by Midhun HP News | Oct 29, 2026 | Latest News, കേരളം
ഡല്‍ഹി: ഏറ്റവും പുതിയ എഐ മോഡലായ ജെമിനി 4 കാര്‍ബണ്‍ പുറത്തിറക്കി ഗൂഗിള്‍. കോഡിങ്, സങ്കീര്‍ണ്ണമായ എഞ്ചിനീയറിങ് ജോലികള്‍, സൈബര്‍ സുരക്ഷ എന്നിവയ്ക്കായി രൂപകല്‍പ്പന ചെയ്ത മോഡലാണിത്. രണ്ടാഴ്ച മുമ്പ് പുറത്തിറക്കിയ ഗൂഗിള്‍ ജെമിനി 4 ആര്‍ഗോണ്‍ അടിസ്ഥാനമാക്കിയാണ് ഈ മോഡല്‍ നിര്‍മ്മിച്ചിരിക്കുന്നത്.
സോഫ്റ്റ്വെയറുകളിലെ സുരക്ഷാ പിഴവുകള്‍ കണ്ടെത്തല്‍, അപകടസാധ്യതകള്‍ വിലയിരുത്തല്‍ പിഴവുകള്‍ പരിഹരിച്ച് സുരക്ഷിതമാക്കല്‍ എന്നിവയില്‍ അത്യാധുനികമായ പ്രകടനമാണ് ജെമിനി 4 കാര്‍ബണ്‍ കാഴ്ചവെക്കുന്നത്.
ആര്‍ഗോണിനെ അപേക്ഷിച്ച് ഇരട്ടിയലധികം വിജയകരമായി സുരക്ഷിതമായ കോഡുകള്‍ നിര്‍മ്മിക്കാന്‍ കാര്‍ബണിന് സാധിക്കും. ദിവസങ്ങളോളം തുടര്‍ച്ചയായി പ്രവര്‍ത്തിച്ച് സങ്കീര്‍ണ്ണമായ കോഡിങ് പ്രശ്‌നങ്ങള്‍ക്കും സിസ്റ്റം ബഗുകള്‍ക്കും സ്വയം പരിഹാരം കണ്ടെത്താന്‍ ഈ മോഡലിന് ശേഷിയുണ്ട്.ഗൂഗിളിന്റെ അഭിപ്രായത്തില്‍ ആര്‍ട്ടിഫിഷ്യല്‍ അനാലിസിസ് ഇന്റലിജന്‍സ് ഇന്‍ഡക്‌സ് 5.0 ല്‍ 59 സ്‌കോറുമായി ജെമിനി 4 കാര്‍ബണ്‍ ഒന്നാം സ്ഥാനത്താണ്.
കോഡിങ്, ശാസ്ത്രീയ ജോലികള്‍, വെബ് ഡെവലപ്പിങ്, മള്‍ട്ടിമോഡല്‍ എന്നിവയിലുടനീളം മോഡല്‍ മികച്ച പെര്‍ഫോര്‍മെന്‍സ് നല്‍കുന്നുവെന്ന് കമ്പനി പറഞ്ഞു. വ്യാജവിവരങ്ങള്‍ നല്‍കുന്നത് ഒഴിവാക്കാനും പ്ലഗിന്‍/പ്രോംപ്റ്റ് ആക്രമണങ്ങളെ പ്രതിരോധിക്കാനും മോഡലിന് പരിശീലനം നല്‍കിയിട്ടുണ്ട്. യു.എസ് ഗവണ്‍മെന്റിന്റെ പ്രീറിലീസ് പരിശോധനകളുടെയും ഗൂഗിളിന്റെ ‘ഫെയര്‍വിന്‍ഡ് പ്രോഗ്രാമിന്റെ’ ഭാഗമായും ആദ്യഘട്ടത്തില്‍ തെരഞ്ഞെടുത്ത സൈബര്‍ സുരക്ഷാ വിദഗ്ധര്‍ക്കാണ് കാര്‍ബണ്‍ ലഭ്യമാക്കുന്നത്.
by Midhun HP News | Oct 29, 2026 | Latest News, കേരളം
പാലക്കാട്: കൊഴിഞ്ഞാമ്പാറ മേനോൻപാറ കൂരാങ്കാട്ടെ വാടകവീട്ടിലെ കുളിമുറിയിലെ സിമന്റ് ടാങ്കിൽ സഹോദരങ്ങളായ രണ്ടു കുട്ടികളെ മുക്കിക്കൊലപ്പെടുത്തിയ കേസിൽ ഒരാൾ കൂടി അറസ്റ്റിൽ. അമ്മ നിവേദ്യയുടെ ആൺസുഹൃത്താണ് അറസ്റ്റിലായത്. കുട്ടികളുടെ അമ്മയെ കസ്റ്റഡിയിൽ വാങ്ങി തെളിവെടുപ്പ് നടത്തിയപ്പോഴാണ് മറ്റൊരാളുടെ സഹായം കൂടി ലഭിച്ചിരുന്നതായി പൊലീസിന് വ്യക്തമായത്.
