by Midhun HP News | Aug 31, 2026 | Latest News, കേരളം
കണ്ണൂര്‍: യുവതിയുടെ കുളിമുറി ദൃശ്യങ്ങള്‍ പകര്‍ത്തിയ എസ്എഫ്‌ഐ നേതാവിനെ പാര്‍ട്ടിയില്‍ നിന്നും പുറത്താക്കി. എസ്എഫ്‌ഐ നേതാവ് കെ നവനീതിനെതിരെയാണ് നടപടി. നവനീതിനെ പാര്‍ട്ടിയുടെ എല്ലാ ഘടകങ്ങളില്‍ നിന്നും പുറത്താക്കിയതായി സിപിഎം ചുഴലി ലോക്കല്‍ കമ്മിറ്റി അറിയിച്ചു.
പാര്‍ട്ടിയോ പാര്‍ട്ടിയുമായി ബന്ധപ്പെട്ട ഏതെങ്കിലും വ്യക്തികളോ നവനീതിന് ഒരു തരത്തിലുള്ള സഹായവും ചെയ്ത് കൊടുത്തിട്ടില്ലെന്നും ലോക്കല്‍ കമ്മിറ്റി അറിയിച്ചു.പൈസക്കരി ദേവമാതാ കോളേജിലെ യുയുസിയാണ് നവനീത്. കഴിഞ്ഞ 20 നാണ് നവനീത് മൊബൈലില്‍ കുളിമുറിദൃശ്യം പകര്‍ത്തിയത്.
വീടിന് പുറത്തുള്ള കുളിമുറിയില്‍ കുളിക്കുന്നതിനിടെയാണ് ഭിത്തിയിലെ വിടവിലൂടെ മൊബൈല്‍ ഫോണ്‍ കണ്ടത്. യുവതി ബഹളംവെച്ചതോടെ ബന്ധുക്കളെത്തി നവനീതിനെ തടഞ്ഞുവെച്ചു. ഫോണ്‍ പരിശോധിച്ചപ്പോള്‍ കുളിക്കുന്ന ദൃശ്യങ്ങളും നേരത്തേ യുവതിയുടെ വീടിന് സമീപത്തുനിന്ന് പകര്‍ത്തിയ മറ്റുദൃശ്യങ്ങളും കണ്ടെത്തിയിരുന്നു.
ഈ സംഭവങ്ങളുടെ പശ്ചാത്തലത്തില്‍ ഈ മാസം 21 ന് ബാലസംഘം ശ്രീകണ്ഠപുരം ഏരിയാ കമ്മിറ്റിയും എസ്എഫ്‌ഐ ഏരിയ കമ്മിറ്റിയും അടിയന്തര ഓണ്‍ലൈന്‍ യോഗം ചേര്‍ന്ന് നവനീതിനെ പുറത്താക്കി. 22 ന് ബ്രാഞ്ച് യോഗം ചേര്‍ന്ന് സിപിഎമ്മില്‍നിന്നു പുറത്താക്കി. പാര്‍ട്ടി ഇയാളെ സംരക്ഷിക്കാന്‍ ശ്രമിക്കുന്നു എന്ന പ്രചാരണം അസംബന്ധമാണെന്നും സിപിഎം വ്യക്തമാക്കി.
by Midhun HP News | Aug 31, 2026 | Latest News, ജില്ലാ വാർത്ത
തിരുവനന്തപുരം: സെക്രട്ടേറിയറ്റില്‍ മുഖ്യമന്ത്രി വിഡി സതീശൻ സന്ദര്‍ശകരെ കാണുന്നതുമായി ബന്ധപ്പെട്ട് പുതിയ ക്രമീകരണങ്ങള്‍ ഏർപ്പെടുത്തി. പൊതുഅവധി അല്ലാത്ത തിങ്കള്‍, ബുധന്‍, വെള്ളി ദിവസങ്ങളില്‍ വൈകുന്നേരം 3 മണി മുതൽ 5.30 വരെയാണ് സന്ദർശന സമയം. ഈ മൂന്ന് ദിവസങ്ങളിലും പ്രായമായവര്‍, ഭിന്നശേഷിക്കാര്‍, ശാരീരിക അവശതകളുള്ളവര്‍ എന്നിവരെ സെക്രട്ടേറിയറ്റ് വളപ്പിലെ പരാതി പരിഹാര സെല്ലില്‍ മുഖ്യമന്ത്രി നേരിട്ട് കാണും. അതിനുശേഷമായിരിക്കും മുഖ്യമന്ത്രി ഓഫീസില്‍ സന്ദര്‍ശകരെ കാണുക.
