by Midhun HP News | Sep 23, 2026 | Latest News, ദേശീയ വാർത്ത
ഡല്‍ഹി: തെരഞ്ഞെടുപ്പ് കമ്മീഷനില്‍ നിര്‍ണായക വിഷയങ്ങളില്‍ ഭിന്നത നിലനില്‍ക്കുന്നതായുള്ള റിപ്പോര്‍ട്ടില്‍ പ്രതികരണവുമായി കമ്മീഷന് രംഗത്ത്. കഴിഞ്ഞ ഒരു വര്‍ഷത്തിനിടെ എടുത്ത എല്ലാ തീരുമാനങ്ങളും ഏകകണ്ഠമായിരുന്നുവെന്ന് തെരഞ്ഞെടുപ്പ് കമ്മിഷന്‍ വ്യക്തമാക്കി. ഏതൊരു സ്ഥാപനത്തിലെയും ചര്‍ച്ചകളുടെ ഭാഗമായി വ്യത്യസ്ത അഭിപ്രായങ്ങളും നിരീക്ഷണങ്ങളും ഉയരുന്നത് സ്വാഭാവികമാണെന്നും കമ്മീഷന് പറഞ്ഞു.
എസ്‌ഐആറുമായി ബന്ധപ്പെട്ട ചില തീരുമാനങ്ങളില്‍ രണ്ട് തെരഞ്ഞെടുപ്പ് കമ്മിഷണര്‍മാര്‍ തങ്ങളുടെ അറിവില്ലാതെ തീരുമാനങ്ങളെടുത്തതിനെതിരെ രേഖാമൂലം എതിര്‍പ്പ് അറിയിച്ചതായി ഇന്ത്യന്‍ എക്‌സ്പ്രസ് റിപ്പോര്‍ട്ട് ചെയ്തിരുന്നു. ഇതിലാണ് ഇപ്പോള്‍ കമ്മീഷന് വ്യക്തത വരുത്തിയത്. ചീഫ് ഇലക്ഷന്‍ കമ്മീഷണര്‍ ഗ്യാനേഷ് കുമാര്‍, തെരഞ്ഞെടുപ്പ് കമ്മിഷണര്‍മാരായ സുഖ്ബീര്‍ സിങ് സന്ധു, വിവേക് ജോഷി എന്നിവരാണ് നിലവില്‍ കമ്മിഷനിലെ ഉന്നത മൂന്ന് ഉദ്യോഗസ്ഥര്‍.
‘വ്യത്യസ്ത അഭിപ്രായങ്ങളും നിരീക്ഷണങ്ങളും ഏതൊരു സ്ഥാപനത്തിലെയും ചര്‍ച്ചകളുടെ ഭാഗമാണ്. അന്തിമ തീരുമാനം കൈക്കൊള്ളുന്നതിന് മുമ്പുള്ള പ്രക്രിയയുടെ ഭാഗമാണിത്. മൂന്ന് കമ്മീഷണര്‍മാര്‍ക്ക് മാത്രമല്ല, തെരഞ്ഞെടുപ്പ് സംവിധാനത്തിന്റെ മെച്ചപ്പെടുത്തലിനായി കമ്മീഷന് നിര്‍ദേശങ്ങള്‍ നല്‍കാന്‍, കമ്മീഷനിലെ എല്ലാ ഉദ്യോഗസ്ഥര്‍ക്കും പൂര്‍ണ അധികാരമുണ്ട്’ -തെരഞ്ഞെടുപ്പ് കമ്മീഷന് ഇന്ന് ഉച്ചയ്ക്ക് പുറത്തിറക്കിയ പ്രസ്താവനയില്‍ വ്യക്തമാക്കി.
പത്ത് മാസക്കാലയളവിലുണ്ടായ ചില പ്രത്യേക ആഭ്യന്തര കുറിപ്പുകളും നിരീക്ഷണങ്ങളും മാത്രം ഉയര്‍ത്തിക്കാട്ടി കമ്മിഷന്റെ തീരുമാനങ്ങള്‍, നിര്‍ദേശങ്ങള്‍, പദ്ധതികള്‍ എന്നിവയുടെ വലിയ ഭാഗം അവഗണിച്ച് വിഷയത്തിന്റെ ഒരു വശം മാത്രമാണ് വാര്‍ത്തയില്‍ അവതരിപ്പിച്ചതെന്നും കമ്മീഷന് പറഞ്ഞു.
