by Midhun HP News | Oct 19, 2026 | Latest News, ദേശീയ വാർത്ത
കോട്ട: ബോളിവുഡ് നടൻ ടൈഗർ ഷറോഫിനെ വെടിവെച്ച് കൊലപ്പെടുത്താൻ ശ്രമിച്ച കേസിൽ മൂന്ന് ഷൂട്ടർമാർ രാജസ്ഥാനിൽ പിടിയിൽ. രാജസ്ഥാനിലെ കോട്ട റെയിൽവേ സ്റ്റേഷനിൽ വെച്ച് ട്രെയിൻ യാത്രയ്ക്കിടെയാണ് ഇവരെ രാജസ്ഥാൻ ആന്റി ഗ്യാങ്സ്റ്റർ ടാസ്ക് ഫോഴ്സുംകോട്ട സിറ്റിപൊലീസും ചേർന്ന് പിടികൂടിയത്. കുപ്രസിദ്ധ ഗുണ്ടാത്തലവൻ ലോറൻസ് ബിഷ്ണോയിയുടെ സംഘവുമായി അടുത്ത ബന്ധമുള്ളവരാണ് പിടിയിലായ മൂന്നുപേരുമെന്നാണ് വിവരം.
മുംബൈ പൊലീസിൽ നിന്ന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ പൂനെ-ജയ്പൂർ എക്സ്പ്രസ് ട്രെയിൻ വളഞ്ഞാണ് സംയുക്ത സംഘം ഇവരെ കസ്റ്റഡിയിലെടുത്തത്. പിടിയിലായവരിൽ രണ്ടുപേർ വാടകക്കൊലയാളികളും മൂന്നാമത്തെയാൾ ആക്രമണത്തിന് ശേഷം രക്ഷപ്പെടാൻ സഹായമൊരുക്കിയ ആളുമാണെന്നാണ് പ്രാഥമിക നിഗമനം. ഹരിയാന സോനിപത് സ്വദേശിയായ 17-കാരനായ പ്രായപൂർത്തിയാകാത്ത ഒരാളും ബിഹാർ ബെഗുസരായ് സ്വദേശിയും നിലവിൽ മുംബൈ അന്ധേരി വെസ്റ്റിൽ റാപ്പിഡോ റൈഡറുമായ 22-കാരൻ ഋതിക് കുമാർ എന്ന റോഷൻ, ഹരിയാന സോനിപത് സ്വദേശിയായ 18-കാരൻ റെഹാൻ എന്നിവരാണ് അറസ്റ്റിലായത്.
നടന്റെ നീക്കങ്ങള്‍ നിരീക്ഷിച്ച ശേഷമാണ് സംഘം ആക്രമണം നടത്തിയത്. എല്ലാ ഞായറാഴ്ചകളിലും ടൈഗർ ഷറോഫ് ജുഹുവിലെ ഫുട്ബോൾ ഗ്രൗണ്ടിൽ എത്താറുണ്ടെന്ന വിവരം അക്രമികൾ മുൻകൂട്ടി മനസ്സിലാക്കിയിരുന്നു. അവിടെനിന്ന് കാറിൽ മടങ്ങുന്ന സമയം കണക്കുകൂട്ടിയാണ് ആക്രമണം നടത്തിയത്. വെടിവെപ്പിന് ശേഷം എസ്.വി റോഡ് വഴി വൈലെ പാർലെ, അന്ധേരി ഭാഗത്തേക്ക് പ്രതികൾ ബൈക്കിൽ കടന്നുകളയുകയായിരുന്നു.