മുന്‍കൂട്ടി അപ്പോയിന്റ്മെന്റ് എടുത്തിട്ടുള്ളവര്‍ക്കും ഈ സമയത്ത് ഓഫീസിലെത്തി മുഖ്യമന്ത്രിയെ കാണാം. സെപ്റ്റംബര്‍ 2 മുതല്‍ പുതിയ ക്രമീകരണം നിലവില്‍ വരും. മറ്റു ജില്ലകളില്‍ നിന്ന് എത്തുന്നവര്‍ക്ക് മുഖ്യമന്ത്രിയെ വേഗത്തില്‍ കണ്ട് പരാതി നല്‍കുന്നതിനും തിരക്ക് ഒഴിവാക്കുന്നതിനുമാണ് പുതിയ ക്രമീകരണമെന്ന് മുഖ്യമന്ത്രിയുടെ ഓഫീസ് അറിയിച്ചു.
മുഖ്യമന്ത്രി സെക്രട്ടേറിയറ്റില്‍ ഇല്ലാത്ത ദിവസങ്ങളിലും പരാതി പരിഹാര സെല്ലില്‍ പൊതുജനങ്ങള്‍ക്ക് നേരിട്ട് പരാതി നല്‍കാം. വൈകുന്നേരം 3.00 മുതല്‍ 5.00 വരെ പ്രത്യേകം നിയോഗിക്കപ്പെട്ട ഉദ്യോഗസ്ഥര്‍ പൊതുജനങ്ങളുടെ പരാതികള്‍ സ്വീകരിക്കും. നിലവിൽ സാധാരണ സന്ദർശന സമയത്ത് എല്ലാ ദിവസവും മുഖ്യമന്ത്രിയുടെ ഓഫിസിലേക്ക് പ്രവേശനം അനുവദിച്ചിരുന്നു.
by Midhun HP News | Aug 31, 2026 | Latest News, ജില്ലാ വാർത്ത
ഇന്ത്യൻ യുവ മാന്ത്രിക നിരയിൽ ഏറെ ശ്രദ്ധേയനും സന്ദേശ പ്രചരണങ്ങൾക്ക് വേണ്ടി സ്വജീവിതം പണയപ്പെടുത്തി ഇന്ത്യയിൽ ഏറ്റവും അധികം എസ്‌ക്കേപ്പ് മാജിക്കുകൾ അവതരിപ്പിച്ച, വേഗതയേറിയ മജീഷ്യനുള്ള ലോക റെക്കോർഡ് കരസ്ഥമാക്കിയ മജീഷ്യൻ ഹാരിസ് താഹക്ക് ഇന്ത്യയുടെ മുൻ രാഷ്ട്രപതിയും ശാസ്ത്രജ്ഞനുമായ എപിജെ അബ്ദുൽ കലാം മെമ്മോറിയൽ യൂത്ത് ഐക്കൺ അവാർഡ് സമ്മാനിച്ചു.
