by Midhun HP News | Oct 16, 2026 | Latest News, കേരളം
റിയാദ്: സൗദി അറേബ്യയിലെ ദമ്മാമിന് സമീപം ഖത്തീഫില്‍ ജോലിക്കിടെയുണ്ടായ അപകടത്തില്‍ പരിക്കേറ്റ് ചികിത്സയിലായിരുന്ന മലയാളി യുവാവ് മരണപ്പെട്ടു. കൊല്ലം അഞ്ചല്‍ ചണ്ണപ്പേട്ട സ്വദേശി ഷാനി ബേബി (42) ആണ് മരിച്ചത്.
ഒരു സ്റ്റോറില്‍ ജോലി ചെയ്യുന്നതിനിടയില്‍ ഫോര്‍ക്ക് ലിഫ്റ്റിനിടയില്‍ കുടുങ്ങിയാണ് അദ്ദേഹത്തിന് ഗുരുതര പരിക്കേറ്റത്. തുടര്‍ന്ന് ഖത്തീഫിലെ സ്വകാര്യ ആശുപത്രിയില്‍ തീവ്രപരിചരണ വിഭാഗത്തില്‍ ചികിത്സയില്‍ കഴിയവെയാണ് അന്ത്യം സംഭവിച്ചത്. 10 മാസം മുമ്പാണ് ഷാനി ജോലിക്കായി സൗദിയിലെത്തിയത്.
ഭാര്യയും മൂന്ന് മക്കളുമടങ്ങുന്ന കുടുംബം നാട്ടിലാണ് ഉള്ളത്. മരണാനന്തര നടപടികള്‍ പൂര്‍ത്തിയാക്കി മൃതദേഹം നാട്ടിലേക്ക് കൊണ്ടുപോകുന്നതിനുള്ള ക്രമീകരണങ്ങള്‍ സാമൂഹ്യ പ്രവര്‍ത്തകരായ നാസ് വക്കം, മന്‍സൂര്‍ നൈന, സലീം പട്ടാമ്പി എന്നിവരുടെ നേതൃത്വത്തില്‍ ചെയ്തുവരുന്നു.
by Midhun HP News | Oct 16, 2026 | Latest News, കേരളം
തിരുവനന്തപുരം: സംസ്ഥാനത്ത് നവരാത്രി ആഘോഷങ്ങളുടെ ഭാഗമായി ഒക്ടോബർ 19 തിങ്കളാഴ്ച സർക്കാർ പൊതു അവധി പ്രഖ്യാപിച്ചു. ഇതോടെ സംസ്ഥാനത്ത് പൊതുവിദ്യാലയങ്ങൾക്കും സർക്കാർ ഓഫീസുകൾക്കും തുടർച്ചയായി നാല് ദിവസം അവധി ലഭിക്കും.
ഒക്ടോബർ 18 ഞായറാഴ്ചയിലെ പതിവ് അവധിക്ക് പുറമെയാണ് തുടർന്നുള്ള മൂന്ന് ദിവസങ്ങളും അവധിയായി മാറുന്നത്. നിലവിലെ കലണ്ടർ പ്രകാരം ഒക്ടോബർ 20 ചൊവ്വാഴ്ച മഹാനവമി അവധിയും, ഒക്ടോബർ 21 ബുധനാഴ്ച വിജയദശമി അവധിയുമാണ്. ഇതിനിടയിലുള്ള പ്രവൃത്തിദിനമായ ഒക്ടോബർ 19 തിങ്കളാഴ്ച കൂടി നവരാത്രി അവധിയായി സർക്കാർ ഔദ്യോഗികമായി പ്രഖ്യാപിച്ചതോടെയാണ് തുടർച്ചയായ നാല് ദിവസത്തെ അവധിയായി മാറിയത്.