കൊലപാതകത്തിന് അമ്മയ്ക്ക് ആവശ്യമായ സഹായങ്ങൾ നൽകിയത് പിടിയിലായ ആളാണെന്ന് പൊലീസ് കണ്ടെത്തി. കുടുംബം താമസിച്ചിരുന്ന വീടിന് സമീപം തന്നെയാണ് ഇയാളും താമസിച്ചിരുന്നത്. കൊലപാതകത്തിന് അമ്മയ്ക്ക് മറ്റാരുടെയോ സഹായം ലഭിച്ചിട്ടുണ്ടെന്ന സംശയത്തിന്റെ അടിസ്ഥാനത്തിൽ പ്രദേശത്തെ ചിലരെ പൊലീസ് നിരീക്ഷിച്ചു വരികയായിരുന്നു. കുട്ടികളുടെ അച്ഛന്റെ സഹോദരിക്കുണ്ടായ സംശയമാണ് കൊലപാതകം പുറത്തുവരാൻ കാരണമായത്.
വടകരപ്പതി പഴണിയാർപാളയം മണൽക്കാട് ജോൺകുമാറിന്റെയും നിവേദ്യയുടെയും മക്കളായ ജെനിഫർ ജൂലിയറ്റ് (5), റോബിൻ ക്രിസ്റ്റഫർ (3) എന്നിവരെയാണ് സെപ്റ്റംബർ 29-ന് രാവിലെ പത്തരയോടെ വാടകവീട്ടിലെ കുളിമുറിയിലെ വെള്ളം നിറച്ച സിമന്റ് ടാങ്കിൽ മരിച്ചനിലയിൽ കണ്ടെത്തിയത്. ആദ്യം കുട്ടികൾ വെള്ളത്തിൽ വീണ് മുങ്ങിമരിച്ചതാണെന്നായിരുന്നു നിഗമനം.അന്വേഷണത്തിൽ കൊലപാതകമാണെന്ന് വ്യക്തമായതോടെ സെപ്റ്റംബർ 30-ന് നിവേദ്യയെ അറസ്റ്റ് ചെയ്ത് റിമാൻഡ് ചെയ്യുകയായിരുന്നു.
അപകടമരണത്തിൽ നിന്ന് കൊലപാതകത്തിലേക്ക്…
കുട്ടികളെ കാണാതായതിനെത്തുടർന്ന് നടത്തിയ തിരച്ചിലിലാണ് കുളിമുറിയിലെ വെള്ളത്തൊട്ടിയിൽ ഇരുവരെയും കണ്ടെത്തിയത്. ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. പോസ്റ്റ്‌ മോർട്ടം റിപ്പോർട്ടിൽ മുങ്ങിമരണമാണെന്ന് വ്യക്തമായിരുന്നു. എന്നാൽ മരണത്തിൽ സംശയം ഉയർന്നതോടെ പൊലീസ് അന്വേഷണം ശക്തമാക്കി.തുടർന്നുള്ള ചോദ്യം ചെയ്യലിൽ കുട്ടികളെ താൻ വെള്ളത്തിൽ മുക്കിക്കൊലപ്പെടുത്തിയതാണെന്ന് നിവേദ്യ സമ്മതിക്കുകയായിരുന്നു. കൊഴിഞ്ഞാമ്പാറ ഇൻസ്പെക്ടർ എസ്. രജീഷിന്റെ നേതൃത്വത്തിലാണ് അന്വേഷണം പുരോഗമിക്കുന്നത്.
by Midhun HP News | Oct 29, 2026 | Latest News, ദേശീയ വാർത്ത
ദുബൈ: ദുബൈയില്‍ ഡ്രൈവറില്ലാ വാഹനങ്ങളുടെ എണ്ണത്തില്‍ വര്‍ധന. ദുബൈ ഓട്ടോണമസ് ട്രാന്‍സ്പോര്‍ട്ടേഷന്‍ സ്ട്രാറ്റജിയുടെ ഭാഗമായി രജിസ്റ്റര്‍ ചെയ്ത് സെല്‍ഫ് ഡ്രൈവിങ് വാഹനങ്ങളുടെ എണ്ണം 160 ആയി ഉയര്‍ന്നതായി ദുബൈ റോഡ്സ് ആന്‍ഡ് ട്രാന്‍സ്പോര്‍ട്ട് അതോറിറ്റി അറിയിച്ചു. 2030-ഓടെ ഇത്തരം വാഹനങ്ങളുടെ എണ്ണം 4,000-ല്‍ എത്തിക്കുകയാണ് ലക്ഷ്യമെന്നും അദ്ദേഹം പറഞ്ഞു.
