by Midhun HP News | Sep 22, 2026 | Latest News, കേരളം
തിരുവനന്തപുരം: ബംഗാൾ ഉൾക്കടലിൽ സ്ഥിതി ചെയ്യുന്ന തീവ്ര ന്യൂനമർദ്ദത്തിന്റെ സ്വാധീനഫലമായി സംസ്ഥാനത്ത് ശനിയാഴ്ച വരെ നേരിയതോ ശക്തി കൂടിയതോ ആയ മഴയ്ക്ക് സാധ്യത. നാളെ (ബുധനാഴ്ച) തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി, കണ്ണൂർ, കാസർകോട് ജില്ലകളിൽ ഒറ്റപ്പെട്ട സ്ഥലങ്ങളിൽ ശക്തമായ മഴയ്ക്കുള്ള സാധ്യതയാണ് നിലനിൽക്കുന്നത്. ജാഗ്രതയുടെ ഭാഗമായി ഈ ജില്ലകളിൽ കേന്ദ്ര കാലാവസ്ഥ വകുപ്പ് യെല്ലോ അലർട്ട് പ്രഖ്യാപിച്ചു.
വ്യാഴാഴ്ച മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലും വെള്ളിയാഴ്ച തിരുവനന്തപുരം, കൊല്ലം, പത്തനംതിട്ട, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലും യെല്ലോ അലർട്ട് പ്രഖ്യാപിച്ചിട്ടുണ്ട്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അർത്ഥമാക്കുന്നത്.
മധ്യ പടിഞ്ഞാറൻ ബംഗാൾ ഉൾക്കടലിനും സമീപ വടക്ക് പടിഞ്ഞാറൻ ബംഗാൾ ഉൾക്കടലിലുമായാണ് തീവ്ര ന്യൂനമർദ്ദം (Depression) സ്ഥിതി ചെയ്യുന്നത്. അടുത്ത 12 മണിക്കൂറിനുള്ളിൽ പടിഞ്ഞാറ്-വടക്കുപടിഞ്ഞാറ് ദിശയിൽ സഞ്ചരിച്ച് മധ്യ പടിഞ്ഞാറൻ ബംഗാൾ ഉൾക്കടലിലും സമീപ വടക്കുപടിഞ്ഞാറൻ ബംഗാൾ ഉൾക്കടലിലുമായി അതിതീവ്ര ന്യൂനമർദ്ദമായി (Deep Depression) ശക്തി പ്രാപിക്കാൻ സാധ്യതയുണ്ട്.
തുടർന്നും പടിഞ്ഞാറ്-വടക്കുപടിഞ്ഞാറ് ദിശയിൽ സഞ്ചരിച്ച് ബുധനാഴ്ച രാത്രിയോടെയോ അല്ലെങ്കിൽ വ്യാഴാഴ്ച പുലർച്ചയോടെയോ വിശാഖപട്ടണത്തിനും ഗോപാൽപൂരിനും ഇടയിൽ വടക്കൻ ആന്ധ്രാപ്രദേശ്–തെക്കൻ ഒഡീഷ തീരങ്ങൾക്കിടയിലൂടെ അതിതീവ്ര ന്യൂനമർദ്ദമായി കരതൊടാൻ സാധ്യതയെന്നും കേന്ദ്ര കാലാവസ്ഥാ വകുപ്പ് അറിയിച്ചു. ഇതിന്റെ സ്വാധീനഫലമായാണ് സംസ്ഥാനത്ത് മഴ ലഭിക്കുന്നത്. ഒറ്റപ്പെട്ട സ്ഥലങ്ങളിൽ ഇടിമിന്നലിനും മണിക്കൂറിൽ 30 – 40 കിലോമീറ്റർ വരെ വേഗത്തിൽ ശക്തമായ കാറ്റിനും സാധ്യതയെന്നും കേന്ദ്ര കാലാവസ്ഥ വകുപ്പ് അറിയിച്ചു.