വിദ്യാഭ്യാസ സ്ഥാപനങ്ങൾക്കും ബാങ്കുകൾക്കും ബാധകം
സംസ്ഥാനത്തെ എല്ലാ സർക്കാർ, അർധ സർക്കാർ സ്ഥാപനങ്ങൾക്കും തിങ്കളാഴ്ചത്തെ അവധി ബാധകമായിരിക്കും. നെഗോഷ്യബിൾ ഇൻസ്ട്രുമെന്റ്സ് ആക്ട് (പ്രകാരം പ്രവർത്തിക്കുന്ന ബാങ്കുകൾ അടക്കമുള്ള ധനകാര്യ സ്ഥാപനങ്ങൾക്കും പ്രൊഫഷണൽ കോളേജുകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും ഒക്ടോബർ 19-ന് അവധിയായിരിക്കുമെന്ന് സർക്കാർ അറിയിച്ചു. പൂജയെടുപ്പും വിദ്യാരംഭ ചടങ്ങുകളും പൂർത്തിയാക്കി ഒക്ടോബർ 22 വ്യാഴാഴ്ചയായിരിക്കും ഇനി വിദ്യാലയങ്ങളും ഓഫീസുകളും സാധാരണ നിലയിൽ പ്രവർത്തിക്കുക.
by Midhun HP News | Oct 16, 2026 | Latest News, ജില്ലാ വാർത്ത
ചിറയിൻകീഴ്: ‘മാതൃ സ്നേഹത്തിന്റെ രുചിയോടെ’ എന്ന സന്ദേശമുയർത്തി എ എം എൽ പി എസ്സിലെ പെരുംകുളം സ്കൂളിലെ വിദ്യാർത്ഥികൾ വലിയകുന്ന് താലൂക്ക് ആശുപത്രിയിലെ അന്തേവാസികൾക്ക് ഉച്ചഭക്ഷണപ്പൊതികൾ വിതരണം ചെയ്തു. കുരുന്നു കൈകളിൽ നിന്ന് സ്നേഹത്തോടെ നൽകിയ ഉച്ചഭക്ഷണ വിതരണം ആശുപത്രി അങ്കണത്തിൽ വെച്ചാണ് സംഘടിപ്പിച്ചത്.
ചിറയിൻകീഴ് ബ്ലോക്ക് പഞ്ചായത്ത് വൈസ് പ്രസിഡന്റ് അൻസർ പെരുംകുളം, സ്കൂൾ ഹെഡ്മാസ്റ്റർ പ്രവീൺ, അധ്യാപകരായ റീന, കൃഷ്ണരാജ്, പിടിഎ പ്രതിനിധികൾ വിദ്യാർത്ഥി പ്രതിനിധികൾ തുടങ്ങിയവർ ചടങ്ങിൽ പങ്കെടുത്തു. കുട്ടികളിൽ നന്മയും സഹജീവി സ്നേഹവും വളർത്തിയെടുക്കുന്നതിനായി സംഘടിപ്പിച്ച ഈ മാതൃകാപരമായ പ്രവർത്തനം ഏറെ ശ്രദ്ധേയമായി.
by Midhun HP News | Oct 16, 2026 | Latest News, ദേശീയ വാർത്ത
ഡൽഹി: സിഎംആർഎൽ–എക്സാലോജിക് മാസപ്പടി ഇടപാടിൽ വിജിലൻസ് എഫ്ഐആർ രജിസ്റ്റർ ചെയ്യണമെന്ന കേരള ഹൈക്കോടതി സിംഗിൾ ബെഞ്ച് ഉത്തരവിനെതിരെ മുൻ മുഖ്യമന്ത്രി പിണറായി വിജയനും മകൾ ടി. വീണയും മരുമകനും മുൻ മന്ത്രിയുമായ പി.എ. മുഹമ്മദ് റിയാസും സുപ്രീം കോടതിയെ സമീപിച്ചു. എൻഫോഴ്‌സ്‌മെന്റ് ഡയറക്ടറേറ്റ് കൈമാറിയ വിവരങ്ങളുടെ അടിസ്ഥാനത്തിൽ അഴിമതി നിരോധന നിയമപ്രകാരം കേസെടുക്കാനുള്ള ഹൈക്കോടതി ഉത്തരവ് സ്റ്റേ ചെയ്യണമെന്നാണ് ഹർജിയിലെ പ്രധാന ആവശ്യം.
പിണറായി വിജയനായി ഹാജരായ മുതിർന്ന അഭിഭാഷകൻ സിദ്ധാർത്ഥ് ലൂത്ര ചീഫ് ജസ്റ്റിസ് സൂര്യ കാന്ത് അധ്യക്ഷനായ ബെഞ്ചിന് മുന്നിൽ വിഷയം പരാമർശിച്ച് ഹർജി അടിയന്തരമായി ലിസ്റ്റ് ചെയ്യണമെന്ന് ആവശ്യപ്പെട്ടു. ഇതിനോടകം വിജിലൻസ് എഫ്ഐആർ രജിസ്റ്റർ ചെയ്തിട്ടുണ്ടെന്നും പ്രതികൾക്ക് നേരെ നടപടികൾക്ക് സാധ്യതയുണ്ടെന്നും അദ്ദേഹം ബോധിപ്പിച്ചു. 82 വയസ്സുള്ള മുതിർന്ന വ്യക്തിയാണെന്നും അദ്ദേഹത്തിന് അറസ്റ്റിൽ നിന്നടക്കം നിയമസംരക്ഷണം ആവശ്യമാണെന്നും ലൂത്ര കോടതിയിൽ വാദിച്ചു.
