by Midhun HP News | Feb 12, 2025 | Latest News, കേരളം
തിരുവനന്തപുരം: വാഹനാപകടത്തിൽ ഗുരുതരമായി പരുക്കേറ്റ് ചികിത്സയിലായിരുന്ന യുവാവ് മരിച്ചു. വലിയ മല സ്വദേശി ആദിൽ മുഹമ്മദാണ് ഇന്ന് രാവിലെ മരിച്ചത്. കഴിഞ്ഞ നാലിന് രാത്രി നെടുമങ്ങാട് വലിയ മലയിൽ ആയിരുന്നു അപകടം. അമിത വേഗത്തിലെത്തിയ ബൈക്ക് ഓട്ടോയ്ക്ക് പിന്നിൽ ഇടിച്ചുണ്ടായ അപകടത്തിൽ പരുക്കേറ്റ ആദിൽ തിരുവനന്തപുരം മെഡിക്കൽ കോളജ് ആശുപത്രിയിൽ ചികിത്സയിലായിരുന്നു. ബൈക്കിൻ്റെ പിൻസീറ്റിലായിരുന്നു അപകട സമയത്ത് ആദിൽ. തലയ്ക്ക് ഗുരുതരമായി പരുക്കേറ്റിരുന്നു. ഇടിയുടെ ആഘാതത്തിൽ ഓട്ടോറിക്ഷ മറിഞ്ഞ് നാല് യാത്രക്കാർക്കും പരുക്കേറ്റിരുന്നു.
by Midhun HP News | Feb 12, 2025 | Latest News, കേരളം
ദ്രാവിഡ മുന്നേറ്റ കഴകം നേതൃത്വത്തില് കമലഹാസന് രാജ്യസഭയിലെത്താനുള്ള സാധ്യത തെളിയുന്നു. ഇന്ന് രാവിലെ ഡി.എം.കെ. മന്ത്രി ശേഖര് ബാബു കമലഹാസനെ കണ്ട് രാജ്യസഭാ സീറ്റ് നല്കുന്നത് സംബന്ധിച്ച് ചര്ച്ച നടത്തിക്കഴിഞ്ഞു.
മുഖ്യമന്ത്രി എം.കെ. സ്റ്റാലിന്റെ നിര്ദേശപ്രകാരമാണീ നടപടി. ജൂലൈയില് ഒഴിവ് വരുന്ന ആറു സീറ്റുകളില് ഒന്ന് നല്കാനാണ് ഡി.എം.കെയുടെ തീരുമാനം. ആറെണ്ണത്തില്, കുറഞ്ഞത് നാല് സീറ്റിലെങ്കിലും അനായാസം വിജയിക്കാന് ഡി.എം.കെക്ക് കഴിയും. അഞ്ച് രാജ്യസഭ സീറ്റ് വരെ സ്വന്തമാക്കാന് കഴിയുമെന്നാണ് ഡി.എം.കെ കണക്ക് കൂട്ടല്.കമലഹാസന് മത്സരിക്കാന് തന്നെയാണ് സാധ്യത. ഇതിലൂടെ കമലഹാസന്റെ രാഷ്ട്രീയ പാര്ട്ടിയായ മക്കള് നീതി മൈയത്തിനെ ഒപ്പം നിര്ത്താമെന്ന കണക്ക് കൂട്ടലിലാണ് ഡി.എം.കെ. വരുന്ന തെരഞ്ഞെടുപ്പില് സംസ്ഥാനത്തെ താര പ്രചാരകനായി കമലഹാസനെ ഉയര്ത്തികാണിക്കാനും ആലോചനയുണ്ട്.
കേന്ദ്ര സര്ക്കാറിനോട് സന്ധിയില്ലാതെ പോരാടുന്ന കമലഹാസന്റെ സാന്നിധ്യം ഏറെ ഗുണം ചെയ്യുമെന്നാണ് സ്റ്റാലിന്റെ കണക്ക് കൂട്ടല്. മുന്പ് കോയമ്പത്തൂരില് മത്സരിക്കാനുള്ള താല്പര്യം കമലഹാസന് ഡി.എം.കെ നേതൃത്വത്തോട് പ്രകടിപ്പിച്ചിരുന്നു. ഇതിനിടെ, നേരത്തെ തന്നെ ഡി.എം.കെ. സീറ്റ് ഉറപ്പ് നല്കിയതാണെന്ന് മക്കള് നീതി മൈയം വക്താക്കള് പറയുന്നു.
by Midhun HP News | Feb 12, 2025 | Latest News, ദേശീയ വാർത്ത
ഡല്ഹി: പുതിയ ആദായനികുതി ബില് നാളെ ലോക്സഭയില് അവതരിപ്പിച്ചേക്കും. 536 വകുപ്പുകളും 622 പേജുകളും 23 അധ്യായങ്ങളുമുള്ള ആദായനികുതി ബില് 2025 ആണ് അവതരിപ്പിക്കാന് പോകുന്നത്.