by Midhun HP News | Sep 22, 2026 | Latest News, കായികം
നഗോയ: ഏഷ്യന്‍ ഗെയിംസില്‍ ഇന്ത്യയുടെ ആദ്യ സ്വര്‍ണം വനിതാ ക്രിക്കറ്റ് ടീമിലൂടെ. കഴിഞ്ഞ തവണ സ്വന്തമാക്കിയ സ്വര്‍ണം ഹര്‍മന്‍പ്രീതും സംഘവും ഇത്തവണയും നിലനിര്‍ത്തി. ഏഷ്യാ കപ്പില്‍ പരാജയപ്പെടുത്തി കിരീടം സ്വന്തമാക്കിയതിനു പിന്നാലെ ശ്രീലങ്കന്‍ വനിതകളെ ഏഷ്യന്‍ ഗെയിംസ് ഫൈനലിലും ഇന്ത്യ വീഴ്ത്തി. 147 റണ്‍സിന്റെ പടുകൂറ്റന്‍ ജയത്തോടെയാണ് ഇന്ത്യയുടെ സ്വര്‍ണ വേട്ട. ബാറ്റിങിലും ബൗളിങിലും ഇന്ത്യന്‍ വനിതകളുടെ സമ്പൂര്‍ണ ആധിപത്യമാണ് ഗ്രൗണ്ടില്‍ കണ്ടത്.
ആദ്യം ബാറ്റ് ചെയ്ത ഇന്ത്യ നിശ്ചിത ഓവറില്‍ റെക്കോര്‍ഡ് ടോട്ടലാണ് പടുത്തുയര്‍ത്തിയത്. 3 വിക്കറ്റ് നഷ്ടത്തില്‍ 216 റണ്‍സ്. വിജയത്തിലേക്ക് ബാറ്റെടുത്ത ശ്രീലങ്കയുടെ പോരാട്ടം 15.4 ഓവറില്‍ വെറും 69 ണ്‍സില്‍ അവസാനിപ്പിക്കാന്‍ ഇന്ത്യയ്ക്കു സാധിച്ചു.
ഏഷ്യന്‍ ഗെയിംസില്‍ ഇതോടെ ഇന്ത്യയുടെ ആകെ മെഡല്‍ 7 ആയി. ഒരു സ്വര്‍ണം, 4 വെള്ളി, 2 വെങ്കലം മെഡലുകളാണ് ഇന്ത്യ സ്വന്തമാക്കിയത്.
ഇന്ത്യക്കായി ഒരിക്കല്‍ കൂടി സ്പിന്നര്‍മാര്‍ കളം വാണു. ദീപ്തി ശര്‍മ, ശ്രേയങ്ക പാട്ടീല്‍, ഷെഫാലി വര്‍മ, ശ്രീചരണി എന്നിവരുടെ പന്തുകള്‍ക്ക് മുന്നില്‍ ലങ്കന്‍ വനിതകള്‍ ഉത്തരംമുട്ടി നിന്നു. ദീപ്തി 4 ഓവറില്‍ വെറും 6 റണ്‍സ് മാത്രം വഴങ്ങി 3 വിക്കറ്റുകള്‍ വീഴ്ത്തി. ഷെഫാലി, ശ്രീചരണി, ശ്രേയങ്ക പാട്ടീല്‍ എന്നിവര്‍ 2 വീതം വിക്കറ്റുകള്‍ സ്വന്തമാക്കി.
കൂറ്റന്‍ ലക്ഷ്യത്തിലേക്ക് ബാറ്റെടുത്ത ശ്രീലങ്കന്‍ നിരയില്‍ ക്യാപ്റ്റന്‍ ചമരി അട്ടപ്പട്ടുവിന് മാത്രമാണ് ക്രീസില്‍ കുറച്ചു നേരമെങ്കിലും പിടിച്ചു നില്‍ക്കാന്‍ പറ്റിയത്. താരം 21 പന്തില്‍ 5 ഫോറുകള്‍ സഹിതം 29 റണ്‍സെടുത്തു. എന്നാല്‍ ദീപ്തി ശര്‍മ ബൗള്‍ ചെയ്യാന്‍ വന്നതിനു പിന്നാലെ ക്യാപ്റ്റന്റെ ചെറുത്തു നില്‍പ്പും അവസാനിച്ചു. കവിഷ ദില്‍ഹരിയാണ് രണ്ടക്കം കടന്ന മറ്റൊരു ശ്രീലങ്കന്‍ ബാറ്റര്‍. എന്നാല്‍ താരത്തിനും അധികം ആയുസുണ്ടായില്ല. ദീപ്തി തന്നെ കവിഷയേയും മടക്കി. 11 റണ്‍സാണ് താരം നേടിയത്. പുറത്താകാതെ 14 റണ്‍സെടുത്ത കൗശിനി നുത്യാംഗനയാണ് പിടിച്ചു നില്‍ക്കാന്‍ നോക്കിയ മറ്റൊരാള്‍. താരമാണ് ലങ്കന്‍ നിരയില്‍ ഏക സിക്‌സര്‍ പറത്തിയത്.