തിരുവനന്തപുരം വക്കം കേന്ദ്രമാക്കി പ്രവർത്തിക്കുന്ന സ്നേഹ സാഗരം ചാരിറ്റബിൾ ട്രസ്റ്റ് ആണ് അവാർഡ് സമ്മാനിച്ചത്. മാജിക്കിൽ ഉപരി അധ്യാപകനും മോട്ടിവേഷണൽ സ്പീക്കറുമായ ഹാരിസ് താഹ പരിസ്ഥിതി സംരക്ഷണത്തിന് വേണ്ടിയും ഭിന്നശേഷിക്കാരുടെ ഉന്നമനത്തിനു വേണ്ടിയും കുട്ടികൾ നേരിടുന്ന പീഡനങ്ങൾക്കെതിരെയും മലിനമായി കിടക്കുന്ന ജലാശയങ്ങൾ ഒറ്റയ്ക്ക് സംരക്ഷിക്കുന്നതും ലഹരി വിരുദ്ധ പ്രവർത്തനങ്ങൾ നിരന്തരം ചെയ്യുന്നതും കഴിഞ്ഞ 26 വർഷമായി രക്തദാന രംഗത്ത് വലിയ സംഭാവനകൾ നൽകിയതും
ഇന്ത്യയിൽ ആദ്യമായി 365 ദിവസം 365 മാജിക് സോഷ്യൽ മീഡിയയിൽ പോസ്റ്റ് ചെയ്യുന്ന ചലഞ്ച് ഏറ്റെടുത്തതും കേരളത്തിൽ ആദ്യമായി സ്വന്തമായി അറ്റംപ്റ്റ് ചെയ്ത് നാഷണൽ റെക്കോർഡും വേൾഡ് റെക്കോർഡും നേടിയതും ഇന്ത്യയിൽ ആദ്യമായി സംഘാടകരുടെ ബഡ്ജറ്റിന് അനുസരിച്ച് പ്രോഗ്രാം അവതരിപ്പിക്കുന്ന പോർട്ടബിൾ ഇല്യൂഷൻ മാജിക് ഷോ ചെയ്യുന്നതും പരിഗണിച്ചാണ് യൂത്ത് ഐക്കൺ അവാർഡ് നൽകിയത്.
മണനാക്ക് ടർഫിൽ നടന്ന ചടങ്ങിൽ വെച്ച് ആറ്റിങ്ങൽ നഗരസഭ ചെയർമാൻ എം പ്രദീപ് അവാർഡ് സമ്മാനിച്ചു. സി പി ഐ എം തിരുവനന്തപുരം ജില്ലാ കമ്മിറ്റി അംഗം അഡ്വ:ഷൈലജ ബീഗം, ചിറയിൻകീഴ് ബ്ലോക്ക്‌ പഞ്ചായത്ത് പ്രസിഡന്റ് ഗീത സുരേഷ്, വക്കം ഗ്രാമപഞ്ചായത്ത് പ്രസിഡന്റ് ഡോ സജീവ്, കടക്കാവൂർ ഗ്രാമപഞ്ചായത്ത് പ്രസിഡന്റ് അഫ്സൽ മുഹമ്മദ്‌, സിപിഐഎം വക്കം ലോക്കൽ കമ്മിറ്റി സെക്രട്ടറി റ്റി. ഷാജു, വക്കം ഷാജഹാൻ, അൻവർ, നദീംഷ തുടങ്ങിയവർ സംസാരിച്ചു. ചടങ്ങിൽ ഉന്നത വിജയം നേടിയ വിദ്യാർത്ഥികളെ ആദരിച്ചു.
by Midhun HP News | Aug 31, 2026 | Latest News, ജില്ലാ വാർത്ത
കല്ലമ്പലം: ശതാബ്ദി ആഘോഷിക്കുന്ന ഒറ്റൂർ പഞ്ചായത്തിലെ ശ്രീനാരായണപുരം ഗവ. യുപിഎസിലെ ശതാബ്ദി കവാടത്തിൻ്റെ ഉദ്ഘാടനം സെപ്റ്റംബർ മൂന്നിന് ഉച്ചയ്ക്ക് 1.30 ന് കേരള സർവകലാശാല പ്രസിദ്ധീകരണ വിഭാഗം മുൻ ഡയറക്‌ടർ ഡോ.എ.റസ്സലുദീൻ നിർവ്വഹിക്കും.
