരീടം ഇല്ലെങ്കില്‍ അത് ഗുരുതരമായ വിഷയമാണെന്നും കെ ജയകുമാര്‍ പറഞ്ഞു. വീഴ്ച പരിശോധിക്കുമെന്നും ഉപ്പു തിന്നവര്‍ വെള്ളം കുടിക്കുമെന്നും ദേവസ്വം ബോര്‍ഡ് പ്രസിഡന്റ് പറഞ്ഞു. ശബരിമലയിലെ സിസ്റ്റം തകരാറിലാകുന്നതിനെ കുറിച്ച് ആശങ്കയുണ്ടെന്നും കെ ജയകുമാര്‍ വ്യക്തമാക്കി.
ഹൈക്കോടതി നിര്‍ദേശ പ്രകാരം ജസ്റ്റിസ് കെടി ശങ്കരന്റെ നേതൃത്വത്തില്‍ ശബരിമലയില്‍ കണക്കെടുപ്പ് പുരോഗമിക്കുന്നതിനിടെയാണ് സ്വര്‍ണക്കിരീടം കാണാതായതായുള്ള റിപ്പോര്‍ട്ടുകള്‍ പുറത്തുവന്നത്. ഹൈക്കോടതിയില്‍ സമര്‍പ്പിക്കുന്ന റിപ്പോര്‍ട്ടില്‍ കൂടുതല്‍ കാര്യങ്ങള്‍ വ്യക്തമാകും. സിസിടിവി കാമറ ഇല്ലാത്ത സ്ഥലത്താണ് കിരീടം സൂക്ഷിച്ചിരുന്നത്.
by Midhun HP News | Sep 24, 2026 | Latest News
തിരുവനന്തപുരം: പുതിയ വൈദ്യുതി കണക്ഷന് ഫീസ് കുത്തനെ കൂട്ടി റെഗുലേറ്ററി കമ്മീഷന്‍. പോസ്റ്റ്, അധിക വയര്‍, ട്രാന്‍സ്ഫോര്‍മര്‍ തുടങ്ങിയവ ആവശ്യമുള്ളവര്‍ക്ക് ലാഭകരവും അല്ലാത്തവര്‍ക്ക് നഷ്ടവും ആകുംവിധമാണ് നിരക്ക് വര്‍ധന. പുതുക്കിയ ഫീസ് ഒക്ടോബര്‍ 12 മുതല്‍ നിലവില്‍ വരും.
ഫീസ് പരിഷ്‌കരിച്ചതോടെ ചിലയിനങ്ങളില്‍ മൂന്നിരട്ടി വരെയാണ് വര്‍ധന. ലൈനില്‍നിന്ന് 200 മീറ്ററിനുള്ളില്‍ പോസ്റ്റും മറ്റുസാധനങ്ങളും വേണ്ട കണക്ഷനും വേണ്ടാത്തതിനും ഒരേ നിരക്കാണ്. മുന്‍പ് വെവ്വേറെയായിരുന്നു നിരക്ക് ഈടാക്കിയിരുന്നത്. കിലോവാട്ട് അടിസ്ഥാനത്തില്‍ നിരക്കുകള്‍ ഏകീകരിച്ചതോടെ, ഉപഭോക്താവിന് അപേക്ഷയ്‌ക്കൊപ്പം ഉടന്‍ തന്നെ ഫീസ് അടയ്ക്കാന്‍ സാധിക്കും. നിലവില്‍ കെഎസ്ഇബി ഫീസ് കണക്കാക്കുന്നതുവരെ കാത്തിരിക്കേണ്ടിയിരുന്നു.
200 മീറ്ററിനപ്പുറം കൂടുതല്‍ ഉപകരണങ്ങളും പോസ്റ്റും വേണ്ടയിടത്ത് നിലവിലെ നിരക്ക് തുടരും. ഇതും രണ്ടുമാസത്തിനകം പരിഷ്‌കരിച്ച് ശുപാര്‍ശ നല്‍കാന്‍ ആവശ്യപ്പെട്ടിട്ടുണ്ട്. രണ്ട് കിലോവാട്ടുവരെ സിംഗിള്‍ ഫെയ്സ് ഗാര്‍ഹിക കണക്ഷന് ഇനി രണ്ടായിരം രൂപ നല്‍കണം. ഇതുവരെ അഞ്ചുകിലോവാട്ടുവരെ 1740 രൂപയായിരുന്നു ഫീസ്. രണ്ടിന് മുകളിലും അഞ്ച് കിലോവാട്ടുവരെയുള്ളത് 1740 രൂപയില്‍നിന്ന് 5000 രൂപയാക്കി. ഗാര്‍ഹികേതര കണക്ഷന് ഒരു കിലോവാട്ടുവരെ 2500 രൂപയും രണ്ട് കിലോവാട്ടുവരെ മൂവായിരം രൂപയും നല്‍കണം.