‘കഴിഞ്ഞ മാസങ്ങളില്‍ കമ്മിഷന്‍ നിരവധി തീരുമാനങ്ങള്‍ കൈക്കൊണ്ടു. നിര്‍ദേശങ്ങള്‍ പുറപ്പെടുവിക്കുകയും 40ഓളം പുതിയ പദ്ധതികള്‍ അവതരിപ്പിക്കുകയും ചെയ്തു. രാജ്യത്തുടനീളം വോട്ടര്‍പട്ടിക പുതുക്കല്‍ (എസ്ഐആര്‍) ഉള്‍പ്പെടെ നിരവധി തിരഞ്ഞെടുപ്പ് പരിഷ്‌കരണങ്ങളും നടപ്പാക്കി. കഴിഞ്ഞ ഒരു വര്‍ഷത്തിനിടെ കമ്മിഷന്റെ മുഴുവന്‍ അംഗങ്ങളും ഏകകണ്ഠമായി എടുത്ത തീരുമാനങ്ങളുടെ ഫലമാണ് ഇവയെല്ലാം’ -ഡെപ്യൂട്ടി ഡയറക്ടര്‍ പി പവന്‍ ഒപ്പുവച്ച പ്രസ്താവനയില്‍ കമ്മീഷന് വ്യക്തമാക്കി.
by Midhun HP News | Sep 23, 2026 | Latest News
തിരുവനന്തപുരം: സാമ്പത്തിക പ്രതിസന്ധി നേരിടുന്ന കെഎസ്ആര്‍ടിസിക്ക് ബസ് വാങ്ങി നല്‍കി വ്യത്യസ്തനായി അങ്കമാലി സ്വദേശി ജോസ്. മുഖ്യമന്ത്രിയുടെ ആഹ്വാനം കേട്ടാണ് ബസ് വാങ്ങി നല്‍കിയതെന്ന് ജോസ് മാധ്യമങ്ങളോട് പറഞ്ഞു. കേരളത്തില്‍ ആദ്യമായാണ് ഒരു സ്വകാര്യ വ്യക്തി കെഎസ്ആര്‍ടിസിക്ക് ബസ് വാങ്ങി നല്‍കുന്നതെന്ന് മന്ത്രി റോജി എം ജോണ്‍ വ്യക്തമാക്കി. ബസ് അങ്കമാലി ഡിപ്പോയ്ക്ക് കൈമാറും.
‘മുഖ്യമന്ത്രിയുടെ ഒരു പ്രസ്താവന ഉണ്ടായിരുന്നു ബസ് ആരെങ്കിലും സംഭാവന ചെയ്യുകയാണെങ്കില്‍ നല്ലതായിരുന്നു എന്ന്. ആ ഒരു നല്ല കാര്യത്തിന് വേണ്ടിയിട്ടാണ് ബസ് വാങ്ങി നല്‍കിയത്. സാമ്പത്തിക പ്രതിസന്ധിയിലൂടെയാണ് സര്‍ക്കാര്‍ പോകുന്നത്. എന്നെ സംബന്ധിച്ച് ഒരു തോന്നല്‍ വന്നു. അങ്ങനെ കൊടുക്കാന്‍ തീരുമാനിച്ചു. ഒരു നല്ല ബസ് കിടന്നോട്ടെ എന്ന് കരുതിയിട്ട് ചെയ്തു എന്ന് മാത്രം.’- ജോസ് മാധ്യമങ്ങളോട് പറഞ്ഞു.