പിടിഎ പ്രസിഡൻ്റ് ജി.എസ്.താരാമോൾ അധ്യക്ഷത വഹിക്കും. ജില്ല പഞ്ചായത്ത് പ്രസിഡൻ്റ് വി. പ്രിയദർശിനി, മറ്റ് പഞ്ചായത്ത് പ്രതിനിധികൾ, അധ്യാപകർ, പൂർവ വിദ്യാർഥികൾ എന്നിവർ പങ്കെടുക്കും.
ചരിത്ര സ്‌മരണകൾ ഉറങ്ങുന്ന സ്‌കൂൾ 100 വർഷം പൂർത്തിയാക്കുന്ന വേളയിൽ ഒരു വർഷം നീണ്ടു നിൽക്കുന്ന ആഘോഷ പരിപാടികൾ നടന്നു വരികയാണ്. പരിമിതികളിൽ വീർപ്പുമുട്ടിയിരുന്ന സ്‌കൂളിന് സൗകര്യങ്ങളോട് കൂടിയ പുതിയ ബഹുനില മന്ദിരത്തിൻ്റെ പണി അവസാന ഘട്ടത്തിലാണ്. ഇതിനായി ഒ.എസ്. അംബിക എംഎൽഎയുടെ ശ്രമഫലമായി ഒരു കോടി രൂപ അനുവദിച്ചിരുന്നു.
കൂടാതെ പൂർവ വിദ്യാർഥികളുടെയും നാട്ടുകാരുടെയും സഹകരണത്തോടെ ബാക്കി ഫണ്ടും ഉൾപ്പെടുത്തിയാണ് നിർമാണം പുരോഗമിക്കുന്നത്. 1982 ൽ 6,7 ക്ലാസുകൾ ആരംഭിച്ചതോടെയാണ് യുപി സ്‌കൂളായി ഉയർന്നത്. ഇപ്പോൾ ഒന്നുമുതൽ 7 വരെയും പ്രീ പ്രൈമറി ക്ലാസും പ്രവർത്തിക്കുന്ന സ്‌കൂളിൽ 460 ഓളം കുട്ടികൾ പഠിക്കുന്നു. ഒറ്റൂരിനെ കൂടാതെ ചെറുന്നിയൂർ, ചെമ്മരുതി പഞ്ചായത്തുകളിലെ കുട്ടികളും ഇവിടെ പഠിക്കാൻ എത്തുന്നു. തികച്ചും ഗ്രാമീണ മേഖലയിൽ പ്രവർത്തിക്കുന്ന സ്‌കൂളിൽ മികച്ച പഠന അന്തരീക്ഷരം ഒരുക്കുന്നതിൽ പിടിഎയും അധ്യാപകരും നാട്ടുകാരും മുന്തിയ പരിഗണനയാണ് നൽകുന്നത്.
by Midhun HP News | Aug 31, 2026 | Latest News, കേരളം
സെപ്റ്റംബറില്‍ ബാങ്ക് ഇടപാടുകള്‍ നടത്താന്‍ പദ്ധതി ഉണ്ടോ? സെപ്റ്റംബറില്‍ രാജ്യത്ത് മൊത്തം 14 ദിവസം ബാങ്കുകള്‍ പ്രവര്‍ത്തിക്കില്ല. പ്രാദേശിക, ദേശീയ അവധികളും ഞായറാഴ്ചകളും രണ്ടാമത്തെ ശനിയാഴ്ചയും നാലാമത്തെ ശനിയാഴ്ചയും അടക്കമുള്ള ബാങ്കുകളുടെ അവധി കണക്കാണിത്. സംസ്ഥാനാടിസ്ഥാനത്തില്‍ ബാങ്കുകളുടെ അവധി ദിനങ്ങളില്‍ വ്യത്യാസമുണ്ടാകും. വിവിധ സംസ്ഥാനങ്ങളില്‍ വ്യത്യസ്ത രീതിയിലാണ് ബാങ്കുകള്‍ക്ക് അവധി വരുന്നത്.