തുടർന്ന് അന്ധേരി വെസ്റ്റ് റെയിൽവേ സ്റ്റേഷന് സമീപം ബൈക്ക് ഉപേക്ഷിച്ച പ്രതികൾ ബോറിവിലി ഭാഗത്തേക്ക് ട്രെയിൻ കയറി. പിന്നീട് മഹാരാഷ്ട്ര അതിർത്തി കടന്ന് ഗുജറാത്തിലേക്ക് പ്രവേശിക്കുകയായിരുന്നു. നേരത്തെ പ്രതികളുടെ സിസിടിവി ദൃശ്യങ്ങൾ ശേഖരിച്ച് പൊലീസ് തിരച്ചിൽ ഊർജ്ജിതമാക്കിയിരുന്നു. കറുത്ത തൊപ്പി ധരിച്ച ഒരാളും ഒപ്പമുള്ള മറ്റൊരാളും നിൽക്കുന്ന ചിത്രങ്ങൾ പുറത്തുവന്നതിന് തൊട്ടുപിന്നാലെയാണ് നാടകീയമായി പ്രതികളെ രാജസ്ഥാനിൽ വെച്ച് പിടികൂടാനായത്. പ്രതികളെ ഉടൻ തന്നെ കൂടുതൽ ചോദ്യം ചെയ്യലിനായി മുംബൈയിലേക്ക് കൊണ്ടുവരുമെന്ന് പൊലീസ് അറിയിച്ചു.
by Midhun HP News | Oct 19, 2026 | Latest News, കേരളം
മുംബൈ: ജുഹുവില്‍ വെടിവയ്പില്‍ പരിക്കേറ്റ നടന്‍ ടൈഗര്‍ ഷറോഫിനെ മഹാരാഷ്ട്ര ഉപ മുഖ്യമന്ത്രി ഏക്‌നാഥ് ഷിന്‍ഡെ സന്ദര്‍ശിച്ചു. ഞായാറാഴ്ച രാത്രിയാണ് മുഖ്യമന്ത്രി ടൈഗര്‍ ഷറോഫിന്റെ വസതിയിലെത്തിയത്. കുടുംബത്തിന് സംസ്ഥാന സര്‍ക്കാരിന്റെ പിന്തുണ കുടിക്കാഴ്ചയില്‍ ഉപമുഖ്യമന്ത്രി ഉറപ്പുനല്‍കുകയും ചെയ്തു.
ടൈഗര്‍ ഷറോഫിന് നേരെ അഞ്ചുതവണയാണ് അക്രമികള്‍ വെടിയുതിര്‍ത്തതെന്ന് നടനുമായുള്ള കൂടിക്കാഴ്ചയ്ക്ക് ശേഷം ഷിന്‍ഡെ പറഞ്ഞു. അദ്ദേഹത്തിന്റെ ഇടതുകൈക്ക് പരിക്കേറ്റതായും സംഭവത്തില്‍ ഡ്രൈവര്‍ക്ക് പരിക്ക് പറ്റിയതായും അദ്ദേഹം പറഞ്ഞു. അതേസമയം, കൃത്യമായ ആസൂത്രണത്തോടെ ആക്രമണം ഉണ്ടായതെന്ന് പൊലീസ് പറഞ്ഞു. അക്രമികള്‍ ഉപയോഗിച്ച ബൈക്ക് അന്ധേരി റെയില്‍വേ സ്റ്റേഷന് സമീപം ഉപേക്ഷിച്ച നിലയില്‍ കണ്ടെത്തി. മുംബൈ രജിസ്റ്റര്‍ ചെയ്ത ബൈക്ക് പൊലീസ് കസ്റ്റഡിയിലെടുത്തു.
