‘സത്യസന്ധതയും ധീരതയുമുള്ള കയ്യൊപ്പാണ് ഉമ്മന്നൂർ കവിതകൾ’: ഡോക്ടർ ജോർജ് ഓണക്കൂർ

by Midhun HP News | Jan 22, 2023 | Latest News, കേരളം, ജില്ലാ വാർത്ത

തിരുവനന്തപുരം: ഭൂതകാലങ്ങളെ ഓർമപ്പെടുത്തിയും വർത്തമാനകാലങ്ങളോടും പ്രതികരിച്ചും ഭാവിയെ പ്രതീക്ഷഭരിതമായി കാണുവാനും ഉള്ള ഊർജ്ജം പകരുകയാണ് സാഹിത്യകാരന്റെ കടമ എന്ന് പ്രശസ്ത സാഹിത്യകാരൻ ഡോക്ടർ ജോർജ് ഓണക്കൂർ അഭിപ്രായപ്പെട്ടു. മലയാള കവിതയുടെ വ്യത്യസ്തമായ വായന അനുഭവമാണ് ഉമ്മന്നൂർ കവിതകൾ എന്നും അദ്ദേഹം കൂട്ടിച്ചേർത്തു. കവിതയുടെ രൂപവും ഭാവവും നടയും ഒക്കെ ഓരോ കാലത്തും മാറിക്കൊണ്ടിരിക്കും. പ്രബലമായ കുറെ കവികൾ നിലനിന്നു പോരുന്ന കവിതാ ശീലങ്ങൾക്കെതിരെ കലാപം നടത്തും.

മറ്റു ചില കവികൾ ആ സംഘ യാത്രയിൽ നിന്ന് മാറി നടക്കും. അത് മാത്രമല്ല തനിക്ക് ഉചിതം എന്ന് തോന്നുന്ന രീതിയിൽ കവിതകൾ ചമയ്ക്കും. ഇത്തരത്തിൽ തന്നിഷ്ടക്കാരനും ഏകാന്തപഥികനും ആയിരുന്നു ഉമ്മന്നൂർ ഗോപാലകൃഷ്ണൻ എന്ന് ഡോക്ടർ ഓണക്കൂർ അഭിപ്രായപ്പെട്ടു. മകരം ബുക്സ് ഏർപ്പെടുത്തിയ ഉമ്മന്നൂർ സാഹിത്യ പുരസ്കാരം രാജു കൃഷ്ണന് സമ്മാനിച്ചുകൊണ്ട് സംസാരിക്കുകയായിരുന്നു. പട്ടം മുണ്ടശ്ശേരി ഹാളിൽ നടന്ന സമ്മേളനത്തിൽ കവിതാ വേദി പ്രസിഡന്റ് കെ കെ ബാബു അധ്യക്ഷനായി.

ഉമ്മന്നൂർ സഹൃദയ വേദി സംഭാവന ചെയ്ത 15,000 രൂപയും ഫലകവും ആയിരുന്നു അവാർഡ്. മകരം ബുക്സ് ഏർപ്പെടുത്തിയ പ്രതിഭാ പുരസ്കാരങ്ങൾ ഷക്കീല സത്താർ (ജീവകാരുണ്യം), രതീഷ് ഇളമാട് (സാഹിത്യ നിരൂപണം) ഷീല പ്രണവം (സംഗീതം) രഹന സന്തോഷ് (ആതുര സേവനം സാമൂഹ്യ പ്രവർത്തനം) ഷിജു അലക്സ് (സാമൂഹികം സാംസ്കാരികം), സിറാജ് മെഡിസോൺ (ആരോഗ്യപരിപാലനം,) അക്ഷയ് കുമാർ (ബാലപ്രതിഭ) എന്നിവരും അവാർഡുകൾ ഏറ്റുവാങ്ങി. എഴുത്തുകാർക്കായി മകരംബുക്സ് ഏർപ്പെടുത്തിയ സർഗ്ഗ പ്രതിഭാ പുരസ്കാരം യു. ഷീജ ബീഗം (കവിതയുടെ പൂക്കാലം,) സുജാത ബാലകൃഷ്ണൻ (കാവ്യ തീർത്ഥം) ഡോ എസ് ഡി അനിൽകുമാർ (രാമന്റെ സംശയങ്ങൾ), ഡോ. ഷേർളി ശങ്കർ (മായക്കണ്ണട ), ജ്യോതിലക്ഷ്മി മൈനാഗപ്പള്ളി (ആൾരൂപങ്ങൾ ), സിന്ധു ദേവശ്രീ (കനൽവഴിയും കടന്ന്), ജയപ്രകാശ് കോക്കാട് (ഹൃദയങ്ങൾ പൂക്കുന്ന രാവ്‌)
എന്നിവർ ജില്ലാ ജഡ്ജ് എം അബ്ദുൽ സത്താർ സമ്മാനിച്ചു.