റോബോട്ടിക് കാര്‍ പാര്‍ക്കിങ് സിസ്റ്റം എന്ന കമ്പനി നടത്തുന്നയാളാണ് ജോസ്. ബസ് വാങ്ങുന്നതിനുള്ള തുക ചെക്കായി ജോസ് മുഖ്യമന്ത്രിക്ക് കൈമാറുകയായിരുന്നു. മുഖ്യമന്ത്രി ചെക്ക് ഗതാഗതമന്ത്രിക്ക് കൈമാറി. ജോസ് ഒരാവശ്യം സര്‍ക്കാരിന് മുന്നില്‍ വെച്ചിട്ടുണ്ട്. അങ്കമാലി സ്വദേശി എന്ന നിലയില്‍ ബസ് അങ്കമാലി ഡിപ്പോയ്ക്ക് കൈമാറണമെന്നതാണ് ജോസിന്റെ ആവശ്യം. പ്രിയദര്‍ശിനി പദ്ധതി നൂറ് ദിവസം പിന്നിട്ട പശ്ചാത്തലത്തില്‍ വിവിധ കോണുകളില്‍ നിന്ന് കെഎസ്ആര്‍ടിസിക്ക് വലിയ തോതിലുള്ള പിന്തുണ ലഭിക്കുന്നുണ്ട്. എങ്കിലും സാമ്പത്തിക പ്രതിസന്ധിയിലൂടെയാണ് കെഎസ്ആര്‍ടിസി കടന്നുപോകുന്നത്. ഈ പശ്ചാത്തലത്തില്‍ ഒരു സ്വകാര്യ വ്യക്തി ബസ് വാങ്ങി നല്‍കിയത് കെഎസ്ആര്‍ടിസിക്ക് ആശ്വാസമാകും. ബസ് ആരെങ്കിലും സംഭാവന ചെയ്യുകയാണെങ്കില്‍ നല്ലതാണെന്നും സ്വകാര്യ ബസ് തന്നെ കെഎസ്ആര്‍ടിസി ആക്കാവുന്നതാണെന്നും ഗതാഗതമന്ത്രിയും മുഖ്യമന്ത്രിയും ആഹ്വാനം ചെയ്തിരുന്നു.
by Midhun HP News | Sep 23, 2026 | Latest News
തിരുവനന്തപുരം: ഇന്ത്യ – വെസ്റ്റ് ഇന്‍ഡീസ് ഏകദിന പരമ്പരയ്ക്കായി വെസ്റ്റ് ഇന്‍ഡീസ് ടീം തിരുവനന്തപുരത്ത് എത്തി. കാര്യവട്ടം ഗ്രീന്‍ഫീല്‍ഡ് അന്താരാഷ്ട്ര സ്റ്റേഡിയത്തില്‍ സെപ്തംബര്‍ 27 ഞായറാഴ്ചയാണ് ഉച്ചയ്ക്ക് രണ്ടിനാണ് ആദ്യ മത്സരം.
സെപ്റ്റംബര്‍ 30ന് ഗുവാഹത്തിയിലാണ് രണ്ടാം ഏകദിനം. ഒക്ടോബര്‍ മൂന്നിന് ന്യൂ ചണ്ഡിഗഢിലാണ് മൂന്നാം മത്സരം. ഇന്ത്യാ പര്യടനത്തില്‍ മൂന്ന് ഏകദിനങ്ങളും അഞ്ച് ടി20 മത്സരങ്ങളുമാണ് വെസ്റ്റ് ഇന്‍ഡീസ് കളിക്കുക. സെപ്റ്റംബര്‍ 27 മുതല്‍ ഒക്ടോബര്‍ 18 വരെ എട്ട് നഗരങ്ങളിലായാണ് പര്യടനം.
ഇന്ത്യയെ സംബന്ധിച്ച് 2027 ഏകദിന ലോകകപ്പിനുള്ള തയാറെടുപ്പെന്നോണമാണ് പരമ്പര. ഇന്ത്യന്‍ ടീമിനെ ശുഭ്മന്‍ ഗില്‍ നയിക്കും. കെഎല്‍ രാഹുലാണ് വൈസ് ക്യാപ്റ്റന്‍. രോഹിത് ശര്‍മയും വിരാട് കോഹ് ലിയും ഉള്‍പ്പെടുന്ന 15 അംഗ ടീമിനെയാണ് ഏകദിന പരമ്പരയ്ക്കായി ഇന്ത്യ പ്രഖ്യാപിച്ചിരിക്കുന്നത്. രവീന്ദ്ര ജഡേജയും മുഹമ്മദ് സിറാജും ഏകദിന പദ്ധതികളിലേക്ക് തിരിച്ചെത്തിയിട്ടുണ്ട്. ജമ്മു കശ്മീര്‍ പേസര്‍ ഔകിബ് നബിക്കും പഞ്ചാബ് ഓള്‍റൗണ്ടര്‍ നമന്‍ ധിറിനും ആദ്യമായി ഏകദിന ടീമില്‍ ഇടം നേടിയിട്ടുണ്ട്.