1961 ലെ ആദായനികുതി നിയമത്തിന് പകരമായാണ് പുതിയ ബില് കൊണ്ടുവരുന്നത്. നടപടിക്രമങ്ങള് ലഘൂകരിക്കാന് ലക്ഷ്യമിട്ടാണ് പുതിയ നിയമനിര്മ്മാണത്തിന് സര്ക്കാര് ഒരുങ്ങുന്നത്. 1961 ലെ ആദായനികുതി നിയമത്തില് പറയുന്ന ‘മുന് വര്ഷം’ (previous year) എന്ന പദത്തിന് പകരം ‘നികുതി വര്ഷം’ (tax year) എന്ന പദമാണ് പുതിയ ബില്ലില് ഇടംപിടിച്ചിരിക്കുന്നത്. കൂടാതെ അസസ്മെന്റ് വര്ഷം എന്ന പദവും ഒഴിവാക്കിയിട്ടുണ്ട്.
ഉദാഹരണമായി മുന്വര്ഷമായ 2023-24ല് നേടിയ വരുമാനത്തിന് അസസ്മെന്റ് വര്ഷമായ 2024-25ല് നികുതി അടയ്ക്കുന്നതാണ് തുടരുന്ന രീതി. എന്നാല് പുതിയ ബില്ലില് ഈ രണ്ടു പദപ്രയോഗങ്ങളും ഒഴിവാക്കി നികുതി വര്ഷമാണ് ഇടംപിടിച്ചിരിക്കുന്നത്. 1961 ലെ ആദായനികുതി നിയമത്തില് 298 വകുപ്പുകളാണ് ഉള്ളത്. എന്നാല് പുതിയ ബില്ലില് വകുപ്പുകളുടെ എണ്ണത്തില് ഗണ്യമായ വര്ധന ഉണ്ട്. നിലവിലുള്ള നിയമത്തില് 14 ഷെഡ്യൂളുകള് ഉണ്ട്. അത് പുതിയ ബില്ലില് 16 ആയി വര്ദ്ധിക്കും. എന്നിരുന്നാലും, അധ്യായങ്ങളുടെ എണ്ണം 23 ല് നിലനിര്ത്തി.
പേജുകളുടെ എണ്ണം 622 ആയി കുറച്ചു. നിലവിലെ നിയമത്തില് 880 പേജുകള് ഉണ്ട്. ബജറ്റ് അവതരണ വേളയിലാണ് നടപ്പുസമ്മേളന കാലയളവില് തന്നെ പുതിയ ആദായനികുതി ബില് അവതരിപ്പിക്കുമെന്ന് ധനമന്ത്രി നിര്മല സീതാരാമന് പ്രഖ്യാപിച്ചത്. ഇലക്ട്രിക് വാഹനങ്ങള് വാങ്ങുന്നത് പ്രോത്സാഹിപ്പിക്കാന് ബില്ലില് കിഴിവ് നിര്ദേശിക്കുന്നതായാണ് റിപ്പോര്ട്ടുകള് വ്യക്തമാക്കുന്നത്. സംഭാവന നിയമങ്ങള് പരിഷ്കരിക്കാനും ക്രിപ്റ്റോ-ആസ്തികള്ക്കും ഡിജിറ്റല് ഇടപാടുകള്ക്കും ശക്തമായ നിയന്ത്രണങ്ങള് കൊണ്ടുവരാനും ലളിതമായ റീഫണ്ട് പ്രക്രിയ ആവിഷ്കരിക്കാനും ലക്ഷ്യമിട്ടുള്ളതാണ് പുതിയ ബില്. വ്യവഹാരങ്ങള് കുറയ്ക്കുന്നതിന് ബില് നിയമപരമായ നിബന്ധനകള് ലളിതമാക്കിയിട്ടുണ്ടെന്നും റിപ്പോര്ട്ടുകള് വ്യക്തമാക്കുന്നു.
