by Midhun HP News | Aug 22, 2026 | Latest News, കേരളം
കൊച്ചി: എറണാകുളം മഹാരാജാസ് കോളജ് വിദ്യാര്ഥി അഭിമന്യു കൊല്ലപ്പെട്ട കേസിന്റെ വിചാരണ ഒക്ടോബര് 15ന് എറണാകുളം പ്രിന്സിപ്പല് സെഷന്സ് കോടതിയില് ആരംഭിക്കും. നാലുമാസത്തിനകം വിചാരണ പൂര്ത്തിയാക്കണമെന്ന ഹൈക്കോടതി ഉത്തരവിനെ തുടര്ന്നാണ് വിചാരണ കോടതി സമയക്രമം നിശ്ചയിച്ചത്. പ്രിന്സിപ്പല് സെഷന്സ് ജഡ്ജി കെകെ ബാലകൃഷ്ണന് പരിഗണിക്കുന്ന കേസില്, പ്രോസിക്യൂഷന് വേണ്ടി സ്പെഷ്യല് പബ്ലിക് പ്രോസിക്യൂട്ടര് ജി മോഹന്രാജ് ഹാജരാകും.
കേസില് ആകെ 156 സാക്ഷികളാണുള്ളത്. അവധി ദിവസങ്ങള് ഒഴികെ തുടര്ച്ചയായി നടക്കുന്ന വിസ്താരം 18 ദിവസത്തിനുള്ളില് പൂര്ത്തിയാക്കും. ഒക്ടോബര് 15ന് ഒന്നും രണ്ടും സാക്ഷികളെ വിസ്തരിക്കും. തുടര്ന്നുള്ള ദിവസങ്ങളിലായി മറ്റ് സാക്ഷികളുടെ വിസ്താരം നടക്കും. ഇത് നവംബര് 12നുള്ളില് പൂര്ത്തിയാക്കാനാണ് ഉദ്ദേശിക്കുന്നത്. പ്രതിഭാഗം ആവശ്യപ്പെട്ട 209 രേഖകളില് 112 എണ്ണം പ്രോസിക്യൂഷന് കഴിഞ്ഞദിവസം കോടതിയില് സമര്പ്പിച്ചിരുന്നു.
2018 ജൂലൈ 2നാണ് മഹാരാജാസ് കോളജില് ചുവരെഴുത്തുമായി ബന്ധപ്പെട്ട തര്ക്കത്തെ തുടര്ന്ന് എസ്എഫ്ഐ പ്രവര്ത്തകനായ അഭിമന്യു കൊല്ലപ്പെടുന്നത്. കാമ്പസ് ഫ്രണ്ട് പ്രവര്ത്തകരാണ് സംഭവത്തിന് പിന്നിലെന്നാണ് കേസ്. ആദ്യഘട്ടത്തില് 16 പ്രതികളാണ് വിചാരണ നേരിടുന്നത്. കൊലക്കുറ്റം, മാരകായുധങ്ങള് ഉപയോഗിച്ച് മുറിവേല്പ്പിക്കല്, ക്രിമിനല് ഗൂഢാലോചന, തെളിവ് നശിപ്പിക്കല്, കലാപശ്രമം, നിയമവിരുദ്ധമായി സംഘം ചേരല് തുടങ്ങിയ ഗുരുതര കുറ്റങ്ങളാണ് പ്രതികള്ക്കെതിരെ ചുമത്തിയിട്ടുള്ളത്.
കുറ്റപത്രം സമര്പ്പിച്ച് വര്ഷങ്ങള് കഴിഞ്ഞിട്ടും വിചാരണ അനന്തമായി നീണ്ടുപോയതിനെതിരെ അഭിമന്യുവിന്റെ അമ്മ ഹൈക്കോടതിയെ സമീപിച്ചിരുന്നു. ഇതിനിടയില് കോടതിയുടെ കസ്റ്റഡിയിലുണ്ടായിരുന്ന ചില രേഖകള് നഷ്ടപ്പെട്ടതും അന്വേഷണത്തിലെ കാലതാമസവും വിവാദങ്ങള്ക്ക് കാരണമായിരുന്നു. തുടര്ന്നാണ് വിചാരണ എത്രയും പെട്ടെന്ന് പൂര്ത്തിയാക്കാന് ഹൈക്കോടതി കര്ശന നിര്ദേശം നല്കിയത്.