ഈ വാഹനങ്ങളുടെ പ്രവര്‍ത്തനം വിപുലീകരിക്കുന്നതിനും റോഡ് സാഹചര്യങ്ങളില്‍ എത്രത്തോളം കാര്യക്ഷമമായി പ്രവര്‍ത്തിക്കാന്‍ വാഹനങ്ങള്‍ക്ക് കഴിയുമെന്ന് പരിശോധിക്കുന്നതിനും ആര്‍ടിഎ പരീക്ഷണങ്ങള്‍ നടത്തിവരുന്നു.
അല്‍ മക്തൂം വിമാനത്താവളത്തിന് എതിര്‍വശത്തുള്ള എമിറേറ്റ്സ് റോഡിലെ മൂന്ന് ലെയ്നുകളിലും, അല്‍ മക്തൂം എയര്‍പോര്‍ട്ട് ടണലിലുമാണ് ഈ പരീക്ഷണങ്ങള്‍ നടക്കുന്നത്. കഴിഞ്ഞ തിങ്കളാഴ്ച ആരംഭിച്ച പരീക്ഷണങ്ങള്‍ അടുത്ത ശനിയാഴ്ച വരെ തുടരും. കുട്ടികളോ കാല്‍നടയാത്രക്കാരോ പെട്ടെന്ന് മുന്നില്‍ വരിക, വാഹനം പെട്ടെന്ന് നിര്‍ത്തേണ്ടി വരിക, ട്രാഫിക് സിഗ്‌നലുകളും മറ്റ് വാഹനങ്ങളില്‍ നിന്നുള്ള സിഗ്‌നലുകളും തിരിച്ചറിയുക തുടങ്ങിയ വിവിധ സാഹചര്യങ്ങള്‍ സൃഷ്ടിച്ചുകൊണ്ട് ഈ വാഹനങ്ങളുടെ പ്രവര്‍ത്തനം പരീക്ഷിച്ചു.
ശ്രദ്ധക്കുറവ്, ക്ഷീണം, അമിതവേഗത തുടങ്ങിയ മനുഷ്യസഹജമായ കാരണങ്ങളാലാണ് ഏകദേശം 95 ശതമാനം വാഹനാപകടങ്ങളും സംഭവിക്കുന്നത്. എന്നാല്‍, അത്യാധുനിക സാങ്കേതികവിദ്യ ഉപയോഗിക്കുന്ന ഈ വാഹനങ്ങള്‍ക്ക് റോഡിനെയും ചുറ്റുപാടുകളെയും നിരീക്ഷിക്കാനും, ഇത്തരം മനുഷ്യസഹജമായ പിഴവുകള്‍ ഇല്ലാതെ തന്നെ ഗതാഗത സാഹചര്യങ്ങളോട് പ്രതികരിക്കാനും സാധിക്കും.
നവീകരണത്തിന്റെയും ജീവിതനിലവാരം മെച്ചപ്പെടുത്തുന്നതിന്റെയും ആഗോള കേന്ദ്രമെന്ന നിലയില്‍ ദുബൈ തങ്ങളുടെ സ്ഥാനം കൂടുതല്‍ മെച്ചപ്പെടുത്തുകയാണെന്ന് ദുബൈ റോഡ്സ് ആന്‍ഡ് ട്രാന്‍സ്പോര്‍ട്ട് അതോറിറ്റിയിലെ ട്രാന്‍സ്പോര്‍ട്ടേഷന്‍ സിസ്റ്റംസ് ഡയറക്ടര്‍ അദെല്‍ ഷക്രി പറഞ്ഞു.
by Midhun HP News | Oct 29, 2026 | Latest News, ദേശീയ വാർത്ത
ഡല്‍ഹി: ദേശീയ അവശ്യ മരുന്ന് വില നിയന്ത്രണ പട്ടികയില്‍ പെടാത്ത ( നോണ്‍ ഷെഡ്യൂള്‍) 137 ജനറിക്, ബയോസിമിലര്‍ കാന്‍സര്‍ മരുന്നുകളുടെ ( 643 ബ്രാന്‍ഡുകള്‍) വില പുതുക്കി നിശ്ചയിച്ചു. ഇതുപ്രകാരം 72 കാന്‍സര്‍ മരുന്നുകള്‍ക്ക് വില കുറയും. പുതുക്കിയ ചില്ലറ വില്‍പ്പന വില (എംആര്‍പി) പ്രസിദ്ധീകരിച്ചിട്ടുണ്ട്.