രാജൻ താന്നിക്കലിന്റെ കഥകൾ (ഓർമ്മയുടെ ചിത്രശാലകൾ), ഡോ ജോർജ് ഓണക്കൂർ പ്രകാശനം ചെയ്തു.ബ്രിന്ദ പുനലൂർ, മഹേഷ്‌ മാണിക്യം,അച്ചൻകോവിൽ അജിത്‌, ഡോ. ശ്രീരേഖാ പണിക്കർ, അശോകൻ കരവാളൂർ, എസ് പ്രദീപ്, വിനായക മുരളി എന്നിവർ സംസാരിച്ചു. അഡ്വ . കാട്ടയ്യം സുരേഷ് സ്വാഗതവും രാജൻ താന്നീക്കൽ നന്ദിയും പറഞ്ഞു.
കവിയരങ്ങിൽ ശ്യാം ഏനാത്, വീണാ സുനിൽ, ദിനേശൻ പേപ്പർമിൽ, റൂംസാന അയൂബ്, എന്നിവർ പങ്കെടുത്തു.

പള്ളിക്കൽ ഗ്രാമപഞ്ചായത്ത് വികസന സെമിനാർ ഉദ്ഘാടനം നടന്നു

by Midhun HP News | Jan 22, 2023 | Latest News, കേരളം, ജില്ലാ വാർത്ത

പള്ളിക്കൽ ഗ്രാമപഞ്ചായത്ത് വികസന സെമിനാർ ജില്ലാ പഞ്ചായത്ത് വൈസ് പ്രസിഡന്റ് എ.ഷൈലജാബീഗം ഉദ്ഘാടനം നിർവഹിച്ചു. ഗ്രാമപഞ്ചായത്ത് പ്രസിഡന്റ് എം ഹസീന അധ്യക്ഷത വഹിച്ചു. ജില്ലാ പഞ്ചായത്തംഗം ബേബി സുധ, ഗ്രാമപഞ്ചായത്ത് വൈസ് പ്രസിഡന്റ് എം മാധവൻകുട്ടി, വികസനകാര്യ സ്റ്റാൻഡിങ് കമ്മിറ്റി ചെയർപേഴ്സൺ എസ് ഷീബ, ക്ഷേമ കാര്യ സ്റ്റാൻഡിങ് കമ്മിറ്റി ചെയർമാൻ എസ് എസ് ബിജു, ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ ആർ രമ്യ, ഗ്രാമപഞ്ചായത്ത് സെക്രട്ടറി അൻവർ റഹ്മാൻ, ബ്ലോക്ക് പഞ്ചായത്ത് അംഗങ്ങളായ നിഹാസ്, അഫ്സൽ ഗ്രാമപഞ്ചായത്ത് അംഗങ്ങളായ റീന കുമാരി, പി. രഘുത്തമൻ, ഷിബിലി, നൂർജഹാൻ, നിസാ മുജീബ്, തസ്ലീന ബീഗം, ഐ മുബാറക്ക്,അനിൽ പി, ആസൂത്രണ സമിതി ഉപാധ്യക്ഷൻ സജീബ് ഹാഷിം, കെ ആർ ആർ നായർ, സോമ സുന്ദരൻപിള്ള, സുരേഷ്, നസീർ വഹാബ്, അശ്വതി, പ്രശാന്ത് തുടങ്ങിയവർ പങ്കെടുത്തു.