by Midhun HP News | Feb 12, 2025 | Latest News, ജില്ലാ വാർത്ത
തിരുവനന്തപുരം: കഴിഞ്ഞ മൂന്ന് വര്ഷത്തിനിടെ സൈബര് കുറ്റവാളികള് കേരളത്തില് നിന്ന് തട്ടിയെടുത്തത് ആയിരം കോടിയില്പ്പരം രൂപ. 2022 മുതല് 2024 വരെയുള്ള മൂന്ന് വര്ഷ കാലയളവില് സൈബര് കുറ്റവാളികള് മലയാളികളുടെ 1021 കോടി രൂപയാണ് തട്ടിയെടുത്തത്. ഏറ്റവും കൂടുതല് തട്ടിപ്പ് നടന്നത് കഴിഞ്ഞവര്ഷമാണ്. 2024ല് മലയാളികളുടെ 763 കോടി രൂപയാണ് സൈബര് കുറ്റവാളികള് തട്ടിയെടുത്തത് എന്ന് പൊലീസ് കണക്കുകള് വ്യക്തമാക്കുന്നു.
2022ല് 48 കോടിയാണ് നഷ്ടമായത്. എന്നാല് 2023ല് സൈബര് തട്ടിപ്പില് വീണ മലയാളികളുടെ എണ്ണം കുത്തനെ ഉയര്ന്നു. 2023ല് സംസ്ഥാനത്ത് വ്യാജ വാഗ്ദാനങ്ങള് നല്കി 210 കോടി രൂപയാണ് തട്ടിയെടുത്തത്. 2024 ല് ആകെ 41,426 പരാതികളാണ് രജിസ്റ്റര് ചെയ്തത്. 2024ല് നഷ്ടപ്പെട്ട പണത്തിന്റെ കാര്യത്തില് എറണാകുളം ജില്ലയാണ് മുന്നില്. എറണാകുളം ജില്ലയില് സൈബര് തട്ടിപ്പിലൂടെ 174 കോടി രൂപയാണ് നഷ്ടമായത്. 114 കോടി രൂപയുടെ നഷ്ടവുമായി തിരുവനന്തപുരമാണ് തൊട്ടുപിന്നില്. സൈബര് തട്ടിപ്പിലൂടെ ഏറ്റവും കുറവ് പണം നഷ്ടമായത് വയനാട് ജില്ലയിലാണ്. ജില്ലയിലുള്ളവരുടെ 9.2 കോടി രൂപ മാത്രമാണ് സൈബര് തട്ടിപ്പിലൂടെ നഷ്ടമായത്.
2022 മുതല് നഷ്ടപ്പെട്ട ആകെ തുകയില് ഏകദേശം 149 കോടി രൂപ തിരിച്ചുപിടിച്ചതായും പൊലീസ് കണക്ക് വ്യക്തമാക്കുന്നു. ഏറ്റവും കൂടുതല് സൈബര് തട്ടിപ്പുകള് നടന്ന 2024ല് തന്നെയാണ് ഏറ്റവും കൂടുതല് തുക പിടിച്ചെടുത്തത്. ഈ കാലയളവില്, പൊലീസ് 76,000 വ്യാജ ഇടപാടുകള് മരവിപ്പിക്കുകയും 107.44 കോടി രൂപ തിരിച്ചുപിടിക്കുകയും ചെയ്തു. 2022ലും 2023ലും യഥാക്രമം 4.38 കോടി രൂപയും 37.16 കോടി രൂപയുമാണ് തിരിച്ചുപിടിച്ചത്.
തട്ടിപ്പിന് ഇരയായവരില് അഞ്ചിലൊന്ന് പേര് സ്വകാര്യ കമ്പനികളിലെ ജീവനക്കാരാണ് (19.5%), തുടര്ന്ന് പെന്ഷന്കാര് (10.9%), വീട്ടമ്മമാര് (10.37%), ബിസിനസുകാര് (10.25%) എന്നിങ്ങനെയാണ് കണക്ക്. 2024 ല് സൈബര് അന്വേഷണ വിഭാഗം തയ്യാറാക്കിയ തട്ടിപ്പിന് ഇരയായവരുടെ കണക്കിലാണ് ഇക്കാര്യം പറയുന്നത്. ഏറ്റവും കൂടുതല് പേര് ഇരകളായത് തൊഴില് തട്ടിപ്പിലാണ്. 35.34 ശതമാനം പേരാണ് തൊഴില് തട്ടിപ്പില് വീണത്. ഓണ്ലൈന് ട്രേഡിങ് തട്ടിപ്പ് (34.96%) ആണ് തൊട്ടുപിന്നില്.