നോണ്‍ ഷെഡ്യൂള്‍ കാന്‍സര്‍ മരുന്നുകളുടെ വ്യാപാര മാര്‍ജിന്‍, എംആര്‍പിയുടെ 30 ശതമാനമായി പരിമിതപ്പെടുത്തിയതിന് പിന്നാലെയാണ് ഔഷധ വില നിയന്ത്രണ അതോറിറ്റി ( എന്‍പിപിഎ)യുടെ നടപടി. പുതിയ നിരക്കുകള്‍ നവംബര്‍ 9 മുതല്‍ പ്രാബല്യത്തിലാകും.
72 മരുന്നുകളുടെ വിലയില്‍ 93 ശതമാനം വരെ കുറവുണ്ടാകും. കനത്ത വിലയുള്ളതും ഒറ്റ നിര്‍മ്മാതാവ് മാത്രമുള്ളതുമായ പേറ്റന്റുള്ള 65 പ്രധാന മരുന്നുകളുടെ നിരക്കില്‍ മാറ്റമില്ലാത്തത് രോഗികള്‍ക്ക് കനത്ത തിരിച്ചടിയാണ്.
വ്യത്യസ്ത ബ്രാന്‍ഡുകള്‍ തമ്മില്‍ വിലവ്യത്യാസം ഉണ്ടായിരുന്ന ജനറിക്, ബയോസിമിലര്‍ മരുന്നുകള്‍ക്കാണ് വന്‍ വിലക്കുറവ് ഉണ്ടായത്. സ്തനാര്‍ബുദ ചികിത്സയ്ക്കുള്ള ‘പാല്‍ബാപ്രോ’ എന്ന ബ്രാന്‍ഡിന്റെ 125 മില്ലിഗ്രാമിന്റെ 21 ഗുളികകളുടെ പായ്ക്കറ്റിന് 40,421 രൂപയുണ്ടായിരുന്നത്, 2720 രൂപയായി കുറഞ്ഞു.
പ്രോസ്‌റ്റേറ്റ് കാന്‍സറിനുള്ള ‘അബിറാലൈവ്’ എന്ന മരുന്നിന് (250എംജിയുടെ 120 ഗുളികയ്ക്ക്) 28,000 രൂപയില്‍ നിന്നും 4840 രൂപയായും, സ്തനാര്‍ബുദത്തിനുള്ള ‘വോമസോള്‍’ 10 ഗുളികകളുടെ വില 458 രൂപയില്‍ നിന്നും 39.52 രൂപയായും കുറഞ്ഞിട്ടുണ്ട്.
വിലയില്‍ ഇളവില്ലാത്ത മരുന്നുകള്‍
65 പ്രധാനമരുന്നുകളുടെ വിലയില്‍ മാറ്റമില്ല. കാന്‍സര്‍ പ്രതിരോധത്തിനുള്ള പ്രധാന ഇമ്യൂണോതെറാപ്പി മരുന്നായ ‘കീട്രൂഡ’യുടെ വില 100 മില്ലിഗ്രാമിന്റെ ഒരു വയലിന് 2,16,500 ആയി തുടരും. മറ്റൊരു ഇമ്യൂണോതെറാപ്പി മരുന്നായ ‘ജെമ്പര്‍ലി’ ( 10 മില്ലിലിറ്റര്‍ വയലിന് 1,90,691 രൂപ), ‘ഇംഫിന്‍സി’ ( 10 മില്ലിലിറ്റര്‍ വയലിന് 1,71,324 രൂപ), ശ്വാസകോശ അര്‍ബുദത്തിനെതിരെയുള്ള ‘ടാഗ്രിസോ’ ( 80 എംജിയുടെ 10 ഗുളികയ്ക്ക് 1,38,830 രൂപ), ‘അലെസെന്‍സ’ (150മില്ലിഗ്രാമിന്റെ 224 ഗുളികകള്‍ക്ക് 4,30,696 രൂപ) എന്നിങ്ങനെ വില മാറ്റമില്ലാതെ തുടരുകയാണ്.