ഞായറാഴ്ച വൈകുന്നേരം ഫുട്‌ബോള്‍ കളി കഴിഞ്ഞ് വീട്ടിലേക്ക് മടങ്ങുന്നതിനിടെയാണ് അദ്ദേഹത്തിന്റെ ബിഎംഡബ്ല്യു കാറിന് നേരെ ആക്രമണമുണ്ടായത്. ടൈഗര്‍ ഷറോഫിന്റെ കാറിനു നേരെ അക്രമികള്‍ വെടിയുതിര്‍ക്കുന്ന ദൃശ്യങ്ങള്‍ പുറത്തുവന്നു. മുംബൈയിലെ പുഷ്പ പാര്‍ക്കിലെ ഫുട്‌ബോള്‍ മൈതാനത്തുനിന്ന് നടന്‍ തന്റെ കാറില്‍ യാത്രതിരിക്കവെ, രണ്ട് അക്രമികള്‍ കാറിന്റെ മുന്‍വശത്തെ ചില്ലിലൂടെയും വശങ്ങളിലൂടെയും അദ്ദേഹത്തിന് നേരെ തുടരെ വെടിയുതിര്‍ക്കുന്നത് ദൃശ്യങ്ങളില്‍ വ്യക്തമാണ്. എന്നാല്‍ കാറിന്റെ തൊട്ടടുത്തെത്തി പോയിന്റ് ബ്ലാങ്ക് റേഞ്ചില്‍ വെടിവയ്ക്കാന്‍ ശ്രമിച്ച അക്രമിയുടെ തോക്ക് പ്രവര്‍ത്തനരഹിതമായത് വലിയ ദുരന്തം ഒഴിവാക്കി. 18 സെക്കന്‍ഡ് ദൈര്‍ഘ്യമുള്ള വിഡിയോയില്‍, വെടിവയ്പ്പില്‍ പരുക്കേറ്റ കാര്‍ ഡ്രൈവര്‍ വാഹനത്തില്‍ നിന്ന് പുറത്തിറങ്ങുന്നതും കാണാം. ഈ സമയം, മൂന്നാമതൊരാള്‍ തയാറാക്കി നിര്‍ത്തിയിരുന്ന ബൈക്കില്‍ അക്രമികള്‍ രക്ഷപ്പെടുകയായിരുന്നു.
മറ്റു ചില ദൃശ്യങ്ങളില്‍, ടൈഗര്‍ ഷറോഫ് കാറിന്റെ മുന്‍വശത്തെ പാസഞ്ചര്‍ സീറ്റില്‍ കയറി അവിടെ നിന്ന് യാത്ര തിരിക്കുന്ന നിമിഷം, തൊട്ടുപിന്നാലെ ബൈക്കിലെത്തിയ സംഘം കാറിന് നേരെ അഞ്ച് തവണ വെടിയുതിര്‍ക്കുന്നതു കാണാം. ഡ്രൈവര്‍ ഫിര്‍ദൗസിന് പരുക്കേറ്റതോടെ ടൈഗര്‍ സ്വയം ഡ്രൈവിങ് സീറ്റിലേക്ക് മാറുന്നതാണ് മറ്റൊരു 14 സെക്കന്‍ഡ് വിഡിയോയിലുള്ളത്. കാറിലും റോഡിലും രക്തക്കറകള്‍ കാണാം. ‘ടൈഗര്‍, വേഗം കൊണ്ടുപോകൂ’ എന്ന് പരിക്കേറ്റ ഡ്രൈവറെ ചൂണ്ടിക്കാട്ടി ഒരു സ്ത്രീ നടനോട് പറയുന്നതും ദൃശ്യങ്ങളിലുണ്ട്.
അക്രമികള്‍ക്കെതിരെ കര്‍ശന നടപടി സ്വീകരിക്കുമെന്ന് സംസ്ഥാന സര്‍ക്കാര്‍ വ്യക്തമാക്കി. തലനാരിഴയ്ക്കാണ് ടൈഗര്‍ ഷറോഫ് വെടിയേല്‍ക്കാതെ രക്ഷപ്പെട്ടത്.അക്രമികളെ തിരിച്ചറിയുന്നതിനും അവരുടെ സഞ്ചാരവഴികളും കൃത്യത്തിന് ശേഷം രക്ഷപ്പെട്ട രീതിയും കണ്ടെത്താനുമായി 15 പ്രത്യേക അന്വേഷണ സംഘങ്ങള്‍ പ്രദേശത്തെ സിസിടിവി ദൃശ്യങ്ങള്‍ വിശദമായി പരിശോധിച്ച് വരികയാണ്’ പൊലീസ് പറഞ്ഞു.