വയോധികയെ വീട്ടിൽ വീട്ടിൽ കയറി ഉപദ്രവിച്ച കേസിൽ പ്രതി അറസ്റ്റിൽ

by Midhun HP News | Jan 22, 2023 | Latest News, കേരളം, ജില്ലാ വാർത്ത

വയോധികയെ വീട്ടിൽ വീട്ടിൽ കയറി ഉപദ്രവിച്ച കേസിൽ പ്രതി അറസ്റ്റിൽ. പള്ളിക്കൽ മടവൂർ വില്ലേജിൽ സീമന്തപുരം പ്ലാന്താനം രശ്മി ഭവനിൽ ചന്ദ്രൻ (48)ആണ് പള്ളിക്കൽ പൊലീസിന്റെ പിടിയിലായത്. വെള്ളിയാഴ്ച രാത്രിയിൽ പ്രതി മടവൂർ ഞാറയിൽക്കോണത്ത് അറുപതുവയസുള്ള വയോധികയെ വീട്ടിൽ കയറിഉപദ്രവിക്കുകയായിരുന്നു. വയോധികയുടെ പരാതിയെ തുടർന്ന് പള്ളിക്കൽപൊലീസ് നടത്തിയ അന്വേഷണത്തിലാണ് പ്രതി കസ്റ്റഡിയിലായത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

ഭവന സന്ദർശന പരിപാടിയ്ക്ക് നേതൃത്വം നൽകി ജില്ലാ കമ്മറ്റി അംഗം അഡ്വ. ബി സത്യൻ

by Midhun HP News | Jan 22, 2023 | Latest News, കേരളം, ജില്ലാ വാർത്ത

സി.പി ഐ എം നേതൃത്വത്തിൽ നടന്നുവരുന്ന ഗൃഹസന്ദർശന പരിപാടിയുടെ ഭാഗമായി ഇന്ന് കരവാരം പഞ്ചായത്തിൽ 37-ാം ബൂത്തിൽ – നെല്ലികുന്ന് കോളനിയിൽ ഭവന സന്ദർശന പരിപാടിക്ക് ജില്ലാ കമ്മറ്റി അംഗം അഡ്വ. ബി സത്യൻ നേതൃത്വം നൽകി. ലോക്കൽ കമ്മറ്റി സെക്രട്ടറി അഡ്വ എസ്, എം റെഫീക്ക്, മുൻ ഗ്രാമ പഞ്ചായത്ത് വൈസ് പ്രസിഡൻൻ്റ് എസ്, സുരേഷ്കുമാർ, ബ്രാഞ്ച് സെക്രട്ടറി, ആർ, സിദ്ധാർദ്ധൻ എന്നിവർ പങ്കെടുത്തു. പാറ കോറികൾ പ്രവർത്തിക്കുന്ന നെല്ലികുന്ന് ഭാഗത്തെ ജനങ്ങൾക്ക്, വെള്ളവും, റോഡും ,വൈദ്യുതിയും, ഭവന പദ്ധതിയിൽപ്പെടുത്തി വീടും നിർമ്മിച്ച് നൽകാനായെന്നും ക്ഷേമ പെൻഷനുകൾ കൃത്യമായി കിട്ടുന്നുവെന്നും സർക്കാരിൻ്റെ ഇടപെടൽ കൊണ്ട് മാത്രമാണ് ഈ നേട്ടം കൈവരിക്കാനായത് എന്നും നാട്ടുകാർ പറഞ്ഞു.

എന്നാൽ നിലവിലെ ഗ്രാമപഞ്ചാത്ത് ഭരണസമിതിയുടെ തമ്മിലടിയും, കെടുകാര്യസ്ഥതയും സർക്കാർ പാവപ്പെട്ടവർക്ക് നൽകുന്ന പല ആനുകൂല്യങ്ങളും നൽകുന്നില്ല എന്ന പരാതിയും നാട്ടുകാർ പറഞ്ഞു, തദ്ദെശ ഭരണ സമിതിയുടെ വീഴ്ചകൾ അവരുടെ ശ്രദ്ധയിൽപ്പെടുത്താൻ ആവശ്യമായ ഇടപെടലുകൾ ഉണ്ടാകുമെന്ന് ഉറപ്പ് നൽകി അഡ്വ ബി.സത്യൻ.