ത്രീഫെയ്സില്‍ അഞ്ചുമുതല്‍ 10 കിലോവാട്ടുവരെ 4220 രൂപയായിരുന്നു. ഇത് അഞ്ചുമുതല്‍ ഏഴുവരെ എണ്ണായിരം രൂപയും ഏഴുമുതല്‍ 10 വരെ 10,000 രൂപയുമായി വര്‍ധിപ്പിച്ചു. ത്രീഫെയ്സില്‍ കിലോവാട്ട് കൂടുന്തോറും ഫീസ് വര്‍ധന തോതും ഉയരുന്ന തരത്തിലാണ് പരിഷ്‌കാരം. എല്‍ടി ത്രീഫെയ്സില്‍ നിലവില്‍ 10 മുതല്‍ 25 കിലോവാട്ടുവരെ 14,420 രൂപയായിരുന്നു. പുതിയ നിരക്കില്‍ 10 മുതല്‍ 30 കിലോവാട്ടുവരെ ഒരു കിലോവാട്ടിന് 1560 രൂപവീതം നല്‍കണം. 25 കിലോവാട്ടിന് 39,000 രൂപ നല്‍കണം. കണക്ടഡ് ലോഡില്‍ മാറ്റംവരുത്താതെ സിംഗിള്‍ ഫെയ്സ് ത്രീ ഫെയ്സ് ആക്കി തരംമാറ്റാന്‍ കിലോവാട്ടിന് 700 രൂപയാണ് ഫീസ് വരിക.
25 മുതല്‍ 50 കിലോവാട്ടുവരെ 21,750 രൂപയായിരുന്നു. ഇനി 30 മുതല്‍ 40 വരെ കിലോവാട്ടിന് 2890 രൂപ വീതമാണ് നിരക്ക്. 50ന് മുകളില്‍ 100 കിലോവാട്ടുവരെ കിലോവാട്ടിന് 5670 രൂപയും. അതായത് 50 കിലോവാട്ട് കണക്ടഡ് ലോഡുള്ള കണക്ഷന് 21,750 രൂപ നല്‍കിയിരുന്നതിന് ഇനി 2.11 ലക്ഷം രൂപ നല്‍കണം. ഈ വിഭാഗത്തില്‍ ട്രാന്‍സ്ഫോര്‍മര്‍ ആവശ്യമെങ്കില്‍ അതിനോ മറ്റ് സാധനങ്ങള്‍ക്കോ പണം ഈടാക്കില്ല.
by Midhun HP News | Sep 23, 2026 | Latest News, കേരളം
തിരുവനന്തപുരം: സാംസ്‌കാരിക പ്രവര്‍ത്തകനും കലാ സംഘാടകനുമായ സൂര്യ കൃഷ്ണമൂര്‍ത്തി അന്തരിച്ചു. 78 വയസായിരുന്നു. വൈകീട്ട് ഏഴ് മണിയോടെയായിരുന്നു അന്ത്യം. കരള്‍ രോഗത്തെ തുടര്‍ന്ന് രണ്ട് ആഴ്ചയായി തിരുവനന്തപുരത്തെ സ്വകാര്യ ആശുപത്രിയില്‍ ചികിത്സയിലായിരുന്നു.
സംഗീത നാടക അക്കാദമി മുന്‍ ചെയര്‍മാനായിരുന്നു. കേന്ദ്ര സംഗീത നാടക അക്കാദമി പുരസ്‌കാരം, കേരള സംഗീത നാടക അക്കാദമി ഫെല്ലോഷിപ്പ് ഉള്‍പ്പെടെ നിരവധി പുരസ്‌കാരങ്ങള്‍ ലഭിച്ചിട്ടുണ്ട്. 1951 ഏപ്രിൽ 11ന് കോട്ടയത്തായിരുന്നു ജനനം. പിതാവ്. പരേതനായ പി.നടരാജ പിള്ള. മാതാവ്: പരേതയായ സി.സരസ്വതി അമ്മ. ഇസ്രയേലിലെ ജോലി വിട്ടാണ് അദ്ദേഹം കലാരംഗത്ത് അദ്ദേഹം സജീവമായത്. മലയാളത്തിലെ ആദ്യത്തെ ലൈറ്റ് ആന്‍ഡ് സൗണ്ട് ഷോയുടെ ശില്‍പിയും സൂര്യ കൃഷ്ണമൂര്‍ത്തിയായിരുന്നു. ലിംക ബുക്‌സ് ഓഫ് റെക്കോര്‍ഡില്‍ ഇടംപിടിച്ച സാംസ്‌കാരികോത്സവമാണ് സൂര്യ ഫെസ്റ്റിവല്‍. വിശ്വപ്രതിഭകള്‍ക്കായി അരങ്ങൊരുക്കിയ കലാസാംസ്‌കാരിക പ്രവര്‍ത്തകന്‍ കൂടിയായിരുന്നു സൂര്യകൃഷ്ണമൂര്‍ത്തി.
രചനയും സംവിധാനവും നിര്‍വഹിച്ച ‘മേല്‍വിലാസം’ എന്ന നാടകം നാനൂറിലേറെ വേദികളില്‍ അവതരിപ്പിച്ചിട്ടുണ്ട്. ഈ നാടകം സിനിമയുമായിരുന്നു. ഇരുപതില്‍പ്പരം രംഗാവതരണങ്ങളുടെ ശില്‍പിയായിരുന്നു. ‘സൂര്യ സ്റ്റേജ് ആൻഡ് ഫിലിം സൊസൈറ്റി’യുടെ സ്ഥാപകനായ അദ്ദേഹം, മലയാള കലയെയും സംസ്കാരത്തെയും ആഗോളതലത്തിൽ എത്തിക്കുന്നതിൽ നിർണായക പങ്കുവഹിച്ച വ്യക്തിത്വമാണ്.
Recent Comments