by Midhun HP News | Oct 19, 2026 | Latest News, കേരളം
കണ്ണൂർ: കൗൺസിൽ ഹാളിലെ ചൂടേറിയ രാഷ്ട്രീയ വാദപ്രതിവാദങ്ങളും പോരടികളും മാറ്റിവെച്ച് ജനപ്രതിനിധികൾ ഒരേ മനസ്സോടെ ഒരേ വേദിയിൽ ചുവടുവെച്ചപ്പോൾ കണ്ണൂർ ദസറ ആഘോഷങ്ങൾക്ക് പുത്തൻ മിഴിവ്. കലകൾ മനുഷ്യരെ ഒരുമിപ്പിക്കാനുള്ളതാണെന്ന ഉന്നതമായ ദസറ സന്ദേശം അന്വർത്ഥമാക്കി യുഡിഎഫ്, എൽഡിഎഫ്, ബിജെപി കക്ഷിഭേദമന്യേ കോർപ്പറേഷനിലെ വനിതാ കൗൺസിലർമാർ അവതരിപ്പിച്ച ഫ്യൂഷൻ ഡാൻസ് കാണികളിൽ വലിയ ആവേശമാണ് പടർത്തിയത്. നാടിന്റെ വികസനകാര്യങ്ങളിലും സാമൂഹിക പ്രവർത്തനങ്ങളിലും കാട്ടുന്ന നേതൃപാടവത്തിനൊപ്പം കലാരംഗവും തങ്ങൾക്ക് വഴങ്ങുമെന്ന് തെളിയിക്കുകയായിരുന്നു ഈ ജനപ്രതിനിധികൾ.
നാടൻ കലാ പ്രകടനങ്ങളുടെ ഭാഗമായി വേദിയിലെത്തിയ വനിതാ കൗൺസിലർമാരുടെ നൃത്തം സദസ്സിൽ തിങ്ങിനിറഞ്ഞ ജനക്കൂട്ടം വലിയ ഹർഷാരവത്തോടെയാണ് സ്വീകരിച്ചത്. വെല്ലിംഗ്ടൺ ഐലൻഡ് മ്യൂസിക് ബാൻഡിന്റെ സംഗീത പരിപാടി പ്രതീക്ഷിച്ചിരുന്ന ആയിരക്കണക്കിന് കാണികൾക്ക് മുന്നിലാണ് കക്ഷിരാഷ്ട്രീയത്തിന്റെ വേർതിരിവുകൾ മറന്ന് കൗൺസിലർമാർ ഒരുമിച്ച് ആടിത്തിമിർത്തത്.
കൗൺസിലർമാരായ ദീപ പി, വിജിന കെ.കെ, ശ്രുതി കെ.പി, ശ്രീജ കെ, ദീപ്‌തി വിനോദ്, സുമ കെ, രേഷ്മ വിനോദ് എന്നിവരാണ് ദസറ വേദിയിൽ മികവുറ്റ ഫ്യൂഷൻ ഡാൻസ് കാഴ്ചവെച്ചത്. രാഷ്ട്രീയ ഭിന്നതകൾ മറന്നുള്ള ഇവരുടെ ഒത്തൊരുമയും കലാപ്രകടനവും ജനങ്ങൾക്കിടയിലും മാതൃകാപരമായ വലിയ കൈയടിയാണ് നേടിക്കൊടുത്തത്.
by Midhun HP News | Oct 19, 2026 | Latest News, ദേശീയ വാർത്ത
മുംബൈ: ഓഹരി വിപണിയില്‍ കനത്ത ഇടിവ്. ഈ വാരത്തിന്റെ തുടക്കമായ ഇന്ന് വ്യാപാരത്തിന്റെ തുടക്കത്തില്‍ തന്നെ സെന്‍സെക്‌സ് 400ലധികം പോയിന്റ് ആണ് താഴ്ന്നത്. നിഫ്റ്റി 23,050 എന്ന സൈക്കോളജിക്കല്‍ ലെവലിന് അരികിലേക്കാണ് താഴ്ന്നത്.