ഏഷ്യന്‍ ഗെയിംസ് വനിതാ ക്രിക്കറ്റില്‍ ഒരു ടീം നേടുന്ന ഏറ്റവും വലിയ ടീം ടോട്ടലെന്ന റെക്കോര്‍ഡ് സ്‌കോറുയര്‍ത്തിയാണ് ഇന്ത്യ കളം വാണത്. ഹോങ്കോങ് ചൈന മംഗോളിയക്കെതിരെ നേടിയ 202 റണ്‍സായിരുന്നു ഇതുവരെയുള്ള മികച്ച ടോട്ടല്‍. ഈ റെക്കോര്‍ഡാണ് ഇന്ത്യ പഴങ്കഥയാക്കിയത്.
ടോസ് നേടി ആദ്യം ബാറ്റ് ചെയ്ത ഇന്ത്യ അര്‍ധ സെഞ്ച്വറി നേടിയ വൈസ് ക്യാപ്റ്റന്‍ സ്മൃതി മന്ധാനയുടേയും സ്മൃതിയ്‌ക്കൊപ്പം മിന്നല്‍ തുടക്കം നല്‍കിയ ഷെഫാലി വര്‍മയുടേയും ഫോമിലേക്ക് മടങ്ങിയെത്തിയ വിക്കറ്റ് കീപ്പര്‍ ബാറ്റര്‍ റിച്ച ഘോഷിന്റേയും ബാറ്റിങ് കരുത്തിലാണ് റെക്കോര്‍ഡ് സ്‌കോര്‍ ഉയര്‍ത്തിയത്. സ്മൃതി 45 പന്തില്‍ 7 സിക്‌സും 5 ഫോറും സഹിതം 79 റണ്‍സെടുത്തു. ഷെഫാലി മൂന്ന് വീതം സിക്‌സും ഫോറും സഹിതം 29 പന്തില്‍ 48 റണ്‍സുമായും മടങ്ങി.
പിന്നാലെയാണ് റിച്ചയുടെ കാമിയോ ഇന്നിങ്‌സ്. ഫോം കണ്ടെത്താന്‍ സാധിക്കാതെ വിഷമിച്ച താരം നിര്‍ണായക പോരാട്ടത്തില്‍ മികവിലേക്ക് ഉയര്‍ന്നത് ഇന്ത്യക്ക് ബലമായി. റിച്ച 22 പന്തില്‍ 6 ഫോറും 3 സിക്‌സും സഹിതം 49 റണ്‍സുമായി പുറത്താകാതെ നിന്നു. അവസാന ഓവറില്‍ രണ്ട് സിക്‌സും ഒരു ഫോറും സഹിതം ഇന്ത്യ 25 റണ്‍സ് വാരിയാണ് 216 റണ്‍സെന്ന മി്കച്ച ടോട്ടല്‍ ഉയര്‍ത്തിയത്.
ബാറ്റിങിന് ഇറങ്ങിയ ഇന്ത്യക്കായി സ്മൃതി- ഷെഫാലി സഖ്യം പറക്കും തുടക്കമാണ് നല്‍കിയത്. ഓപ്പണിങില്‍ ഇരുവരും ചേര്‍ന്നു 10 ഓവറില്‍ 99 റണ്‍സെടുത്താണ് പിരിഞ്ഞത്. പത്താം ഓവറിലെ അവസാന പന്തിലാണ് ഷെഫാലി അര്‍ധ സെഞ്ച്വറിക്ക് രണ്ട് റണ്‍സ് അകലെ വീഴുന്നത്. ബംഗ്ലാദേശിനെതിരെ കത്തും ഫോമില്‍ ബാറ്റ് വീശിയ ഇരുവരും സമാന മികവ് ഫൈനലിലും ആവര്‍ത്തിച്ചു.
ക്യാപ്റ്റന്‍ ഹര്‍മന്‍പ്രീത് കൗര്‍ 17 പന്തില്‍ 19 റണ്‍സുമായി മടങ്ങി. ഭാരതി ഫൂല്‍മാലി 7 റണ്‍സുമായി പുറത്താകാതെ നിന്നു.
by Midhun HP News | Sep 22, 2026 | Latest News, കേരളം
കൊല്ലം: കഞ്ചാവ് കേസ് പ്രതി റെയില്‍വേ പൊലീസ് സ്റ്റേഷനില്‍ നിന്നും രക്ഷപ്പെട്ടു. ലോക്കപ്പ് പൂട്ടാന്‍ മറന്നതിനെത്തുടര്‍ന്നാണ് പ്രതി സ്റ്റേഷനില്‍ നിന്നും ചാടിപ്പോയത്. അഷ്ടമുടി കല്‍പ്പടിക്കല്‍ സ്വദേശി അബ്ദുള്‍ സലാം (37 ) ആണ് പൊലീസിന്റെ പിടിയില്‍ നിന്നും കടന്നുകളഞ്ഞത്.