ന്യൂസീലന്‍ഡിനെതിരായ ഏകദിന പരമ്പരയിലെ അവസാന രണ്ട് മത്സരങ്ങള്‍ ഹാംസ്ട്രിങ് പരിക്കിനെ തുടര്‍ന്ന് നഷ്ടമായ ജോണ്‍ ക്യാംപ്ബെല്‍ വിന്‍ഡീസ് ഏകദിന ടീമില്‍ തിരിച്ചെത്തിയിട്ടുണ്ട്. ഓഗസ്റ്റില്‍ ശസ്ത്രക്രിയയ്ക്ക് വിധേയനായ അകീം ഓഗസ്റ്റിന്റെ പകരക്കാരനായാണ് ജുവല്‍ ആന്‍ഡ്രൂ ടീമിലെത്തിയത്. ഷിംറോണ്‍ ഹെറ്റ്മെയര്‍ ഏകദിന പരമ്പരയ്ക്ക് ശേഷം ടി20 ടീമിനൊപ്പം ചേരും.
വെസ്റ്റ് ഇന്‍ഡീസ് ഏകദിന ടീം: ഷായ് ഹോപ്പ് (ക്യാപ്റ്റന്‍), ജുവല്‍ ആന്‍ഡ്രൂ, ജോണ്‍ ക്യാംപ്ബെല്‍, കീസി കാര്‍ട്ടി, റോസ്റ്റണ്‍ ചേസ്, മാത്യു ഫോര്‍ഡ്, ജസ്റ്റിന്‍ ഗ്രീവ്സ്, അമീര്‍ ജാംഗൂ, അല്‍സാരി ജോസഫ്, ഷമര്‍ ജോസഫ്, വിറ്റല്‍ ലോവ്സ്, ഗുഡാകേഷ് മോട്ടി, കീമോ പോള്‍, ഷെര്‍ഫെയ്ന്‍ റൂഥര്‍ഫോര്‍ഡ്, ജെയ്ഡന്‍ സീല്‍സ്.
ഇന്ത്യന്‍ ഏകദിന ടീം: ശുഭ്മന്‍ ഗില്‍ (ക്യാപ്റ്റന്‍), രോഹിത് ശര്‍മ, വിരാട് കോഹ്‌ലി, ഋതുരാജ് ഗെയ്ക്വാദ്്, കെ.എല്‍. രാഹുല്‍ (വൈസ് ക്യാപ്റ്റന്‍), ധ്രുവ് ജുറേല്‍, നിതീഷ് കുമാര്‍ റെഡ്ഡി, രവീന്ദ്ര ജഡേജ, കുല്‍ദീപ് യാദവ്, പ്രസിദ്ധ് കൃഷ്ണ, ഗുര്‍നൂര്‍ ബ്രാര്‍, മുഹമ്മദ് സിറാജ്, ഔകിബ് നബി, യശസ്വി ജയ്സ്വാള്‍, നമന്‍ ധിര്‍.
by Midhun HP News | Sep 23, 2026 | Latest News
തിരുവനന്തപുരം: മഴക്കെടുതിയില്‍ മരിച്ചവരുടെ കുടുംബങ്ങള്‍ക്ക് 8 ലക്ഷം രൂപ ധനസഹായം നല്‍കാന്‍ സംസ്ഥാന മന്ത്രിസഭായോഗ തീരുമാനം. മലപ്പുറം, ഇടുക്കി, കോട്ടയം ജില്ലകളില്‍ കഴിഞ്ഞ ദിവസമുണ്ടായ അപകടത്തില്‍പ്പെട്ടവരുടെ കുടുംബങ്ങള്‍ക്കാണ് സഹായം. ലോകകേരള സഭ പിരിച്ചു വിടാന്‍ സര്‍ക്കാര്‍ തീരുമാനിച്ചുവെന്നും മുഖ്യമന്ത്രി വിഡി സതീശന്‍ പറഞ്ഞു. പകരം ഫലപ്രദമായ പുതിയ സംവിധാനം ഉണ്ടാക്കുമെന്നും മന്ത്രിസഭായോഗത്തിന് ശേഷം മുഖ്യമന്ത്രി മാധ്യമങ്ങളോട് പറഞ്ഞു.