ബാങ്ക് ഓഹരികളില്‍ ഉണ്ടായ ഇടിവ് ആണ് വിപണിയില്‍ പ്രതിഫലിച്ചത്. എച്ച്ഡിഎഫ്‌സി ബാങ്ക് മാത്രം രണ്ടുശതമാനമാണ് താഴ്ന്നത്. കഴിഞ്ഞ ദിവസം എച്ച്ഡിഎഫ്ഡി ബാങ്കിന്റെ ത്രൈമാസ കണക്കുകള്‍ പുറത്തുവന്നിരുന്നു. എച്ച്ഡിഎഫ്‌സി ബാങ്കിന്റെ നെറ്റ് ഇന്ററെസ്റ്റ് മാര്‍ജിനിലെ സമ്മര്‍ദ്ദവുമായി ബന്ധപ്പെട്ട ആശങ്കകളും വരുമാന വളര്‍ച്ചയിലെ മന്ദതയുമാണ് വിപണി വികാരത്തെ പ്രതികൂലമായി ബാധിച്ചത്. ബാങ്ക് നിഫ്റ്റി 0.5 ശതമാനമാണ് താഴ്ന്നത്.
ആഗോള വിപണിയില്‍ നിന്നുള്ള പ്രതികൂലമായ സൂചനകളും ഇന്ത്യന്‍ വിപണിയില്‍ പ്രതിഫലിക്കുന്നുണ്ട്. ആര്‍ട്ടിഫിഷ്യല്‍ ഇന്റലിജന്‍സ് നിക്ഷേപങ്ങള്‍ക്കായി വലിയ തോതില്‍ ഫണ്ട് വേണ്ടി വരുമെന്ന ആശങ്ക ആഗോള വിപണിയില്‍ ടെക് ഓഹരികളെ ബാധിക്കുന്നുണ്ട്. ഇതാണ് പ്രധാനമായി ഏഷ്യന്‍ വിപണിയെ അടക്കം ബാധിച്ചത്.
എണ്ണവില കാര്യമായി കുറയാതെ ഉയര്‍ന്നുതന്നെ നില്‍ക്കുന്നതും വിപണിയില്‍ പ്രതിഫലിക്കുന്നുണ്ട്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് 107 ഡോളറിന് മുകളില്‍ തന്നെയാണ്. അതിനിടെ ഡോളറിനെതിരെ രൂപയുടെ മൂല്യത്തില്‍ 9 പൈസയുടെ വര്‍ധനയാണ് ഉണ്ടായത്. 94.80ലേക്കാണ് രൂപ ഉയര്‍ന്നത്. റിസര്‍വ് ബാങ്കിന്റെ ഇടപെടല്‍ ആണ് രൂപയ്ക്ക് കരുത്തായത്.
by Midhun HP News | Oct 19, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവില വീണ്ടും ഉയര്‍ന്നു. പവന് 280 രൂപയാണ് വര്‍ധിച്ചത്. 1,08,560 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 35 രൂപയാണ് വര്‍ധിച്ചത്. 13,570 രൂപയാണ് ഒരു ഗ്രാം സ്വര്‍ണത്തിന്റെ വില.
ആഗോള വിപണിയിലെ എണ്ണവില അടക്കമുള്ള വിഷയങ്ങളാണ് സ്വര്‍ണവിലയെ സ്വാധീനിക്കുന്നത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില കുറഞ്ഞതാണ് സ്വര്‍ണവില ഉയരാന്‍ പ്രധാന കാരണം. നിലവില്‍ ബാരലിന് 107 ഡോളറിന് മുകളിലാണ് എണ്ണവില. റഷ്യയ്‌ക്കെതിരെയുള്ള ഉപരോധത്തില്‍ അമേരിക്ക ഇളവ് പ്രഖ്യാപിച്ചതാണ് എണ്ണവില കുറയാന്‍ കാരണം.