കേരളത്തില്‍ ഞായറാഴ്ചകളിലും രണ്ടാമത്തെ ശനിയാഴ്ചയും നാലാമത്തെ ശനിയാഴ്ചയും ശ്രീകൃഷ്ണ ജയന്തിക്കും ശ്രീനാരായണ ഗുരു സമാധി ദിനത്തിലും ബാങ്കിന് അവധിയാണ്. സെപ്റ്റംബറില്‍ മൊത്തം കേരളത്തില്‍ എട്ട് ദിവസമാണ് ബാങ്ക് അവധിയുള്ളത്. അവധി സമയത്തും ഓണ്‍ലൈന്‍ ഇടപാടുകള്‍ നടത്താന്‍ സാധിക്കുമെന്നത് ഇടപാടുകാര്‍ക്ക് ആശ്വാസമാണ്. റിസര്‍വ് ബാങ്ക് ഓഫ് ഇന്ത്യ പുറത്തിറക്കുന്ന ഹോളിഡേ കലണ്ടര്‍ അനുസരിച്ചാണ് സെപ്റ്റംബര്‍ മാസത്തില്‍ മൊത്തം 14 ദിവസം ബാങ്ക് അവധി വരുന്നത്. അവധിയും അവധി ബാധകമാകുന്ന സംസ്ഥാനങ്ങളുടെയും പട്ടിക താഴെ:
സെപ്റ്റംബര്‍ 4- വെള്ളിയാഴ്ച- ശ്രീകൃഷ്ണ ജയന്തി- കേരളം ഉള്‍പ്പെടെയുള്ള സംസ്ഥാനങ്ങളില്‍ അവധി
സെപ്റ്റംബര്‍ ആറ്- ഞായറാഴ്ച
സെപ്റ്റംബര്‍ 11- വെള്ളിയാഴ്ച- രാജസ്ഥാനില്‍ അവധി
സെപ്റ്റംബര്‍ 12- രണ്ടാം ശനിയാഴ്ച
സെപ്റ്റംബര്‍ 13- ഞായറാഴ്ച
സെപ്റ്റംബര്‍ 14- തിങ്കളാഴ്ച- വിനായക ചതുര്‍ഥി- മഹാരാഷ്ട്ര, ഒഡിഷ, കര്‍ണാടക, തമിഴ്‌നാട്, ഗുജറാത്ത്, തെലങ്കാന, ഗോവ, ആന്ധ്രാപ്രദേശ് എന്നി സംസ്ഥാനങ്ങളില്‍ അവധി
സെപ്റ്റംബര്‍ 15- ചൊവ്വാഴ്ച- ഗണേശ ചതുര്‍ഥി- ഗുജറാത്ത്, ഒഡിഷ, ഗോവ എന്നി സംസ്ഥാനങ്ങളില്‍ അവധി
സെപ്റ്റംബര്‍ 20- ഞായറാഴ്ച
സെപ്റ്റംബര്‍ 21- തിങ്കളാഴ്ച- ശ്രീനാരായണഗുരു സമാധി ദിനം- കേരളത്തില്‍ അവധി
സെപ്റ്റംബര്‍ 22- ചൊവ്വാഴ്ച- കര്‍മ്മ പൂജ- ഝാര്‍ഖണ്ഡില്‍ അവധി
സെപ്റ്റംബര്‍ 23- ബുധനാഴ്ച- മഹാരാജ ഹരി സിങ്ങിന്റെ ജന്മദിനം- ജമ്മു കശ്മീരില്‍ അവധി
സെപ്റ്റംബര്‍ 25- വെള്ളിയാഴ്ച- സിക്കിമില്‍ അവധി
സെപ്റ്റംബര്‍ 26- നാലാമത്തെ ശനിയാഴ്ച
സെപ്റ്റംബര്‍ 27- ഞായറാഴ്ച
Recent Comments