കഴിഞ്ഞ വര്ഷം തട്ടിപ്പിനായി ഉപയോഗിച്ചിരുന്ന ഏകദേശം 50,000 സ്മാര്ട്ട്ഫോണുകള്/ഉപകരണങ്ങള് സൈബര് പൊലീസ് കരിമ്പട്ടികയില് പെടുത്തി. സൈബര് സാമ്പത്തിക കുറ്റകൃത്യങ്ങളില് പങ്കാളികളായ 19,000 സിം കാര്ഡുകള്, 31,000 വെബ്സൈറ്റുകള്, 23,000 സോഷ്യല് മീഡിയ അക്കൗണ്ടുകള് എന്നിവയും ബ്ലോക്ക് ചെയ്തു.
2024ലെ തട്ടിപ്പിന്റെ ജില്ല തിരിച്ചുള്ള കണക്ക്
എറണാകുളം – 174 കോടി രൂപ
തിരുവനന്തപുരം – 114.9 കോടി രൂപ
തൃശൂര് – 85.74 കോടി രൂപ
കോഴിക്കോട് – 60 കോടി രൂപ
മലപ്പുറം – 52.5 കോടി രൂപ
കണ്ണൂര് – 47.74 കോടി രൂപ
പാലക്കാട് – 46 കോടി രൂപ
കൊല്ലം – 40.78 കോടി രൂപ
ആലപ്പുഴ – 39 കോടി രൂപ
കോട്ടയം – 35.67 കോടി രൂപ
പത്തനംതിട്ട – 24 കോടി രൂപ
കാസര്കോട് – 17.63 കോടി രൂപ
ഇടുക്കി – 15.23 കോടി രൂപ
വയനാട് – 9 കോടി രൂപ
by Midhun HP News | Feb 12, 2025 | Latest News, ജില്ലാ വാർത്ത
തിരുവനന്തപുരം: ആറ്റുകാല് ഭഗവതിക്ഷേത്രത്തിലെ പൊങ്കാല ഉത്സവത്തോടനുബന്ധിച്ച് മാര്ച്ച് 13ന് പ്രാദേശിക അവധി പ്രഖ്യാപിച്ചു. പൊങ്കാല പ്രമാണിച്ച് തിരുവനന്തപുരം നഗരപരിധിയില് ബാങ്കുകള്ക്ക് ഉള്പ്പെടെയാണ് അവധി പ്രഖ്യാപിച്ചത്.
ആറ്റുകാല് പൊങ്കാല ഉത്സവം
ആറ്റുകാല് ഭഗവതിക്ഷേത്രത്തിലെ പൊങ്കാല ഉത്സവം മാര്ച്ച് 5 മുതല് 14 വരെ നടക്കും. മാര്ച്ച് 13-നാണ് പൊങ്കാല.13-ന് രാവിലെ 10.15-ന് പൊങ്കാല അടുപ്പില് തീ പകരും. ഉച്ചയ്ക്ക് 1.15-ന് പൊങ്കാല നിവേദിക്കും. ഒന്നാം ഉത്സവദിനമായ മാര്ച്ച് 5-ന് കാപ്പുകെട്ടി കുടിയിരുത്ത്, 7-ന് കുത്തിയോട്ട വ്രതാരംഭം. ഏഴാം ഉത്സവദിനമായ മാര്ച്ച് 11-ന് ദേവീദര്ശനം രാവിലെ 7.30 മുതല് മാത്രമായിരിക്കും. 13-ന് രാത്രി 7.45-ന് കുത്തിയോട്ട കുട്ടികള്ക്ക് ചൂരല്കുത്തുന്ന ചടങ്ങ്. രാത്രി 11.15-ന് ദേവിയെ പുറത്തെഴുന്നള്ളിക്കും. 14-ന് രാത്രി 10-ന് കാപ്പഴിച്ച് കുടിയിളക്കുന്ന ചടങ്ങും ഒരുമണിക്ക് കുരുതിതര്പ്പണവും നടത്തും.
by Midhun HP News | Feb 12, 2025 | Latest News, ജില്ലാ വാർത്ത
ആലംകോട് പൂവൻപാറ വിളപ്പുറം വിളയിൽ അപ്പൂപ്പൻ നടയിൽ ഉത്സവ മഹാമഹം നാളെ നടക്കും.
നാളെ രാവിലെ 5 മണിയ്ക്ക് ഗണപതി ഹോമം, കലശവും നടത്തും. 8.30 നു പൊങ്കാല, ഉച്ചയ്ക്ക് 12.30 നു അന്നദാനം, 6.30 നു വിളക്ക്, ദീപ കാഴ്ചകൾ, തുടർന്ന് കുട്ടികളുടെ കലാപരിപാടികളും അരങ്ങേറും.
Recent Comments