by Midhun HP News | Sep 22, 2026 | Latest News, ജില്ലാ വാർത്ത
തിരുവനന്തപുരം: ഗതാഗത കമ്മീഷണര്‍ സി എച്ച് നാഗരാജുവിനെ മാറ്റി. ഇന്റലിജന്‍സ് ഐജിയായാണ് മാറ്റി നിയമിച്ചത്. പകരം ദക്ഷിണ മേഖലാ ഐജി ജി സ്പര്‍ജന്‍കുമാറിനെ ഗതാഗത കമ്മീഷണറായി നിയമിച്ചു.
നിലവില്‍ ദക്ഷിണമേഖലാ ഐജി ആര്‍ നിശാന്തിനിയാണ്. സ്പര്‍ജന്‍ കുമാറിന്റെ ഒഴിവില്‍ നിശാന്തിനിയെ ദക്ഷിണ മേഖലാ ഐജിയായും മാറ്റി നിയമിച്ചിട്ടുണ്ട്. ഐപിഎസ് ഉദ്യോഗസ്ഥരുടെ സ്ഥലംമാറ്റ ഉത്തരവ് പുറത്തിറങ്ങി.
ഭരണസൗകര്യം മുന്‍നിര്‍ത്തിയാണ് സര്‍ക്കാരിന്റെ നടപടി. ഗതാഗത വകുപ്പിലെ പ്രവര്‍ത്തനങ്ങള്‍ ഏകോപിപ്പിക്കുന്നതിനായി പുതിയൊരു കമ്മീഷണര്‍ വേണമെന്ന ശക്തമായ നിലപാട് മന്ത്രി സി പി ജോൺ സ്വീകരിക്കുകയായിരുന്നുവെന്നാണ് റിപ്പോർട്ടുകൾ.മോട്ടോര്‍ വാഹന വകുപ്പിന്റെ പ്രവര്‍ത്തനം കൂടുതല്‍ സുതാര്യവും ജനസൗഹൃദവുമാക്കാനും, സേവനങ്ങള്‍ ഡിജിറ്റലൈസ് ചെയ്യാനും നാഗരാജുവിന്റെ കാലത്ത് വകുപ്പിന് കഴിഞ്ഞിരുന്നു. അതേസമയം, ജനകീയ പൊലീസ് ഉദ്യോഗസ്ഥന്‍ എന്ന നിലയില്‍ പേരു കേട്ട ഐപിഎസ് ഓഫീസറാണ് സ്പര്‍ജന്‍ കുമാര്‍.
by Midhun HP News | Sep 22, 2026 | Latest News, കേരളം
തൃശൂർ: പാലപ്പിള്ളിയിലെ ഹാരിസൺ മലയാളം പ്ലാന്റേഷനിൽ വനിതാ വാച്ചറെ മരത്തിൽ തൂങ്ങിമരിച്ച നിലയിൽ കണ്ടെത്തിയ സംഭവത്തിൽ കനത്ത ജനരോഷവും തൊഴിലാളി പ്രതിഷേധവും. കുണ്ടായി എസ്റ്റേറ്റിലെ വനിതാ സെക്യൂരിറ്റി വാച്ചറായ മഞ്ജുഷ (42) ആണ് പ്ലാന്റേഷനുള്ളിലെ മരക്കൊമ്പിൽ ജീവനൊടുക്കിയത്. ജോലിക്കെത്തിയ ശേഷം കാണാതായതിനെത്തുടർന്ന് നടത്തിയ തെരച്ചിലിലാണ് മൃതദേഹം കണ്ടെത്തിയത്. സംഭവസ്ഥലത്തുനിന്ന് മേലുദ്യോഗസ്ഥർക്കെതിരെ ഗുരുതര ആരോപണങ്ങളടങ്ങിയ ആത്മഹത്യാക്കുറിപ്പും പൊലീസ് കണ്ടെടുത്തു.