by Midhun HP News | Aug 22, 2026 | Latest News, കേരളം
മലപ്പുറം: 2027ല് തിരുനാവായയില് നടക്കാനിരിക്കുന്ന കേരളം കുംഭമേളയെ സംസ്ഥാന സര്ക്കാര് കൂടുതല് ഗൗരവത്തോടെ കാണണമെന്ന് മഹാമണ്ഡലേശ്വര് ആനന്ദവനം ഭാരതി. പ്രയാഗ്രാജില് എല്ലാ വര്ഷവും നടക്കുന്ന മാഘമേളയ്ക്ക് സമാനമായ രീതിയിലായിരിക്കും തിരുനാവായയിലെ മഹാമാഘ മഹോത്സവം സംഘടിപ്പിക്കുകയെന്നും ആനന്ദവനം ഭാരതി പറഞ്ഞു. രാജ്യത്തിന്റെ വിവിധ ഭാഗങ്ങളില് നിന്നായി ലക്ഷക്കണക്കിന് തീര്ഥാടകരും സന്യാസിമാരും തിരുനാവായയിലെത്താന് സാധ്യതയുള്ളതിനാല് ഒരുക്കങ്ങള് നേരത്തെ ആരംഭിക്കണമെന്നും അദ്ദേഹം ആവശ്യപ്പെട്ടു. തിരുനാവായയില് മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം.
2028ല് നടക്കുന്ന മഹാകുംഭമേളയ്ക്ക് മുന്നോടിയായാണ് 2027ലെ കേരളം കുംഭമേള സംഘടിപ്പിക്കുന്നത്. രാജ്യത്തിന്റെ വിവിധ ഭാഗങ്ങളില് നിന്നുള്ള സന്യാസിമാരുടെയും തീര്ഥാടകരുടെയും വലിയ സാന്നിധ്യം മേളയില് പ്രതീക്ഷിക്കുന്നുണ്ട്. വിവിധ സന്യാസി പരമ്പരകളില്പ്പെട്ട സന്യാസിമാര് ഇത്തവണ തിരുനാവായയിലെത്തുമെന്നും അദ്ദേഹം വ്യക്തമാക്കി. വിവിധ സംസ്ഥാനങ്ങളില് നിന്നുള്ള തീര്ഥാടകരും സന്യാസിമാരും വലിയ തോതില് എത്തുന്നതിനാല് മേള കേരളത്തിലെ പ്രധാന ആത്മീയ സംഗമമായി മാറുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേര്ത്തു.
2027ലെ മകരസംക്രാന്തി മുതല് ശിവരാത്രി വരെയുള്ള കാലയളവിലാണ് കേരളം കുംഭമേള നടക്കുക. ഇത്രയും വലിയ ജനസാന്നിധ്യം പ്രതീക്ഷിക്കുന്ന സാഹചര്യത്തില് ഗതാഗതം, താമസം, ശുചിത്വം, കുടിവെള്ളം, സുരക്ഷ തുടങ്ങിയ അടിസ്ഥാന സൗകര്യങ്ങള് ഉള്പ്പെടെയുള്ള ഒരുക്കങ്ങള് സര്ക്കാര് നേരത്തെ തന്നെ ആരംഭിക്കണമെന്നും മഹാമണ്ഡലേശ്വര് ആവശ്യപ്പെട്ടു. രാജ്യത്തിന്റെ വിവിധ ഭാഗങ്ങളില്നിന്ന് തീര്ഥാടകരെത്തുന്ന വലിയ ആത്മീയ സംഗമത്തിന് ആവശ്യമായ സംവിധാനങ്ങള് സമയബന്ധിതമായി ഒരുക്കിയില്ലെങ്കില് പിന്നീട് വലിയ വെല്ലുവിളികള് നേരിടേണ്ടിവരുമെന്നും അദ്ദേഹം ചൂണ്ടിക്കാട്ടി.
by Midhun HP News | Aug 22, 2026 | Latest News, കേരളം
കൊച്ചി: സംസ്ഥാനത്ത് സ്വര്ണവില കുതിപ്പ് തുടരുന്നു. ഇന്നലെ രണ്ടു തവണയായി 1680 രൂപ വര്ധിച്ച സ്വര്ണവിലയില് ഇന്ന് ഒറ്റയടിക്ക് 1120 രൂപയുടെ വര്ധനയാണ് രേഖപ്പെടുത്തിയത്. ഗ്രാമിന് ആനുപാതികമായി 140 രൂപയാണ് വര്ധിച്ചത്. 14,950 രൂപയാണ് ഒരു ഗ്രാം സ്വര്ണത്തിന്റെ വില.
രാജ്യാന്തര വിപണിയിലെ മാറ്റങ്ങളാണ് സ്വര്ണവിലയുടെ കുതിപ്പിന് കാരണം. ഡോളര് ദുര്ബലമായതും അമേരിക്കന് ബോണ്ട് ആദായത്തിലുണ്ടായ കുറവും സ്വര്ണത്തിന് കരുത്തേകി. യുഎസ് ഫെഡറല് റിസര്വിന്റെ പണപ്പെരുപ്പ ആശങ്കകളും സ്വര്ണ വിപണിയെ സ്വാധീനിക്കുന്നുണ്ട്.