തിങ്കളാഴ്ച ഉച്ചയ്ക്ക് 12.50 നാണ് ലോക്കപ്പിന്റെ കുറ്റി തുറന്ന് പൊലീസിന്റെ കണ്ണ് വെട്ടിച്ച് ഇയാള്‍ കടന്നു കളഞ്ഞത്. ഞായറാഴ്ച റെയില്‍വേ സ്റ്റേഷന്‍ പരിസരത്തുനിന്ന് കഞ്ചാവുമായിട്ടാണ് അബ്ദുള്‍ സലാമിനെ പിടികൂടിയത്. തുടര്‍ന്ന് ഇയാളെ വിശദമായി പരിശോധിച്ചപ്പോള്‍ രണ്ടു മൊബൈല്‍ ഫോണ്‍ കണ്ടെത്തി.
ഒരു ഫോണ്‍ കൊല്ലത്തു നിര്‍ത്തിയിട്ടിരുന്ന പാലരുവി എക്‌സ്പ്രസില്‍നിന്ന് മോഷ്ടിച്ചതാണെന്ന് പ്രതി സമ്മതിച്ചു. തുടര്‍ന്ന് കഞ്ചാവ് കൈവശം വച്ചതിനും മോഷണത്തിനും പ്രത്യേകം കേസ് രജിസ്റ്റര്‍ ചെയ്തു. കോടതിയില്‍ ഹാജരാക്കാനായി ലോക്കപ്പിലാക്കി. എന്നാല്‍ പൂട്ടാന്‍ മറന്നതോടെ പൊലീസിന്റെ കണ്ണുവെട്ടിച്ച് ഇയാള്‍ ചാടിപ്പോകുകയായിരുന്നു.
by Midhun HP News | Sep 22, 2026 | Latest News, കേരളം
കൊച്ചി: എറണാകുളം മഹാരാജാസ് കോളജിലെ എസ്എഫ്ഐ നേതാവായിരുന്ന അഭിമന്യുവിനെ കൊലപ്പെടുത്തിയ കേസിൽ രഹസ്യവിചാരണ വേണമെന്ന പ്രതികളുടെ ആവശ്യം കോടതി തള്ളി. കേസിന്റെ വിചാരണ നടപടികൾ അടച്ചിട്ട മുറിയിൽ നടത്തണമെന്ന പ്രതിഭാഗത്തിന്റെ ഹർജി എറണാകുളം പ്രിൻസിപ്പൽ സെഷൻസ് കോടതി ജഡ്ജി കെ.കെ. ബാലകൃഷ്ണനാണ് തള്ളിയത്. ഇതോടെ ഹൈക്കോടതി നിർദ്ദേശപ്രകാരം കേസിന്റെ വിചാരണ ഒക്ടോബർ 15 മുതൽ കോടതിയിൽ ആരംഭിക്കും.
വിചാരണ വേളയിൽ കോടതി മുറിയിൽ മാധ്യമപ്രവർത്തകർക്കും പൊതുജനങ്ങൾക്കും ബന്ധുക്കൾക്കും പ്രവേശനം അനുവദിക്കരുതെന്നായിരുന്നു പ്രതികൾ പ്രധാനമായും ഹർജിയിലൂടെ ആവശ്യപ്പെട്ടിരുന്നത്. എന്നാൽ വിചാരണ റിപ്പോർട്ട് ചെയ്യുക എന്നത് മാധ്യമങ്ങളുടെ മൗലികമായ അവകാശമാണെന്ന പ്രോസിക്യൂഷന്റെ ശക്തമായ വാദം കോടതി അംഗീകരിക്കുകയായിരുന്നു.