തിങ്കളാഴ്ച പതിവുപോലെ ഡ്യൂട്ടിക്കെത്തിയ മഞ്ജുഷയെ പിന്നീട് കാണാതാവുകയായിരുന്നു. തുടർന്ന് ബന്ധുക്കളും സഹപ്രവർത്തകരും ചേർന്ന് എസ്റ്റേറ്റ് മേഖല കേന്ദ്രീകരിച്ച് നടത്തിയ വിശദമായ തെരച്ചിലിനൊടുവിലാണ് തോട്ടത്തിനുള്ളിലെ ഉൾഭാഗത്തെ മരത്തിൽ തൂങ്ങിയ നിലയിൽ മൃതദേഹം കാണപ്പെട്ടത്. വിവരമറിഞ്ഞ് പ്രദേശവാസികളും തോട്ടം തൊഴിലാളികളും സംഭവസ്ഥലത്തേക്ക് തടിച്ചുകൂടി. തുടർന്ന് പൊലീസ് സ്ഥലത്തെത്തി പ്രാഥമിക പരിശോധന നടത്തി ഇൻക്വസ്റ്റ് നടപടികളിലേക്ക് കടന്നു.
മരണവുമായി ബന്ധപ്പെട്ട് മഞ്ജുഷ എഴുതിയതെന്ന് കരുതുന്ന കത്താണ് പ്രതിഷേധത്തിന് ആക്കം കൂട്ടിയത്. മേലുദ്യോഗസ്ഥരിൽനിന്നുള്ള വലിയ തോതിൽ മാനസിക പീഡനം സഹിക്കാനാവാതെയാണ് ജീവനൊടുക്കുന്നതെന്ന് വ്യക്തമാക്കുന്ന കത്ത് സംസ്ഥാന പൊലീസ് ഡിജിപിയെയും ഹാരിസൺ മലയാളം കൊച്ചിൻ മാനേജരെയും അഭിസംബോധന ചെയ്തുകൊണ്ടാണ് തയ്യാറാക്കിയിട്ടുള്ളത്. എസ്റ്റേറ്റിലെ ചില ഫീൽഡ് ഓഫീസർമാർ ജോലിസ്ഥലത്ത് നിരന്തരം വേട്ടയാടുകയും സമ്മർദ്ദത്തിലാക്കുകയും ചെയ്തതായി കത്തിൽ പേരെടുത്ത് പറഞ്ഞ് കുറ്റപ്പെടുത്തുന്നുണ്ട്.
by Midhun HP News | Sep 22, 2026 | Latest News, ജില്ലാ വാർത്ത
തിരുവനന്തപുരം: സിഎംആര്‍എല്‍- എക്സാലോജിക് സാമ്പത്തിക ഇടപാടു കേസില്‍ മുന്‍ മുഖ്യമന്ത്രി പിണറായി വിജയനും മുന്‍മന്ത്രി റിയാസിനുമെതിരെ അന്വേഷണത്തിന് ഉത്തരവിട്ട് സര്‍ക്കാര്‍. ഇഡിയുടെ കത്തില്‍ കേസ് എടുക്കാമെന്ന നിയമോപേദശം ലഭിച്ചതിനെ തുടര്‍ന്ന് ഇന്ന് മുഖ്യമന്ത്രി വിഡി സതീശന്‍, ആഭ്യന്തരമന്ത്രി രമേശ് ചെന്നിത്തലയും തമ്മില്‍ നടത്തിയ കൂടിക്കാഴ്ചയ്ക്ക് പിന്നാലെയാണ് തീരുമാനം.
എഫ്ഐആര്‍ രജിസ്റ്റര്‍ ചെയ്ത് അന്വേഷിക്കാനാണ് ആഭ്യന്തരമന്ത്രി ഡിജിപിക്ക് നിര്‍ദേശം നിര്‍ദേശം നല്കിയത്. കേസ് അന്വേഷിക്കുന്നതിനായി പ്രത്യേക അന്വേഷണസംഘം രൂപികരിക്കുമെന്നാണ് വിവരം. അഴിമതി നിരോധന നിയമപ്രകാരം കേസെടുത്ത് അന്വേഷണം നടത്തണമെന്നായിരുന്നു ഇഡിയുടെ റിപ്പോര്‍ട്ടിലെ ശുപാര്‍ശ. രണ്ടാഴ്ച മുന്‍പാണ് ഇഡി ഇക്കാര്യം ആവശ്യപ്പെട്ട് ഡിജിപിക്ക് കത്ത് നല്കിയത്. അതിന്റെ അടിസ്ഥാനത്തില്‍ ഇരുവര്‍ക്കുമെതിരെ കേസ് എടുക്കാമെന്ന് സെപ്റ്റംബര്‍ പതിനെട്ടിന് ഡയറക്ടര്‍ ജനറല്‍ ഓഫ് പ്രോസിക്യൂഷന്‍ നിയമോപദേശം നല്‍കിയിരുന്നു.