ലോകകേരള സഭയുടെ പേരില്‍ നടന്നത് വലിയ ധൂര്‍ത്താണ്. അത് അവസാനിപ്പിക്കാനാണ് സര്‍ക്കാര്‍ തീരുമാനിച്ചത്. ലോക കേരള സഭയ്ക്ക് പകരം ബദല്‍ സംവിധാനം ഉണ്ടാകും. പ്രവാസികളുടെ വിഷയങ്ങള്‍ അഡ്രസ് ചെയ്യാന്‍ ഫലപ്രദമായ സംവിധാനം കൊണ്ടുവരും. അവരുടെ റെമിറ്റന്‍സ് ഇക്കോണമിയെ ഇന്‍വെസ്റ്റ്‌മെന്റ് ഇക്കോണമിയാക്കി മാറ്റാനുള്ള സംരംഭം കൂടിയുള്ള വലിയ പദ്ധതി ഉണ്ടാകും. അതിനായി മന്ത്രിസഭാ ഉപസമിതി രൂപീകരിച്ചു. മുഖ്യമന്ത്രി ചെയര്‍മാനായ സമിതിയില്‍, വ്യവസായ, ആഭ്യന്തര, ആരോഗ്യ, ജലവിഭവ മന്ത്രിമാര്‍ അംഗങ്ങളായിരിക്കുമെന്നും മുഖ്യമന്ത്രി പറഞ്ഞു.
കേരളപ്പിറവിക്ക് ശേഷം സംസ്ഥാനം 70 വര്‍ഷത്തിലേക്ക് കടക്കുകയാണ്. ഇത് വിപുലമായി ആഘോഷിക്കാനാണ് സര്‍ക്കാരിന്റെ തീരുമാനം. ഫെസ്റ്റിവല്‍ കേരള എന്ന പേരില്‍ രാജ്യത്തെല്ലായിടത്തും ആഘോഷ പരിപാടികള്‍ നടത്താനാണ് തീരുമാനിച്ചിട്ടുള്ളത്. കേരളത്തിന്റെ 70-ാം ജന്മദിനത്തോട് അനുബന്ധിച്ച് പരിപാടികള്‍ ആരംഭിക്കാനാണ് നിശ്ചയിച്ചിട്ടുള്ളത്. മുഖ്യമന്ത്രി ചെയര്‍മാനായും, സാംസ്‌കാരിക മന്ത്രി കണ്‍വീനറുമായി സമിതി രൂപീകരിച്ചിട്ടുണ്ടെന്നും മുഖ്യമന്ത്രി പറഞ്ഞു.
ചെന്നൈ, ഡല്‍ഹി, ബംഗ്ലൂര്‍, മുംബൈ, കൊല്‍ക്കത്ത തുടങ്ങിയ മഹാനഗരങ്ങളിലാണ് ആദ്യം പരിപാടി സംഘടിപ്പിക്കുന്നത്. കേരളത്തിന്റെ പ്രത്യേകതകളെ രാജ്യത്തിന്റെ വിവിധ ഭാഗങ്ങളില്‍ ഷേകേസ് ചെയ്യാനാണ് ഫെസ്റ്റിവലിലൂടെ സര്‍ക്കാര്‍ ലക്ഷ്യമിടുന്നത്. ഇന്‍വെസ്റ്റ്‌മെന്റ് അടക്കം ഇതില്‍ ഉള്‍പ്പെടുമെന്നും മുഖ്യമന്ത്രി പറഞ്ഞു. രാജ്യത്തിന്റെ പുറത്ത് ഫെസ്റ്റിവല്‍ നടത്തുന്നത് സംബന്ധിച്ച് പിന്നീട് തീരുമാനിക്കും.
സംസ്ഥാനത്ത് റോഡപകടങ്ങള്‍ വര്‍ധിച്ചു വരികയാണ്. മരണ നിരക്കും ഉയരുകയാണ്. ഈ സാഹചര്യത്തില്‍ റോഡ് സുരക്ഷ ഉറപ്പു വരുത്താന്‍ ക്യാംപെയ്ന്‍ നടത്തുമെന്ന് മുഖ്യമന്ത്രി പറഞ്ഞു. റോഡപകടങ്ങള്‍ പരമാവധി കുറയ്ക്കുക ലക്ഷ്യമിട്ടാണ് ക്യാംപെയ്ന്‍ നടത്തുന്നത്. വിവിധ വകുപ്പുകളെ ഏകോപിപ്പിച്ചുകൊണ്ട് ഗതാഗത വകുപ്പിന്റെ നേതൃത്വത്തിലാണ് ക്യാംപെയ്ന്‍ സംഘടിപ്പിക്കുന്നത്.