ദസറ അവധിക്ക് ശേഷം ഒക്ടോബർ 26-നോ 27-നോ കോടതി തുറക്കുമ്പോൾ ഹർജി ലിസ്റ്റ് ചെയ്യാമെന്ന് ചീഫ് ജസ്റ്റിസ് വ്യക്തമാക്കി. എന്നാൽ കേസ് അടിയന്തരമായി കേൾക്കണമെന്ന് അഭിഭാഷകൻ ആവർത്തിച്ചതോടെ, ജഡ്ജിമാരുടെ ലഭ്യതയ്ക്കനുസരിച്ച് അവധിക്കാല പ്രത്യേക ബെഞ്ചിന്റെ പരിഗണനയ്ക്ക് വിടുന്നത് ആലോചിക്കാമെന്ന് ചീഫ് ജസ്റ്റിസ് അറിയിച്ചു.
ഹൈക്കോടതി ഉത്തരവിലെ പിഴവുകൾ ചൂണ്ടിക്കാട്ടി പ്രതിഭാഗം
കെ.എം. ഷാജഹാൻ നൽകിയ പൊതുതാൽപ്പര്യ സ്വഭാവമുള്ള റിട്ട് ഹർജിയിലാണ് സിംഗിൾ ബെഞ്ച് ഈ ഉത്തരവ് പുറപ്പെടുവിച്ചതെന്നും, പൊതുതാൽപ്പര്യ ഹർജികൾ പരിഗണിക്കാൻ ചുമതലയില്ലാത്ത (റോസ്റ്റർ ഇല്ലാത്ത) ബെഞ്ചാണ് ഇതെന്നും ലൂത്ര കോടതിയിൽ വാദിച്ചു. ആരോപണവിധേയരായ ആളുകളുടെ ഭാഗം കേൾക്കാതെയാണ് സിംഗിൾ ബെഞ്ച് കേസ് രജിസ്റ്റർ ചെയ്യാൻ ഉത്തരവിട്ടത്. ഇതിനെതിരെ നൽകിയ അപ്പീൽ ഹൈക്കോടതി ഡിവിഷൻ ബെഞ്ച് കഴിഞ്ഞ ദിവസം തള്ളിയ സാഹചര്യത്തിലാണ് നേതാക്കൾ സുപ്രീം കോടതിയെ സമീപിച്ചതെന്നും അദ്ദേഹം ചൂണ്ടിക്കാട്ടി.
by Midhun HP News | Oct 16, 2026 | Latest News, ദേശീയ വാർത്ത
അബുദാബി: യുഎഇയില്‍ പല ഇടങ്ങളിലായി ശക്തമായ മൂടല്‍മഞ്ഞ്. ഇന്ന് രാവില്‍െ മുതല്‍ പലയിടത്തും കാഴ്ചാപരിധി വളരെ കുറഞ്ഞതിനാല്‍, വാഹനമോടിക്കുന്നവര്‍ക്ക് റോഡരികിലെ സൂചനാ ബോര്‍ഡുകള്‍ അടുത്തെത്തിയാല്‍ മാത്രമേ കണാന്‍ കഴിയുന്നുള്ളു. കാഴ്ചാപരിധി കുറവായതിനാല്‍ വാഹനങ്ങളുടെ വേഗത കുറയ്ക്കാനും അതീവ ജാഗ്രത പാലിക്കാനും പൊലീസ് നിര്‍ദ്ദേശം നല്‍കി.