ഹാവെൻ ഇന്റർനാഷണൽ ആഗോള സാഹിത്യ സംഘടന; യുവ കവി പരിചയ പരിപാടിയുടെ സമാപന സമ്മേളനം

by Midhun HP News | Jan 22, 2023 | Latest News, കേരളം, ജില്ലാ വാർത്ത

ഹാവെൻ ഇന്റർനാഷണൽ ആഗോള സാഹിത്യ സംഘടനയിലൂടെ കേരളത്തിലെ സ്കൂൾ കുട്ടികളെയും 67 രാജ്യങ്ങളിലെ കവികളെയും പങ്കെടുപ്പിച്ച് ബാലചന്ദ്രൻ നായർ കഴിഞ്ഞ ഒരു വർഷമായി നടത്തിവന്ന യുവ കവി പരിചയ പരിപാടിയുടെ സമാപന സമ്മേളനം തിരുവനന്തപുരം ലൈബ്രറി ഓഡിറ്റോറിയത്തിൽ നടന്നു. ഇൻഡ്യ ബുക്ക് ഓഫ് റെക്കോഡ്സ് പ്രതിനിധികൾ മെഡലും സർട്ടിഫിക്കറ്റുകളും വിതരണം ചെയ്തു. പ്രൊജക്ട് ഡയറക്ടർ ബാലചന്ദ്രൻ നായർക്കും ഏറ്റവും കൂടുതൽ യുവകവികളെ പരിചയപ്പെടുത്തിയ നെടുമങ്ങാട്, അവനവഞ്ചേരി ഹൈസ്കൂളുകൾക്കും പങ്കെടുത്ത എല്ലാ വിദ്യാലയങ്ങൾക്കും ട്രോഫികൾ വിതരണം ചെയ്തു.

407 യുവകവികളിൽ ഏറ്റവും മികച്ച ആലാപനം കാഴ്ചവച്ച സങ്കീർത്തന, ദേവനന്ദ, ശിവശങ്കർ, പവൻ എന്നീ വിദ്യാർത്ഥികൾക്ക് ക്യാഷ് അവാർഡ് വിതരണം ചെയ്യുകയുണ്ടായി. പ്രിൻസസ് ഗൗരി ലക്ഷ്മി ബായി തമ്പുരാട്ടി യുവകവി സംഗമം ഉൽഘാടനം ചെയ്തു. സൂര്യ സ്‌റ്റേജ് ആന്റ് ഫിലിം സൊസൈറ്റി ഡയറക്ടർ സൂര്യ കൃഷ്ണമൂർത്തി മുഖ്യാതിഥി ആയിരുന്നു. ഹാവെൻ സ്ഥാപക മിസ്. ഇമ്മാനുവൽ മെറ്റിൽസ് അദ്ധ്യക്ഷത വഹിച്ചു. ബാലചന്ദ്രൻ നായർ സ്വാഗതവും പങ്കജം കൊട്ടാരത്ത് റിപ്പോർട്ട് അവതരണവും നടത്തി. സാഹിത്യകാരായ കിട്ടൻ കുമാരൻ, എച്ചുമുക്കുട്ടി എന്നിവർ ആശംസാ പ്രസംഗം നടത്തി. ശശിധരൻ നമ്പ്യാർ നന്ദി രേഖപ്പെടുത്തി.

കെഎസ്ആര്‍ടിസി ബസിന് അടിയില്‍ വീണ് കാല്‍നട യാത്രക്കാരന് ഗുരുതര പരിക്ക്

by Midhun HP News | Jan 22, 2023 | Latest News, കേരളം, ജില്ലാ വാർത്ത

കോട്ടയം: കോട്ടയത്ത് കെഎസ്ആര്‍ടിസി ബസിന് അടിയില്‍ വീണ് കാല്‍നട യാത്രക്കാരന് ഗുരുതര പരിക്കേറ്റു. കോട്ടയം ടിബി റോഡിലാണ് സംഭവം. അപകടത്തില്‍ പരിക്കേറ്റയാളെ തിരിച്ചറിഞ്ഞിട്ടില്ല. ഇയാളെ കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. അപകടത്തിന്റെ സിസിടിവി ദൃശ്യങ്ങളും പുറത്തു വന്നിട്ടുണ്ട്. റോഡിലൂടെ നടന്നു വരുന്നയാള്‍ ബസിന് അടിയിലേക്ക് വീഴുന്നതാണ് ദൃശ്യങ്ങളിലുള്ളത്. ഇയാള്‍ ബസിന് അടിയിലേക്ക് ചാടിയതാണോ എന്നും പൊലീസ് പരിശോധിക്കുന്നുണ്ട്.