സിഎംആര്‍എല്‍- എക്സാലോജിക് സാമ്പത്തിക ഇടപാടു കേസില്‍ മുന്‍ മുഖ്യമന്ത്രി പിണറായി വിജയനെതിരെ കേസ് എടുക്കാമെന്നാണ് ഡയറക്ടര്‍ ജനറല്‍ ഓഫ് പ്രോസിക്യൂഷന്റെ നിയമോപദേശം. എന്‍ഫോഴ്‌സ്‌മെന്റ് ഡയറക്ടറേറ്റ് കൈമാറിയ കേസിന്റെ വസ്തുതകളും സാഹചര്യങ്ങളും പരിശോധിച്ചതില്‍ നിന്ന്, 2017 മാര്‍ച്ച് 4-നും 2019 മെയ് 18-നും ഇടയില്‍ വ്യാജ കരാറിന്റെ മറവില്‍ കൊച്ചിന്‍ മിനറല്‍സ് ആന്‍ഡ് റൂട്ടൈല്‍ ലിമിറ്റഡില്‍ നിന്ന് മകള്‍ ടി. വീണ വഴി 3.28 കോടി രൂപയുടെ സാമ്പത്തിക നേട്ടം പിണറായി വിജയന്‍ കൈവരിച്ചതായി സംശയലേശമന്യേ തെളിയിക്കപ്പെട്ടിട്ടുണ്ടെന്ന്, ഡിജിപി ടി ആസിഫലി നിയമോപദേശത്തില്‍ പറഞ്ഞിരുന്നു.
ഈ തുക പിണറായി വിജയന്റെ അറിയപ്പെടുന്ന വരുമാന സ്രോതസ്സുകള്‍ക്ക് ആനുപാതികമല്ലെന്ന് നിയമോപദേശത്തില്‍ പറയുന്നു. കൂടാതെ, 1988-ലെ അഴിമതി നിരോധന നിയമത്തിലെ സെക്ഷന്‍ 13(1)(b) പ്രകാരം പിണറായിയും വീണയും വിചാരണ നേരിടാന്‍ ബാധ്യസ്ഥരാണെന്നും നിയമോപദേശത്തില്‍ ഉണ്ട്.
കൃത്യം നടന്ന കാലയളവ് അഴിമതി നിരോധന നിയമത്തിലെ ഭേദഗതി നടന്ന 2018 ജൂലൈ 26-ന് മുമ്പും ശേഷവും ആയതിനാല്‍, ഭേദഗതിക്ക് മുമ്പും ശേഷവും ബാധകമായ ശിക്ഷാ വ്യവസ്ഥകള്‍ ഉചിതമായി പ്രയോഗിക്കാവുന്നതാണെന്നും നിയമോപദേശത്തില്‍ പറയുന്നു. സിഎംആര്‍എല്‍ കേസില്‍ മുന്‍മന്ത്രിയും വീണയുടെ ഭര്‍ത്താവുമായ മുഹമ്മദ് റിയാസിനെതിരെയും നിയമനടപടി സ്വീകരിക്കാവുന്നതാണെന്ന് ഡിജിപി നിയമോപദേശത്തില്‍ വ്യക്തമാക്കി.