ദുബൈ മുതല്‍ റാസല്‍ഖൈമ വരെ പലയിടങ്ങളിലും മൂടല്‍മഞ്ഞ് അനുഭവപ്പെട്ടു. എമിറേറ്റില്‍ പല ഇടങ്ങളിലും മൂടല്‍മഞ്ഞ് അനുഭവപ്പെടുന്നുണ്ട്. നാഷണല്‍ സെന്റര്‍ ഓഫ് മെറ്റീരിയോളജി രാജ്യത്തുടനീളം മൂടല്‍മഞ്ഞിനെത്തുടര്‍ന്ന് റെഡ്, യെല്ലോ അലേര്‍ട്ടുകള്‍ പ്രഖ്യാപിച്ചിരുന്നു. ഇന്ന് രാവിലെ 9 മണി വരെ ഇവ പ്രാബല്യത്തിലുണ്ടായിരുന്നു.
ഇന്ന് യുഎഇയില്‍ കാലാവസ്ഥ തെളിഞ്ഞതോ ഭാഗികമായി മേഘാവൃതമോ ആയിരിക്കും.ഉച്ചകഴിഞ്ഞ് കിഴക്കന്‍, തെക്കന്‍ മേഖലകളില്‍ സംവഹന മേഘങ്ങള്‍ രൂപപ്പെടാനും മഴ പെയ്യാനും സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. വെള്ളിയാഴ്ച രാത്രിയും ശനിയാഴ്ച രാവിലെയും തീരപ്രദേശങ്ങളിലും ഉള്‍പ്രദേശങ്ങളിലും അന്തരീക്ഷത്തില്‍ ഈര്‍പ്പം വര്‍ദ്ധിക്കാനും, മൂടല്‍മഞ്ഞുണ്ടാകാനും സാധ്യതയുണ്ട്.
മിതമായ രീതിയില്‍ കാറ്റിന് സാധ്യയുണ്ട്. എന്നാല്‍ ചില സമയങ്ങളില്‍ മണിക്കൂറില്‍ 45 കിലോമീറ്റര്‍ വരെ വേഗതയില്‍ ശക്തമായ കാറ്റ് വീശിയേക്കാം. കാറ്റ് കാരണം പൊടിപടലങ്ങള്‍ ഉയരാനും, ഇത് കാഴ്ചാപരിധി കുറയ്ക്കാനും ഇടയാക്കിയേക്കാം. അറേബ്യന്‍ ഗള്‍ഫില്‍ കടല്‍ ശാന്തമോ മിതമായതോ ആയിരിക്കും, ഒമാന്‍ കടലില്‍ കടല്‍ താരതമ്യേന ശാന്തമായിരിക്കും. വെള്ളിയാഴ്ച അബുദാബി, ഷാര്‍ജ, ദുബൈ എന്നിവിടങ്ങളില്‍ താപനില 37°C വരെ ഉയരും. ഈ എമിറേറ്റുകളില്‍ രേഖപ്പെടുത്തുന്ന ഏറ്റവും കുറഞ്ഞ താപനില 29°C ആയിരിക്കും.
by Midhun HP News | Oct 16, 2026 | Latest News, ജില്ലാ വാർത്ത
തിരുവനന്തപുരം: മുഖ്യമന്ത്രിയുടെ ദുരിതാശ്വാസനിധിയില്‍ നിന്നുള്ള സഹായത്തിന് അര്‍ഹതാ മാനദണ്ഡമായ കുടുംബ വാര്‍ഷിക വരുമാന പരിധി മൂന്നുലക്ഷം രൂപയാക്കി ഉയര്‍ത്താന്‍ മന്ത്രിസഭായോഗം തീരുമാനിച്ചെന്ന് മുഖ്യമന്ത്രി അറിയിച്ചു. മുമ്പ് ഇത് രണ്ട് ലക്ഷമായിരുന്നു. പോര്‍ട്ടല്‍ മുഖേന ധനസഹായം അനുവദിക്കാനുള്ള അധികാരം വര്‍ധിപ്പിച്ചു.
മുഖ്യമന്ത്രിക്ക് അഞ്ചു ലക്ഷം രൂപയും റവന്യൂ മന്ത്രിക്ക് ഒരു ലക്ഷം രൂപയും റവന്യൂ വകുപ്പ് സ്‌പെഷ്യല്‍ സെക്രട്ടറിക്ക് 50,000 രൂപയും ജില്ലാ കലക്ടര്‍ക്ക് 25,000 രൂപയും അനുവദിക്കാന്‍ അധികാരം നല്‍കി. അടിയന്തര സാഹചര്യങ്ങളെ നേരിടാന്‍ കലക്ടര്‍മാര്‍ക്ക് ഒരു കോടി രൂപ വീതം അണ്‍ടൈഡ് ഫണ്ട് അനുവദിക്കാനും മന്ത്രിസഭായോഗം തീരുമാനിച്ചു.