വരും ദിവസങ്ങളിലും അന്താരാഷ്ട്ര വിപണിയിലെ ചലനങ്ങള്ക്കനുസരിച്ച് സംസ്ഥാനത്തെ വിലയില് വ്യതിയാനങ്ങള് തുടരാന് സാധ്യതയുണ്ട്. ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്ണ വിലയിലെ റെക്കോര്ഡ്. ഡിസംബര് 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Aug 21, 2026 | Latest News, ജില്ലാ വാർത്ത
ഇന്ത്യൻ ഡെന്റൽ അസോസിയേഷൻ ആറ്റിങ്ങൽ ബ്രാഞ്ച് വിമൻസ് ഡെന്റൽ കൗൺസിലിന്റെയും സി ഡി എച്ച് വിഭാഗത്തിന്റെയും കീഴിൽ ദന്ത പരിചരണ ക്ലാസ് സംഘടിപ്പിച്ചു. ആറ്റിങ്ങൽ പൂവണത്തുംമൂട് പൊന്നൂസ് വൃദ്ധസദനത്തിലെ അന്തേവാസികളായ സ്ത്രീകൾക്ക് വേണ്ടി നടത്തിയ പരിപാടിയിൽ ഡോക്ടർ രഞ്ജന രവീന്ദ്രൻ ക്ലാസ് എടുത്തു.
തുടർന്ന് ദന്തപരിശോധന ക്യാമ്പും നടത്തി. ഐ ഡി ഐ ആറ്റിങ്ങൽ ബ്രാഞ്ച് പ്രസിഡന്റ് ഡോക്ടർ രാഖി രാകേഷ്, വിമൻസ് ഡെന്റൽ കൗൺസിൽ പ്രതിനിധികളായ ഡോക്ടർ പ്രിയ ലക്ഷ്മി, ഡോക്ടർ ഷെറിൻ എന്നിവർ പരിപാടിയിൽ പങ്കെടുത്തു. അന്തേവാസികൾക്കായി ഓറൽ ഹൈജീൻ കിറ്റുകൾ വിതരണം ചെയ്യുകയും അവരുടെ പങ്കാളിത്തത്തോടെ രസകരവും സംവേദാത്മകവുമായ പ്രവർത്തനങ്ങളും സംഘടിപ്പിച്ചു.
by Midhun HP News | Aug 21, 2026 | Latest News, ജില്ലാ വാർത്ത
ആറ്റിങ്ങൽ: ബിജെപി തിരുവനന്തപുരം നോർത്ത് ജില്ല സംഘടിപ്പിച്ച വന്ദേമാതര സദസ്സിൽ ജില്ല വൈസ് പ്രസിഡൻ്റ് അഡ്വ. സ്മിത സുന്ദരേശൻ അദ്ധ്യക്ഷയായി. ജില്ല ജനറൽ സെക്രട്ടറി രാജേഷ് മാധവൻ സ്വാഗതം പറഞ്ഞ ചടങ്ങ് സംസ്ഥാന വക്താവ് യുവരാജ് ഗോകുൽ ഉദ്ഘാടനം ചെയ്തു. ജില്ല സഹ പ്രഭാരി എ ജി ശ്രീകുമാർ ആശംസകൾ നേർന്ന ചടങ്ങിൽ ജില്ല ജനറൽ സെക്രട്ടറി ഇലകമൺ സതീശൻ, ജില്ല ഭാരവാഹികൾ, ജന പ്രതിനിധികൾ, മണ്ഡലം ഭാരവാഹികൾ എന്നിവർ പങ്കെടുത്തു. ഗായത്രി ടീച്ചർ വന്ദേമാതരം ആലപിച്ചു. മഹിളാ മോർച്ച ജില്ല അദ്ധ്യക്ഷ റീന. എസ്. ധരൻ നന്ദി പറഞ്ഞു.
by Midhun HP News | Aug 21, 2026 | Latest News, മരണം
കിളിമാനൂർ: പോങ്ങനാട് അജിതാ ഭവനിൽ വി. എസ്.പ്രദീപ് കുമാർ (54) (കിളിമാനൂർ ഉപ ജില്ലാ വിദ്യാഭ്യാസ ഓഫീസർ) അന്തരിച്ചു.
ഭാര്യ: സരിത (അദ്ധ്യാപിക, വൊക്കേഷണൽ ഹയർ സെക്കൻ്റ്റി സ്കൂൾ
തിരുവല്ലം)
മകൾ: അനഘ (വിദ്യാർത്ഥിനി)
സംസ്കാരം: (നാളെ) ശനിയാഴ്ച ഉച്ചക്കു ശേഷം 3 മണിക്ക് വീട്ടുവളപ്പിൽ
Recent Comments