by Midhun HP News | Sep 22, 2026 | Latest News, ദേശീയ വാർത്ത
ന്യൂയോര്‍ക്ക്: യുഎസ് പ്രസിഡന്റ് ഡൊണാള്‍ഡ് ട്രംപും പ്രമുഖ വാര്‍ത്താ മാധ്യമങ്ങളും തമ്മിലുള്ള ഏറ്റുമുട്ടലിനിടയില്‍ പുതിയ ലൈവ് സ്ട്രീമിങ്ങുമായി ട്രംപ് ടിവി രംഗത്തെത്തി. ട്രംപിന്റെ പഴയ കാല പ്രസംഗങ്ങള്‍, ഭരണകൂടത്തിന്റെ പ്രഖ്യാപനങ്ങള്‍, പുതിയ അപ്‌ഡേറ്റുകള്‍ എന്നിവ ഉള്‍പ്പെടുത്തിക്കൊണ്ടാണ് വൈറ്റ് ഹൗസ് ലൈവ് സ്ട്രീമിങ്ങ് ആരംഭിച്ചിരിക്കുന്നത്.
തനിക്കെതിരെ നിരന്തരമായി വ്യാജവാര്‍ത്തകള്‍ നല്‍കുകയാണെന്ന് ആരോപിച്ച് സിഎന്‍എന്‍ , പൊളിറ്റിക്കോ , എംഎസ്‌നൗ എന്നീ മാധ്യമങ്ങള്‍ക്ക് നേരത്തെ ട്രംപ് വൈറ്റ് ഹൗസില്‍ വിലക്ക് ഏര്‍പ്പെടുത്തിയിരുന്നു. വിലക്കിനെതിരെ മൂന്ന് മാധ്യമസ്ഥാപനങ്ങളും ഫെഡറല്‍ കോടതിയില്‍ ഹര്‍ജി നല്‍കി. എന്നാല്‍ മാധ്യമങ്ങള്‍ക്ക് ഏര്‍പ്പെടുത്തിയ നിയന്ത്രണങ്ങളെ ന്യായീകരിച്ചുകൊണ്ട് ട്രംപ് തിങ്കളാഴ്ച്ച രംഗത്ത് എത്തി.
വ്യാജവാര്‍ത്തകള്‍ നല്‍കുന്ന മാധ്യമപ്രവര്‍ത്തകരെ വൈറ്റ് ഹൗസില്‍ നിയന്ത്രിക്കാന്‍ ഭരണകൂടത്തിന് അവകാശമുണ്ടെന്ന് ട്രംപ് വ്യക്തമാക്കി. വിലക്കിനെ തുടര്‍ന്ന് തന്നെ മറ്റുള്ള മാധ്യമങ്ങളും ബഹിഷ്‌ക്കരിച്ചേക്കും എന്നുള്ള വാദങ്ങളും ട്രംപ് തള്ളിക്കളഞ്ഞു. മാധ്യമങ്ങളുമായുള്ള പ്രശ്‌നം രൂക്ഷമാകുന്നതിനിടിയില്‍ ആണ് ലൈവ് സ്ട്രീമിംഗുമായി ‘ട്രംപ് ടിവി’ പ്രവര്‍ത്തനം ആരംഭിച്ചത്.
ലോഞ്ചിനിടയില്‍ അമേരിക്കയുടെ 47ാമത് പ്രസിഡന്റായി ട്രംപ് സത്യപ്രതിജ്ഞ ചെയ്യുന്ന ചടങ്ങ് ഉള്‍പ്പെടെയുള്ള പൊതുപരിപാടികളുടെയും പ്രസംഗങ്ങളുടെയും ദൃശ്യങ്ങള്‍ വൈറ്റ് ഹൗസ് സംപ്രേഷണം ചെയ്തു. അതേസമയം, റിപ്പോര്‍ട്ടിംഗിന്റെ അടിസ്ഥാനത്തില്‍ ഏത് മാധ്യമപ്രവര്‍ത്തകര്‍ക്ക് വൈറ്റ് ഹൗസില്‍ പ്രവേശനം നല്‍കണമെന്ന് തീരുമാനിക്കാന്‍ സര്‍ക്കാരിന് അവകാശമില്ലെന്ന് വാദിച്ചുകൊണ്ട് സിഎന്‍എന്‍, എംഎസ്‌നൗ, പൊളിറ്റിക്കോ എന്നിവര്‍ മാധ്യമ നിയന്ത്രണത്തെ കോടതിയില്‍ ചോദ്യം ചെയ്തിരിക്കുകയാണ്. 81ാമത് ഐക്യരാഷ്ട്ര പൊതുസഭയില്‍ പങ്കെടുക്കുന്നതിനായി ട്രംപ് ഇപ്പോള്‍ ന്യൂയോര്‍ക്കിലാണ് ഉള്ളത്.