കേരള സ്റ്റേറ്റ് ഡേറ്റ പോളിസി 2026 ന്റെ കരടിന് മന്ത്രിസഭാ യോഗം അംഗീകാരം നല്‍കിയിട്ടുണ്ട്. പൊതുഫണ്ട് ഉപയോഗിച്ച് സര്‍ക്കാര്‍ വകുപ്പുകള്‍, ഓഫീസുകള്‍, ഏജന്‍സികള്‍, സര്‍ക്കാര്‍ സ്ഥാപനങ്ങള്‍ എന്നിവ സൃഷ്ടിക്കുകയോ ശേഖരിക്കുകയോ, സൂക്ഷിക്കുകയോ, പ്രൊസസ് ചെയ്യുകയോ ചെയ്യുന്ന ഡേറ്റയുടെ വര്‍ഗീകരണം, പങ്കിടല്‍, ഉത്തരവാദിത്വത്തോട് കൂടിയുള്ള ഉപയോഗം തുടങ്ങിയവയ്ക്കായി സംസ്ഥാനതല ചട്ടക്കൂട് ഉണ്ടാക്കുന്നതിനാണ് കേരള സ്റ്റേറ്റ് ഡേറ്റ പോളിസി 2026 വിഭാവനം ചെയ്തിട്ടുള്ളത്.
ഒരു പൊതു ഡേറ്റ എക്‌സ്‌ചേഞ്ച് പ്ലാറ്റ് ഫോം വഴി കൃത്യമായ സര്‍ക്കാര്‍ ഡാറ്റ സുരക്ഷിതമായും നിയന്ത്രിതമായും പങ്കിടുന്നതിനും ഡേറ്റയുടെ ഗുണനിലവാരം, പരസ്പര പ്രവര്‍ത്തന ക്ഷമത എന്നിവ പ്രോത്സാഹിപ്പിക്കുന്നതുമാണ് നയത്തിന്റെ ലക്ഷ്യം. സര്‍ക്കാര്‍ വകുപ്പുകള്‍ക്കിടയില്‍ ഡേറ്റ (വിവരങ്ങള്‍) പരസ്പരം പങ്കിടുന്നതിന് സാങ്കേതികമായ ഒരു സംവിധാനം രൂപീകരിക്കേണ്ട ആവശ്യകതയില്‍ നിന്നാണ് സംസ്ഥാന ഡേറ്റ പോളിസി എന്ന നിര്‍ദേശം ഉയര്‍ന്നു വന്നത്. കേരള സ്റ്റേറ്റ് ഐടി മിഷനാണ് സ്റ്റേറ്റ് ഡേറ്റ പോളിസി തയാറാക്കിയത്.
റവന്യൂ വകുപ്പില്‍ 15 വര്‍ഷം രജിസ്‌ട്രേഷന്‍ കാലാവധി പൂര്‍ത്തിയാക്കുകയും നിലവില്‍ ഉപയോഗിക്കാന്‍ സാധിക്കാത്തതുമായ 152 വാഹനങ്ങള്‍ക്ക് പകരം പുതിയ വാഹനങ്ങള്‍ വാങ്ങാന്‍ തുക അനുവദിച്ചു.
പശ്ചിമേഷ്യന്‍ യുദ്ധത്തെ തുടര്‍ന്ന് ബിറ്റുമിന്റെ വിലയിലുണ്ടായ അസാധാരണമായ വര്‍ധനയുടെ പശ്ചാത്തലത്തില്‍, ആശ്വാസ നടപടിയായി അനുവദിച്ച ബിറ്റുമിന്‍ വില വ്യത്യാസം നല്‍കുന്നതിനുള്ള ആനുകൂല്യത്തിന്റെ കാലാവധി 2027 ഏപ്രില്‍ 30 വരെ ദീര്‍ഘിപ്പിക്കാനും, റോഡ് പ്രവര്‍ത്തികള്‍ നിര്‍വഹിക്കുന്ന എല്ലാ എഞ്ചിനിയറിങ് വകുപ്പുകള്‍ക്കും പൊതുമേഖല സ്ഥാപനങ്ങള്‍ക്കും ബാധകമാക്കാനും മന്ത്രിസഭായോഗം തീരുമാനിച്ചിട്ടുണ്ട്.
Recent Comments