by Midhun HP News | Oct 29, 2026 | Latest News, കായികം, ജില്ലാ വാർത്ത
തിരുവനന്തപുരം: രഞ്ജി ട്രോഫി ക്രിക്കറ്റിൽ ബംഗാളിന് മുന്നിൽ സമ്പൂർണ്ണമായി കീഴടങ്ങി ആതിഥേയരായ കേരളം. അവസാന ദിനം ബാറ്റിങ് തുടർന്ന കേരളത്തെ രണ്ടാം ഇന്നിങ്സിൽ വെറും 120 റൺസിന് ചുരുട്ടിക്കെട്ടിയ ബംഗാൾ 287 റൺസിന്റെ പടുകൂറ്റൻ ജയം സ്വന്തമാക്കി. ഒന്നാം ഇന്നിങ്സിലെ ബാറ്റിങ് പരാജയത്തിന് പിന്നാലെ രണ്ടാം ഇന്നിങ്സിലും മുൻനിരയും മധ്യനിരയും ഒരുപോലെ തകർന്നടിഞ്ഞതാണ് കേരളത്തിന് സ്വന്തം തട്ടകത്തിൽ നാണംകെട്ട തോൽവി സമ്മാനിച്ചത്.
നാല് വിക്കറ്റ് നഷ്ടത്തിൽ 53 റൺസ് എന്ന അതീവ പരുങ്ങലിലായ നിലയിലാണ് കേരളം മത്സരത്തിന്റെ അവസാന ദിനം ബാറ്റിങ് പുനരാരംഭിച്ചത്. എന്നാൽ തലേദിവസത്തെ സ്കോറായ 19 റൺസിൽ നിൽക്കെ തന്നെ ക്യാപ്റ്റൻ വിഷ്ണു വിനോദിന്റെ വിക്കറ്റ് നഷ്ടമായതോടെ കേരളത്തിന്റെ പതനം വേഗത്തിലായി. ഒരു റൺസ് മാത്രമെടുത്ത സൽമാൻ നിസാറും അധികം വൈകാതെ കൂടാരം കയറി.
വാലറ്റത്ത് 33 റൺസെടുത്ത എം.ഡി. നിധീഷ് മാത്രമാണ് ബംഗാൾ ബൗളർമാർക്കെതിരെ അല്പമെങ്കിലും ചെറുത്തുനിൽപ്പ് നടത്തിയത്. എന്നാൽ അതൊന്നും വലിയൊരു പരാജയത്തിൽനിന്ന് കേരളത്തെ രക്ഷിക്കാൻ പര്യാപ്തമായിരുന്നില്ല. ഒന്നാം ഇന്നിങ്സിൽ നാല് വിക്കറ്റുകളുമായി കേരള ബാറ്റിങ് നിരയെ തകർത്ത ഇടംകൈയൻ സ്പിന്നർ പ്രദീപ്ത പ്രമാണിക് രണ്ടാം ഇന്നിങ്സിലും ആറ് വിക്കറ്റുകൾ വീഴ്ത്തി കേരളത്തിന്റെ ചീട്ടുകൊട്ടാരം തകർത്തു.
മുൻനിരയെയും വാലറ്റത്തെയും എറിഞ്ഞിട്ട് മുഹമ്മദ് ഷമിയും മികച്ച പിന്തുണ നൽകി. വൈശാഖ് ചന്ദ്രനെയും ആദിത്യ സർവാതെയെയും മടക്കി അയച്ച ഷമി മത്സരത്തിലുടനീളം തകർപ്പൻ ഫോം നിലനിർത്തി. ജയിക്കാൻ 408 റൺസ് എന്ന കൂറ്റൻ ലക്ഷ്യവുമായി നാലാം ഇന്നിങ്സിൽ ബാറ്റിങ്ങിനിറങ്ങിയ കേരളത്തിന് ബംഗാളിന്റെ കൃത്യതയാർന്ന ബൗളിംഗിന് മുന്നിൽ യാതൊരു മറുപടിയും ഉണ്ടായിരുന്നില്ല. ഒന്നാം ഇന്നിങ്സിലും രണ്ടാം ഇന്നിങ്സിലും ഒരുപോലെ ബാറ്റിങ് നിര പരാജയപ്പെട്ടത് കേരളത്തിന് വരും മത്സരങ്ങളിൽ വലിയ തലവേദനയായി മാറും.
Recent Comments