പ്രതികളുടെ വാദങ്ങളിൽ കഴമ്പില്ലെന്ന് കണ്ടെത്തിയ കോടതി ഹർജി തള്ളി ഉത്തരവിടുകയായിരുന്നു. കേസിന്റെ വിചാരണ നാല് മാസത്തിനകം പൂർത്തിയാക്കണമെന്ന് ഹൈക്കോടതി നേരത്തെ നിർദ്ദേശം നൽകിയിട്ടുണ്ട്. ഇതിന്റെ അടിസ്ഥാനത്തിലാണ് പ്രിൻസിപ്പൽ സെഷൻസ് കോടതി നടപടികൾ വേഗത്തിലാക്കിയത്. ഒക്ടോബർ 15 മുതൽ നിശ്ചയിച്ച സമയപരിധിക്കുള്ളിൽ സാക്ഷിവിസ്താരം ഉൾപ്പെടെയുള്ള മുഴുവൻ നിയമനടപടികളും പൂർത്തിയാക്കും.
2018 ജൂലൈ രണ്ടിനാണ് സംസ്ഥാനത്തെ ആകെ നടുക്കിയ കൊലപാതകം അരങ്ങേറിയത്. മഹാരാജാസ് കോളജിലെ രണ്ടാം വർഷ ബിരുദ കെമിസ്ട്രി വിദ്യാർഥിയും എസ്എഫ്ഐ യൂണിറ്റ് സെക്രട്ടറിയുമായിരുന്ന വട്ടവട സ്വദേശി അഭിമന്യു (20) കോളജ് ഹോസ്റ്റലിന് സമീപം വെച്ച് രാഷ്ട്രീയ എതിരാളികളാൽ അതിക്രൂരമായി കുത്തേറ്റു മരിക്കുകയായിരുന്നു. ചുമരെഴുത്തുമായി ബന്ധപ്പെട്ട തർക്കമാണ് പിന്നീട് കൊലപാതകത്തിൽ കലാശിച്ചത്. ക്യാമ്പസ് ഫ്രണ്ട്, പോപ്പുലർ ഫ്രണ്ട്, എസ്ഡിപിഐ സംഘടനകളുമായി ബന്ധപ്പെട്ട് പ്രവർത്തിച്ച പതിനാറ് പ്രതികളാണ് കേസിൽ കോടതിയിൽ നേരിട്ട് വിചാരണ നേരിടുന്നത്.
by Midhun HP News | Sep 22, 2026 | Latest News, ജില്ലാ വാർത്ത
തിരുവനന്തപുരം: ഗതാഗത കമ്മീഷണര്‍ സി എച്ച് നാഗരാജുവിനെ മാറ്റി. ഇന്റലിജന്‍സ് ഐജിയായാണ് മാറ്റി നിയമിച്ചത്. പകരം ദക്ഷിണ മേഖലാ ഐജി ജി സ്പര്‍ജന്‍കുമാറിനെ ഗതാഗത കമ്മീഷണറായി നിയമിച്ചു.
നിലവില്‍ ദക്ഷിണമേഖലാ ഐജി ആര്‍ നിശാന്തിനിയാണ്. സ്പര്‍ജന്‍ കുമാറിന്റെ ഒഴിവില്‍ നിശാന്തിനിയെ ദക്ഷിണ മേഖലാ ഐജിയായും മാറ്റി നിയമിച്ചിട്ടുണ്ട്. ഐപിഎസ് ഉദ്യോഗസ്ഥരുടെ സ്ഥലംമാറ്റ ഉത്തരവ് പുറത്തിറങ്ങി.
ഭരണസൗകര്യം മുന്‍നിര്‍ത്തിയാണ് സര്‍ക്കാരിന്റെ നടപടി. ഗതാഗത വകുപ്പിലെ പ്രവര്‍ത്തനങ്ങള്‍ ഏകോപിപ്പിക്കുന്നതിനായി പുതിയൊരു കമ്മീഷണര്‍ വേണമെന്ന ശക്തമായ നിലപാട് മന്ത്രി സി പി ജോൺ സ്വീകരിക്കുകയായിരുന്നുവെന്നാണ് റിപ്പോർട്ടുകൾ.മോട്ടോര്‍ വാഹന വകുപ്പിന്റെ പ്രവര്‍ത്തനം കൂടുതല്‍ സുതാര്യവും ജനസൗഹൃദവുമാക്കാനും, സേവനങ്ങള്‍ ഡിജിറ്റലൈസ് ചെയ്യാനും നാഗരാജുവിന്റെ കാലത്ത് വകുപ്പിന് കഴിഞ്ഞിരുന്നു. അതേസമയം, ജനകീയ പൊലീസ് ഉദ്യോഗസ്ഥന്‍ എന്ന നിലയില്‍ പേരു കേട്ട ഐപിഎസ് ഓഫീസറാണ് സ്പര്‍ജന്‍ കുമാര്‍.
Recent Comments