by Midhun HP News | Sep 22, 2026 | Latest News, കേരളം
കൊച്ചി: അനധികൃതമായി വ്യാജമദ്യമടക്കം വീട്ടിൽ സൂക്ഷിച്ച കേസിൽ ജയിലിൽ കഴിയുന്ന ആന്‍റോ അഗസ്റ്റിന് ഹൈക്കോടതി ജാമ്യം അനുവദിച്ചു. ജസ്റ്റിസ് കൗസർ എടപ്പഗത്തിന്റെ ബെഞ്ചാണ് ഹർജി അനുവദിച്ചത്. മാനന്തവാടി ജയിലിൽ ജുഡീഷ്യൽ കസ്റ്റഡിയിൽ കഴിയുന്ന ആൻ്റോ അഗസ്റ്റിന് കോടതി ഉത്തരവ് ലഭ്യമാകുന്ന മുറയ്ക്ക് ജയിലിൽ നിന്ന് നടപടികൾ പൂർത്തിയാക്കി പുറത്തിറങ്ങാനാവും. ഇന്ന് തന്നെ ഇദ്ദേഹം ജയിൽ മോചിതനാകുമെന്നാണ് കരുതുന്നത്.
അതേസമയം മുട്ടിൽ മരം മുറിയിലെ വഞ്ചന കേസിൽ അഗസ്റ്റിൻ സഹോദരങ്ങൾ നൽകിയ ഹർജി ഇന്ന് സുപ്രീംകോടതി പരിഗണിക്കും. ജസ്റ്റിസ് ജെ ബി പർദ്ദിവാല അധ്യക്ഷനായ ബെഞ്ച് ആണ് ഹർജി പരിഗണിക്കുന്നത്.ചോറ്റാനിക്കര കോടതിയിലെ വിചാരണ തടയണമെന്ന് ആവശ്യപ്പെട്ടാണ് കേസിലെ ഒന്നാം പ്രതിയായ റോജി അഗസ്റ്റിൻ സുപ്രീംകോടതിയിൽ ഹർജി സമർപ്പിച്ചത്. നേരത്തെ ഹൈക്കോടതി ഈ ആവശ്യം തള്ളിയിരുന്നു. ഹൈക്കോടതി ഉത്തരവ് ഉടനടി സ്റ്റേ ചെയ്യണമെന്നായിരുന്നു ആവശ്യം. വിചാരണ ആറുമാസത്തിൽ പൂർത്തിയാക്കാൻ ചോറ്റാനിക്കര കോടതിക്ക് ഹൈക്കോടതി നിർദേശം നല്‍കിയിരുന്നു.
ജസ്റ്റിസ് ജെ ബി പർദ്ദിവാല അധ്യക്ഷനായ ബെഞ്ച് ആണ് ഹർജി പരിഗണിക്കുന്നത്.ചോറ്റാനിക്കര കോടതിയിലെ വിചാരണ തടയണമെന്ന് ആവശ്യപ്പെട്ടാണ് കേസിലെ ഒന്നാം പ്രതിയായ റോജി അഗസ്റ്റിൻ സുപ്രീംകോടതിയിൽ ഹർജി സമർപ്പിച്ചത്. നേരത്തെ ഹൈക്കോടതി ഈ ആവശ്യം തള്ളിയിരുന്നു. ഹൈക്കോടതി ഉത്തരവ് ഉടനടി സ്റ്റേ ചെയ്യണമെന്നായിരുന്നു ആവശ്യം. വിചാരണ ആറുമാസത്തിൽ പൂർത്തിയാക്കാൻ ചോറ്റാനിക്കര കോടതിക്ക് ഹൈക്കോടതി നിർദേശം നല്‍കിയിരുന്നു.
Recent Comments