ഒരു വശത്ത് അവയര്‍നെസ്സ് പ്രോഗ്രാം നടത്തുമ്പോള്‍ തന്നെ, ഇതോടൊപ്പം ഗതാഗത നിയമലംഘനങ്ങളില്‍ കര്‍ശന നടപടി സ്വീകരിക്കുന്നത് തുടരുമെന്നും മുഖ്യമന്ത്രി വിഡി സതീശന്‍ പറഞ്ഞു. റോഡപകടങ്ങള്‍ ഗണ്യമായി കുറയ്ക്കുകയാണ് സര്‍ക്കാര്‍ ലക്ഷ്യമിടുന്നത്. ഇതിന് ജനങ്ങളുടെ പൂര്‍ണ സഹകരണം ഉണ്ടാകണം. വയോജനക്ഷേമ വകുപ്പിന്റെ പേര് മാറ്റി. ഡിപ്പാര്‍ട്ട്‌മെന്റ് ഫോര്‍ സീനിയര്‍ സിറ്റിസണ്‍സ് എന്നാക്കിയെന്നും മുഖ്യമന്ത്രി അറിയിച്ചു.
by Midhun HP News | Sep 23, 2026 | Latest News
മലയാള സിനിമയുടെ കാരണവർ നടൻ മധുവിന് ഇന്ന് 93-ാം പിറന്നാൾ. ആറു പതിറ്റാണ്ടിലേറെ നീണ്ട സിനിമാ ജീവിതത്തിൽ നായകനായും സ്വഭാവനടനായും വില്ലനായും സംവിധായകനായും നിർമാതാവായും മധു മലയാള സിനിമയിൽ തന്റേതായൊരു അധ്യായം എഴുതിച്ചേർത്തു. 1933 സെപ്റ്റംബർ 23ന് തിരുവനന്തപുരത്ത് ജനിച്ച മാധവൻ നായരാണ് പിന്നീട് മലയാളികൾക്ക് പ്രിയപ്പെട്ട മധുവായത്.
ഇപ്പോഴിതാ മധുവിന് പിറന്നാൾ ആശംസകൾ നേർന്നിരിക്കുകയാണ് നടൻ മമ്മൂട്ടി. മധുവിന്റെ വലിയ ആരാധകൻ കൂടിയാണ് മമ്മൂട്ടി. ‘ഹാപ്പി ബർത്ത് ഡേ മൈ സൂപ്പർ സ്റ്റാർ’- എന്നാണ് മധുവിനൊപ്പമുള്ള ചിത്രം പങ്കുവച്ച് മമ്മൂട്ടി കുറിച്ചിരിക്കുന്നത്. മമ്മൂട്ടിയോടുള്ള സ്നേഹത്തെക്കുറിച്ച് അഭിമുഖങ്ങളിലുൾപ്പെടെ മധു വാചാലനാകാറുണ്ട്.
ഞാനിപ്പോഴും മധു സാറിന്റെ ആരാധകനാണ്. അദ്ദേഹമാണ് എന്റെ സൂപ്പർ സ്റ്റാർ എന്ന് മമ്മൂട്ടിയും പറയാറുണ്ട്. സിനിമാ പ്രവർത്തകരും ആരാധകരുമടക്കം നിരവധി പേരാണ് പിറന്നാൾ ആശംസകൾ നേരുന്നത്. സിനിമയോടുള്ള അടങ്ങാത്ത അഭിനിവേശമാണ് കോളജ് അധ്യാപകന്റെ റോളില്‍ നിന്നും മധുവിനെ സ്‌കൂള്‍ ഓഫ് ഡ്രാമയിലെത്തിച്ചത്.
നസീറും സത്യനും വെള്ളിത്തിരയില്‍ നിറ‍ഞ്ഞു നിന്നിരുന്ന സമയത്തായിരുന്നു മധുവിന്റെയും സിനിമയിലേക്കുള്ള രംഗപ്രവേശം. എംഎന്‍ പിഷാരടി സംവിധാനം ചെയ്ത നിണമണിഞ്ഞ കാല്‍പ്പാടുകളായിരുന്നു ആദ്യ ചിത്രം. പന്ത്രണ്ടോളം സിനിമകള്‍ സംവിധാനം ചെയ്ത മധു പതിനാറോളം ചിത്രങ്ങള്‍ നിര്‍മിക്കുകയും ചെയ്തു.
Recent Comments