അമേരിക്കന്‍ നടപടിയെ തുടര്‍ന്ന് കൂടുതല്‍ റഷ്യന്‍ എണ്ണ ആഗോള വിപണിയില്‍ എത്തും. ഇതാണ് വില കുറയാന്‍ കാരണമെന്ന് റിപ്പോര്‍ട്ടുകള്‍ പറയുന്നു. പണപ്പെരുപ്പ നിരക്ക് കൂടിയതോടെ പലിശനിരക്ക് വര്‍ധിപ്പിക്കാന്‍ യുഎസ് ഫെഡറല്‍ റിസര്‍വ് തയ്യാറായേക്കുമെന്നാണ് റിപ്പോര്‍ട്ടുകള്‍ വ്യക്തമാക്കുന്നത്. എന്നാല്‍ ഇതുസംബന്ധിച്ച് കൂടുതല്‍ വ്യക്തത വരുത്താന്‍ യുഎസ് ഫെഡറല്‍ റിസര്‍വ് തയ്യാറായിട്ടില്ല. പലിശനിരക്ക് കൂട്ടിയാല്‍ സ്വര്‍ണത്തിന്റെ ആകര്‍ഷണം കുറയുമെന്നാണ് വിപണി വിദഗ്ധര്‍ പറയുന്നത്. എന്നാല്‍ ഇക്കാര്യത്തില്‍ യുഎസ് കേന്ദ്രബാങ്ക് കൂടുതല്‍ വ്യക്തത വരുത്താത്തതാണ് താല്‍ക്കാലികമായെങ്കിലും സ്വര്‍ണവില വര്‍ധിക്കാന്‍ കാരണം.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Oct 19, 2026 | Latest News, ജില്ലാ വാർത്ത
തിരുവനന്തപുരം: സംസ്ഥാനത്ത് വ്യാഴാഴ്ച വരെ ശക്തമായ മഴ തുടരുമെന്ന് കേന്ദ്ര കാലാവസ്ഥ വകുപ്പ്. ശക്തമായ മഴ കണക്കിലെടുത്ത് വിവിധ ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. പത്തനംതിട്ട, കോട്ടയം, എറണാകുളം, ഇടുക്കി, മലപ്പുറം, വയനാട്, കണ്ണൂര്‍ ജില്ലകളിലാണ് ശക്തമായ മഴ മുന്നറിയിപ്പ്.
ചൊവ്വാഴ്ച തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി ജില്ലകളിലും യെല്ലോ അലര്‍ട്ട് പ്രഖ്യാപിച്ചു. ബുധനാഴ്ച കോഴിക്കോട്, വയനാട്, കണ്ണൂര്‍, കാസര്‍കോട് ഒഴികെയുള്ള എല്ലാ ജില്ലകളിലും വ്യാഴാഴ്ച തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ഒഴികെ മറ്റ് എല്ലാ ജില്ലകളിലും മഴ മുന്നറിയിപ്പ് ഉണ്ട്.
ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില്‍ 64.5 മില്ലിമീറ്റര്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അര്‍ത്ഥമാക്കുന്നത്.
കള്ളക്കടൽ ജാഗ്രത നിർദേശം
കള്ളക്കടൽ പ്രതിഭാസത്തിന്റെ ഭാഗമായി തിരുവനന്തപുരം (കാപ്പിൽ മുതൽ പൊഴിയൂർ വരെ) ജില്ലയിലെ തീരങ്ങളിൽ (19/10/2026) ഉച്ചയ്ക്ക് 02.30 മുതൽ 20/10/2026 രാവിലെ 08.30 വരെ 0.8 മുതൽ 1.3 മീറ്റർ വരെ ഉയർന്ന തിരമാലകൾ കാരണം കടലാക്രമണത്തിന് സാധ്യതയുണ്ടെന്ന് ദേശീയ സമുദ്ര വിവര വിശകലന കേന്ദ്രം (INCOIS) അറിയിച്ചു.
കള്ളക്കടൽ പ്രതിഭാസത്തിന്റെ ഭാഗമായി കന്യാകുമാരി തീരത്ത് (19/10/2026) രാവിലെ 08.30 മുതൽ 20/10/2026 രാവിലെ 08.30 വരെ 1.2 മുതൽ 1.4 മീറ്റർ വരെ ഉയർന്ന തിരമാലകൾ കാരണം കടലാക്രമണത്തിന് സാധ്യതയുണ്ടെന്ന് ദേശീയ സമുദ്ര വിവര വിശകലന കേന്ദ്രം (INCOIS) അറിയിച്ചു.
കടലാക്രമണത്തിന് സാധ്യതയുള്ളതിനാൽ മത്സ്യത്തൊഴിലാളികളും തീരദേശവാസികളും ജാഗ്രത പാലിയ്ക്കുക.
Recent Comments